౧౨. దుతియసఙ్ఘభేదకవగ్గో

౪౬౦. ‘‘కతిహి ను ఖో, భన్తే, అఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో’’తి? ‘‘పఞ్చహుపాలి, అఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ దిట్ఠిం కమ్మేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ దిట్ఠిం ఉద్దేసేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ దిట్ఠిం వోహరన్తో. ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ దిట్ఠిం అనుస్సావనేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ దిట్ఠిం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ ఖన్తిం కమ్మేన…పే… అవినిధాయ ఖన్తిం ఉద్దేసేన…పే… అవినిధాయ ఖన్తిం వోహరన్తో…పే… అవినిధాయ ఖన్తిం అనుస్సావనేన…పే… అవినిధాయ ఖన్తిం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ రుచిం కమ్మేన…పే… అవినిధాయ రుచిం ఉద్దేసేన…పే… అవినిధాయ రుచిం వోహరన్తో…పే… అవినిధాయ రుచిం అనుస్సావనేన…పే… అవినిధాయ రుచిం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, అవినిధాయ సఞ్ఞం కమ్మేన…పే… అవినిధాయ సఞ్ఞం ఉద్దేసేన…పే… అవినిధాయ సఞ్ఞం వోహరన్తో…పే… అవినిధాయ సఞ్ఞం అనుస్సావనేన…పే… అవినిధాయ సఞ్ఞం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో న ఆపాయికో న నేరయికో న కప్పట్ఠో న అతేకిచ్ఛో’’తి.

దుతియసఙ్ఘభేదకవగ్గో నిట్ఠితో ద్వాదసమో.

తస్సుద్దానం –

అవినిధాయ దిట్ఠిం కమ్మేన, ఉద్దేసే వోహరేన చ;

అనుస్సావనే సలాకేన, పఞ్చేతే దిట్ఠినిస్సితా.

ఖన్తిం రుచిఞ్చ సఞ్ఞఞ్చ, తయో తే పఞ్చధా నయా.

హేట్ఠిమే కణ్హపక్ఖమ్హి, సమవీసతి విధీ యథా;

తథేవ సుక్కపక్ఖమ్హి, సమవీసతి జానథాతి.