౧౧. సఙ్ఘభేదకవగ్గో

౪౫౯. [చూళవ. ౩౫౪-౩౫౫; అ. ని. ౧౦.౩౮ ఆదయో] ‘‘కతిహి ను ఖో, భన్తే, అఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో’’తి? ‘‘పఞ్చహుపాలి, అఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ దిట్ఠిం కమ్మేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ దిట్ఠిం ఉద్దేసేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ దిట్ఠి వోహరన్తో – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ దిట్ఠిం అనుస్సావనేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ దిట్ఠిం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ ఖన్తిం కమ్మేన…పే… వినిధాయ ఖన్తిం ఉద్దేసేన…పే… వినిధాయ ఖన్తిం వోహరన్తో…పే… వినిధాయ ఖన్తిం అనుస్సావనేన…పే… వినిధాయ ఖన్తిం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి అవినయం వినయోతి దీపేతి, వినయం అవినయోతి దీపేతి, వినిధాయ రుచిం కమ్మేన…పే… వినిధాయ రుచిం ఉద్దేసేన…పే… వినిధాయ రుచిం వోహరన్తో…పే… వినిధాయ రుచిం అనుస్సావనేన…పే… వినిధాయ రుచిం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో.

‘‘అపరేహిపి, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో. కతమేహి పఞ్చహి? ఇధుపాలి, భిక్ఖు అధమ్మం ధమ్మోతి దీపేతి, ధమ్మం అధమ్మోతి దీపేతి, అవినయం వినయోతి దీపేతి, వినయం అవినయోతి దీపేతి, వినిధాయ సఞ్ఞం కమ్మేన…పే… వినిధాయ సఞ్ఞం ఉద్దేసేన…పే… వినిధాయ సఞ్ఞం వోహరన్తో…పే… వినిధాయ సఞ్ఞం అనుస్సావనేన…పే… వినిధాయ సఞ్ఞం సలాకగ్గాహేన – ఇమేహి ఖో, ఉపాలి, పఞ్చహఙ్గేహి సమన్నాగతో సఙ్ఘభేదకో ఆపాయికో నేరయికో కప్పట్ఠో అతేకిచ్ఛో’’తి.

సఙ్ఘభేదకవగ్గో నిట్ఠితో ఏకాదసమో.

తస్సుద్దానం –

వినిధాయ దిట్ఠిం కమ్మేన, ఉద్దేసే వోహరేన చ;

అనుస్సావనే సలాకేన, పఞ్చేతే దిట్ఠినిస్సితా;

ఖన్తిం రుచిఞ్చ సఞ్ఞఞ్చ, తయో తే పఞ్చధా నయాతి.