౬. పలిబోధపఞ్హాబ్యాకరణం
౪౧౫. పక్కమనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
పక్కమనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, చీవరపలిబోధో పఠమం ఛిజ్జతి;
తస్స సహ బహిసీమగమనా, ఆవాసపలిబోధో ఛిజ్జతి.
నిట్ఠానన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
నిట్ఠానన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, ఆవాసపలిబోధో పఠమం ఛిజ్జతి;
చీవరే నిట్ఠితే చీవరపలిబోధో ఛిజ్జతి.
సన్నిట్ఠానన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
సన్నిట్ఠానన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, ద్వే పలిబోధా అపుబ్బం అచరిమం ఛిజ్జన్తి.
నాసనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
నాసనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, ఆవాసపలిబోధో పఠమం ఛిజ్జతి;
చీవరే నట్ఠే చీవరపలిబోధో ఛిజ్జతి.
సవనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
సవనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, చీవరపలిబోధో పఠమం ఛిజ్జతి;
తస్స సహ సవనేన, ఆవాసపలిబోధో ఛిజ్జతి.
ఆసావచ్ఛేదికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
ఆసావచ్ఛేదికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, ఆవాసపలిబోధో పఠమం ఛిజ్జతి;
చీవరాసాయ ఉపచ్ఛిన్నాయ చీవరపలిబోధో ఛిజ్జతి.
సీమాతిక్కమనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
సీమాతిక్కమనన్తికో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, చీవరపలిబోధో పఠమం ఛిజ్జతి;
తస్స బహిసీమే [బహిసీమగతస్స (సీ. స్యా.)] ఆవాసపలిబోధో ఛిజ్జతి.
సహుబ్భారో కథినుద్ధారో [సఉబ్భారో (క.)], వుత్తో ఆదిచ్చబన్ధునా;
ఏతఞ్చ తాహం పుచ్ఛామి, కతమో పలిబోధో పఠమం ఛిజ్జతి.
సహుబ్భారో కథినుద్ధారో, వుత్తో ఆదిచ్చబన్ధునా;
ఏతఞ్చ తాహం విస్సజ్జిస్సం, ద్వే పలిబోధా అపుబ్బం అచరిమం ఛిజ్జన్తీతి.
౪౧౬. కతి కథినుద్ధారా సఙ్ఘాధీనా? కతి కథినుద్ధారా పుగ్గలాధీనా? కతి కథినుద్ధారా నేవ సఙ్ఘాధీనా న పుగ్గలాధీనా? ఏకో కథినుద్ధారో సఙ్ఘాధీనో – అన్తరుబ్భారో. చత్తారో కథినుద్ధారా పుగ్గలాధీనా – పక్కమనన్తికో, నిట్ఠానన్తికో, సన్నిట్ఠానన్తికో, సీమాతిక్కమనన్తికో. చత్తారో కథినుద్ధారా నేవ సఙ్ఘాధీనా న పుగ్గలాధీనా – నాసనన్తికో, సవనన్తికో, ఆసావచ్ఛేదికో, సహుబ్భారో. కతి కథినుద్ధారా అన్తోసీమాయ ఉద్ధరియ్యన్తి? కతి కథినుద్ధారా బహిసీమాయ ఉద్ధరియ్యన్తి? కతి కథినుద్ధారా సియా అన్తోసీమాయ ఉద్ధరియ్యన్తి సియా బహిసీమాయ ఉద్ధరియ్యన్తి? ద్వే కథినుద్ధారా అన్తోసీమాయ ఉద్ధరియ్యన్తి – అన్తరుబ్భారో, సహుబ్భారో. తయో కథినుద్ధారా బహిసీమాయ ఉద్ధరియ్యన్తి – పక్కమనన్తికో, సవనన్తికో, సీమాతిక్కమనన్తికో. చత్తారో కథినుద్ధారా సియా అన్తోసీమాయ ఉద్ధరియ్యన్తి సియా బహిసీమాయ ఉద్ధరియ్యన్తి – నిట్ఠానన్తికో, సన్నిట్ఠానన్తికో, నాసనన్తికో, ఆసావచ్ఛేదికో.
కతి కథినుద్ధారా ఏకుప్పాదా ఏకనిరోధా? కతి కథినుద్ధారా ఏకుప్పాదా నానానిరోధా? ద్వే కథినుద్ధారా ఏకుప్పాదా ఏకనిరోధా – అన్తరుబ్భారో, సహుబ్భారో. అవసేసా కథినుద్ధారా ఏకుప్పాదా నానానిరోధాతి.
కథినభేదో నిట్ఠితో.