౫. చిత్తాగారవగ్గో

౨౩౫. రాజాగారం వా చిత్తాగారం వా ఆరామం వా ఉయ్యానం వా పోక్ఖరణిం వా దస్సనాయ గచ్ఛన్తీ ద్వే ఆపత్తియో ఆపజ్జతి. గచ్ఛతి, ఆపత్తి దుక్కటస్స; యత్థ ఠితా పస్సతి, ఆపత్తి పాచిత్తియస్స.

ఆసన్దిం వా పల్లఙ్కం వా పరిభుఞ్జన్తీ ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే, ఆపత్తి పాచిత్తియస్స.

సుత్తం కన్తన్తీ ద్వే ఆపత్తియో ఆపజ్జతి. కన్తతి, పయోగే దుక్కటం; ఉజ్జవుజ్జవే, ఆపత్తి పాచిత్తియస్స.

గిహివేయ్యావచ్చం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే, ఆపత్తి పాచిత్తియస్స.

భిక్ఖునియా – ‘‘ఏహాయ్యే ఇమం అధికరణం వూపసమేహీ’’తి వుచ్చమానా – ‘‘సాధూ’’తి పటిస్సుణిత్వా నేవ వూపసమేన్తీ న వూపసమాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.

అగారికస్స వా పరిబ్బాజకస్స వా పరిబ్బాజికాయ వా సహత్థా ఖాదనీయం వా భోజనీయం వా దేన్తీ ద్వే ఆపత్తియో ఆపజ్జతి. దేతి, పయోగే దుక్కటం; దిన్నే, ఆపత్తి పాచిత్తియస్స.

ఆవసథచీవరం అనిస్సజ్జిత్వా పరిభుఞ్జన్తీ ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే, ఆపత్తి పాచిత్తియస్స.

ఆవసథం అనిస్సజ్జిత్వా చారికం పక్కమన్తీ ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

తిరచ్ఛానవిజ్జం పరియాపుణన్తీ ద్వే ఆపత్తియో ఆపజ్జతి. పరియాపుణాతి, పయోగే దుక్కటం; పదే పదే ఆపత్తి పాచిత్తియస్స.

తిరచ్ఛానవిజ్జం వాచేన్తీ ద్వే ఆపత్తియో ఆపజ్జతి. వాచేతి, పయోగే దుక్కటం; పదే పదే ఆపత్తి పాచిత్తియస్స.

చిత్తాగారవగ్గో పఞ్చమో.