౬. ఆరామవగ్గో

౨౩౬. జానం సభిక్ఖుకం ఆరామం అనాపుచ్ఛా పవిసన్తీ ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

భిక్ఖుం అక్కోసన్తీ పరిభాసన్తీ ద్వే ఆపత్తియో ఆపజ్జతి. అక్కోసతి, పయోగే దుక్కటం; అక్కోసితే, ఆపత్తి పాచిత్తియస్స.

చణ్డీకతా గణం పరిభాసన్తీ ద్వే ఆపత్తియో ఆపజ్జతి. పరిభాసతి, పయోగే దుక్కటం; పరిభాసితే, ఆపత్తి పాచిత్తియస్స.

నిమన్తితా వా పవారితా వా ఖాదనీయం వా భోజనీయం వా భుఞ్జన్తీ ద్వే ఆపత్తియో ఆపజ్జతి. ‘‘ఖాదిస్సామి భుఞ్జిస్సామీ’’తి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

కులం మచ్ఛరాయన్తీ ద్వే ఆపత్తియో ఆపజ్జతి. మచ్ఛరాయతి, పయోగే దుక్కటం; మచ్ఛరితే, ఆపత్తి పాచిత్తియస్స.

అభిక్ఖుకే ఆవాసే వస్సం వసన్తీ ద్వే ఆపత్తియో ఆపజ్జతి. ‘‘వస్సం వసిస్సామీ’’తి సేనాసనం పఞ్ఞపేతి పానీయం పరిభోజనీయం ఉపట్ఠపేతి పరివేణం సమ్మజ్జతి, ఆపత్తి దుక్కటస్స; సహ అరుణుగ్గమనా ఆపత్తి పాచిత్తియస్స.

వస్సంవుట్ఠా భిక్ఖునీ ఉభతోసఙ్ఘే తీహి ఠానేహి న పవారేన్తీ ఏకం ఆపత్తిం ఆపజ్జతి. పాచిత్తియం.

ఓవాదాయ వా సంవాసాయ వా న గచ్ఛన్తీ ఏకం ఆపత్తిం ఆపజ్జతి. పాచిత్తియం.

ఉపోసథమ్పి న పుచ్ఛన్తీ ఓవాదమ్పి న యాచన్తీ ఏకం ఆపత్తిం ఆపజ్జతి. పాచిత్తియం.

పసాఖే జాతం గణ్డం వా రుధితం వా అనపలోకేత్వా సఙ్ఘం వా గణం వా పురిసేన సద్ధిం ఏకేనేకా భేదాపేన్తీ ద్వే ఆపత్తియో ఆపజ్జతి. భేదాపేతి, పయోగే దుక్కటం; భిన్నే, ఆపత్తి పాచిత్తియస్స.

ఆరామవగ్గో ఛట్ఠో.