౨. కతాపత్తివారో
౧. పారాజికకణ్డం
౨౨౮. అవస్సుతా భిక్ఖునీ అవస్సుతస్స పురిసపుగ్గలస్స కాయసంసగ్గం సాదియన్తీ కతి ఆపత్తియో ఆపజ్జతి? అవస్సుతా భిక్ఖునీ అవస్సుతస్స పురిసపుగ్గలస్స కాయసంసగ్గం సాదియన్తీ తిస్సో ఆపత్తియో ఆపజ్జతి. అధక్ఖకం ఉబ్భజాణుమణ్డలం గహణం సాదియతి, ఆపత్తి పారాజికస్స; ఉబ్భక్ఖకం అధోజాణుమణ్డలం గహణం సాదియతి, ఆపత్తి థుల్లచ్చయస్స; కాయపటిబద్ధం గహణం సాదియతి, ఆపత్తి దుక్కటస్స – అవస్సుతా భిక్ఖునీ అవస్సుతస్స పురిసపుగ్గలస్స కాయసంసగ్గం సాదియన్తీ ఇమా తిస్సో ఆపత్తియో ఆపజ్జతి.
వజ్జప్పటిచ్ఛాదికా భిక్ఖునీ వజ్జం పటిచ్ఛాదేన్తీ కతి ఆపత్తియో ఆపజ్జతి? వజ్జప్పటిచ్ఛాదికా భిక్ఖునీ వజ్జం పటిచ్ఛాదేన్తీ తిస్సో ఆపత్తియో ఆపజ్జతి. జానం పారాజికం ధమ్మం పటిచ్ఛాదేతి, ఆపత్తి పారాజికస్స; వేమతికా పటిచ్ఛాదేతి, ఆపత్తి థుల్లచ్చయస్స; ఆచారవిపత్తిం పటిచ్ఛాదేతి, ఆపత్తి దుక్కటస్స – వజ్జప్పటిచ్ఛాదికా భిక్ఖునీ వజ్జం పటిచ్ఛాదేన్తీ ఇమా తిస్సో ఆపత్తియో ఆపజ్జతి.
ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జన్తీ కతి ఆపత్తియో ఆపజ్జతి? ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి పారాజికస్స – ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జన్తీ ఇమా తిస్సో ఆపత్తియో ఆపజ్జతి.
అట్ఠమం వత్థుం పరిపూరేన్తీ కతి ఆపత్తియో ఆపజ్జతి? అట్ఠమం వత్థుం పరిపూరేన్తీ తిస్సో ఆపత్తియో ఆపజ్జతి. పురిసేన – ‘‘ఇత్థన్నామం ఓకాసం [ఇత్థన్నామం గహనం (సీ.), ఇత్థన్నామం గబ్భం (స్యా.)] ఆగచ్ఛా’’తి వుత్తా గచ్ఛతి, ఆపత్తి దుక్కటస్స; పురిసస్స హత్థపాసం ఓక్కన్తమత్తే ఆపత్తి థుల్లచ్చయస్స; అట్ఠమం వత్థుం పరిపూరేతి, ఆపత్తి పారాజికస్స – అట్ఠమం వత్థుం పరిపూరేన్తీ ఇమా తిస్సో ఆపత్తియో ఆపజ్జతి.
పారాజికా నిట్ఠితా.
౨. సఙ్ఘాదిసేసకణ్డం
౨౨౯. ఉస్సయవాదికా భిక్ఖునీ అడ్డం కరోన్తీ తిస్సో ఆపత్తియో ఆపజ్జతి. ఏకస్స ఆరోచేతి, ఆపత్తి దుక్కటస్స; దుతియస్స ఆరోచేతి, ఆపత్తి థుల్లచ్చయస్స; అడ్డపరియోసానే ఆపత్తి సఙ్ఘాదిసేసస్స.
చోరిం వుట్ఠాపేన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.
ఏకా గామన్తరం గచ్ఛన్తీ తిస్సో ఆపత్తియో ఆపజ్జతి. గచ్ఛతి, ఆపత్తి దుక్కటస్స; పఠమం పాదం పరిక్ఖేపం అతిక్కామేతి, ఆపత్తి థుల్లచ్చయస్స; దుతియం పాదం అతిక్కామేతి, ఆపత్తి సఙ్ఘాదిసేసస్స.
సమగ్గేన సఙ్ఘేన ఉక్ఖిత్తం భిక్ఖునిం ధమ్మేన వినయేన సత్థుసాసనేన అనపలోకేత్వా కారకసఙ్ఘం అనఞ్ఞాయ గణస్స ఛన్దం ఓసారేన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.
అవస్సుతా భిక్ఖునీ అవస్సుతస్స పురిసపుగ్గలస్స హత్థతో ఖాదనీయం వా భోజనీయం వా సహత్థా పటిగ్గహేత్వా భుఞ్జన్తీ తిస్సో ఆపత్తియో ఆపజ్జతి. ‘‘ఖాదిస్సామి భుఞ్జిస్సామీ’’తి పటిగ్గణ్హాతి, ఆపత్తి థుల్లచ్చయస్స; అజ్ఝోహారే అజ్ఝోహారే ఆపత్తి సఙ్ఘాదిసేసస్స; ఉదకదన్తపోనం పటిగ్గణ్హాతి, ఆపత్తి దుక్కటస్స.
‘‘కిం తే, అయ్యే, ఏసో పురిసపుగ్గలో కరిస్సతి అవస్సుతో వా అనవస్సుతో వా, యతో త్వం అనవస్సుతా! ఇఙ్ఘ, అయ్యే, యం తే ఏసో పురిసపుగ్గలో దేతి ఖాదనీయం వా భోజనీయం వా, తం త్వం సహత్థా పటిగ్గహేత్వా ఖాద వా భుఞ్జ వా’’తి ఉయ్యోజేన్తీ తిస్సో ఆపత్తియో ఆపజ్జతి. తస్సా వచనేన ఖాదిస్సామి భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి థుల్లచ్చయస్స; భోజనపరియోసానే ఆపత్తి సఙ్ఘాదిసేసస్స.
కుపితా భిక్ఖునీ యావతతియం సమనుభాసనాయ న పటినిస్సజ్జన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.
కిస్మిఞ్చిదేవ అధికరణే పచ్చాకతా భిక్ఖునీ యావతతియం సమనుభాసనాయ న పటినిస్సజ్జన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.
సంసట్ఠా భిక్ఖునియో యావతతియం సమనుభాసనాయ న పటినిస్సజ్జన్తియో తిస్సో ఆపత్తియో ఆపజ్జన్తి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.
‘‘సంసట్ఠావ, అయ్యే, తుమ్హే విహరథ. మా తుమ్హే నానా విహరిత్థా’’తి ఉయ్యోజేన్తీ యావతతియం సమనుభాసనాయ న పటినిస్సజ్జన్తీ తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.
సఙ్ఘాదిసేసా నిట్ఠితా.
౩. నిస్సగ్గియకణ్డం
౨౩౦. పత్తసన్నిచయం కరోన్తీ ఏకం ఆపత్తిం ఆపజ్జతి. నిస్సగ్గియం పాచిత్తియం.
అకాలచీవరం ‘‘కాలచీవర’’న్తి అధిట్ఠహిత్వా భాజాపేన్తీ ద్వే ఆపత్తియో ఆపజ్జతి. భాజాపేతి, పయోగే దుక్కటం; భాజాపితే నిస్సగ్గియం పాచిత్తియం.
భిక్ఖునియా సద్ధిం చీవరం పరివత్తేత్వా అచ్ఛిన్దన్తీ ద్వే ఆపత్తియో ఆపజ్జతి. అచ్ఛిన్దతి, పయోగే దుక్కటం; అచ్ఛిన్నే నిస్సగ్గియం పాచిత్తియం.
అఞ్ఞం విఞ్ఞాపేత్వా అఞ్ఞం విఞ్ఞాపేన్తీ ద్వే ఆపత్తియో ఆపజ్జతి. విఞ్ఞాపేతి, పయోగే దుక్కటం; విఞ్ఞాపితే నిస్సగ్గియం పాచిత్తియం.
అఞ్ఞం చేతాపేత్వా అఞ్ఞం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అఞ్ఞదత్థికే పరిక్ఖారేన అఞ్ఞుద్దిసికేన సఙ్ఘికేన సంయాచికేన అఞ్ఞం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సంయాచికేన అఞ్ఞం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అఞ్ఞదత్థికేన పరిక్ఖారేన అఞ్ఞుద్దిసికే పుగ్గలికేన సంయాచికేన అఞ్ఞం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అతిరేకచతుక్కంసపరమం గరుపావురణం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
అతిరేకఅడ్ఢతేయ్యకంసపరమం లహుపావురణం చేతాపేన్తీ ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.
నిస్సగ్గియా పాచిత్తియా నిట్ఠితా.
౪. పాచిత్తియకణ్డం
౧. లసుణవగ్గో
౨౩౧. లసుణం ఖాదన్తీ ద్వే ఆపత్తియో ఆపజ్జతి. ఖాదిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.
సమ్బాధే లోమం సంహరాపేన్తీ ద్వే ఆపత్తియో ఆపజ్జతి. సంహరాపేతి, పయోగే దుక్కటం; సంహరాపితే ఆపత్తి పాచిత్తియస్స.
తలఘాతకం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే ఆపత్తి పాచిత్తియస్స.
జతుమట్ఠకం ఆదియన్తీ ద్వే ఆపత్తియో ఆపజ్జతి. ఆదియతి, పయోగే దుక్కటం, ఆదిన్నే ఆపత్తి పాచిత్తియస్స.
అతిరేకద్వఙ్గులపబ్బపరమం ఉదకసుద్ధికం ఆదియన్తీ ద్వే ఆపత్తియో ఆపజ్జతి. ఆదియతి, పయోగే దుక్కటం; ఆదిన్నే ఆపత్తి పాచిత్తియస్స.
భిక్ఖుస్స భుఞ్జన్తస్స పానీయేన వా విధూపనేన వా ఉపతిట్ఠన్తీ ద్వే ఆపత్తియో ఆపజ్జతి. హత్థపాసే తిట్ఠతి, ఆపత్తి పాచిత్తియస్స; హత్థపాసం విజహిత్వా తిట్ఠతి, ఆపత్తి దుక్కటస్స.
ఆమకధఞ్ఞం విఞ్ఞాపేత్వా భుఞ్జన్తీ ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.
ఉచ్చారం వా పస్సావం వా సఙ్కారం వా విఘాసం వా తిరోకుట్టే వా తిరోపాకారే వా ఛడ్డేన్తీ ద్వే ఆపత్తియో ఆపజ్జతి. ఛడ్డేతి, పయోగే దుక్కటం; ఛడ్డితే ఆపత్తి పాచిత్తియస్స.
ఉచ్చారం వా పస్సావం వా సఙ్కారం వా విఘాసం వా హరితే ఛడ్డేన్తీ ద్వే ఆపత్తియో ఆపజ్జతి. ఛడ్డేతి, పయోగే దుక్కటం; ఛడ్డితే ఆపత్తి పాచిత్తియస్స.
నచ్చం వా గీతం వా వాదితం వా దస్సనాయ గచ్ఛన్తీ ద్వే ఆపత్తియో ఆపజ్జతి. గచ్ఛతి, ఆపత్తి దుక్కటస్స; యత్థ ఠితా పస్సతి వా సుణాతి వా, ఆపత్తి పాచిత్తియస్స.
లసుణవగ్గో పఠమో.
౨. రత్తన్ధకారవగ్గో
౨౩౨. రత్తన్ధకారే అప్పదీపే పురిసేన సద్ధిం ఏకేనేకా సన్తిట్ఠన్తీ ద్వే ఆపత్తియో ఆపజ్జతి. హత్థపాసే తిట్ఠతి, ఆపత్తి పాచిత్తియస్స; హత్థపాసం విజహిత్వా తిట్ఠతి, ఆపత్తి దుక్కటస్స.
పటిచ్ఛన్నే ఓకాసే పురిసేన సద్ధిం ఏకేనేకా సన్తిట్ఠన్తీ ద్వే ఆపత్తియో ఆపజ్జతి. హత్థపాసే తిట్ఠతి, ఆపత్తి పాచిత్తియస్స; హత్థపాసం విజహిత్వా తిట్ఠతి, ఆపత్తి దుక్కటస్స.
అజ్ఝోకాసే పురిసేన సద్ధిం ఏకేనేకా సన్తిట్ఠన్తీ ద్వే ఆపత్తియో ఆపజ్జతి. హత్థపాసే తిట్ఠతి, ఆపత్తి పాచిత్తియస్స; హత్థపాసం విజహిత్వా తిట్ఠతి, ఆపత్తి దుక్కటస్స.
రథికాయ వా బ్యూహే వా సిఙ్ఘాటకే వా పురిసేన సద్ధిం ఏకేనేకా సన్తిట్ఠన్తీ ద్వే ఆపత్తియో ఆపజ్జతి. హత్థపాసే తిట్ఠతి, ఆపత్తి పాచిత్తియస్స; హత్థపాసం విజహిత్వా తిట్ఠతి, ఆపత్తి దుక్కటస్స.
పురేభత్తం కులాని ఉపసఙ్కమిత్వా ఆసనే నిసీదిత్వా సామికే అనాపుచ్ఛా పక్కమన్తీ ద్వే ఆపత్తియో ఆపజ్జతి. పఠమం పాదం అనోవస్సకం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.
పచ్ఛాభత్తం కులాని ఉపసఙ్కమిత్వా సామికే అనాపుచ్ఛా ఆసనే నిసీదన్తీ ద్వే ఆపత్తియో ఆపజ్జతి. నిసీదతి, పయోగే దుక్కటం; నిసిన్నే ఆపత్తి పాచిత్తియస్స.
వికాలే కులాని ఉపసఙ్కమిత్వా సామికే అనాపుచ్ఛా సేయ్యం సన్థరిత్వా వా సన్థరాపేత్వా వా అభినిసీదన్తీ ద్వే ఆపత్తియో ఆపజ్జతి. అభినిసీదతి, పయోగే దుక్కటం; అభినిసిన్నే ఆపత్తి పాచిత్తియస్స.
దుగ్గహితేన దూపధారితేన పరం ఉజ్ఝాపేన్తీ ద్వే ఆపత్తియో ఆపజ్జతి. ఉజ్ఝాపేతి, పయోగే దుక్కటం; ఉజ్ఝాపితే ఆపత్తి పాచిత్తియస్స.
అత్తానం వా పరం వా నిరయేన వా బ్రహ్మచరియేన వా అభిసపన్తీ ద్వే ఆపత్తియో ఆపజ్జతి. అభిసపతి, పయోగే దుక్కటం; అభిసపితే ఆపత్తి పాచిత్తియస్స.
అత్తానం వధిత్వా వధిత్వా రోదన్తీ ద్వే ఆపత్తియో ఆపజ్జతి. వధతి రోదతి, ఆపత్తి పాచిత్తియస్స; వధతి న రోదతి, ఆపత్తి దుక్కటస్స.
రత్తన్ధకారవగ్గో దుతియో.
౩. నహానవగ్గో
౨౩౩. నగ్గా నహాయన్తీ ద్వే ఆపత్తియో ఆపజ్జతి. నహాయతి, పయోగే దుక్కటం; నహానపరియోసానే ఆపత్తి పాచిత్తియస్స.
పమాణాతిక్కన్తం ఉదకసాటికం కారాపేన్తీ ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే, ఆపత్తి పాచిత్తియస్స.
భిక్ఖునియా చీవరం విసిబ్బేత్వా వా విసిబ్బాపేత్వా వా నేవ సిబ్బేన్తీ న సిబ్బాపనాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.
పఞ్చాహికం సఙ్ఘాటిచారం అతిక్కామేన్తీ ఏకం ఆపత్తిం ఆపజ్జతి. పాచిత్తియం. చీవరసఙ్కమనీయం ధారేన్తీ ద్వే ఆపత్తియో ఆపజ్జతి. ధారేతి, పయోగే దుక్కటం; ధారితే, ఆపత్తి పాచిత్తియస్స.
గణస్స చీవరలాభం అన్తరాయం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే, ఆపత్తి పాచిత్తియస్స.
ధమ్మికం చీవరవిభఙ్గం పటిబాహన్తీ ద్వే ఆపత్తియో ఆపజ్జతి. పటిబాహతి, పయోగే దుక్కటం; పటిబాహితే, ఆపత్తి పాచిత్తియస్స.
అగారికస్స వా పరిబ్బాజకస్స వా పరిబ్బాజికాయ వా సమణచీవరం దేన్తీ ద్వే ఆపత్తియో ఆపజ్జతి. దేతి, పయోగే దుక్కటం; దిన్నే, ఆపత్తి పాచిత్తియస్స.
దుబ్బలచీవరపచ్చాసా చీవరకాలసమయం అతిక్కామేన్తీ ద్వే ఆపత్తియో ఆపజ్జతి. అతిక్కామేతి, పయోగే దుక్కటం; అతిక్కామితే, ఆపత్తి పాచిత్తియస్స.
ధమ్మికం కథినుద్ధారం పటిబాహన్తీ ద్వే ఆపత్తియో ఆపజ్జతి. పటిబాహతి, పయోగే దుక్కటం; పటిబాహితే, ఆపత్తి పాచిత్తియస్స.
నహానవగ్గో తతియో.
౪. తువట్టవగ్గో
౨౩౪. ద్వే భిక్ఖునియో ఏకమఞ్చే తువట్టేన్తియో ద్వే ఆపత్తియో ఆపజ్జన్తి. నిపజ్జన్తి, పయోగే దుక్కటం; నిపన్నే, ఆపత్తి పాచిత్తియస్స.
ద్వే భిక్ఖునియో ఏకత్థరణపావురణా తువట్టేన్తియో ద్వే ఆపత్తియో ఆపజ్జన్తి. నిపజ్జన్తి, పయోగే దుక్కటం; నిపన్నే, ఆపత్తి పాచిత్తియస్స.
భిక్ఖునియా సఞ్చిచ్చ అఫాసుం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే, ఆపత్తి పాచిత్తియస్స.
దుక్ఖితం సహజీవినిం నేవ ఉపట్ఠేన్తీ న ఉపట్ఠాపనాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.
భిక్ఖునియా ఉపస్సయం దత్వా కుపితా అనత్తమనా నిక్కడ్ఢన్తీ ద్వే ఆపత్తియో ఆపజ్జతి. నిక్కడ్ఢతి, పయోగే దుక్కటం; నిక్కడ్ఢితే, ఆపత్తి పాచిత్తియస్స.
సంసట్ఠా భిక్ఖునీ యావతతియం సమనుభాసనాయ న పటినిస్సజ్జన్తీ ద్వే ఆపత్తియో ఆపజ్జతి. ఞత్తియా దుక్కటం; కమ్మవాచాపరియోసానే ఆపత్తి పాచిత్తియస్స.
అన్తోరట్ఠే సాసఙ్కసమ్మతే సప్పటిభయే అసత్థికా చారికం చరన్తీ ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే, ఆపత్తి పాచిత్తియస్స.
తిరోరట్ఠే సాసఙ్కసమ్మతే సప్పటిభయే అసత్థికా చారికం చరన్తీ ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే, ఆపత్తి పాచిత్తియస్స.
అన్తోవస్సం చారికం చరన్తీ ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే, ఆపత్తి పాచిత్తియస్స.
వస్సంవుట్ఠా భిక్ఖునీ చారికం న పక్కమన్తీ ఏకం ఆపత్తిం ఆపజ్జతి. పాచిత్తియం.
తువట్టవగ్గో చతుత్థో.
౫. చిత్తాగారవగ్గో
౨౩౫. రాజాగారం వా చిత్తాగారం వా ఆరామం వా ఉయ్యానం వా పోక్ఖరణిం వా దస్సనాయ గచ్ఛన్తీ ద్వే ఆపత్తియో ఆపజ్జతి. గచ్ఛతి, ఆపత్తి దుక్కటస్స; యత్థ ఠితా పస్సతి, ఆపత్తి పాచిత్తియస్స.
ఆసన్దిం వా పల్లఙ్కం వా పరిభుఞ్జన్తీ ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే, ఆపత్తి పాచిత్తియస్స.
సుత్తం కన్తన్తీ ద్వే ఆపత్తియో ఆపజ్జతి. కన్తతి, పయోగే దుక్కటం; ఉజ్జవుజ్జవే, ఆపత్తి పాచిత్తియస్స.
గిహివేయ్యావచ్చం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే, ఆపత్తి పాచిత్తియస్స.
భిక్ఖునియా – ‘‘ఏహాయ్యే ఇమం అధికరణం వూపసమేహీ’’తి వుచ్చమానా – ‘‘సాధూ’’తి పటిస్సుణిత్వా నేవ వూపసమేన్తీ న వూపసమాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.
అగారికస్స వా పరిబ్బాజకస్స వా పరిబ్బాజికాయ వా సహత్థా ఖాదనీయం వా భోజనీయం వా దేన్తీ ద్వే ఆపత్తియో ఆపజ్జతి. దేతి, పయోగే దుక్కటం; దిన్నే, ఆపత్తి పాచిత్తియస్స.
ఆవసథచీవరం అనిస్సజ్జిత్వా పరిభుఞ్జన్తీ ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే, ఆపత్తి పాచిత్తియస్స.
ఆవసథం అనిస్సజ్జిత్వా చారికం పక్కమన్తీ ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.
తిరచ్ఛానవిజ్జం పరియాపుణన్తీ ద్వే ఆపత్తియో ఆపజ్జతి. పరియాపుణాతి, పయోగే దుక్కటం; పదే పదే ఆపత్తి పాచిత్తియస్స.
తిరచ్ఛానవిజ్జం వాచేన్తీ ద్వే ఆపత్తియో ఆపజ్జతి. వాచేతి, పయోగే దుక్కటం; పదే పదే ఆపత్తి పాచిత్తియస్స.
చిత్తాగారవగ్గో పఞ్చమో.
౬. ఆరామవగ్గో
౨౩౬. జానం సభిక్ఖుకం ఆరామం అనాపుచ్ఛా పవిసన్తీ ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.
భిక్ఖుం అక్కోసన్తీ పరిభాసన్తీ ద్వే ఆపత్తియో ఆపజ్జతి. అక్కోసతి, పయోగే దుక్కటం; అక్కోసితే, ఆపత్తి పాచిత్తియస్స.
చణ్డీకతా గణం పరిభాసన్తీ ద్వే ఆపత్తియో ఆపజ్జతి. పరిభాసతి, పయోగే దుక్కటం; పరిభాసితే, ఆపత్తి పాచిత్తియస్స.
నిమన్తితా వా పవారితా వా ఖాదనీయం వా భోజనీయం వా భుఞ్జన్తీ ద్వే ఆపత్తియో ఆపజ్జతి. ‘‘ఖాదిస్సామి భుఞ్జిస్సామీ’’తి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.
కులం మచ్ఛరాయన్తీ ద్వే ఆపత్తియో ఆపజ్జతి. మచ్ఛరాయతి, పయోగే దుక్కటం; మచ్ఛరితే, ఆపత్తి పాచిత్తియస్స.
అభిక్ఖుకే ఆవాసే వస్సం వసన్తీ ద్వే ఆపత్తియో ఆపజ్జతి. ‘‘వస్సం వసిస్సామీ’’తి సేనాసనం పఞ్ఞపేతి పానీయం పరిభోజనీయం ఉపట్ఠపేతి పరివేణం సమ్మజ్జతి, ఆపత్తి దుక్కటస్స; సహ అరుణుగ్గమనా ఆపత్తి పాచిత్తియస్స.
వస్సంవుట్ఠా భిక్ఖునీ ఉభతోసఙ్ఘే తీహి ఠానేహి న పవారేన్తీ ఏకం ఆపత్తిం ఆపజ్జతి. పాచిత్తియం.
ఓవాదాయ వా సంవాసాయ వా న గచ్ఛన్తీ ఏకం ఆపత్తిం ఆపజ్జతి. పాచిత్తియం.
ఉపోసథమ్పి న పుచ్ఛన్తీ ఓవాదమ్పి న యాచన్తీ ఏకం ఆపత్తిం ఆపజ్జతి. పాచిత్తియం.
పసాఖే జాతం గణ్డం వా రుధితం వా అనపలోకేత్వా సఙ్ఘం వా గణం వా పురిసేన సద్ధిం ఏకేనేకా భేదాపేన్తీ ద్వే ఆపత్తియో ఆపజ్జతి. భేదాపేతి, పయోగే దుక్కటం; భిన్నే, ఆపత్తి పాచిత్తియస్స.
ఆరామవగ్గో ఛట్ఠో.
౭. గబ్భినీవగ్గో
౨౩౭. గబ్భినిం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పాయన్తిం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
ద్వే వస్సాని ఛసు ధమ్మేసు అసిక్ఖితసిక్ఖం సిక్ఖమానం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన అసమ్మతం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
ఊనద్వాదసవస్సం గిహిగతం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
సహజీవినిం వుట్ఠాపేత్వా ద్వే వస్సాని నేవ అనుగ్గణ్హన్తీ నానుగ్గణ్హాపేన్తీ ఏకం ఆపత్తిం ఆపజ్జతి. పాచిత్తియం.
వుట్ఠాపితం పవత్తినిం ద్వే వస్సాని నానుబన్ధన్తీ ఏకం ఆపత్తిం ఆపజ్జతి. పాచిత్తియం.
సహజీవినిం వుట్ఠాపేత్వా నేవ వూపకాసేన్తీ న వూపకాసాపేన్తీ ఏకం ఆపత్తిం ఆపజ్జతి. పాచిత్తియం.
గబ్భినీవగ్గో సత్తమో.
౮. కుమారీభూతవగ్గో
౨౩౮. ఊనవీసతివస్సం కుమారిభూతం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
ఊనద్వాదసవస్సా వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పరిపుణ్ణద్వాదసవస్సా సఙ్ఘేన అసమ్మతా వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
‘‘అలం తావ తే, అయ్యే, వుట్ఠాపితేనా’’తి వుచ్చమానా ‘‘సాధూ’’తి పటిస్సుణిత్వా పచ్ఛా ఖీయనధమ్మం ఆపజ్జన్తీ ద్వే ఆపత్తియో ఆపజ్జతి. ఖియ్యతి, పయోగే దుక్కటం; ఖియ్యితే, ఆపత్తి పాచిత్తియస్స.
సిక్ఖమానం – ‘‘సచే మే త్వం, అయ్యే, చీవరం దస్ససి, ఏవాహం తం వుట్ఠాపేస్సామీ’’తి వత్వా నేవ వుట్ఠాపేన్తీ న వుట్ఠాపనాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.
సిక్ఖమానం – ‘‘సచే మం త్వం, అయ్యే, ద్వే వస్సాని అనుబన్ధిస్ససి, ఏవాహం తం వుట్ఠాపేస్సామీ’’తి వత్వా నేవ వుట్ఠాపేన్తీ న వుట్ఠాపనాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.
పురిససంసట్ఠం కుమారకసంసట్ఠం చణ్డిం సోకావాసం సిక్ఖమానం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
మాతాపితూహి వా సామికేన వా అననుఞ్ఞాతం సిక్ఖమానం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
పారివాసికఛన్దదానే సిక్ఖమానం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
అనువస్సం వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
ఏకం వస్సం ద్వే వుట్ఠాపేన్తీ ద్వే ఆపత్తియో ఆపజ్జతి. వుట్ఠాపేతి, పయోగే దుక్కటం; వుట్ఠాపితే, ఆపత్తి పాచిత్తియస్స.
కుమారీభూతవగ్గో అట్ఠమో.
౯. ఛత్తుపాహనవగ్గో
౨౩౯. ఛత్తుపాహనం ధారేన్తీ ద్వే ఆపత్తియో ఆపజ్జతి. ధారేతి, పయోగే దుక్కటం; ధారితే, ఆపత్తి పాచిత్తియస్స.
యానేన యాయన్తీ ద్వే ఆపత్తియో ఆపజ్జతి. యాయతి, పయోగే దుక్కటం; యాయితే, ఆపత్తి పాచిత్తియస్స.
సఙ్ఘాణిం ధారేన్తీ ద్వే ఆపత్తియో ఆపజ్జతి. ధారేతి, పయోగే దుక్కటం; ధారితే, ఆపత్తి పాచిత్తియస్స.
ఇత్థాలఙ్కారం ధారేన్తీ ద్వే ఆపత్తియో ఆపజ్జతి. ధారేతి, పయోగే దుక్కటం; ధారితే, ఆపత్తి పాచిత్తియస్స.
గన్ధవణ్ణకేన నహాయన్తీ ద్వే ఆపత్తియో ఆపజ్జతి. నహాయతి, పయోగే దుక్కటం; నహానపరియోసానే, ఆపత్తి పాచిత్తియస్స.
వాసితకేన పిఞ్ఞాకేన నహాయన్తీ ద్వే ఆపత్తియో ఆపజ్జతి. నహాయతి, పయోగే దుక్కటం; నహానపరియోసానే, ఆపత్తి పాచిత్తియస్స.
భిక్ఖునియా ఉమ్మద్దాపేన్తీ పరిమద్దాపేన్తీ ద్వే ఆపత్తియో ఆపజ్జతి. ఉమ్మద్దాపేతి, పయోగే దుక్కటం; ఉమ్మద్దితే, ఆపత్తి పాచిత్తియస్స.
సిక్ఖమానాయ ఉమ్మద్దాపేన్తీ పరిమద్దాపేన్తీ ద్వే ఆపత్తియో ఆపజ్జతి. ఉమ్మద్దాపేతి, పయోగే దుక్కటం; ఉమ్మద్దితే, ఆపత్తి పాచిత్తియస్స.
సామణేరియా ఉమ్మద్దాపేన్తీ పరిమద్దాపేన్తీ ద్వే ఆపత్తియో ఆపజ్జతి. ఉమ్మద్దాపేతి, పయోగే దుక్కటం; ఉమ్మద్దితే, ఆపత్తి పాచిత్తియస్స.
గిహినియా ఉమ్మద్దాపేన్తీ పరిమద్దాపేన్తీ ద్వే ఆపత్తియో ఆపజ్జతి. ఉమ్మద్దాపేతి, పయోగే దుక్కటం; ఉమ్మద్దితే, ఆపత్తి పాచిత్తియస్స.
భిక్ఖుస్స పురతో అనాపుచ్ఛా ఆసనే నిసీదన్తీ ద్వే ఆపత్తియో ఆపజ్జతి. నిసీదతి, పయోగే దుక్కటం; నిసిన్నే, ఆపత్తి పాచిత్తియస్స.
అనోకాసకతం భిక్ఖుం పఞ్హం పుచ్ఛన్తీ ద్వే ఆపత్తియో ఆపజ్జతి. పుచ్ఛతి, పయోగే దుక్కటం; పుచ్ఛితే, ఆపత్తి పాచిత్తియస్స.
అసఙ్కచ్చికా గామం పవిసన్తీ ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.
ఛత్తుపాహనవగ్గో నవమో.
ఖుద్దకం నిట్ఠితం.
౫. పాటిదేసనీయకణ్డం
౨౪౦. సప్పిం విఞ్ఞాపేత్వా భుఞ్జన్తీ ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాటిదేసనీయస్స.