౪. తువట్టవగ్గో

౨౩౪. ద్వే భిక్ఖునియో ఏకమఞ్చే తువట్టేన్తియో ద్వే ఆపత్తియో ఆపజ్జన్తి. నిపజ్జన్తి, పయోగే దుక్కటం; నిపన్నే, ఆపత్తి పాచిత్తియస్స.

ద్వే భిక్ఖునియో ఏకత్థరణపావురణా తువట్టేన్తియో ద్వే ఆపత్తియో ఆపజ్జన్తి. నిపజ్జన్తి, పయోగే దుక్కటం; నిపన్నే, ఆపత్తి పాచిత్తియస్స.

భిక్ఖునియా సఞ్చిచ్చ అఫాసుం కరోన్తీ ద్వే ఆపత్తియో ఆపజ్జతి. కరోతి, పయోగే దుక్కటం; కతే, ఆపత్తి పాచిత్తియస్స.

దుక్ఖితం సహజీవినిం నేవ ఉపట్ఠేన్తీ న ఉపట్ఠాపనాయ ఉస్సుక్కం కరోన్తీ ఏకం ఆపత్తిం ఆపజ్జతి. పాచిత్తియం.

భిక్ఖునియా ఉపస్సయం దత్వా కుపితా అనత్తమనా నిక్కడ్ఢన్తీ ద్వే ఆపత్తియో ఆపజ్జతి. నిక్కడ్ఢతి, పయోగే దుక్కటం; నిక్కడ్ఢితే, ఆపత్తి పాచిత్తియస్స.

సంసట్ఠా భిక్ఖునీ యావతతియం సమనుభాసనాయ న పటినిస్సజ్జన్తీ ద్వే ఆపత్తియో ఆపజ్జతి. ఞత్తియా దుక్కటం; కమ్మవాచాపరియోసానే ఆపత్తి పాచిత్తియస్స.

అన్తోరట్ఠే సాసఙ్కసమ్మతే సప్పటిభయే అసత్థికా చారికం చరన్తీ ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే, ఆపత్తి పాచిత్తియస్స.

తిరోరట్ఠే సాసఙ్కసమ్మతే సప్పటిభయే అసత్థికా చారికం చరన్తీ ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే, ఆపత్తి పాచిత్తియస్స.

అన్తోవస్సం చారికం చరన్తీ ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే, ఆపత్తి పాచిత్తియస్స.

వస్సంవుట్ఠా భిక్ఖునీ చారికం న పక్కమన్తీ ఏకం ఆపత్తిం ఆపజ్జతి. పాచిత్తియం.

తువట్టవగ్గో చతుత్థో.