౨. సఙ్ఘాదిసేసకణ్డాది

౨౫౦. ఉస్సయవాదికా భిక్ఖునీ అడ్డం కరణపచ్చయా తిస్సో ఆపత్తియో ఆపజ్జతి. ఏకస్స ఆరోచేతి, ఆపత్తి దుక్కటస్స; దుతియస్స ఆరోచేతి, ఆపత్తి థుల్లచ్చయస్స; అడ్డపరియోసానే ఆపత్తి సఙ్ఘాదిసేసస్స.

చోరిం వుట్ఠాపనపచ్చయా తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

ఏకా గామన్తరం గమనపచ్చయా తిస్సో ఆపత్తియో ఆపజ్జతి. గచ్ఛతి, ఆపత్తి దుక్కటస్స; పఠమం పాదం పరిక్ఖేపం అతిక్కామేతి, ఆపత్తి థుల్లచ్చయస్స; దుతియం పాదం అతిక్కామేతి, ఆపత్తి సఙ్ఘాదిసేసస్స.

సమగ్గేన సఙ్ఘేన ఉక్ఖిత్తం భిక్ఖునిం ధమ్మేన వినయేన సత్థుసాసనేన అనపలోకేత్వా కారకసఙ్ఘం అనఞ్ఞాయ గణస్స ఛన్దం ఓసారణపచ్చయా తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

అవస్సుతా భిక్ఖునీ అవస్సుతస్స పురిసపుగ్గలస్స హత్థతో ఖాదనీయం వా భోజనీయం వా సహత్థా పటిగ్గహేత్వా భుఞ్జనపచ్చయా తిస్సో ఆపత్తియో ఆపజ్జతి. ‘‘ఖాదిస్సామి భుఞ్జిస్సామీ’’తి పటిగ్గణ్హాతి, ఆపత్తి థుల్లచ్చయస్స; అజ్ఝోహారే అజ్ఝోహారే ఆపత్తి సఙ్ఘాదిసేసస్స; ఉదకదన్తపోనం పటిగ్గణ్హాతి, ఆపత్తి దుక్కటస్స.

‘‘కిం తే, అయ్యే, ఏసో పురిసపుగ్గలో కరిస్సతి అవస్సుతో వా అనవస్సుతో వా, యతో త్వం అనవస్సుతా! ఇఙ్ఘ, అయ్యే, యం తే ఏసో పురిసపుగ్గలో దేతి ఖాదనీయం వా భోజనీయం వా తం త్వం సహత్థా పటిగ్గహేత్వా ఖాద వా భుఞ్జ వా’’తి, ఉయ్యోజనపచ్చయా తిస్సో ఆపత్తియో ఆపజ్జతి. తస్సా వచనేన ఖాదిస్సామి భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి థుల్లచ్చయస్స; భోజనపరియోసానే ఆపత్తి సఙ్ఘాదిసేసస్స.

కుపితా భిక్ఖునీ యావతతియం సమనుభాసనాయ న పటినిస్సజ్జనపచ్చయా తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

కిస్మిఞ్చిదేవ అధికరణే పచ్చాకతా భిక్ఖునీ యావతతియం సమనుభాసనాయ న పటినిస్సజ్జనపచ్చయా తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

సంసట్ఠా భిక్ఖునీ యావతతియం సమనుభాసనాయ న పటినిస్సజ్జనపచ్చయా తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

‘‘సంసట్ఠావ, అయ్యే, తుమ్హే విహరథ, మా తుమ్హే నానా విహరిత్థా’’తి ఉయ్యోజేన్తీ యావతతియం సమనుభాసనాయ న పటినిస్సజ్జనపచ్చయా తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

దస సఙ్ఘాదిసేసా నిట్ఠితా…పే….

(యథా హేట్ఠా తథా విత్థారేతబ్బా పచ్చయమేవ నానాకరణం)

దధిం విఞ్ఞాపేత్వా భుఞ్జనపచ్చయా కతి ఆపత్తియో ఆపజ్జతి? దధిం విఞ్ఞాపేత్వా భుఞ్జనపచ్చయా ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాటిదేసనీయస్స – దధిం విఞ్ఞాపేత్వా భుఞ్జనపచ్చయా ఇమా ద్వే ఆపత్తియో ఆపజ్జతి.

కతాపత్తివారో నిట్ఠితో దుతియో.