౧. పారాజికకణ్డం

౨౪౯. కాయసంసగ్గం సాదియనపచ్చయా కతి ఆపత్తియో ఆపజ్జతి? కాయసంసగ్గం సాదియనపచ్చయా పఞ్చ ఆపత్తియో ఆపజ్జతి. అవస్సుతా భిక్ఖునీ అవస్సుతస్స పురిసపుగ్గలస్స అధక్ఖకం ఉబ్భజాణుమణ్డలం గహణం సాదియతి, ఆపత్తి పారాజికస్స; భిక్ఖు కాయేన కాయం ఆమసతి, ఆపత్తి సఙ్ఘాదిసేసస్స; కాయేన కాయపటిబద్ధం ఆమసతి, ఆపత్తి థుల్లచ్చయస్స; కాయపటిబద్ధేన కాయపటిబద్ధం ఆమసతి, ఆపత్తి దుక్కటస్స; అఙ్గులిపతోదకే పాచిత్తియం – కాయసంసగ్గం సాదియనపచ్చయా ఇమా పఞ్చ ఆపత్తియో ఆపజ్జతి.

వజ్జప్పటిచ్ఛాదనపచ్చయా కతి ఆపత్తియో ఆపజ్జతి? వజ్జప్పటిచ్ఛాదనపచ్చయా చతస్సో ఆపత్తియో ఆపజ్జతి. భిక్ఖునీ జానం పారాజికం ధమ్మం [ధమ్మం అజ్ఝాపన్నం (స్యా.)] పటిచ్ఛాదేతి, ఆపత్తి పారాజికస్స; వేమతికా పటిచ్ఛాదేతి, ఆపత్తి థుల్లచ్చయస్స; భిక్ఖు సఙ్ఘాదిసేసం పటిచ్ఛాదేతి, ఆపత్తి పాచిత్తియస్స; ఆచారవిపత్తిం పటిచ్ఛాదేతి, ఆపత్తి దుక్కటస్స – వజ్జప్పటిచ్ఛాదనపచ్చయా ఇమా చతస్సో ఆపత్తియో ఆపజ్జతి.

యావతతియం సమనుభాసనాయ న పటినిస్సజ్జనపచ్చయా కతి ఆపత్తియో ఆపజ్జతి? యావతతియం సమనుభాసనాయ న పటినిస్సజ్జనపచ్చయా పఞ్చ ఆపత్తియో ఆపజ్జతి. ఉక్ఖిత్తానువత్తికా భిక్ఖునీ యావతతియం సమనుభాసనాయ న పటినిస్సజ్జతి, ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి పారాజికస్స; భేదకానువత్తికా భిక్ఖునీ యావతతియం సమనుభాసనాయ న పటినిస్సజ్జతి, ఆపత్తి సఙ్ఘాదిసేసస్స; పాపికాయ దిట్ఠియా యావతతియం సమనుభాసనాయ న పటినిస్సజ్జతి, ఆపత్తి పాచిత్తియస్స – యావతతియం సమనుభాసనాయ న పటినిస్సజ్జనపచ్చయా ఇమా పఞ్చ ఆపత్తియో ఆపజ్జతి.

అట్ఠమం వత్థుం పరిపూరణపచ్చయా కతి ఆపత్తియో ఆపజ్జతి? అట్ఠమం వత్థుం పరిపూరణపచ్చయా తిస్సో ఆపత్తియో ఆపజ్జతి. పురిసేన – ‘‘ఇత్థన్నామం ఓకాసం ఆగచ్ఛా’’తి వుత్తా గచ్ఛతి, ఆపత్తి దుక్కటస్స; పురిసస్స హత్థపాసం ఓక్కన్తమత్తే ఆపత్తి థుల్లచ్చయస్స; అట్ఠమం వత్థుం పరిపూరేతి, ఆపత్తి పారాజికస్స – అట్ఠమం వత్థుం పరిపూరణపచ్చయా ఇమా తిస్సో ఆపత్తియో ఆపజ్జతి.

పారాజికా నిట్ఠితా.