౭. పాదుకవగ్గో

౧౫౬. అనాదరియం పటిచ్చ పాదుకారుళ్హస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ ఉపాహనారుళ్హస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ యానగతస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ సయనగతస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ పల్లత్థికాయ నిసిన్నస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానే సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ వేఠితసీసస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ ఓగుణ్ఠితసీసస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ ఛమాయం నిసీదిత్వా ఆసనే నిసిన్నస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ నీచే ఆసనే నిసీదిత్వా ఉచ్చే ఆసనే నిసిన్నస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ ఠితేన నిసిన్నస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ పచ్ఛతో గచ్ఛన్తేన పురతో గచ్ఛన్తస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ ఉప్పథేన గచ్ఛన్తేన పథేన గచ్ఛన్తస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ వాచతో చ చిత్తతో చ సముట్ఠాతి…పే….

అనాదరియం పటిచ్చ ఠితేన ఉచ్చారం వా పస్సావం వా కరోన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానే సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ హరితే ఉచ్చారం వా పస్సావం వా ఖేళం వా కరోన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ ఉదకే ఉచ్చారం వా పస్సావం వా ఖేళం వా కరోన్తస్స దుక్కటం…పే… కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియే భిక్ఖూ ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖూ ఉదకే ఉచ్చారమ్పి పస్సావమ్పి ఖేళమ్పి అకంసు, తస్మిం వత్థుస్మిం. ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

పాదుకవగ్గో సత్తమో.

పఞ్చసత్తతి సేఖియా నిట్ఠితా.

తస్సుద్దానం –

పరిమణ్డలం పటిచ్ఛన్నం, సుసంవుతోక్ఖిత్తచక్ఖు;

ఉక్ఖిత్తోజ్జగ్ఘికా సద్దో, తయో చేవ పచాలనా.

ఖమ్భం ఓగుణ్ఠితో చేవుక్కుటిపల్లత్థికాయ చ;

సక్కచ్చం పత్తసఞ్ఞీ చ, సమసూపం సమతిత్తికం [సమతిత్థికం (క.)].

సక్కచ్చం పత్తసఞ్ఞీ చ, సపదానం సమసూపకం;

థూపకతో పటిచ్ఛన్నం, విఞ్ఞత్తుజ్ఝానసఞ్ఞినా.

న మహన్తం మణ్డలం ద్వారం, సబ్బం హత్థం న బ్యాహరే;

ఉక్ఖేపో ఛేదనా గణ్డో, ధునం సిత్థావకారకం.

జివ్హానిచ్ఛారకఞ్చేవ, చపుచపు సురుసురు;

హత్థో పత్తో చ ఓట్ఠో చ, సామిసం సిత్థకేన చ.

ఛత్తపాణిస్స సద్ధమ్మం, న దేసేన్తి తథాగతా;

ఏవమేవ దణ్డపాణిస్స, సత్థఆవుధపాణినం.

పాదుకా ఉపాహనా చేవ, యానసేయ్యాగతస్స చ;

పల్లత్థికా నిసిన్నస్స, వేఠితోగుణ్ఠితస్స చ.

ఛమా నీచాసనే ఠానే, పచ్ఛతో ఉప్పథేన చ;

ఠితకేన న కాతబ్బం, హరితే ఉదకమ్హి చాతి.

తేసం వగ్గానముద్దానం –

పరిమణ్డలఉజ్జగ్ఘి, ఖమ్భం పిణ్డం తథేవ చ;

కబళా సురుసురు చ, పాదుకేన చ సత్తమాతి.

మహావిభఙ్గే కత్థపఞ్ఞత్తివారో నిట్ఠితో.