౨. కతాపత్తివారో

౧. పారాజికకణ్డం

౧౫౭. మేథునం ధమ్మం పటిసేవన్తో కతి ఆపత్తియో ఆపజ్జతి? మేథునం ధమ్మం పటిసేవన్తో తిస్సో ఆపత్తియో ఆపజ్జతి. అక్ఖాయితే సరీరే మేథునం ధమ్మం పటిసేవతి, ఆపత్తి పారాజికస్స; యేభుయ్యేన ఖాయితే సరీరే మేథునం ధమ్మం పటిసేవతి, ఆపత్తి థుల్లచ్చయస్స; వట్టకతే [వివటకతే (స్యా.)] ముఖే అచ్ఛుపన్తం అఙ్గజాతం పవేసేతి, ఆపత్తి దుక్కటస్స – మేథునం ధమ్మం పటిసేవన్తో ఇమా తిస్సో ఆపత్తియో ఆపజ్జతి.

౧౫౮. అదిన్నం ఆదియన్తో కతి ఆపత్తియో ఆపజ్జతి? అదిన్నం ఆదియన్తో తిస్సో ఆపత్తియో ఆపజ్జతి. పఞ్చమాసకం వా అతిరేకపఞ్చమాసకం వా అగ్ఘనకం అదిన్నం థేయ్యసఙ్ఖాతం ఆదియతి, ఆపత్తి పారాజికస్స; అతిరేకమాసకం వా ఊనపఞ్చమాసకం వా అగ్ఘనకం అదిన్నం థేయ్యసఙ్ఖాతం ఆదియతి, ఆపత్తి థుల్లచ్చయస్స; మాసకం వా ఊనమాసకం వా అగ్ఘనకం అదిన్నం థేయ్యసఙ్ఖాతం ఆదియతి, ఆపత్తి దుక్కటస్స – అదిన్నం ఆదియన్తో ఇమా తిస్సో ఆపత్తియో ఆపజ్జతి.

౧౫౯. సఞ్చిచ్చ మనుస్సవిగ్గహం జీవితా వోరోపేన్తో కతి ఆపత్తియో ఆపజ్జతి? సఞ్చిచ్చ మనుస్సవిగ్గహం జీవితా వోరోపేన్తో తిస్సో ఆపత్తియో ఆపజ్జతి. మనుస్సం ఓదిస్స ఓపాతం ఖణతి ‘‘పపతిత్వా మరిస్సతీ’’తి, ఆపత్తి దుక్కటస్స; పపతితే దుక్ఖా వేదనా ఉప్పజ్జతి, ఆపత్తి థుల్లచ్చయస్స; మరతి, ఆపత్తి పారాజికస్స – సఞ్చిచ్చ మనుస్సవిగ్గహం జీవితా వోరోపేన్తో ఇమా తిస్సో ఆపత్తియో ఆపజ్జతి.

౧౬౦. అసన్తం అభూతం ఉత్తరిమనుస్సధమ్మం ఉల్లపన్తో కతి ఆపత్తియో ఆపజ్జతి? అసన్తం అభూతం ఉత్తరిమనుస్సధమ్మం ఉల్లపన్తో తిస్సో ఆపత్తియో ఆపజ్జతి. పాపిచ్ఛో ఇచ్ఛాపకతో అసన్తం అభూతం ఉత్తరిమనుస్సధమ్మం ఉల్లపతి, ఆపత్తి పారాజికస్స; ‘‘యో తే విహారే వసతి, సో భిక్ఖు అరహా’’తి భణతి, పటివిజానన్తస్స ఆపత్తి థుల్లచ్చయస్స; న పటివిజానన్తస్స ఆపత్తి దుక్కటస్స – అసన్తం అభూతం ఉత్తరిమనుస్సధమ్మం ఉల్లపన్తో ఇమా తిస్సో ఆపత్తియో ఆపజ్జతి.

చత్తారో పారాజికా నిట్ఠితా.

౨. సఙ్ఘాదిసేసకణ్డం

౧౬౧. ఉపక్కమిత్వా అసుచిం మోచేన్తో తిస్సో ఆపత్తియో ఆపజ్జతి. చేతేతి ఉపక్కమతి ముచ్చతి, ఆపత్తి సఙ్ఘాదిసేసస్స; చేతేతి ఉపక్కమతి న ముచ్చతి, ఆపత్తి థుల్లచ్చయస్స; పయోగే దుక్కటం.

మాతుగామేన సద్ధిం కాయసంసగ్గం సమాపజ్జన్తో తిస్సో ఆపత్తియో ఆపజ్జతి. కాయేన కాయం ఆమసతి, ఆపత్తి సఙ్ఘాదిసేసస్స; కాయేన కాయపటిబద్ధం ఆమసతి, ఆపత్తి థుల్లచ్చయస్స; కాయపటిబద్ధేన కాయపటిబద్ధం ఆమసతి, ఆపత్తి దుక్కటస్స.

మాతుగామం దుట్ఠుల్లాహి వాచాహి ఓభాసేన్తో తిస్సో ఆపత్తియో ఆపజ్జతి. వచ్చమగ్గం పస్సావమగ్గం ఆదిస్స వణ్ణమ్పి భణతి, అవణ్ణమ్పి భణతి, ఆపత్తి సఙ్ఘాదిసేసస్స; వచ్చమగ్గం పస్సావమగ్గం ఠపేత్వా అధక్ఖకం ఉబ్భజాణుమణ్డలం ఆదిస్స వణ్ణమ్పి భణతి అవణ్ణమ్పి భణతి, ఆపత్తి థుల్లచ్చయస్స; కాయపటిబద్ధం ఆదిస్స వణ్ణమ్పి భణతి అవణ్ణమ్పి భణతి, ఆపత్తి దుక్కటస్స.

అత్తకామపారిచరియా వణ్ణం భాసన్తో తిస్సో ఆపత్తియో ఆపజ్జతి. మాతుగామస్స సన్తికే అత్తకామపారిచరియాయ వణ్ణం భాసతి, ఆపత్తి సఙ్ఘాదిసేసస్స; పణ్డకస్స సన్తికే అత్తకామపారిచరియాయ వణ్ణం భాసతి, ఆపత్తి థుల్లచ్చయస్స; తిరచ్ఛానగతస్స సన్తికే అత్తకామపారిచరియాయ వణ్ణం భాసతి, ఆపత్తి దుక్కటస్స.

సఞ్చరిత్తం సమాపజ్జన్తో తిస్సో ఆపత్తియో ఆపజ్జతి. పటిగ్గణ్హాతి వీమంసతి పచ్చాహరతి, ఆపత్తి సఙ్ఘాదిసేసస్స; పటిగ్గణ్హాతి వీమంసతి న పచ్చాహరతి, ఆపత్తి థుల్లచ్చయస్స; పటిగ్గణ్హాతి న వీమంసతి న పచ్చాహరతి, ఆపత్తి దుక్కటస్స.

సఞ్ఞాచికాయ కుటిం కారాపేన్తో తిస్సో ఆపత్తియో ఆపజ్జతి. కారాపేతి, పయోగే దుక్కటం; ఏకం పిణ్డం అనాగతే, ఆపత్తి థుల్లచ్చయస్స; తస్మిం పిణ్డే ఆగతే, ఆపత్తి సఙ్ఘాదిసేసస్స.

మహల్లకం విహారం కారాపేన్తో తిస్సో ఆపత్తియో ఆపజ్జతి. కారాపేతి, పయోగే దుక్కటం; ఏకం పిణ్డం అనాగతే, ఆపత్తి థుల్లచ్చయస్స; తస్మిం పిణ్డే ఆగతే, ఆపత్తి సఙ్ఘాదిసేసస్స.

భిక్ఖుం అమూలకేన పారాజికేన ధమ్మేన అనుద్ధంసేన్తో తిస్సో ఆపత్తియో ఆపజ్జతి. అనోకాసం కారాపేత్వా చావనాధిప్పాయో వదేతి, ఆపత్తి సఙ్ఘాదిసేసేన దుక్కటస్స; ఓకాసం కారాపేత్వా అక్కోసాధిప్పాయో వదేతి, ఆపత్తి ఓమసవాదస్స.

భిక్ఖుం అఞ్ఞభాగియస్స అధికరణస్స కిఞ్చి దేసం లేసమత్తం ఉపాదాయ పారాజికేన ధమ్మేన అనుద్ధంసేన్తో తిస్సో ఆపత్తియో ఆపజ్జతి. అనోకాసం కారాపేత్వా చావనాధిప్పాయో వదేతి, ఆపత్తి సఙ్ఘాదిసేసేన దుక్కటస్స; ఓకాసం కారాపేత్వా అక్కోసాధిప్పాయో వదేతి, ఆపత్తి ఓమసవాదస్స.

సఙ్ఘభేదకో భిక్ఖు యావతతియం సమనుభాసనాయ న పటినిస్సజ్జన్తో తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

భేదకానువత్తకా భిక్ఖూ యావతతియం సమనుభాసనాయ [సమనుభాసియమానా (స్యా.)] న పటినిస్సజ్జన్తా తిస్సో ఆపత్తియో ఆపజ్జన్తి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

దుబ్బచో భిక్ఖు యావతతియం సమనుభాసనాయ [సమనుభాసియమానో (స్యా.)] న పటినిస్సజ్జన్తో తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

కులదూసకో భిక్ఖు యావతతియం సమనుభాసనాయ న పటినిస్సజ్జన్తో తిస్సో ఆపత్తియో ఆపజ్జతి. ఞత్తియా దుక్కటం; ద్వీహి కమ్మవాచాహి థుల్లచ్చయా; కమ్మవాచాపరియోసానే ఆపత్తి సఙ్ఘాదిసేసస్స.

తేరస సఙ్ఘాదిసేసా నిట్ఠితా.

౩. నిస్సగ్గియకణ్డం

౧. కథినవగ్గో

౧౬౨. అతిరేకచీవరం దసాహం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

ఏకరత్తం తిచీవరేన విప్పవసన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

అకాలచీవరం పటిగ్గహేత్వా మాసం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

అఞ్ఞాతికాయ భిక్ఖునియా పురాణచీవరం ధోవాపేన్తో ద్వే ఆపత్తియో ఆపజ్జతి. ధోవాపేతి, పయోగే దుక్కటం; ధోవాపితే నిస్సగ్గియం పాచిత్తియం.

అఞ్ఞాతికాయ భిక్ఖునియా హత్థతో చీవరం పటిగ్గణ్హన్తో ద్వే ఆపత్తియో ఆపజ్జతి. గణ్హాతి, పయోగే దుక్కటం; గహితే నిస్సగ్గియం పాచిత్తియం.

అఞ్ఞాతకం గహపతిం వా గహపతానిం వా చీవరం విఞ్ఞాపేన్తో ద్వే ఆపత్తియో ఆపజ్జతి. విఞ్ఞాపేతి, పయోగే దుక్కటం; విఞ్ఞాపితే నిస్సగ్గియం పాచిత్తియం.

అఞ్ఞాతకం గహపతిం వా గహపతానిం వా తతుత్తరి చీవరం విఞ్ఞాపేన్తో ద్వే ఆపత్తియో ఆపజ్జతి. విఞ్ఞాపేతి, పయోగే దుక్కటం; విఞ్ఞాపితే నిస్సగ్గియం పాచిత్తియం.

పుబ్బే అప్పవారితో అఞ్ఞాతకం గహపతికం ఉపసఙ్కమిత్వా చీవరే వికప్పం ఆపజ్జన్తో ద్వే ఆపత్తియో ఆపజ్జతి. వికప్పం ఆపజ్జతి, పయోగే దుక్కటం; వికప్పం ఆపన్నే నిస్సగ్గియం పాచిత్తియం.

పుబ్బే అప్పవారితో అఞ్ఞాతకే గహపతికే ఉపసఙ్కమిత్వా చీవరే వికప్పం ఆపజ్జన్తో ద్వే ఆపత్తియో ఆపజ్జతి. వికప్పం ఆపజ్జతి, పయోగే దుక్కటం; వికప్పం ఆపన్నే నిస్సగ్గియం పాచిత్తియం.

అతిరేకతిక్ఖత్తుం చోదనాయ అతిరేకఛక్ఖత్తుం ఠానేన చీవరం అభినిప్ఫాదేన్తో ద్వే ఆపత్తియో ఆపజ్జతి. అభినిప్ఫాదేతి, పయోగే దుక్కటం; అభినిప్ఫాదితే నిస్సగ్గియం పాచిత్తియం.

కథినవగ్గో పఠమో.

౨. కోసియవగ్గో

౧౬౩. కోసియమిస్సకం సన్థతం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే నిస్సగ్గియం పాచిత్తియం.

సుద్ధకాళకానం ఏళకలోమానం సన్థతం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే నిస్సగ్గియం పాచిత్తియం.

అనాదియిత్వా తులం ఓదాతానం తులం గోచరియానం నవం సన్థతం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే నిస్సగ్గియం పాచిత్తియం.

అనువస్సం సన్థతం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే నిస్సగ్గియం పాచిత్తియం.

అనాదియిత్వా పురాణసన్థతస్స సామన్తా సుగతవిదత్థిం నవం నిసీదనసన్థతం కారాపేన్తో ద్వే ఆపత్తియో ఆపజ్జతి. కారాపేతి, పయోగే దుక్కటం; కారాపితే నిస్సగ్గియం పాచిత్తియం.

ఏళకలోమాని పటిగ్గహేత్వా తియోజనం అతిక్కామేన్తో ద్వే ఆపత్తియో ఆపజ్జతి. పఠమం పాదం తియోజనం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, నిస్సగ్గియం పాచిత్తియం.

అఞ్ఞాతికాయ భిక్ఖునియా ఏళకలోమాని ధోవాపేన్తో ద్వే ఆపత్తియో ఆపజ్జతి. ధోవాపేతి, పయోగే దుక్కటం; ధోవాపితే నిస్సగ్గియం పాచిత్తియం.

రూపియం పటిగ్గణ్హన్తో ద్వే ఆపత్తియో ఆపజ్జతి. గణ్హాతి, పయోగే దుక్కటం; గహితే నిస్సగ్గియం పాచిత్తియం.

నానప్పకారకం రూపియసంవోహారం సమాపజ్జన్తో ద్వే ఆపత్తియో ఆపజ్జతి. సమాపజ్జతి, పయోగే దుక్కటం; సమాపన్నే నిస్సగ్గియం పాచిత్తియం.

నానప్పకారకం కయవిక్కయం సమాపజ్జన్తో ద్వే ఆపత్తియో ఆపజ్జతి. సమాపజ్జతి, పయోగే దుక్కటం; సమాపన్నే నిస్సగ్గియం పాచిత్తియం.

కోసియవగ్గో దుతియో.

౩. పత్తవగ్గో

౧౬౪. అతిరేకపత్తం దసాహం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

ఊనపఞ్చబన్ధనేన పత్తేన అఞ్ఞం నవం పత్తం చేతాపేన్తో ద్వే ఆపత్తియో ఆపజ్జతి. చేతాపేతి, పయోగే దుక్కటం; చేతాపితే నిస్సగ్గియం పాచిత్తియం.

భేసజ్జాని పటిగ్గహేత్వా సత్తాహం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

అతిరేకమాసే సేసే గిమ్హానే వస్సికసాటికచీవరం పరియేసన్తో ద్వే ఆపత్తియో ఆపజ్జతి. పరియేసతి, పయోగే దుక్కటం; పరియిట్ఠే నిస్సగ్గియం పాచిత్తియం.

భిక్ఖుస్స సామం చీవరం దత్వా కుపితో అనత్తమనో అచ్ఛిన్దన్తో ద్వే ఆపత్తియో ఆపజ్జతి. అచ్ఛిన్దతి, పయోగే దుక్కటం; అచ్ఛిన్నే నిస్సగ్గియం పాచిత్తియం.

సామం సుత్తం విఞ్ఞాపేత్వా తన్తవాయేహి చీవరం వాయాపేన్తో ద్వే ఆపత్తియో ఆపజ్జతి. వాయాపేతి, పయోగే దుక్కటం; వాయాపితే నిస్సగ్గియం పాచిత్తియం.

పుబ్బే అప్పవారితో అఞ్ఞాతకస్స గహపతికస్స తన్తవాయే ఉపసఙ్కమిత్వా చీవరే వికప్పం ఆపజ్జన్తో ద్వే ఆపత్తియో ఆపజ్జతి. వికప్పం ఆపజ్జతి, పయోగే దుక్కటం; వికప్పం ఆపన్నే నిస్సగ్గియం పాచిత్తియం.

అచ్చేకచీవరం పటిగ్గహేత్వా చీవరకాలసమయం అతిక్కామేన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

తిణ్ణం చీవరానం అఞ్ఞతరం చీవరం అన్తరఘరే నిక్ఖిపిత్వా అతిరేకఛారత్తం విప్పవసన్తో ఏకం ఆపత్తిం ఆపజ్జతి. నిస్సగ్గియం పాచిత్తియం.

జానం సఙ్ఘికం లాభం పరిణతం అత్తనో పరిణామేన్తో ద్వే ఆపత్తియో ఆపజ్జతి. పరిణామేతి, పయోగే దుక్కటం; పరిణామితే నిస్సగ్గియం పాచిత్తియం.

పత్తవగ్గో తతియో.

తింస నిస్సగ్గియా పాచిత్తియా నిట్ఠితా.

౪. పాచిత్తియకణ్డం

౧. ముసావాదవగ్గో

౧౬౫. సమ్పజానముసావాదం భాసన్తో కతి ఆపత్తియో ఆపజ్జతి? సమ్పజానముసావాదం భాసన్తో పఞ్చ ఆపత్తియో ఆపజ్జతి. పాపిచ్ఛో ఇచ్ఛాపకతో అసన్తం అభూతం ఉత్తరిమనుస్సధమ్మం ఉల్లపతి, ఆపత్తి పారాజికస్స; భిక్ఖుం అమూలకేన పారాజికేన ధమ్మేన అనుద్ధంసేతి, ఆపత్తి సఙ్ఘాదిసేసస్స; ‘‘యో తే విహారే వసతి, సో భిక్ఖు అరహా’’తి భణతి, పటివిజానన్తస్స ఆపత్తి థుల్లచ్చయస్స; న పటివిజానన్తస్స ఆపత్తి దుక్కటస్స; సమ్పజానముసావాదే పాచిత్తియం – సమ్పజానముసావాదం భాసన్తో ఇమా పఞ్చ ఆపత్తియో ఆపజ్జతి.

ఓమసన్తో ద్వే ఆపత్తియో ఆపజ్జతి. ఉపసమ్పన్నం ఓమసతి, ఆపత్తి పాచిత్తియస్స; అనుపసమ్పన్నం ఓమసతి, ఆపత్తి దుక్కటస్స.

పేసుఞ్ఞం ఉపసంహరన్తో ద్వే ఆపత్తియో ఆపజ్జతి. ఉపసమ్పన్నస్స పేసుఞ్ఞం ఉపసంహరతి, ఆపత్తి పాచిత్తియస్స; అనుపసమ్పన్నస్స పేసుఞ్ఞం ఉపసంహరతి, ఆపత్తి దుక్కటస్స.

అనుపసమ్పన్నం పదసో ధమ్మం వాచేన్తో ద్వే ఆపత్తియో ఆపజ్జతి. వాచేతి, పయోగే దుక్కటం; పదే పదే ఆపత్తి పాచిత్తియస్స.

అనుపసమ్పన్నేన ఉత్తరిదిరత్తతిరత్తం సహసేయ్యం కప్పేన్తో ద్వే ఆపత్తియో ఆపజ్జతి. నిపజ్జతి, పయోగే దుక్కటం; నిపన్నే ఆపత్తి పాచిత్తియస్స.

మాతుగామేన సహసేయ్యం కప్పేన్తో ద్వే ఆపత్తియో ఆపజ్జతి. నిపజ్జతి, పయోగే దుక్కటం; నిపన్నే ఆపత్తి పాచిత్తియస్స.

మాతుగామస్స ఉత్తరిఛప్పఞ్చవాచాహి ధమ్మం దేసేన్తో ద్వే ఆపత్తియో ఆపజ్జతి. దేసేతి, పయోగే దుక్కటం; పదే పదే ఆపత్తి పాచిత్తియస్స.

అనుపసమ్పన్నస్స ఉత్తరిమనుస్సధమ్మం భూతం ఆరోచేన్తో ద్వే ఆపత్తియో ఆపజ్జతి. ఆరోచేతి, పయోగే దుక్కటం; ఆరోచితే ఆపత్తి పాచిత్తియస్స.

భిక్ఖుస్స దుట్ఠుల్లం ఆపత్తిం అనుపసమ్పన్నస్స ఆరోచేన్తో ద్వే ఆపత్తియో ఆపజ్జతి. ఆరోచేతి, పయోగే దుక్కటం; ఆరోచితే ఆపత్తి పాచిత్తియస్స.

పథవిం ఖణన్తో ద్వే ఆపత్తియో ఆపజ్జతి. ఖణతి, పయోగే దుక్కటం; పహారే పహారే ఆపత్తి పాచిత్తియస్స.

ముసావాదవగ్గో పఠమో.

౨. భూతగామవగ్గో

౧౬౬. భూతగామం పాతేన్తో ద్వే ఆపత్తియో ఆపజ్జతి. పాతేతి, పయోగే దుక్కటం; పహారే పహారే ఆపత్తి పాచిత్తియస్స.

అఞ్ఞేనఞ్ఞం పటిచరన్తో ద్వే ఆపత్తియో ఆపజ్జతి. అనారోపితే అఞ్ఞవాదకే అఞ్ఞేనఞ్ఞం పటిచరతి, ఆపత్తి దుక్కటస్స; ఆరోపితే అఞ్ఞవాదకే అఞ్ఞేనఞ్ఞం పటిచరతి, ఆపత్తి పాచిత్తియస్స.

భిక్ఖుం ఉజ్ఝాపేన్తో ద్వే ఆపత్తియో ఆపజ్జతి. ఉజ్ఝాపేతి, పయోగే దుక్కటం; ఉజ్ఝాపితే ఆపత్తి పాచిత్తియస్స.

సఙ్ఘికం మఞ్చం వా పీఠం వా భిసిం వా కోచ్ఛం వా అజ్ఝోకాసే సన్థరిత్వా అనుద్ధరిత్వా అనాపుచ్ఛా పక్కమన్తో ద్వే ఆపత్తియో ఆపజ్జతి. పఠమం పాదం లేడ్డుపాతం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

సఙ్ఘికే విహారే సేయ్యం సన్థరిత్వా అనుద్ధరిత్వా అనాపుచ్ఛా పక్కమన్తో ద్వే ఆపత్తియో ఆపజ్జతి. పఠమం పాదం పరిక్ఖేపం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

సఙ్ఘికే విహారే జానం పుబ్బుపగతం భిక్ఖుం అనుపఖజ్జ సేయ్యం కప్పేన్తో ద్వే ఆపత్తియో ఆపజ్జతి. నిపజ్జతి, పయోగే దుక్కటం; నిపన్నే ఆపత్తి పాచిత్తియస్స.

భిక్ఖుం కుపితో అనత్తమనో సఙ్ఘికా విహారా నిక్కడ్ఢేన్తో ద్వే ఆపత్తియో ఆపజ్జతి. నిక్కడ్ఢతి, పయోగే దుక్కటం; నిక్కడ్ఢితే ఆపత్తి పాచిత్తియస్స.

సఙ్ఘికే విహారే ఉపరివేహాసకుటియా ఆహచ్చపాదకం మఞ్చం వా పీఠం వా అభినిసీదన్తో ద్వే ఆపత్తియో ఆపజ్జతి. అభినిసీదతి, పయోగే దుక్కటం; అభినిసిన్నే ఆపత్తి పాచిత్తియస్స.

ద్వత్తిపరియాయే అధిట్ఠహిత్వా తతుత్తరి అధిట్ఠహన్తో ద్వే ఆపత్తియో ఆపజ్జతి. అధిట్ఠేతి, పయోగే దుక్కటం; అధిట్ఠితే ఆపత్తి పాచిత్తియస్స.

జానం సప్పాణకం ఉదకం తిణం వా మత్తికం వా సిఞ్చన్తో ద్వే ఆపత్తియో ఆపజ్జతి. సిఞ్చతి, పయోగే దుక్కటం; సిఞ్చితే ఆపత్తి పాచిత్తియస్స.

భూతగామవగ్గో దుతియో.

౩. ఓవాదవగ్గో

౧౬౭. అసమ్మతో భిక్ఖునియో ఓవదన్తో ద్వే ఆపత్తియో ఆపజ్జతి. ఓవదతి, పయోగే దుక్కటం; ఓవదితే ఆపత్తి పాచిత్తియస్స.

అత్థఙ్గతే సూరియే భిక్ఖునియో ఓవదన్తో ద్వే ఆపత్తియో ఆపజ్జతి. ఓవదతి, పయోగే దుక్కటం; ఓవదితే ఆపత్తి పాచిత్తియస్స.

భిక్ఖునుపస్సయం ఉపసఙ్కమిత్వా భిక్ఖునియో ఓవదన్తో ద్వే ఆపత్తియో ఆపజ్జతి. ఓవదతి, పయోగే దుక్కటం; ఓవదితే ఆపత్తి పాచిత్తియస్స.

‘‘ఆమిసహేతు భిక్ఖూ భిక్ఖునియో ఓవదన్తీ’’తి భణన్తో ద్వే ఆపత్తియో ఆపజ్జతి. భణతి, పయోగే దుక్కటం; భణితే ఆపత్తి పాచిత్తియస్స.

అఞ్ఞాతికాయ భిక్ఖునియా చీవరం దేన్తో ద్వే ఆపత్తియో ఆపజ్జతి. దేతి, పయోగే దుక్కటం; దిన్నే ఆపత్తి పాచిత్తియస్స.

అఞ్ఞాతికా భిక్ఖునియా చీవరం సిబ్బేన్తో ద్వే ఆపత్తియో ఆపజ్జతి. సిబ్బేతి, పయోగే దుక్కటం; ఆరాపథే ఆరాపథే ఆపత్తి పాచిత్తియస్స.

భిక్ఖునియా సద్ధిం సంవిధాయ ఏకద్ధానమగ్గం పటిపజ్జన్తో ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే ఆపత్తి పాచిత్తియస్స.

భిక్ఖునియా సద్ధిం సంవిధాయ ఏకం నావం అభిరుహన్తో ద్వే ఆపత్తియో ఆపజ్జతి. అభిరుహతి, పయోగే దుక్కటం; అభిరుళ్హే ఆపత్తి పాచిత్తియస్స.

జానం భిక్ఖునిపరిపాచితం పిణ్డపాతం భుఞ్జన్తో ద్వే ఆపత్తియో ఆపజ్జతి. ‘‘భుఞ్జిస్సామీ’’తి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

భిక్ఖునియా సద్ధిం ఏకో ఏకాయ రహో నిసజ్జం కప్పేన్తో ద్వే ఆపత్తియో ఆపజ్జతి. నిసీదతి, పయోగే దుక్కటం; నిసిన్నే ఆపత్తి పాచిత్తియస్స.

ఓవాదవగ్గో తతియో.

౪. భోజనవగ్గో

౧౬౮. తతుత్తరి ఆవసథపిణ్డం భుఞ్జన్తో ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

గణభోజనం భుఞ్జన్తో ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

పరమ్పరభోజనం భుఞ్జన్తో ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

ద్వత్తిపత్తపూరే పూవే పటిగ్గహేత్వా తతుత్తరి పటిగ్గణ్హన్తో ద్వే ఆపత్తియో ఆపజ్జతి. గణ్హాతి, పయోగే దుక్కటం; గహితే ఆపత్తి పాచిత్తియస్స.

భుత్తావీ పవారితో అనతిరిత్తం ఖాదనీయం వా భోజనీయం వా భుఞ్జన్తో ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

భిక్ఖుం భుత్తావిం పవారితం అనతిరిత్తేన ఖాదనీయేన వా భోజనీయేన వా అభిహట్ఠుం పవారేన్తో ద్వే ఆపత్తియో ఆపజ్జతి. తస్స వచనేన ఖాదిస్సామి భుఞ్జిస్సామీతి పటిగ్గణ్హాతి, ఆపత్తి దుక్కటస్స; భోజనపరియోసానే ఆపత్తి పాచిత్తియస్స.

వికాలే ఖాదనీయం వా భోజనీయం వా భుఞ్జన్తో ద్వే ఆపత్తియో ఆపజ్జతి. ఖాదిస్సామి భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

సన్నిధికారకం ఖాదనీయం వా భోజనీయం వా భుఞ్జన్తో ద్వే ఆపత్తియో ఆపజ్జతి. ఖాదిస్సామి భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

పణీతభోజనాని అత్తనో అత్థాయ విఞ్ఞాపేత్వా భుఞ్జన్తో ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

అదిన్నం ముఖద్వారం ఆహారం ఆహరన్తో ద్వే ఆపత్తియో ఆపజ్జతి. భుఞ్జిస్సామీతి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

భోజనవగ్గో చతుత్థో.

౫. అచేలకవగ్గో

౧౬౯. అచేలకస్స, వా పరిబ్బాజకస్స వా పరిబ్బాజికాయ వా సహత్థా ఖాదనీయం వా భోజనీయం వా దేన్తో ద్వే ఆపత్తియో ఆపజ్జతి. దేతి, పయోగే దుక్కటం; దిన్నే ఆపత్తి పాచిత్తియస్స.

భిక్ఖుం – ‘‘ఏహావుసో, గామం వా నిగమం వా పిణ్డాయ పవిసిస్సామా’’తి తస్స దాపేత్వా వా అదాపేత్వా వా ఉయ్యోజేన్తో ద్వే ఆపత్తియో ఆపజ్జతి. ఉయ్యోజేతి, పయోగే దుక్కటం; ఉయ్యోజితే ఆపత్తి పాచిత్తియస్స.

సభోజనే కులే అనుపఖజ్జ నిసజ్జం కప్పేన్తో ద్వే ఆపత్తియో ఆపజ్జతి. నిసీదతి, పయోగే దుక్కటం; నిసిన్నే ఆపత్తి పాచిత్తియస్స.

మాతుగామేన సద్ధిం రహో పటిచ్ఛన్నే ఆసనే నిసజ్జం కప్పేన్తో ద్వే ఆపత్తియో ఆపజ్జతి. నిసీదతి, పయోగే దుక్కటం; నిసిన్నే ఆపత్తి పాచిత్తియస్స.

మాతుగామేన సద్ధిం ఏకో ఏకాయ రహో నిసజ్జం కప్పేన్తో ద్వే ఆపత్తియో ఆపజ్జతి. నిసీదతి, పయోగే దుక్కటం; నిసిన్నే ఆపత్తి పాచిత్తియస్స.

నిమన్తితో సభత్తో సమానో పురేభత్తం పచ్ఛాభత్తం కులేసు చారిత్తం ఆపజ్జన్తో ద్వే ఆపత్తియో ఆపజ్జతి. పఠమం పాదం ఉమ్మారం అతిక్కామేతి, ఆపత్తి దుక్కటస్స; దుతియం పాదం అతిక్కామేతి, ఆపత్తి పాచిత్తియస్స.

తతుత్తరి భేసజ్జం విఞ్ఞాపేన్తో ద్వే ఆపత్తియో ఆపజ్జతి. విఞ్ఞాపేతి, పయోగే దుక్కటం; విఞ్ఞాపితే ఆపత్తి పాచిత్తియస్స.

ఉయ్యుత్తం సేనం దస్సనాయ గచ్ఛన్తో ద్వే ఆపత్తియో ఆపజ్జతి. గచ్ఛతి, ఆపత్తి దుక్కటస్స; యత్థ ఠితో పస్సతి, ఆపత్తి పాచిత్తియస్స.

అతిరేకతిరత్తం సేనాయ వసన్తో ద్వే ఆపత్తియో ఆపజ్జతి. వసతి, పయోగే దుక్కటం; వసితే ఆపత్తి పాచిత్తియస్స.

ఉయ్యోధికం గచ్ఛన్తో ద్వే ఆపత్తియో ఆపజ్జతి. గచ్ఛతి, ఆపత్తి దుక్కటస్స; యత్థ ఠితో పస్సతి, ఆపత్తి పాచిత్తియస్స.

అచేలకవగ్గో పఞ్చమో.

౬. సురామేరయవగ్గో

౧౭౦. మజ్జం పివన్తో ద్వే ఆపత్తియో ఆపజ్జతి. ‘‘పివిస్సామీ’’తి పటిగ్గణ్హాతి, ఆపత్తి దుక్కటస్స; అజ్ఝోహారే అజ్ఝోహారే ఆపత్తి పాచిత్తియస్స.

భిక్ఖుం అఙ్గులిపతోదకేన హాసేన్తో ద్వే ఆపత్తియో ఆపజ్జతి. హాసేతి, పయోగే దుక్కటం; హసితే ఆపత్తి పాచిత్తియస్స.

ఉదకే కీళన్తో ద్వే ఆపత్తియో ఆపజ్జతి. హేట్ఠాగోప్ఫకే ఉదకే కీళతి, ఆపత్తి దుక్కటస్స; ఉపరిగోప్ఫకే కీళతి, ఆపత్తి పాచిత్తియస్స.

అనాదరియం కరోన్తో ద్వే ఆపత్తియో ఆపజ్జతి. కరోతి, పయోగే దుక్కటం; కతే ఆపత్తి పాచిత్తియస్స.

భిక్ఖుం భింసాపేన్తో ద్వే ఆపత్తియో ఆపజ్జతి. భింసాపేతి, పయోగే దుక్కటం; భింసాపితే ఆపత్తి పాచిత్తియస్స.

జోతిం సమాదహిత్వా విసిబ్బేన్తో ద్వే ఆపత్తియో ఆపజ్జతి. సమాదహతి, పయోగే దుక్కటం; సమాదహితే ఆపత్తి పాచిత్తియస్స.

ఓరేనద్ధమాసం నహాయన్తో ద్వే ఆపత్తియో ఆపజ్జతి. నహాయతి, పయోగే దుక్కటం; నహానపరియోసానే ఆపత్తి పాచిత్తియస్స.

అనాదియిత్వా తిణ్ణం దుబ్బణ్ణకరణానం అఞ్ఞతరం దుబ్బణ్ణకరణం నవం చీవరం పరిభుఞ్జన్తో ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే ఆపత్తి పాచిత్తియస్స.

భిక్ఖుస్స వా భిక్ఖునియా వా సిక్ఖమానాయ వా సామణేరస్స వా సామణేరియా వా సామం చీవరం వికప్పేత్వా అప్పచ్చుద్ధారణం పరిభుఞ్జన్తో ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే ఆపత్తి పాచిత్తియస్స.

భిక్ఖుస్స పత్తం వా చీవరం వా నిసీదనం వా సూచిఘరం వా కాయబన్ధనం వా అపనిధేన్తో ద్వే ఆపత్తియో ఆపజ్జతి. అపనిధేతి, పయోగే దుక్కటం; అపనిధితే ఆపత్తి పాచిత్తియస్స.

సురామేరయవగ్గో ఛట్ఠో.

౭. సప్పాణకవగ్గో

౧౭౧. సఞ్చిచ్చ పాణం జీవితా వోరోపేన్తో కతి ఆపత్తియో ఆపజ్జతి? సఞ్చిచ్చ పాణం జీవితా వోరోపేన్తో చతస్సో ఆపత్తియో ఆపజ్జతి. అనోదిస్స ఓపాతం ఖణతి – ‘‘యో కోచి పపతిత్వా మరిస్సతీ’’తి, ఆపత్తి దుక్కటస్స; మనుస్సో తస్మిం పపతిత్వా మరతి, ఆపత్తి పారాజికస్స; యక్ఖో వా పేతో వా తిరచ్ఛానగతమనుస్సవిగ్గహో వా తస్మిం పపతిత్వా మరతి, ఆపత్తి థుల్లచ్చయస్స; తిరచ్ఛానగతో తస్మిం పపతిత్వా మరతి, ఆపత్తి పాచిత్తియస్స – సఞ్చిచ్చ పాణం జీవితా వోరోపేన్తో ఇమా చతస్సో ఆపత్తియో ఆపజ్జతి.

జానం సప్పాణకం ఉదకం పరిభుఞ్జన్తో ద్వే ఆపత్తియో ఆపజ్జతి. పరిభుఞ్జతి, పయోగే దుక్కటం; పరిభుత్తే ఆపత్తి పాచిత్తియస్స.

జానం యథాధమ్మం నిహతాధికరణం పునకమ్మాయ ఉక్కోటేన్తో ద్వే ఆపత్తియో ఆపజ్జతి. ఉక్కోటేతి, పయోగే దుక్కటం; ఉక్కోటితే ఆపత్తి పాచిత్తియస్స.

భిక్ఖుస్స జానం దుట్ఠుల్లం ఆపత్తిం పటిచ్ఛాదేన్తో ఏకం ఆపత్తిం ఆపజ్జతి. పాచిత్తియం.

జానం ఊనవీసతివస్సం పుగ్గలం ఉపసమ్పాదేన్తో ద్వే ఆపత్తియో ఆపజ్జతి. ఉపసమ్పాదేతి, పయోగే దుక్కటం; ఉపసమ్పాదితే ఆపత్తి పాచిత్తియస్స.

జానం థేయ్యసత్థేన సద్ధిం సంవిధాయ ఏకద్ధానమగ్గం పటిపజ్జన్తో ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే ఆపత్తి పాచిత్తియస్స.

మాతుగామేన సద్ధిం సంవిధాయ ఏకద్ధానమగ్గం పటిపజ్జన్తో ద్వే ఆపత్తియో ఆపజ్జతి. పటిపజ్జతి, పయోగే దుక్కటం; పటిపన్నే ఆపత్తి పాచిత్తియస్స.

పాపికాయ దిట్ఠియా యావతతియం సమనుభాసనాయ న పటినిస్సజ్జన్తో ద్వే ఆపత్తియో ఆపజ్జతి. ఞత్తియా దుక్కటం; కమ్మవాచాపరియోసానే ఆపత్తి పాచిత్తియస్స.

జానం తథావాదినా భిక్ఖునా అకటానుధమ్మేన తం దిట్ఠిం అప్పటినిస్సట్ఠేన సద్ధిం సమ్భుఞ్జన్తో ద్వే ఆపత్తియో ఆపజ్జతి. సమ్భుఞ్జతి, పయోగే దుక్కటం; సమ్భుత్తే ఆపత్తి పాచిత్తియస్స.

జానం తథానాసితం సమణుద్దేసం ఉపలాపేన్తో ద్వే ఆపత్తియో ఆపజ్జతి. ఉపలాపేతి, పయోగే దుక్కటం; ఉపలాపితే ఆపత్తి పాచిత్తియస్స.

సప్పాణకవగ్గో సత్తమో.

౮. సహధమ్మికవగ్గో

౧౭౨. భిక్ఖూహి సహధమ్మికం వుచ్చమానో – ‘‘న తావాహం, ఆవుసో, ఏతస్మిం సిక్ఖాపదే సిక్ఖిస్సామి యావ న అఞ్ఞం భిక్ఖుం బ్యత్తం వినయధరం పరిపుచ్ఛిస్సామీ’’తి భణన్తో ద్వే ఆపత్తియో ఆపజ్జతి. భణతి, పయోగే దుక్కటం; భణితే ఆపత్తి పాచిత్తియస్స.

వినయం వివణ్ణేన్తో ద్వే ఆపత్తియో ఆపజ్జతి. వివణ్ణేతి, పయోగే దుక్కటం; వివణ్ణితే ఆపత్తి పాచిత్తియస్స.

మోహేన్తో ద్వే ఆపత్తియో ఆపజ్జతి. అనారోపితే మోహే మోహేతి, ఆపత్తి దుక్కటస్స; ఆరోపితే మోహే మోహేతి, ఆపత్తి పాచిత్తియస్స.

భిక్ఖుస్స కుపితో అనత్తమనో పహారం దేన్తో ద్వే ఆపత్తియో ఆపజ్జతి. పహరతి, పయోగే దుక్కటం; పహతే ఆపత్తి పాచిత్తియస్స.