౬. సురుసురువగ్గో

౧౫౫. అనాదరియం పటిచ్చ సురుసురుకారకం భుఞ్జన్తస్స దుక్కటం కత్థ పఞ్ఞత్తన్తి? కోసమ్బియం పఞ్ఞత్తం. కం ఆరబ్భాతి? సమ్బహులే భిక్ఖూ ఆరబ్భ. కిస్మిం వత్థుస్మిన్తి? సమ్బహులా భిక్ఖూ సురుసురుకారకం ఖీరం పివింసు, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ హత్థనిల్లేహకం భుఞ్జన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ పత్తనిల్లేహకం భుఞ్జన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ ఓట్ఠనిల్లేహకం భుఞ్జన్తస్స దుక్కటం…పే… ఏకా పఞ్ఞత్తి. ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ సామిసేన హత్థేన పానీయథాలకం పటిగ్గణ్హన్తస్స దుక్కటం కత్థ పఞ్ఞత్తన్తి? భగ్గేసు పఞ్ఞత్తం. కం ఆరబ్భాతి? సమ్బహులే భిక్ఖూ ఆరబ్భ. కిస్మిం వత్థుస్మిన్తి? సమ్బహులా భిక్ఖూ సామిసేన హత్థేన పానీయథాలకం పటిగ్గహేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ ససిత్థకం పత్తధోవనం అన్తరఘరే ఛడ్డేన్తస్స దుక్కటం కత్థ పఞ్ఞత్తన్తి? భగ్గేసు పఞ్ఞత్తం. కం ఆరబ్భాతి? సమ్బహులే భిక్ఖూ ఆరబ్భ. కిస్మిం వత్థుస్మిన్తి? సమ్బహులా భిక్ఖూ ససిత్థకం పత్తధోవనం అన్తరఘరే ఛడ్డేసుం, తస్మిం వత్థుస్మిం. ఏకా పఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – కాయతో చ చిత్తతో చ సముట్ఠాతి, న వాచతో…పే….

అనాదరియం పటిచ్చ ఛత్తపాణిస్స ధమ్మం దేసేన్తస్స దుక్కటం కత్థ పఞ్ఞత్తన్తి? సావత్థియం పఞ్ఞత్తం. కం ఆరబ్భాతి? ఛబ్బగ్గియే భిక్ఖూ ఆరబ్భ. కిస్మిం వత్థుస్మిన్తి? ఛబ్బగ్గియా భిక్ఖూ ఛత్తపాణిస్స ధమ్మం దేసేసుం, తస్మిం వత్థుస్మిం. ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ దణ్డపాణిస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ సత్థపాణిస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

అనాదరియం పటిచ్చ ఆవుధపాణిస్స ధమ్మం దేసేన్తస్స దుక్కటం…పే… ఏకా పఞ్ఞత్తి, ఏకా అనుపఞ్ఞత్తి. ఛన్నం ఆపత్తిసముట్ఠానానం ఏకేన సముట్ఠానేన సముట్ఠాతి – వాచతో చ చిత్తతో చ సముట్ఠాతి, న కాయతో…పే….

సురుసురువగ్గో ఛట్ఠో.