౯. సాసఙ్కసిక్ఖాపదం

౬౫౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖూ వుత్థవస్సా ఆరఞ్ఞకేసు సేనాసనేసు విహరన్తి. కత్తికచోరకా భిక్ఖూ – ‘‘లద్ధలాభా’’తి పరిపాతేన్తి. భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, ఆరఞ్ఞకేసు సేనాసనేసు విహరన్తేన తిణ్ణం చీవరానం అఞ్ఞతరం చీవరం అన్తరఘరే నిక్ఖిపితు’’న్తి.

తేన ఖో పన సమయేన భిక్ఖూ – ‘‘భగవతా అనుఞ్ఞాతం ఆరఞ్ఞకేసు సేనాసనేసు విహరన్తేన తిణ్ణం చీవరానం అఞ్ఞతరం చీవరం అన్తరఘరే నిక్ఖిపితు’’న్తి తిణ్ణం చీవరానం అఞ్ఞతరం చీవరం అన్తరఘరే నిక్ఖిపిత్వా అతిరేకఛారత్తం విప్పవసన్తి. తాని చీవరాని నస్సన్తిపి వినస్సన్తిపి డయ్హన్తిపి ఉన్దూరేహిపి ఖజ్జన్తి. భిక్ఖూ దుచ్చోళా హోన్తి లూఖచీవరా. భిక్ఖూ ఏవమాహంసు – ‘‘కిస్స తుమ్హే, ఆవుసో, దుచ్చోళా లూఖచీవరా’’తి? అథ ఖో తే భిక్ఖూ భిక్ఖూనం ఏతమత్థం ఆరోచేసుం. యే తే భిక్ఖూ అప్పిచ్ఛా… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖూ తిణ్ణం చీవరానం అఞ్ఞతరం చీవరం అన్తరఘరే నిక్ఖిపిత్వా అతిరేకఛారత్తం విప్పవసిస్సన్తీ’’తి! అథ ఖో తే భిక్ఖూ తే అనేకపరియాయేన విగరహిత్వా భగవతో ఏతమత్థం ఆరోచేసుం…పే… సచ్చం కిర, భిక్ఖవే, భిక్ఖూ తిణ్ణం చీవరానం అఞ్ఞతరం చీవరం అన్తరఘరే నిక్ఖిపిత్వా అతిరేకఛారత్తం విప్పవసన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తే, భిక్ఖవే, మోఘపురిసా తిణ్ణం చీవరానం అఞ్ఞతరం చీవరం అన్తరఘరే నిక్ఖిపిత్వా అతిరేకఛారత్తం విప్పవసిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౬౫౩. ‘‘ఉపవస్సం ఖో పన కత్తికపుణ్ణమం యాని ఖో పన తాని ఆరఞ్ఞకాని సేనాసనాని సాసఙ్కసమ్మతాని సప్పటిభయాని తథారూపేసు భిక్ఖు సేనాసనేసు విహరన్తో ఆకఙ్ఖమానో తిణ్ణం చీవరానం అఞ్ఞతరం చీవరం అన్తరఘరే నిక్ఖిపేయ్య, సియా చ తస్స భిక్ఖునో కోచిదేవ పచ్చయో తేన చీవరేన విప్పవాసాయ. ఛారత్తపరమం తేన భిక్ఖునా తేన చీవరేన విప్పవసితబ్బం. తతో చే ఉత్తరి విప్పవసేయ్య, అఞ్ఞత్ర భిక్ఖుసమ్ముతియా, నిస్సగ్గియం పాచిత్తియ’’న్తి.

౬౫౪. ఉపవస్సం ఖో పనాతి వుట్ఠవస్సానం.

కత్తికపుణ్ణమన్తి కత్తికచాతుమాసినీ వుచ్చతి.

[పాచి. ౫౭౩] యాని ఖో పన తాని ఆరఞ్ఞకాని సేనాసనానీతి ఆరఞ్ఞకం నామ సేనాసనం పఞ్చధనుసతికం పచ్ఛిమం.

[పాచి. ౫౭౩] సాసఙ్కం నామ ఆరామే ఆరామూపచారే చోరానం నివిట్ఠోకాసో దిస్సతి, భుత్తోకాసో దిస్సతి, ఠితోకాసో దిస్సతి, నిసిన్నోకాసో దిస్సతి, నిపన్నోకాసో దిస్సతి.

[పాచి. ౫౭౩] సప్పటిభయం నామ ఆరామే ఆరామూపచారే చోరేహి మనుస్సా హతా దిస్సన్తి, విలుత్తా దిస్సన్తి, ఆకోటితా దిస్సన్తి.

[పాచి. ౫౭౩] తథారూపేసు భిక్ఖు సేనాసనేసు విహరన్తోతి ఏవరూపేసు భిక్ఖు సేనాసనేసు విహరన్తో.

ఆకఙ్ఖమానోతి ఇచ్ఛమానో.

తిణ్ణం చీవరానం అఞ్ఞతరం చీవరన్తి సఙ్ఘాటిం వా ఉత్తరాసఙ్గం వా అన్తరవాసకం వా.

అన్తరఘరే నిక్ఖిపేయ్యాతి సమన్తా గోచరగామే నిక్ఖిపేయ్య.

సియా చ తస్స భిక్ఖునో కోచిదేవ పచ్చయో తేన చీవరేన విప్పవాసాయాతి సియా పచ్చయో సియా కరణీయం.

ఛారత్తపరమం తేన భిక్ఖునా తేన చీవరేన విప్పవసితబ్బన్తి ఛారత్తపరమతా విప్పవసితబ్బం.

అఞ్ఞత్ర భిక్ఖుసమ్ముతియాతి ఠపేత్వా భిక్ఖుసమ్ముతిం.

తతో చే ఉత్తరి విప్పవసేయ్యాతి సత్తమే అరుణుగ్గమనే నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బం. ‘‘ఇదం మే, భన్తే, చీవరం అతిరేకఛారత్తం విప్పవుట్ఠం, అఞ్ఞత్ర భిక్ఖుసమ్ముతియా, నిస్సగ్గియం. ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౬౫౫. అతిరేకఛారత్తే అతిరేకసఞ్ఞీ విప్పవసతి, అఞ్ఞత్ర భిక్ఖుసమ్ముతియా, నిస్సగ్గియం పాచిత్తియం. అతిరేకఛారత్తే వేమతికో విప్పవసతి, అఞ్ఞత్ర భిక్ఖుసమ్ముతియా, నిస్సగ్గియం పాచిత్తియం. అతిరేకఛారత్తే ఊనకసఞ్ఞీ విప్పవసతి, అఞ్ఞత్ర భిక్ఖుసమ్ముతియా, నిస్సగ్గియం పాచిత్తియం. అప్పచ్చుద్ధటే పచ్చుద్ధటసఞ్ఞీ…పే… అవిస్సజ్జితే విస్సజ్జితసఞ్ఞీ… అనట్ఠే నట్ఠసఞ్ఞీ… అవినట్ఠే వినట్ఠసఞ్ఞీ… అదడ్ఢే దడ్ఢసఞ్ఞీ … అవిలుత్తే విలుత్తసఞ్ఞీ విప్పవసతి, అఞ్ఞత్ర భిక్ఖుసమ్ముతియా, నిస్సగ్గియం పాచిత్తియం.

నిస్సగ్గియం చీవరం అనిస్సజ్జిత్వా పరిభుఞ్జతి, ఆపత్తి దుక్కటస్స. ఊనకఛారత్తే అతిరేకసఞ్ఞీ, ఆపత్తి దుక్కటస్స. ఊనకఛారత్తే వేమతికో, ఆపత్తి దుక్కటస్స. ఊనకఛారత్తే ఊనకసఞ్ఞీ, అనాపత్తి.

౬౫౬. అనాపత్తి – ఛారత్తం విప్పవసతి, ఊనకఛారత్తం విప్పవసతి, ఛారత్తం విప్పవసిత్వా పున గామసీమం ఓక్కమిత్వా వసిత్వా పక్కమతి, అన్తో ఛారత్తం పచ్చుద్ధరతి, విస్సజ్జేతి, నస్సతి, వినస్సతి, డయ్హతి, అచ్ఛిన్దిత్వా గణ్హన్తి, విస్సాసం గణ్హన్తి, భిక్ఖుసమ్ముతియా, ఉమ్మత్తకస్స, ఆదికమ్మికస్సాతి.

సాసఙ్కసిక్ఖాపదం నిట్ఠితం నవమం.