౧. కోసియసిక్ఖాపదం

౫౪౨. తేన సమయేన బుద్ధో భగవా ఆళవియం విహరతి అగ్గాళవే చేతియే. తేన ఖో పన సమయేన ఛబ్బగ్గియా భిక్ఖూ కోసియకారకే ఉపసఙ్కమిత్వా ఏవం వదన్తి – ‘‘బహూ, ఆవుసో, కోసకారకే పచథ, అమ్హాకమ్పి దస్సథ, మయమ్పి ఇచ్ఛామ కోసియమిస్సకం సన్థతం కాతు’’న్తి. తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా అమ్హే ఉపసఙ్కమిత్వా ఏవం వక్ఖన్తి – ‘బహూ, ఆవుసో, కోసకారకే పచథ, అమ్హాకమ్పి దస్సథ, మయమ్పి ఇచ్ఛామ కోసియమిస్సకం సన్థతం కాతు’న్తి! అమ్హాకమ్పి అలాభా, అమ్హాకమ్పి దుల్లద్ధం, యే మయం ఆజీవస్స హేతు పుత్తదారస్స కారణా బహూ ఖుద్దకే పాణే సఙ్ఘాతం ఆపాదేమా’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ కోసియకారకే ఉపసఙ్కమిత్వా ఏవం వక్ఖన్తి – ‘బహూ, ఆవుసో, కోసకారకే పచథ, అమ్హాకమ్పి దస్సథ, మయమ్పి ఇచ్ఛామ కోసియమిస్సకం సన్థతం కాతు’’’న్తి! అథ ఖో తే భిక్ఖూ ఛబ్బగ్గియే భిక్ఖూ అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర తుమ్హే, భిక్ఖవే, కోసియకారకే ఉపసఙ్కమిత్వా ఏవం వదేథ – ‘బహూ, ఆవుసో, కోసకారకే పచథ, అమ్హాకమ్పి దస్సథ, మయమ్పి ఇచ్ఛామ కోసియమిస్సకం సన్థతం కాతు’’’న్తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, కోసియకారకే ఉపసఙ్కమిత్వా ఏవం వక్ఖథ – బహూ, ఆవుసో, కోసకారకే పచథ, అమ్హాకమ్పి దస్సథ, మయమ్పి ఇచ్ఛామ కోసియమిస్సకం సన్థతం కాతున్తి. నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౪౩. ‘‘యో పన భిక్ఖు కోసియమిస్సకం సన్థతం కారాపేయ్య, నిస్సగ్గియం పాచిత్తియ’’న్తి.

౫౪౪. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

సన్థతం నామ సన్థరిత్వా కతం హోతి అవాయిమం.

కారాపేయ్యాతి ఏకేనపి కోసియంసునా మిస్సిత్వా కరోతి వా కారాపేతి వా, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా పుగ్గలస్స వా. ఏవఞ్చ పన, భిక్ఖవే, నిస్సజ్జితబ్బ…పే… ఇదం మే, భన్తే, కోసియమిస్సకం సన్థతం కారాపితం నిస్సగ్గియం. ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… ఆయస్మతో దమ్మీతి.

౫౪౫. అత్తనా విప్పకతం అత్తనా పరియోసాపేతి, నిస్సగ్గియం పాచిత్తియం. అత్తనా విప్పకతం పరేహి పరియోసాపేతి, నిస్సగ్గియం పాచిత్తియం. పరేహి విప్పకతం అత్తనా పరియోసాపేతి, నిస్సగ్గియం పాచిత్తియం. పరేహి విప్పకతం పరేహి పరియోసాపేతి, నిస్సగ్గియం పాచిత్తియం.

అఞ్ఞస్సత్థాయ కరోతి వా కారాపేతి వా, ఆపత్తి దుక్కటస్స. అఞ్ఞేన కతం పటిలభిత్వా పరిభుఞ్జతి, ఆపత్తి దుక్కటస్స.

౫౪౬. అనాపత్తి వితానం వా భూమత్థరణం వా సాణిపాకారం వా భిసిం వా బిబ్బోహనం వా కరోతి, ఉమ్మత్తకస్స, ఆదికమ్మికస్సాతి.

కోసియసిక్ఖాపదం నిట్ఠితం పఠమం.