౩. అనియతకణ్డం
౧. పఠమఅనియతసిక్ఖాపదం
ఇమే ఖో పనాయస్మన్తో ద్వే అనియతా ధమ్మా
ఉద్దేసం ఆగచ్ఛన్తి.
౪౪౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉదాయీ సావత్థియం కులూపకో హోతి, బహుకాని కులాని ఉపసఙ్కమతి. తేన ఖో పన సమయేన ఆయస్మతో ఉదాయిస్స ఉపట్ఠాకకులస్స కుమారికా అఞ్ఞతరస్స కులస్స కుమారకస్స దిన్నా హోతి. అథ ఖో ఆయస్మా ఉదాయీ పుబ్బణ్హసమయం నివాసేత్వా పత్తచీవరమాదాయ యేన తం కులం తేనుపసఙ్కమి; ఉపసఙ్కమిత్వా మనుస్సే పుచ్ఛి – ‘‘కహం ఇత్థన్నామా’’తి? తే ఏవమాహంసు – ‘‘దిన్నా, భన్తే, అముకస్స కులస్స కుమారకస్సా’’తి. తమ్పి ఖో కులం ఆయస్మతో ఉదాయిస్స ఉపట్ఠాకం హోతి. అథ ఖో ఆయస్మా ఉదాయీ యేన తం కులం తేనుపసఙ్కమి; ఉపసఙ్కమిత్వా మనుస్సే పుచ్ఛి – ‘‘కహం ఇత్థన్నామా’’తి? తే ఏవమాహంసు – ‘‘ఏసాయ్య, ఓవరకే నిసిన్నా’’తి. అథ ఖో ఆయస్మా ఉదాయీ యేన సా కుమారికా తేనుపసఙ్కమి; ఉపసఙ్కమిత్వా తస్సా కుమారికాయ సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేసి కాలయుత్తం సముల్లపన్తో కాలయుత్తం ధమ్మం భణన్తో.
తేన ఖో పన సమయేన విసాఖా మిగారమాతా బహుపుత్తా హోతి బహునత్తా అరోగపుత్తా అరోగనత్తా అభిమఙ్గలసమ్మతా. మనుస్సా యఞ్ఞేసు ఛణేసు ఉస్సవేసు విసాఖం మిగారమాతరం పఠమం భోజేన్తి. అథ ఖో విసాఖా మిగారమాతా నిమన్తితా తం కులం అగమాసి. అద్దసా ఖో విసాఖా మిగారమాతా ఆయస్మన్తం ఉదాయిం తస్సా కుమారికాయ సద్ధిం ఏకం ఏకాయ రహో పటిచ్ఛన్నే ఆసనే అలంకమ్మనియే నిసిన్నం. దిస్వాన ఆయస్మన్తం ఉదాయిం ఏతదవోచ – ‘‘ఇదం, భన్తే, నచ్ఛన్నం నప్పతిరూపం యం అయ్యో మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేతి. కిఞ్చాపి, భన్తే, అయ్యో అనత్థికో తేన ధమ్మేన, అపిచ దుస్సద్ధాపయా అప్పసన్నా మనుస్సా’’తి. ఏవమ్పి ఖో ఆయస్మా ఉదాయీ విసాఖాయ మిగారమాతుయా వుచ్చమానో నాదియి. అథ ఖో విసాఖా మిగారమాతా నిక్ఖమిత్వా భిక్ఖూనం ఏతమత్థం ఆరోచేసి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉదాయీ మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేస్సతీ’’తి! అథ ఖో తే భిక్ఖూ ఆయస్మన్తం ఉదాయిం అనేకపరియాయేన విగరహిత్వా భగవతో ఏతమత్థం ఆరోచేసుం…పే… ‘‘సచ్చం కిర త్వం, ఉదాయి, మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేసీ’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౪౪౪. ‘‘యో పన భిక్ఖు మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేయ్య, తమేనం సద్ధేయ్యవచసా ఉపాసికా దిస్వా తిణ్ణం ధమ్మానం అఞ్ఞతరేన వదేయ్య – పారాజికేన వా సఙ్ఘాదిసేసేన వా పాచిత్తియేన వా, నిసజ్జం భిక్ఖు పటిజానమానో తిణ్ణం ధమ్మానం అఞ్ఞతరేన కారేతబ్బో – పారాజికేన వా సఙ్ఘాదిసేసేన వా పాచిత్తియేన వా యేన వా సా సద్ధేయ్యవచసా ఉపాసికా వదేయ్య, తేన సో భిక్ఖు కారేతబ్బో. అయం ధమ్మో అనియతో’’తి.
౪౪౫. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
మాతుగామో నామ మనుస్సిత్థీ, న యక్ఖీ న పేతీ న తిరచ్ఛానగతా. అన్తమసో తదహుజాతాపి దారికా, పగేవ మహత్తరీ.
సద్ధిన్తి ఏకతో.
ఏకో ఏకాయాతి భిక్ఖు చేవ హోతి మాతుగామో చ.
రహో నామ చక్ఖుస్స రహో, సోతస్స రహో. చక్ఖుస్స రహోనామ న సక్కా హోతి అక్ఖిం వా నిఖణీయమానే భముకం వా ఉక్ఖిపీయమానే సీసం వా ఉక్ఖిపీయమానే పస్సితుం. సోతస్స రహోనామ న సక్కా హోతి పకతికథా సోతుం.
పటిచ్ఛన్నం నామ ఆసనం కుట్టేన వా [కుడ్డేన వా (సీ. స్యా.)] కవాటేన వా కిలఞ్జేన వా సాణిపాకారేన వా రుక్ఖేన వా థమ్భేన వా కోత్థళియా వా యేన కేనచి పటిచ్ఛన్నం హోతి.
అలంకమ్మనియేతి సక్కా హోతి మేథునం ధమ్మం పటిసేవితుం.
నిసజ్జం కప్పేయ్యాతి మాతుగామే నిసిన్నే భిక్ఖు ఉపనిసిన్నో వా హోతి ఉపనిపన్నో వా. భిక్ఖు నిసిన్నే మాతుగామో ఉపనిసిన్నో వా హోతి ఉపనిపన్నో వా. ఉభో వా నిసిన్నా హోన్తి ఉభో వా నిపన్నా.
సద్ధేయ్యవచసా నామ ఆగతఫలా అభిసమేతావినీ విఞ్ఞాతసాసనా.
ఉపాసికా నామ బుద్ధం సరణం గతా, ధమ్మం సరణం గతా, సఙ్ఘం సరణం గతా.
దిస్వాతి పస్సిత్వా.
తిణ్ణం ధమ్మానం అఞ్ఞతరేన వదేయ్య – పారాజికేన వా సఙ్ఘాదిసేసేన వా పాచిత్తియేన వా. నిసజ్జం భిక్ఖు పటిజానమానో తిణ్ణం ధమ్మానం అఞ్ఞతరేన కారేతబ్బో – పారాజికేన వా సఙ్ఘాదిసేసేన వా పాచిత్తియేన వా. యేన వా సా సద్ధేయ్యవచసా ఉపాసికా వదేయ్య తేన సో భిక్ఖు కారేతబ్బో.
౪౪౬. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామస్స మేథునం ధమ్మం పటిసేవన్తో’’తి, సో చ తం పటిజానాతి, ఆపత్తియా కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామస్స మేథునం ధమ్మం పటిసేవన్తో’’తి, సో చే ఏవం వదేయ్య – ‘‘సచ్చాహం నిసిన్నో, నో చ ఖో మేథునం ధమ్మం పటిసేవి’’న్తి, నిసజ్జాయ కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామస్స మేథునం ధమ్మం పటిసేవన్తో’’తి, సో చే ఏవం వదేయ్య – ‘‘నాహం నిసిన్నో, అపిచ ఖో నిపన్నో’’తి, నిపజ్జాయ కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామస్స మేథునం ధమ్మం పటిసేవన్తో’’తి, సో చే ఏవం వదేయ్య – ‘‘నాహం నిసిన్నో అపిచ ఖో ఠితో’’తి, న కారేతబ్బో.
౪౪౭. సా చే ఏవం వదేయ్య – ‘‘అయ్యో మయా దిట్ఠో నిపన్నో మాతుగామస్స మేథునం ధమ్మం పటిసేవన్తో’’తి, సో చ తం పటిజానాతి, ఆపత్తియా కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిపన్నో మాతుగామస్స మేథునం ధమ్మం పటిసేవన్తో’’తి, సో చే ఏవం వదేయ్య – ‘‘సచ్చాహం నిపన్నో, నో చ ఖో మేథునం ధమ్మం పటిసేవి’’న్తి, నిపజ్జాయ కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిపన్నో మాతుగామస్స మేథునం ధమ్మం పటిసేవన్తో’’తి, సో చే ఏవం వదేయ్య – ‘‘నాహం నిపన్నో, అపిచ ఖో నిసిన్నో’’తి, నిసజ్జాయ కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిపన్నో మాతుగామస్స మేథునం ధమ్మం పటిసేవన్తో’’తి, సో చే ఏవం వదేయ్య – ‘‘నాహం నిపన్నో అపిచ ఖో ఠితో’’తి, న కారేతబ్బో.
౪౪౮. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామేన సద్ధిం కాయసంసగ్గం సమాపజ్జన్తో’’తి, సో చ తం పటిజానాతి, ఆపత్తియా కారేతబ్బో…పే… సచ్చాహం నిసిన్నో నో చ ఖో కాయసంసగ్గం సమాపజ్జిన్తి, నిసజ్జాయ కారేతబ్బో…పే… నాహం నిసిన్నో అపిచ ఖో నిపన్నోతి, నిపజ్జాయ కారేతబ్బో…పే… నాహం నిసిన్నో అపిచ ఖో ఠితోతి, న కారేతబ్బో.
సా చే ఏవం వదేయ్య – ‘‘అయ్యో మయా దిట్ఠో నిపన్నో మాతుగామేన సద్ధిం కాయసంసగ్గం సమాపజ్జన్తో’’తి, సో చ తం పటిజానాతి, ఆపత్తియా కారేతబ్బో…పే… సచ్చాహం నిపన్నో, నో చ ఖో కాయసంసగ్గం సమాపజ్జిన్తి, నిపజ్జాయ కారేతబ్బో…పే… నాహం నిపన్నో, అపిచ ఖో నిసిన్నోతి, నిసజ్జాయ కారేతబ్బో…పే… నాహం నిపన్నో, అపిచ ఖో ఠితోతి, న కారేతబ్బో.
౪౪౯. సా చే ఏవం వదేయ్య – ‘‘అయ్యో మయా దిట్ఠో మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసిన్నో’’తి, సో చ తం పటిజానాతి, నిసజ్జాయ కారేతబ్బో…పే… నాహం నిసిన్నో అపిచ ఖో నిపన్నోతి, నిపజ్జాయ కారేతబ్బో…పే… నాహం నిసిన్నో, అపిచ ఖో ఠితోతి, న కారేతబ్బో.
౪౫౦. సా చే ఏవం వదేయ్య – ‘‘అయ్యో మయా దిట్ఠో మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిపన్నో’’తి, సో చ తం పటిజానాతి, నిపజ్జాయ కారేతబ్బో…పే… నాహం నిపన్నో, అపిచ ఖో నిసిన్నోతి, నిసజ్జాయ కారేతబ్బో…పే… నాహం నిపన్నో, అపిచ ఖో ఠితోతి, న కారేతబ్బో.
అనియతోతి న నియతో, పారాజికం వా సఙ్ఘాదిసేసో వా పాచిత్తియం వా.
౪౫౧. గమనం పటిజానాతి, నిసజ్జం పటిజానాతి, ఆపత్తిం పటిజానాతి, ఆపత్తియా కారేతబ్బో. గమనం పటిజానాతి, నిసజ్జం న పటిజానాతి, ఆపత్తిం పటిజానాతి, ఆపత్తియా కారేతబ్బో. గమనం పటిజానాతి, నిసజ్జం పటిజానాతి, ఆపత్తిం న పటిజానాతి, నిసజ్జాయ కారేతబ్బో. గమనం పటిజానాతి, నిసజ్జం న పటిజానాతి, ఆపత్తిం న పటిజానాతి, న కారేతబ్బో.
గమనం న పటిజానాతి, నిసజ్జం పటిజానాతి, ఆపత్తిం పటిజానాతి, ఆపత్తియా
కారేతబ్బో. గమనం న పటిజానాతి, నిసజ్జం న పటిజానాతి, ఆపత్తిం పటిజానాతి, ఆపత్తియా కారేతబ్బో. గమనం న పటిజానాతి, నిసజ్జం పటిజానాతి, ఆపత్తిం న పటిజానాతి, నిసజ్జాయ కారేతబ్బో. గమనం న పటిజానాతి, నిసజ్జం న పటిజానాతి, ఆపత్తిం న పటిజానాతి, న కారేతబ్బోతి.
పఠమో అనియతో నిట్ఠితో.
౨. దుతియఅనియతసిక్ఖాపదం
౪౫౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉదాయీ – ‘‘భగవతా పటిక్ఖిత్తం మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేతు’’న్తి తస్సాయేవ కుమారికాయ సద్ధిం ఏకో ఏకాయ రహో నిసజ్జం కప్పేసి కాలయుత్తం సముల్లపన్తో కాలయుత్తం ధమ్మం భణన్తో. దుతియమ్పి ఖో విసాఖా మిగారమాతా నిమన్తితా తం కులం అగమాసి. అద్దసా ఖో విసాఖా మిగారమాతా ఆయస్మన్తం ఉదాయిం తస్సాయేవ కుమారికాయ సద్ధిం ఏకం ఏకాయ రహో నిసిన్నం. దిస్వాన ఆయస్మన్తం ఉదాయిం ఏతదవోచ – ‘‘ఇదం, భన్తే, నచ్ఛన్నం నప్పతిరూపం యం అయ్యో మాతుగామేన సద్ధిం ఏకో ఏకాయ రహో నిసజ్జం కప్పేతి. కిఞ్చాపి, భన్తే, అయ్యో అనత్థికో తేన ధమ్మేన, అపిచ దుస్సద్ధాపయా అప్పసన్నా మనుస్సా’’తి. ఏవమ్పి ఖో ఆయస్మా ఉదాయీ విసాఖాయ మిగారమాతుయా వుచ్చమానో నాదియి. అథ ఖో విసాఖా మిగారమాతా నిక్ఖమిత్వా భిక్ఖూనం ఏతమత్థం ఆరోచేసి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉదాయీ మాతుగామేన సద్ధిం ఏకో ఏకాయ రహో నిసజ్జం కప్పేస్సతీ’’తి! అథ ఖో తే భిక్ఖూ ఆయస్మన్తం ఉదాయిం అనేకపరియాయేన విగరహిత్వా భగవతో ఏతమత్థం ఆరోచేసుం …పే… ‘‘సచ్చం కిర త్వం, ఉదాయి, మాతుగామేన సద్ధిం ఏకో ఏకాయ రహో నిసజ్జం కప్పేసీ’’తి? ‘‘సచ్చం భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, మాతుగామేన సద్ధిం ఏకో ఏకాయ రహో నిసజ్జం కప్పేస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౪౫౩. ‘‘న హేవ ఖో పన పటిచ్ఛన్నం ఆసనం హోతి నాలం కమ్మనియం, అలఞ్చ ఖో హోతి మాతుగామం దుట్ఠుల్లాహి వాచాహి ఓభాసితుం. యో పన భిక్ఖు తథారూపే ఆసనే మాతుగామేన సద్ధిం ఏకో ఏకాయ రహో నిసజ్జం కప్పేయ్య, తమేనం సద్ధేయ్యవచసా ఉపాసికా దిస్వా ద్విన్నం ధమ్మానం అఞ్ఞతరేన వదేయ్య – సఙ్ఘాదిసేసేన వా పాచిత్తియేన వా. నిసజ్జం భిక్ఖు పటిజానమానో ద్విన్నం ధమ్మానం అఞ్ఞతరేన కారేతబ్బో – సఙ్ఘాదిసేసేన వా పాచిత్తియేన వా. యేన వా సా సద్ధేయ్యవచసా ఉపాసికా వదేయ్య తేన సో భిక్ఖు కారేతబ్బో. అయమ్పి ధమ్మో అనియతో’’తి.
౪౫౪. న హేవ ఖో పన పటిచ్ఛన్నం ఆసనం హోతీతి అప్పటిచ్ఛన్నం హోతి కుట్టేన వా కవాటేన వా కిలఞ్జేన వా సాణిపాకారేన వా రుక్ఖేన వా థమ్భేన వా కోత్థళియా వా యేన కేనచి అప్పటిచ్ఛన్నం హోతి.
నాలం కమ్మనియన్తి న సక్కా హోతి మేథునం ధమ్మం పటిసేవితుం.
అలఞ్చ ఖో హోతి మాతుగామం దుట్ఠుల్లాహి వాచాహి ఓభాసితున్తి సక్కా హోతి మాతుగామం దుట్ఠుల్లాహి వాచాహి ఓభాసితుం.
యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
తథారూపే ఆసనేతి ఏవరూపే ఆసనే.
మాతుగామో నామ మనుస్సిత్థీ, న యక్ఖీ న పేతీ న తిరచ్ఛానగతా, విఞ్ఞూ పటిబలా సుభాసితదుబ్భాసితం దుట్ఠుల్లాదుట్ఠుల్లం ఆజానితుం.
సద్ధిన్తి ఏకతో.
ఏకో ఏకాయాతి భిక్ఖు చేవ హోతి మాతుగామో చ.
రహో నామ చక్ఖుస్స రహో, సోతస్స రహో. చక్ఖుస్స రహో నామ న సక్కా హోతి అక్ఖిం వా నిఖణీయమానే భముకం వా ఉక్ఖిపీయమానే సీసం వా ఉక్ఖిపీయమానే పస్సితుం. సోతస్స రహో నామ న సక్కా హోతి పకతికథా సోతుం.
నిసజ్జం కప్పేయ్యాతి మాతుగామే నిసిన్నే భిక్ఖు ఉపనిసిన్నో వా హోతి ఉపనిపన్నో వా. భిక్ఖు నిసిన్నే మాతుగామో ఉపనిసిన్నో వా హోతి ఉపనిపన్నో వా. ఉభో వా నిసిన్నా హోన్తి ఉభో వా నిపన్నా.
సద్ధేయ్యవచసా నామ ఆగతఫలా అభిసమేతావినీ విఞ్ఞాతసాసనా.
ఉపాసికా నామ బుద్ధం సరణం గతా, ధమ్మం సరణం గతా, సఙ్ఘం సరణం గతా.
దిస్వాతి పస్సిత్వా.
ద్విన్నం ధమ్మానం అఞ్ఞతరేన వదేయ్య సఙ్ఘాదిసేసేన వా పాచిత్తియేన వా. నిసజ్జం భిక్ఖు పటిజానమానో ద్విన్నం ధమ్మానం అఞ్ఞతరేన కారేతబ్బో – సఙ్ఘాదిసేసేన వా పాచిత్తియేన వా. యేన వా సా సద్ధేయ్యవచసా ఉపాసికా వదేయ్య, తేన సో భిక్ఖు కారేతబ్బో.
౪౫౫. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామేన సద్ధిం కాయసంసగ్గం సమాపజ్జన్తో’’తి, సో చ తం పటిజానాతి, ఆపత్తియా కారేతబ్బో. సా చే ఏవం వదేయ్య – ‘‘అయ్యో మయా దిట్ఠో నిసిన్నో మాతుగామేన సద్ధిం కాయసంసగ్గం సమాపజ్జన్తో’’తి, సో చే ఏవం వదేయ్య – ‘‘సచ్చాహం నిసిన్నో, నో చ ఖో కాయసంసగ్గం సమాపజ్జి’’న్తి, నిసజ్జాయ కారేతబ్బో…పే… నాహం నిసిన్నో, అపిచ ఖో నిపన్నోతి, నిపజ్జాయ కారేతబ్బో…పే… నాహం నిసిన్నో, అపిచ ఖో ఠితోతి, న కారేతబ్బో.
సా చే ఏవం వదేయ్య – ‘‘అయ్యో మయా దిట్ఠో నిపన్నో మాతుగామేన సద్ధిం కాయసంసగ్గం సమాపజ్జన్తో’’తి, సో చ తం పటిజానాతి, ఆపత్తియా కారేతబ్బో…పే… సచ్చాహం నిపన్నో, నో చ ఖో కాయసంసగ్గం సమాపజ్జిన్తి, నిపజ్జాయ కారేతబ్బో…పే… నాహం నిపన్నో, అపిచ ఖో నిసిన్నోతి, నిసజ్జాయ కారేతబ్బో …పే… నాహం నిపన్నో, అపిచ ఖో ఠితోతి, న కారేతబ్బో.
సా చే ఏవం వదేయ్య – ‘‘అయ్యస్స మయా సుతం నిసిన్నస్స మాతుగామం దుట్ఠుల్లాహి వాచాహి ఓభాసన్తస్సా’’తి, సో చ తం పటిజానాతి, ఆపత్తియా కారేతబ్బో. సా చే ఏవం వదేయ్య – ‘‘అయ్యస్స మయా సుతం నిసిన్నస్స మాతుగామం దుట్ఠుల్లాహి వాచాహి ఓభాసన్తస్సా’’తి, సో చే ఏవం వదేయ్య – ‘‘సచ్చాహం నిసిన్నో, నో చ ఖో దుట్ఠుల్లాహి వాచాహి ఓభాసి’’న్తి, నిసజ్జాయ కారేతబ్బో…పే… నాహం నిసిన్నో, అపిచ ఖో నిపన్నోతి, నిపజ్జాయ కారేతబ్బో…పే… నాహం నిసిన్నో, అపిచ ఖో ఠితోతి, న కారేతబ్బో.
సా చే ఏవం వదేయ్య – ‘‘అయ్యస్స మయా సుతం నిపన్నస్స మాతుగామం దుట్ఠుల్లాహి వాచాహి ఓభాసన్తస్సా’’తి, సో చ తం పటిజానాతి, ఆపత్తియా కారేతబ్బో…పే… సచ్చాహం నిపన్నో నో చ ఖో దుట్ఠుల్లాహి వాచాహి ఓభాసిన్తి, నిపజ్జాయ కారేతబ్బో…పే… నాహం నిపన్నో, అపిచ ఖో నిసిన్నోతి, నిసజ్జాయ కారేతబ్బో…పే… నాహం నిపన్నో, అపిచ ఖో ఠితోతి, న కారేతబ్బో.
౪౫౬. సా చే ఏవం వదేయ్య – ‘‘అయ్యో మయా దిట్ఠో మాతుగామేన సద్ధిం ఏకో ఏకాయ రహో నిసిన్నో’’తి, సో చ తం పటిజానాతి, నిసజ్జాయ కారేతబ్బో…పే… నాహం నిసిన్నో, అపిచ ఖో నిపన్నోతి, నిపజ్జాయ కారేతబ్బో…పే… నాహం నిసిన్నో, అపిచ ఖో ఠితోతి, న కారేతబ్బో.
సా చే ఏవం వదేయ్య – ‘‘అయ్యో మయా దిట్ఠో మాతుగామేన సద్ధిం ఏకో ఏకాయ రహో నిపన్నో’’తి, సో చ తం పటిజానాతి, నిపజ్జాయ కారేతబ్బో…పే… నాహం నిపన్నో, అపిచ ఖో నిసిన్నోతి, నిసజ్జాయ కారేతబ్బో…పే… నాహం నిపన్నో, అపిచ ఖో ఠితోతి, న కారేతబ్బో.
అయమ్పీతి పురిమం ఉపాదాయ వుచ్చతి.
అనియతోతి న నియతో, సఙ్ఘాదిసేసో వా పాచిత్తియం వా.
౪౫౭. గమనం పటిజానాతి నిసజ్జం పటిజానాతి ఆపత్తిం పటిజానాతి, ఆపత్తియా కారేతబ్బో. గమనం పటిజానాతి నిసజ్జం న పటిజానాతి ఆపత్తిం పటిజానాతి, ఆపత్తియా కారేతబ్బో. గమనం పటిజానాతి నిసజ్జం పటిజానాతి ఆపత్తిం న పటిజానాతి, నిసజ్జాయ కారేతబ్బో. గమనం పటిజానాతి నిసజ్జం న పటిజానాతి ఆపత్తిం న పటిజానాతి, న కారేతబ్బో.
గమనం న పటిజానాతి నిసజ్జం పటిజానాతి ఆపత్తిం పటిజానాతి, ఆపత్తియా కారేతబ్బో. గమనం న పటిజానాతి నిసజ్జం న పటిజానాతి ఆపత్తిం పటిజానాతి, ఆపత్తియా కారేతబ్బో. గమనం న పటిజానాతి నిసజ్జం పటిజానాతి ఆపత్తిం న పటిజానాతి, నిసజ్జాయ కారేతబ్బో. గమనం న పటిజానాతి నిసజ్జం న పటిజానాతి ఆపత్తిం న పటిజానాతి, న కారేతబ్బోతి.
దుతియో అనియతో నిట్ఠితో.
౪౫౮. ఉద్దిట్ఠా ఖో ఆయస్మన్తో ద్వే అనియతా ధమ్మా. తత్థాయస్మన్తే పుచ్ఛామి – ‘‘కచ్చిత్థ పరిసుద్ధా’’? దుతియమ్పి పుచ్ఛామి – ‘‘కచ్చిత్థ పరిసుద్ధా’’? తతియమ్పి పుచ్ఛామి – ‘‘కచ్చిత్థ పరిసుద్ధా’’? పరిసుద్ధేత్థాయస్మన్తో; తస్మా తుణ్హీ, ఏవమేతం ధారయామీతి.
తస్సుద్దానం –
అలం కమ్మనియఞ్చేవ, తథేవ చ నహేవ ఖో;
అనియతా సుపఞ్ఞత్తా, బుద్ధసేట్ఠేన తాదినాతి.
అనియతకణ్డం నిట్ఠితం.