౨. కాయసంసగ్గసిక్ఖాపదం

౨౬౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉదాయీ అరఞ్ఞే విహరతి. తస్సాయస్మతో విహారో అభిరూపో హోతి దస్సనీయో పాసాదికో, మజ్ఝేగబ్భో, సమన్తాపరియాగారో, సుపఞ్ఞత్తం మఞ్చపీఠం భిసిబిమ్బోహనం, పానీయం పరిభోజనీయం సుపట్ఠితం, పరివేణం సుసమ్మట్ఠం. బహూ మనుస్సా ఆయస్మతో ఉదాయిస్స విహారపేక్ఖకా ఆగచ్ఛన్తి. అఞ్ఞతరోపి బ్రాహ్మణో సపజాపతికో యేనాయస్మా ఉదాయీ తేనుపసఙ్కమి; ఉపసఙ్కమిత్వా ఆయస్మన్తం ఉదాయిం ఏతదవోచ – ‘‘ఇచ్ఛామ మయం భోతో ఉదాయిస్స విహారం పేక్ఖితు’’న్తి. ‘‘తేన హి, బ్రాహ్మణ, పేక్ఖస్సూ’’తి, అవాపురణం [అపాపురణం (స్యా.)] ఆదాయ ఘటికం ఉగ్ఘాటేత్వా కవాటం పణామేత్వా విహారం పావిసి. సోపి ఖో బ్రాహ్మణో ఆయస్మతో ఉదాయిస్స పిట్ఠితో పావిసి. సాపి ఖో బ్రాహ్మణీ తస్స బ్రాహ్మణస్స పిట్ఠితో పావిసి. అథ ఖో ఆయస్మా ఉదాయీ ఏకచ్చే వాతపానే వివరన్తో ఏకచ్చే వాతపానే థకేన్తో గబ్భం అనుపరిగన్త్వా పిట్ఠితో ఆగన్త్వా తస్సా బ్రాహ్మణియా అఙ్గమఙ్గాని పరామసి. అథ ఖో సో బ్రాహ్మణో ఆయస్మతా ఉదాయినా సద్ధిం పటిసమ్మోదిత్వా అగమాసి. అథ ఖో సో బ్రాహ్మణో అత్తమనో అత్తమనవాచం నిచ్ఛారేసి – ‘‘ఉళారా ఇమే సమణా సక్యపుత్తియా యే ఇమే ఏవరూపే అరఞ్ఞే విహరన్తి. భవమ్పి ఉదాయీ ఉళారో యో ఏవరూపే అరఞ్ఞే విహరతీ’’తి.

ఏవం వుత్తే సా బ్రాహ్మణీ తం బ్రాహ్మణం ఏతదవోచ – ‘‘కుతో తస్స ఉళారత్తతా! యథేవ మే త్వం అఙ్గమఙ్గాని పరామసి ఏవమేవ మే సమణో ఉదాయీ అఙ్గమఙ్గాని పరామసీ’’తి. అథ ఖో సో బ్రాహ్మణో ఉజ్ఝాయతి ఖియ్యతి విపాచేతి – ‘‘అలజ్జినో ఇమే సమణా సక్యపుత్తియా దుస్సీలా ముసావాదినో. ఇమే హి నామ ధమ్మచారినో సమచారినో బ్రహ్మచారినో సచ్చవాదినో సీలవన్తో కల్యాణధమ్మా పటిజానిస్సన్తి! నత్థి ఇమేసం సామఞ్ఞం నత్థి ఇమేసం బ్రహ్మఞ్ఞం, నట్ఠం ఇమేసం సామఞ్ఞం నట్ఠం ఇమేసం బ్రహ్మఞ్ఞం, కుతో ఇమేసం సామఞ్ఞం కుతో ఇమేసం బ్రహ్మఞ్ఞం, అపగతా ఇమే సామఞ్ఞా అపగతా ఇమే బ్రహ్మఞ్ఞా. కథఞ్హి నామ సమణో ఉదాయీ మమ భరియాయ అఙ్గమఙ్గాని పరామసిస్సతి! న హి సక్కా కులిత్థీహి కులధీతాహి కులకుమారీహి కులసుణ్హాహి కులదాసీహి ఆరామం వా విహారం వా గన్తుం. సచే [సచే హి (స్యా.)] కులిత్థియో కులధీతరో [కులధీతాయో (సీ. స్యా.)] కులకుమారియో కులసుణ్హాయో కులదాసియో ఆరామం వా విహారం వా గచ్ఛేయ్యుం, తాపి సమణా సక్యపుత్తియా దూసేయ్యు’’న్తి!

అస్సోసుం ఖో భిక్ఖు తస్స బ్రాహ్మణస్స ఉజ్ఝాయన్తస్స ఖియ్యన్తస్స విపాచేన్తస్స. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉదాయీ మాతుగామేన సద్ధిం కాయసంసగ్గం సమాపజ్జిస్సతీ’’తి! అథ ఖో తే భిక్ఖూ ఆయస్మన్తం ఉదాయిం అనేకపరియాయేన విగరహిత్వా భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా ఆయస్మన్తం ఉదాయిం పటిపుచ్ఛి – ‘‘సచ్చం కిర త్వం, ఉదాయి, మాతుగామేన సద్ధిం కాయసంసగ్గం సమాపజ్జసీ’’తి? ‘‘సచ్చం, భగవా’’తి. విగరహి బుద్ధో భగవా – ‘‘అననుచ్ఛవికం, మోఘపురిస, అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ త్వం, మోఘపురిస, మాతుగామేన సద్ధిం కాయసంసగ్గం సమాపజ్జిస్ససి! నను మయా, మోఘపురిస, అనేకపరియాయేన విరాగాయ ధమ్మో దేసితో నో సరాగాయ…పే… కామపరిళాహానం వూపసమో అక్ఖాతో. నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౨౭౦. ‘‘యో పన భిక్ఖు ఓతిణ్ణో విపరిణతేన చిత్తేన మాతుగామేన సద్ధిం కాయసంసగ్గం సమాపజ్జేయ్య హత్థగ్గాహం వా వేణిగ్గాహం వా అఞ్ఞతరస్స వా అఞ్ఞతరస్స వా అఙ్గస్స పరామసనం, సఙ్ఘాదిసేసో’’తి.

౨౭౧. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

ఓతిణ్ణో నామ సారత్తో అపేక్ఖవా పటిబద్ధచిత్తో.

విపరిణతన్తి రత్తమ్పి చిత్తం విపరిణతం. దుట్ఠమ్పి చిత్తం విపరిణతం. మూళ్హమ్పి చిత్తం విపరిణతం. అపిచ, రత్తం చిత్తం ఇమస్మిం అత్థే అధిప్పేతం విపరిణతన్తి.

మాతుగామో నామ మనుస్సిత్థీ, న యక్ఖీ న పేతీ, న తిరచ్ఛానగతా. అన్తమసో తదహుజాతాపి దారికా, పగేవ మహత్తరీ.

సద్ధిన్తి ఏకతో.

కాయసంసగ్గం సమాపజ్జేయ్యాతి అజ్ఝాచారో వుచ్చతి.

హత్థో నామ కప్పరం ఉపాదాయం యావ అగ్గనఖా.

వేణీ నామ సుద్ధకేసా వా, సుత్తమిస్సా వా, మాలామిస్సా వా, హిరఞ్ఞమిస్సా వా, సువణ్ణమిస్సా వా, ముత్తామిస్సా వా, మణిమిస్సా వా.

అఙ్గం నామ హత్థఞ్చ వేణిఞ్చ ఠపేత్వా అవసేసం అఙ్గం నామ.

౨౭౨. ఆమసనా, పరామసనా, ఓమసనా, ఉమ్మసనా, ఓలఙ్ఘనా, ఉల్లఙ్ఘనా, ఆకడ్ఢనా, పతికడ్ఢనా, అభినిగ్గణ్హనా, అభినిప్పీళనా, గహణం, ఛుపనం.

ఆమసనా నామ ఆమట్ఠమత్తా.

పరామసనా నామ ఇతోచితో చ సంచోపనా.

ఓమసనా నామ హేట్ఠా ఓరోపనా.

ఉమ్మసనా నామ ఉద్ధం ఉచ్చారణా.

ఓలఙ్ఘనా నామ హేట్ఠా ఓనమనా.

ఉల్లఙ్ఘనా నామ ఉద్ధం ఉచ్చారణా.

ఆకడ్ఢనా నామ ఆవిఞ్ఛనా [ఆవిఞ్జనా (సీ. స్యా.)].

పతికడ్ఢనా నామ పతిప్పణామనా.

అభినిగ్గణ్హనా నామ అఙ్గం గహేత్వా నిప్పీళనా.

అభినిప్పీళనా నామ కేనచి సహ నిప్పీళనా.

గహణం నామ గహితమత్తం.

ఛుపనం నామ ఫుట్ఠమత్తం.

సఙ్ఘాదిసేసోతి…పే… తేనపి వుచ్చతి సఙ్ఘాదిసేసోతి.

౨౭౩. ఇత్థీ చ హోతి ఇత్థిసఞ్ఞీ సారత్తో చ భిక్ఖు చ. నం ఇత్థియా కాయేన కాయం ఆమసతి పరామసతి ఓమసతి ఉమ్మసతి ఓలఙ్ఘేతి ఉల్లఙ్ఘేతి ఆకడ్ఢతి పతికడ్ఢతి అభినిగ్గణ్హాతి అభినిప్పీళేతి గణ్హాతి ఛుపతి, ఆపత్తి సఙ్ఘాదిసేసస్స.

ఇత్థీ చ హోతి వేమతికో సారత్తో చ. భిక్ఖు చ నం ఇత్థియా కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స.

ఇత్థీ చ హోతి పణ్డకసఞ్ఞీ సారత్తో చ. భిక్ఖు చ నం ఇత్థియా కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స.

ఇత్థీ చ హోతి పురిససఞ్ఞీ సారత్తో చ. భిక్ఖు చ నం ఇత్థియా కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స.

ఇత్థీ చ హోతి తిరచ్ఛానగతసఞ్ఞీ సారత్తో చ. భిక్ఖు చ నం ఇత్థియా కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స.

పణ్డకో చ హోతి పణ్డకసఞ్ఞీ సారత్తో చ. భిక్ఖు చ నం పణ్డకస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స.

పణ్డకో చ హోతి వేమతికో సారత్తో చ. భిక్ఖు చ నం పణ్డకస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

పణ్డకో చ హోతి పురిససఞ్ఞీ సారత్తో చ. భిక్ఖు చ నం పణ్డకస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

పణ్డకో చ హోతి తిరచ్ఛానగతసఞ్ఞీ సారత్తో చ. భిక్ఖు చ నం పణ్డకస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

పణ్డకో చ హోతి ఇత్థిసఞ్ఞీ సారత్తో చ. భిక్ఖు చ నం పణ్డకస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

పురిసో చ హోతి పురిససఞ్ఞీ సారత్తో చ. భిక్ఖు చ నం పురిసస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

పురిసో చ హోతి వేమతికో…పే… పురిసో చ హోతి తిరచ్ఛానగతసఞ్ఞీ… పురిసో చ హోతి ఇత్థిసఞ్ఞీ… పురిసో చ హోతి పణ్డకసఞ్ఞీ సారత్తో చ. భిక్ఖు చ నం పురిసస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

తిరచ్ఛానగతో చ హోతి తిరచ్ఛానగతసఞ్ఞీ సారత్తో చ. భిక్ఖు చ నం తిరచ్ఛానగతస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

తిరచ్ఛానగతో చ హోతి వేమతికో…పే… తిరచ్ఛానగతో చ హోతి ఇత్థిసఞ్ఞీ… తిరచ్ఛానగతో చ హోతి పణ్డకసఞ్ఞీ… తిరచ్ఛానగతో చ హోతి. పురిససఞ్ఞీ సారత్తో చ. భిక్ఖు చ నం తిరచ్ఛానగతస్స కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స.

ఏకమూలకం నిట్ఠితం.

౨౭౪. ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం సఙ్ఘాదిసేసానం.

ద్వే ఇత్థియో ద్విన్నం ఇత్థీనం వేమతికో సారత్తో చ. భిక్ఖు చ నం ద్విన్నం ఇత్థీనం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం థుల్లచ్చయానం.

ద్వే ఇత్థియో ద్విన్నం ఇత్థీనం పణ్డకసఞ్ఞీ…పే… పురిససఞ్ఞీ… తిరచ్ఛానగతసఞ్ఞీ సారత్తో చ. భిక్ఖు చ ద్విన్నం ఇత్థీనం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం థుల్లచ్చయానం.

ద్వే పణ్డకా ద్విన్నం పణ్డకానం పణ్డకసఞ్ఞీ సారత్తో చ భిక్ఖు చ నం ద్విన్నం పణ్డకానం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం థుల్లచ్చయానం.

ద్వే పణ్డకా ద్విన్నం పణ్డకానం వేమతికో…పే… పురిససఞ్ఞీ… తిరచ్ఛానగతసఞ్ఞీ… ఇత్థిసఞ్ఞీ సారత్తో చ. భిక్ఖు చ నం ద్విన్నం పణ్డకానం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

ద్వే పురిసా ద్విన్నం పురిసానం పురిససఞ్ఞీ సారత్తో చ భిక్ఖు చ నం ద్విన్నం పురిసానం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

ద్వే పురిసా ద్విన్నం పురిసానం వేమతికో…పే… తిరచ్ఛానగతసఞ్ఞీ… ఇత్థిసఞ్ఞీ… పణ్డకసఞ్ఞీ సారత్తో చ. భిక్ఖు చ నం ద్విన్నం పురిసానం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

ద్వే తిరచ్ఛానగతా ద్విన్నం తిరచ్ఛానగతానం తిరచ్ఛానగతసఞ్ఞీ సారత్తో చ. భిక్ఖు చ నం ద్విన్నం తిరచ్ఛానగతానం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

ద్వే తిరచ్ఛానగతా ద్విన్నం తిరచ్ఛానగతానం వేమతికో…పే… ఇత్థిసఞ్ఞీ… పణ్డకసఞ్ఞీ … పురిససఞ్ఞీ సారత్తో చ. భిక్ఖు చ నం ద్విన్నం తిరచ్ఛానగతానం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

౨౭౫. ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి సఙ్ఘాదిసేసేన దుక్కటస్స.

ఇత్థీ చ పణ్డకో చ ఉభిన్నం వేమతికో సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

ఇత్థీ చ పణ్డకో చ ఉభిన్నం పణ్డకసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం థుల్లచ్చయానం.

ఇత్థీ చ పణ్డకో చ ఉభిన్నం పురిససఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

ఇత్థీ చ పణ్డకో చ ఉభిన్నం తిరచ్ఛానగతసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

ఇత్థీ చ పురిసో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి సఙ్ఘాదిసేసేన దుక్కటస్స.

ఇత్థీ చ పురిసో చ ఉభిన్నం వేమతికో…పే… పణ్డకసఞ్ఞీ… పురిససఞ్ఞీ… తిరచ్ఛానగతసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

ఇత్థీ చ తిరచ్ఛానగతో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి సఙ్ఘాదిసేసేన దుక్కటస్స.

ఇత్థీ చ తిరచ్ఛానగతో చ ఉభిన్నం వేమతికో…పే… పణ్డకసఞ్ఞీ… పురిససఞ్ఞీ … తిరచ్ఛానగతసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

పణ్డకో చ పురిసో చ ఉభిన్నం పణ్డకసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

పణ్డకో చ పురిసో చ ఉభిన్నం వేమతికో…పే… పురిససఞ్ఞీ… తిరచ్ఛానగతసఞ్ఞీ… ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

పణ్డకో చ తిరచ్ఛానగతో చ ఉభిన్నం పణ్డకసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స.

పణ్డకో చ తిరచ్ఛానగతో చ ఉభిన్నం వేమతికో…పే… పురిససఞ్ఞీ… తిరచ్ఛానగతసఞ్ఞీ… ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

పురిసో చ తిరచ్ఛానగతో చ ఉభిన్నం పురిససఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

పురిసో చ తిరచ్ఛానగతో చ ఉభిన్నం వేమతికో…పే… తిరచ్ఛానగతసఞ్ఞీ… ఇత్థిసఞ్ఞీ… పణ్డకసఞ్ఞీ సారత్తో చ. భిక్ఖు చ నం ఉభిన్నం కాయేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం.

దుమూలకం నిట్ఠితం.

౨౭౬. ఇత్థీ చ హోతి ఇత్థిసఞ్ఞీ సారత్తో చ. భిక్ఖు చ నం ఇత్థియా కాయేన కాయపటిబద్ధం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం కాయేన కాయపటిబద్ధం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం థుల్లచ్చయానం …పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయేన కాయపటిబద్ధం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స…పే….

ఇత్థీ చ హోతి ఇత్థిసఞ్ఞీ సారత్తో చ. భిక్ఖు చ నం ఇత్థియా కాయపటిబద్ధేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం కాయపటిబద్ధేన కాయం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం థుల్లచ్చయానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయపటిబద్ధేన కాయం ఆమసతి పరామసతి…పే… గణ్హాతి ఛుపతి, ఆపత్తి థుల్లచ్చయేన దుక్కటస్స…పే….

ఇత్థీ చ హోతి ఇత్థిసఞ్ఞీ సారత్తో చ. భిక్ఖు చ నం ఇత్థియా కాయపటిబద్ధేన కాయపటిబద్ధం ఆమసతి పరామసతి…పే… గణ్హాతి ఛుపతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం కాయపటిబద్ధేన కాయపటిబద్ధం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం కాయపటిబద్ధేన కాయపటిబద్ధం ఆమసతి పరామసతి…పే… గణ్హాతి ఛుపతి, ఆపత్తి ద్విన్నం దుక్కటానం…పే….

ఇత్థీ చ హోతి ఇత్థిసఞ్ఞీ సారత్తో చ. భిక్ఖు చ నం ఇత్థియా నిస్సగ్గియేన కాయం ఆమసతి ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం నిస్సగ్గియేన కాయం ఆమసతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం నిస్సగ్గియేన కాయం ఆమసతి, ఆపత్తి ద్విన్నం దుక్కటానం…పే….

ఇత్థీ చ హోతి ఇత్థిసఞ్ఞీ సారత్తో చ. భిక్ఖు చ నం ఇత్థియా నిస్సగ్గియేన కాయపటిబద్ధం ఆమసతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం నిస్సగ్గియేన కాయపటిబద్ధం ఆమసతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం నిస్సగ్గియేన కాయపటిబద్ధం ఆమసతి, ఆపత్తి ద్విన్నం దుక్కటానం…పే….

ఇత్థీ చ హోతి ఇత్థిసఞ్ఞీ సారత్తో చ. భిక్ఖు చ నం ఇత్థియా నిస్సగ్గియేన నిస్సగ్గియం ఆమసతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. భిక్ఖు చ నం ద్విన్నం ఇత్థీనం నిస్సగ్గియేన నిస్సగ్గియం ఆమసతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. భిక్ఖు చ నం ఉభిన్నం నిస్సగ్గియేన నిస్సగ్గియం ఆమసతి, ఆపత్తి ద్విన్నం దుక్కటానం…పే….

భిక్ఖుపేయ్యాలో నిట్ఠితో.

౨౭౭. ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స కాయేన కాయం ఆమసతి పరామసతి ఓమసతి ఉమ్మసతి ఓలఙ్ఘేతి ఉల్లఙ్ఘేతి ఆకడ్ఢతి పతికడ్ఢతి అభినిగ్గణ్హాతి అభినిప్పీళేతి గణ్హాతి ఛుపతి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి సఙ్ఘాదిసేసస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స కాయేన కాయం ఆమసన్తి పరామసన్తి ఓమసన్తి ఉమ్మసన్తి ఓలఙ్ఘేన్తి ఉల్లఙ్ఘేన్తి ఆకడ్ఢన్తి పతికడ్ఢన్తి అభినిగ్గణ్హన్తి అభినిప్పీళేన్తి గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం సఙ్ఘాదిసేసానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స కాయేన కాయం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి సఙ్ఘాదిసేసేన దుక్కటస్స…పే….

ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స కాయేన కాయపటిబద్ధం ఆమసతి పరామసతి…పే… గణ్హాతి ఛుపతి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి థుల్లచ్చయస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స కాయేన కాయపటిబద్ధం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం థుల్లచ్చయానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స కాయేన కాయపటిబద్ధం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి థుల్లచ్చయేన దుక్కటస్స…పే….

ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స కాయపటిబద్ధేన కాయం ఆమసతి పరామసతి…పే… గణ్హాతి ఛుపతి సేవనాధిప్పాయో కాయేన వాయమతి ఫస్సం పటివిజానాతి, ఆపత్తి థుల్లచ్చయస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స కాయపటిబద్ధేన కాయం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం థుల్లచ్చయానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స కాయపటిబద్ధేన కాయం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి థుల్లచ్చయేన దుక్కటస్స…పే….

౨౭౮. ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స కాయపటిబద్ధేన కాయపటిబద్ధం ఆమసతి పరామసతి…పే… గణ్హాతి ఛుపతి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స కాయపటిబద్ధేన కాయపటిబద్ధం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స కాయపటిబద్ధేన కాయపటిబద్ధం ఆమసన్తి పరామసన్తి…పే… గణ్హన్తి ఛుపన్తి, సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స నిస్సగ్గియేన కాయం ఆమసతి. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స నిస్సగ్గియేన కాయం ఆమసన్తి. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స నిస్సగ్గియేన కాయం ఆమసన్తి. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స నిస్సగ్గియేన కాయపటిబద్ధం ఆమసతి. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స నిస్సగ్గియేన కాయపటిబద్ధం ఆమసన్తి. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స నిస్సగ్గియేన కాయపటిబద్ధం ఆమసన్తి. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ హోతి ఇత్థిసఞ్ఞీ సారత్తో చ. ఇత్థీ చ నం భిక్ఖుస్స నిస్సగ్గియేన నిస్సగ్గియం ఆమసతి. సేవనాధిప్పాయో కాయేన వాయమతి, న చ ఫస్సం పటివిజానాతి, ఆపత్తి దుక్కటస్స…పే….

ద్వే ఇత్థియో ద్విన్నం ఇత్థీనం ఇత్థిసఞ్ఞీ సారత్తో చ. ఇత్థియో చ నం భిక్ఖుస్స నిస్సగ్గియేన నిస్సగ్గియం ఆమసన్తి. సేవనాధిప్పాయో కాయేన వాయమతి, న చ ఫస్సం పటివిజానాతి, ఆపత్తి ద్విన్నం దుక్కటానం…పే….

ఇత్థీ చ పణ్డకో చ ఉభిన్నం ఇత్థిసఞ్ఞీ సారత్తో చ. ఉభో చ నం భిక్ఖుస్స నిస్సగ్గియేన నిస్సగ్గియం ఆమసన్తి. సేవనాధిప్పాయో కాయేన వాయమతి, న చ ఫస్సం పటివిజానాతి, ఆపత్తి ద్విన్నం దుక్కటానం…పే….

౨౭౯. సేవనాధిప్పాయో కాయేన వాయమతి ఫస్సం పటివిజానాతి, ఆపత్తి సఙ్ఘాదిసేసస్స.

సేవనాధిప్పాయో కాయేన వాయమతి, న చ ఫస్సం పటివిజానాతి, ఆపత్తి దుక్కటస్స.

సేవనాధిప్పాయో న చ కాయేన వాయమతి, ఫస్సం పటివిజానాతి, అనాపత్తి.

సేవనాధిప్పాయో న చ కాయేన వాయమతి, న చ ఫస్సం పటివిజానాతి, అనాపత్తి.

మోక్ఖాధిప్పాయో కాయేన వాయమతి, ఫస్సం పటివిజానాతి, అనాపత్తి.

మోక్ఖాధిప్పాయో కాయేన వాయమతి, న చ ఫస్సం పటివిజానాతి, అనాపత్తి.

మోక్ఖాధిప్పాయో న చ కాయేన వాయమతి, ఫస్సం పటివిజానాతి, అనాపత్తి.

మోక్ఖాధిప్పాయో న చ కాయేన వాయమతి, న చ ఫస్సం పటివిజానాతి, అనాపత్తి.

౨౮౦. అనాపత్తి అసఞ్చిచ్చ, అసతియా, అజానన్తస్స, అసాదియన్తస్స, ఉమ్మత్తకస్స, ఖిత్తచిత్తస్స, వేదనాట్టస్స, ఆదికమ్మికస్సాతి.

వినీతవత్థుఉద్దానగాథా

మాతా ధీతా భగినీ చ, జాయా యక్ఖీ చ పణ్డకో;

సుత్తా మతా తిరచ్ఛానా, దారుధితలికాయ చ.

సమ్పీళే సఙ్కమో మగ్గో, రుక్ఖో నావా చ రజ్జు చ;

దణ్డో పత్తం పణామేసి, వన్దే వాయమి నచ్ఛుపేతి.

వినీతవత్థు

౨౮౧. తేన ఖో పన సమయేన అఞ్ఞతరో భిక్ఖు మాతుయా మాతుపేమేన ఆమసి. తస్స కుక్కుచ్చం అహోసి – ‘‘భగవతా సిక్ఖాపదం పఞ్ఞత్తం, కచ్చి ను ఖో అహం సఙ్ఘాదిసేసం ఆపత్తిం ఆపన్నో’’తి? భగవతో ఏతమత్థం ఆరోచేసి. ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

తేన ఖో పన సమయేన అఞ్ఞతరో భిక్ఖు ధీతుయా ధీతుపేమేన ఆమసి…పే… భగినియా భగినిపేమేన ఆమసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

తేన ఖో పన సమయేన అఞ్ఞతరో భిక్ఖు పురాణదుతియికాయ కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో సఙ్ఘాదిసేస’’న్తి.

తేన ఖో పన సమయేన అఞ్ఞతరో భిక్ఖు యక్ఖినియా కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు పణ్డకస్స కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు సుత్తిత్థియా కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో సఙ్ఘాదిసేస’’న్తి.

తేన ఖో పన సమయేన అఞ్ఞతరో భిక్ఖు మతిత్థియా కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు తిరచ్ఛానగతిత్థియా కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

తేన ఖో పన సమయేన అఞ్ఞతరో భిక్ఖు దారుధీతలికాయ కాయసంసగ్గం సమాపజ్జి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

౨౮౨. తేన ఖో పన సమయేన సమ్బహులా ఇత్థియో అఞ్ఞతరం భిక్ఖుం సమ్పీళేత్వా బాహాపరమ్పరాయ ఆనేసుం. తస్స కుక్కుచ్చం అహోసి…పే… ‘‘సాదియి త్వం, భిక్ఖూ’’తి? ‘‘నాహం, భగవా, సాదియి’’న్తి. ‘‘అనాపత్తి, భిక్ఖూ, అసాదియన్తస్సా’’తి.

తేన ఖో పన సమయేన అఞ్ఞతరో భిక్ఖు ఇత్థియా అభిరూళ్హం సఙ్కమం సారత్తో సఞ్చాలేసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

తేన ఖో పన సమయేన అఞ్ఞతరో భిక్ఖు ఇత్థిం పటిపథే పస్సిత్వా సారత్తో అంసకూటేన పహారం అదాసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో సఙ్ఘాదిసేస’’న్తి.

తేన ఖో పన సమయేన అఞ్ఞతరో భిక్ఖు ఇత్థియా అభిరూళ్హం రుక్ఖం సారత్తో సఞ్చాలేసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

తేన ఖో పన సమయేన అఞ్ఞతరో భిక్ఖు ఇత్థియా అభిరూళ్హం నావం సారత్తో సఞ్చాలేసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

తేన ఖో పన సమయేన అఞ్ఞతరో భిక్ఖు ఇత్థియా గహితం రజ్జుం సారత్తో ఆవిఞ్ఛి [ఆవిఞ్జి (సీ. స్యా.)]. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు ఇత్థియా గహితం దణ్డం సారత్తో ఆవిఞ్ఛి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు సారత్తో ఇత్థిం పత్తేన పణామేసి. తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు ఇత్థియా వన్దన్తియా సారత్తో పాదం ఉచ్చారేసి. తస్స కుక్కుచ్చం అహోసి…పే… ‘‘ఆపత్తిం త్వం, భిక్ఖు, ఆపన్నో సఙ్ఘాదిసేస’’న్తి.

తేన ఖో పన సమయేన అఞ్ఞతరో భిక్ఖు ఇత్థిం గహేస్సామీతి వాయమిత్వా న ఛుపి.

తస్స కుక్కుచ్చం అహోసి…పే… ‘‘అనాపత్తి, భిక్ఖు, సఙ్ఘాదిసేసస్స; ఆపత్తి దుక్కటస్సా’’తి.

కాయసంసగ్గసిక్ఖాపదం నిట్ఠితం దుతియం.