౭. నిసీదనసిక్ఖాపదం

౫౩౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భగవతా భిక్ఖూనం నిసీదనం అనుఞ్ఞాతం హోతి. ఛబ్బగ్గియా భిక్ఖూ – ‘‘భగవతా నిసీదనం అనుఞ్ఞాత’’న్తి అప్పమాణికాని నిసీదనాని ధారేన్తి. మఞ్చస్సపి పీఠస్సపి పురతోపి పచ్ఛతోపి ఓలమ్బేన్తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ అప్పమాణికాని నిసీదనాని ధారేస్సన్తీ’’తి…పే… సచ్చం కిర తుమ్హే, భిక్ఖవే, అప్పమాణికాని నిసీదనాని ధారేథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, అప్పమాణికాని నిసీదనాని ధారేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

‘‘నిసీదనం పన భిక్ఖునా కారయమానేన పమాణికం కారేతబ్బం. తత్రిదం పమాణం – దీఘసో ద్వే విదత్థియో, సుగతవిదత్థియా; తిరియం దియడ్ఢం. తం అతిక్కామయతో ఛేదనకం పాచిత్తియ’’న్తి.

ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.

౫౩౨. తేన ఖో పన సమయేన ఆయస్మా ఉదాయీ మహాకాయో హోతి. సో భగవతో పురతో నిసీదనం పఞ్ఞపేత్వా సమన్తతో సమఞ్ఛమానో నిసీదతి. అథ ఖో భగవా ఆయస్మన్తం ఉదాయిం ఏతదవోచ – ‘‘కిస్స త్వం, ఉదాయి, నిసీదనం సమన్తతో సమఞ్ఛసి; సేయ్యథాపి పురాణాసికోట్ఠో’’తి? ‘‘తథా హి పన, భన్తే, భగవతా భిక్ఖూనం అతిఖుద్దకం నిసీదనం అనుఞ్ఞాత’’న్తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, నిసీదనస్స దసం విదత్థిం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౫౩౩. ‘‘నిసీదనం పన భిక్ఖునా కారయమానేన పమాణికం కారేతబ్బం. తత్రిదం పమాణం – దీఘసో ద్వే విదత్థియో, సుగతవిదత్థియా; తిరియం దియడ్ఢం. దసా విదత్థి. తం అతిక్కామయతో ఛేదనకం పాచిత్తియ’’న్తి.

౫౩౪. నిసీదనం నామ సదసం వుచ్చతి.

కారయమానేనాతి కరోన్తో వా కారాపేన్తో వా పమాణికం కారేతబ్బం. తత్రిదం పమాణం – దీఘసో ద్వే విదత్థియో, సుగతవిదత్థియా; తిరియం దియడ్ఢం. దసా విదత్థి. తం అతిక్కామేత్వా కరోతి వా కారాపేతి వా, పయోగే దుక్కటం. పటిలాభేన ఛిన్దిత్వా పాచిత్తియం దేసేతబ్బం.

౫౩౫. అత్తనా విప్పకతం అత్తనా పరియోసాపేతి, ఆపత్తి పాచిత్తియస్స. అత్తనా విప్పకతం పరేహి పరియోసాపేతి, ఆపత్తి పాచిత్తియస్స. పరేహి విప్పకతం అత్తనా పరియోసాపేతి, ఆపత్తి పాచిత్తియస్స. పరేహి విప్పకతం పరేహి పరియోసాపేతి, ఆపత్తి పాచిత్తియస్స.

అఞ్ఞస్సత్థాయ కరోతి వా కారాపేతి వా, ఆపత్తి దుక్కటస్స. అఞ్ఞేన కతం పటిలభిత్వా పరిభుఞ్జతి, ఆపత్తి దుక్కటస్స.

౫౩౬. అనాపత్తి పమాణికం కరోతి, ఊనకం కరోతి, అఞ్ఞేన కతం పమాణాతిక్కన్తం పటిలభిత్వా ఛిన్దిత్వా పరిభుఞ్జతి, వితానం వా భూమత్థరణం వా సాణిపాకారం వా భిసిం వా బిబ్బోహనం వా కరోతి, ఉమ్మత్తకస్స, ఆదికమ్మికస్సాతి.

నిసీదనసిక్ఖాపదం నిట్ఠితం సత్తమం.