౫. అచేలకవగ్గో
౧. అచేలకసిక్ఖాపదం
౨౬౯. తేన సమయేన బుద్ధో భగవా వేసాలియం విహరతి మహావనే కూటాగారసాలాయం. తేన ఖో పన సమయేన సఙ్ఘస్స ఖాదనీయం ఉస్సన్నం హోతి. అథ ఖో ఆయస్మా ఆనన్దో భగవతో ఏతమత్థం ఆరోచేసి. ‘‘తేనహానన్ద, విఘాసాదానం పూవం దేహీ’’తి. ‘‘ఏవం భన్తే’’తి ఖో ఆయస్మా ఆనన్దో భగవతో పటిస్సుణిత్వా విఘాసాదే పటిపాటియా నిసీదాపేత్వా ఏకేకం పూవం దేన్తో అఞ్ఞతరిస్సా పరిబ్బాజికాయ ఏకం మఞ్ఞమానో ద్వే పూవే అదాసి. సామన్తా పరిబ్బాజికాయో తం పరిబ్బాజికం ఏతదవోచుం – ‘‘జారో తే ఏసో సమణో’’తి. ‘‘న మే సో సమణో జారో, ఏకం మఞ్ఞమానో ద్వే పూవే అదాసీ’’తి. దుతియమ్పి ఖో…పే… తతియమ్పి ఖో ఆయస్మా ఆనన్దో ఏకేకం పూవం దేన్తో తస్సాయేవ పరిబ్బాజికాయ ఏకం మఞ్ఞమానో ద్వే పూవే అదాసి. సామన్తా పరిబ్బాజికాయో తం పరిబ్బాజికం ఏతదవోచుం – ‘‘జారో తే ఏసో సమణో’’తి. ‘‘న మే సో సమణో జారో, ఏకం మఞ్ఞమానో ద్వే పూవే అదాసీ’’తి. ‘‘జారో న జారో’’తి భణ్డింసు. అఞ్ఞతరోపి ఆజీవకో పరివేసనం అగమాసి. అఞ్ఞతరో భిక్ఖు పహూతేన సప్పినా ఓదనం మద్దిత్వా తస్స ఆజీవకస్స మహన్తం పిణ్డం అదాసి. అథ ఖో సో ఆజీవకో తం పిణ్డం ఆదాయ అగమాసి. అఞ్ఞతరో ఆజీవకో తం ఆజీవకం ఏతదవోచ – ‘‘కుతో తయా, ఆవుసో, పిణ్డో లద్ధో’’తి? ‘‘తస్సావుసో, సమణస్స గోతమస్స ముణ్డగహపతికస్స పరివేసనాయ లద్ధో’’తి.
అస్సోసుం ఖో ఉపాసకా తేసం ఆజీవకానం ఇమం కథాసల్లాపం. అథ ఖో తే ఉపాసకా యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం నిసీదింసు. ఏకమన్తం నిసిన్నా ఖో తే ఉపాసకా భగవన్తం ఏతదవోచుం – ‘‘ఇమే, భన్తే, తిత్థియా అవణ్ణకామా బుద్ధస్స అవణ్ణకామా ధమ్మస్స అవణ్ణకామా సఙ్ఘస్స. సాధు, భన్తే, అయ్యా తిత్థియానం సహత్థా న దదేయ్యు’’న్తి. అథ ఖో భగవా తే ఉపాసకే ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో తే ఉపాసకా భగవతా ధమ్మియా కథాయ సన్దస్సితా సమాదపితా సముత్తేజితా సమ్పహంసితా ఉట్ఠాయాసనా భగవన్తం అభివాదేత్వా పదక్ఖిణం కత్వా పక్కమింసు. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘తేన హి, భిక్ఖవే, భిక్ఖూనం సిక్ఖాపదం పఞ్ఞపేస్సామి దస అత్థవసే పటిచ్చ – సఙ్ఘసుట్ఠుతాయ, సఙ్ఘఫాసుతాయ …పే… సద్ధమ్మట్ఠితియా, వినయానుగ్గహాయ. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౨౭౦. ‘‘యో పన భిక్ఖు అచేలకస్స వా పరిబ్బాజకస్స వా పరిబ్బాజికాయ వా సహత్థా ఖాదనీయం వా భోజనీయం వా దదేయ్య, పాచిత్తియ’’న్తి.
౨౭౧. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
అచేలకో నామ యో కోచి పరిబ్బాజకసమాపన్నో నగ్గో.
పరిబ్బాజకో నామ భిక్ఖుఞ్చ సామణేరఞ్చ ఠపేత్వా యో కోచి పరిబ్బాజకసమాపన్నో.
పరిబ్బాజికా నామ భిక్ఖునిఞ్చ సిక్ఖమానఞ్చ సామణేరిఞ్చ ఠపేత్వా యా కాచి పరిబ్బాజికసమాపన్నా.
ఖాదనీయం నామ పఞ్చ భోజనాని – ఉదకదన్తపోనం ఠపేత్వా అవసేసం ఖాదనీయం నామ.
భోజనీయం నామ పఞ్చ భోజనాని – ఓదనో, కుమ్మాసో, సత్తు, మచ్ఛో, మంసం.
దదేయ్యాతి కాయేన వా కాయపటిబద్ధేన వా నిస్సగ్గియేన వా దేతి, ఆపత్తి పాచిత్తియస్స.
౨౭౨. తిత్థియే తిత్థియసఞ్ఞీ సహత్థా ఖాదనీయం వా భోజనీయం వా దేతి, ఆపత్తి పాచిత్తియస్స. తిత్థియే వేమతికో సహత్థా ఖాదనీయం వా భోజనీయం వా దేతి, ఆపత్తి పాచిత్తియస్స. తిత్థియే అతిత్థియసఞ్ఞీ సహత్థా ఖాదనీయం వా భోజనీయం వా దేతి, ఆపత్తి పాచిత్తియస్స.
ఉదకదన్తపోనం దేతి, ఆపత్తి దుక్కటస్స. అతిత్థియే తిత్థియసఞ్ఞీ, ఆపత్తి దుక్కటస్స. అతిత్థియే వేమతికో, ఆపత్తి దుక్కటస్స. అతిత్థియే అతిత్థియసఞ్ఞీ, అనాపత్తి.
౨౭౩. అనాపత్తి దాపేతి న దేతి, ఉపనిక్ఖిపిత్వా దేతి, బాహిరాలేపం దేతి, ఉమ్మత్తకస్స, ఆదికమ్మికస్సాతి.
అచేలకసిక్ఖాపదం నిట్ఠితం పఠమం.
౨. ఉయ్యోజనసిక్ఖాపదం
౨౭౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉపనన్దో సక్యపుత్తో భాతునో సద్ధివిహారికం భిక్ఖుం ఏతదవోచ – ‘‘ఏహావుసో, గామం పిణ్డాయ పవిసిస్సామా’’తి. తస్స అదాపేత్వా ఉయ్యోజేసి – ‘‘గచ్ఛావుసో, న మే తయా సద్ధిం కథా వా నిసజ్జా వా ఫాసు హోతి, ఏకకస్స మే కథా వా నిసజ్జా వా ఫాసు హోతీ’’తి. అథ ఖో సో భిక్ఖు ఉపకట్ఠే కాలే నాసక్ఖి పిణ్డాయ చరితుం, పటిక్కమనేపి భత్తవిస్సగ్గం న సమ్భావేసి, ఛిన్నభత్తో అహోసి. అథ ఖో సో భిక్ఖు ఆరామం గన్త్వా భిక్ఖూనం ఏతమత్థం ఆరోచేసి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో భిక్ఖుం – ‘ఏహావుసో, గామం పిణ్డాయ పవిసిస్సామా’తి తస్స అదాపేత్వా ఉయ్యోజేస్సతీ’’తి …పే… సచ్చం కిర త్వం, ఉపనన్ద, భిక్ఖుం – ‘‘ఏహావుసో, గామం పిణ్డాయ పవిసిస్సామా’’తి తస్స అదాపేత్వా ఉయ్యోజేసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, భిక్ఖుం – ‘‘ఏహావుసో, గామం పిణ్డాయ పవిసిస్సామా’’తి తస్స అదాపేత్వా ఉయ్యోజేస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౨౭౫. ‘‘యో పన భిక్ఖు భిక్ఖుం – ‘‘ఏహావుసో, గామం వా నిగమం వా పిణ్డాయ పవిసిస్సామా’తి తస్స దాపేత్వా వా అదాపేత్వా వా ఉయ్యోజేయ్య – ‘గచ్ఛావుసో, న మే తయా సద్ధిం కథా వా నిసజ్జా వా ఫాసు హోతి, ఏకకస్స మే కథా వా నిసజ్జా వా ఫాసు హోతీ’తి, ఏతదేవ పచ్చయం కరిత్వా అనఞ్ఞం, పాచిత్తియ’’న్తి.
౨౭౬. యో పనాతి యో, యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
భిక్ఖున్తి అఞ్ఞం భిక్ఖుం.
ఏహావుసో, గామం వా నిగమం వాతి గామోపి నిగమోపి నగరమ్పి, గామో చేవ నిగమో చ.
తస్స దాపేత్వాతి యాగుం వా భత్తం వా ఖాదనీయం వా భోజనీయం వా దాపేత్వా.
అదాపేత్వాతి న కిఞ్చి దాపేత్వా.
ఉయ్యోజేయ్యాతి మాతుగామేన సద్ధిం హసితుకామో కీళితుకామో రహో నిసీదితుకామో అనాచారం ఆచరితుకామో ఏవం వదేతి – ‘‘గచ్ఛావుసో, న మే తయా సద్ధిం కథా వా నిసజ్జా వా ఫాసు హోతి, ఏకకస్స మే కథా వా నిసజ్జా వా ఫాసు హోతీ’’తి ఉయ్యోజేతి, ఆపత్తి దుక్కటస్స. దస్సనూపచారం వా సవనూపచారం వా విజహన్తస్స ఆపత్తి దుక్కటస్స. విజహితే, ఆపత్తి పాచిత్తియస్స.
ఏతదేవ పచ్చయం కరిత్వా అనఞ్ఞన్తి న అఞ్ఞో కోచి పచ్చయో హోతి ఉయ్యోజేతుం.
౨౭౭. ఉపసమ్పన్నే ఉపసమ్పన్నసఞ్ఞీ ఉయ్యోజేతి, ఆపత్తి పాచిత్తియస్స. ఉపసమ్పన్నే వేమతికో ఉయ్యోజేతి, ఆపత్తి పాచిత్తియస్స. ఉపసమ్పన్నే అనుపసమ్పన్నసఞ్ఞీ ఉయ్యోజేతి, ఆపత్తి పాచిత్తియస్స.
కలిసాసనం ఆరోపేతి, ఆపత్తి దుక్కటస్స. అనుపసమ్పన్నం ఉయ్యోజేతి, ఆపత్తి దుక్కటస్స. కలిసాసనం ఆరోపేతి, ఆపత్తి దుక్కటస్స. అనుపసమ్పన్నే ఉపసమ్పన్నసఞ్ఞీ, ఆపత్తి దుక్కటస్స. అనుపసమ్పన్నే వేమతికో, ఆపత్తి దుక్కటస్స. అనుపసమ్పన్నే అనుపసమ్పన్నసఞ్ఞీ, ఆపత్తి దుక్కటస్స.
౨౭౮. అనాపత్తి ‘‘ఉభో ఏకతో న యాపేస్సామా’’తి ఉయ్యోజేతి, ‘‘మహగ్ఘం భణ్డం పస్సిత్వా లోభధమ్మం ఉప్పాదేస్సతీ’’తి ఉయ్యోజేతి, ‘‘మాతుగామం పస్సిత్వా అనభిరతిం ఉప్పాదేస్సతీ’’తి ఉయ్యోజేతి, ‘‘గిలానస్స వా ఓహియ్యకస్స వా విహారపాలస్స వా యాగుం వా భత్తం వా ఖాదనీయం వా భోజనీయం వా నీహరా’’తి ఉయ్యోజేతి, న అనాచారం ఆచరితుకామో, సతి కరణీయే ఉయ్యోజేతి, ఉమ్మత్తకస్స, ఆదికమ్మికస్సాతి.
ఉయ్యోజనసిక్ఖాపదం నిట్ఠితం దుతియం.
౩. సభోజనసిక్ఖాపదం
౨౭౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉపనన్దో సక్యపుత్తో సహాయకస్స ఘరం గన్త్వా తస్స పజాపతియా సద్ధిం సయనిఘరే [సయనీఘరే (స్యా.)] నిసజ్జం కప్పేసి. అథ ఖో సో పురిసో యేనాయస్మా ఉపనన్దో సక్యపుత్తో తేనుపసఙ్కమి; ఉపసఙ్కమిత్వా ఆయస్మన్తం ఉపనన్దం సక్యపుత్తం అభివాదేత్వా ఏకమన్తం నిసీది. ఏకమన్తం నిసిన్నో ఖో సో పురిసో పజాపతిం ఏతదవోచ – ‘‘దదేహాయ్యస్స భిక్ఖ’’న్తి. అథ ఖో సా ఇత్థీ ఆయస్మతో ఉపనన్దస్స సక్యపుత్తస్స భిక్ఖం అదాసి. అథ ఖో సో పురిసో ఆయస్మన్తం ఉపనన్దం సక్యపుత్తం ఏతదవోచ – ‘‘గచ్ఛథ, భన్తే, యతో అయ్యస్స భిక్ఖా దిన్నా’’తి. అథ ఖో సా ఇత్థీ సల్లక్ఖేత్వా – ‘‘పరియుట్ఠితో అయం పురిసో’’తి, ఆయస్మన్తం ఉపనన్దం సక్యపుత్తం ఏతదవోచ – ‘‘నిసీదథ, భన్తే, మా అగమిత్థా’’తి. దుతియమ్పి ఖో సో పురిసో…పే… తతియమ్పి ఖో సో పురిసో ఆయస్మన్తం ఉపనన్దం సక్యపుత్తం ఏతదవోచ – ‘‘గచ్ఛథ, భన్తే, యతో అయ్యస్స భిక్ఖా దిన్నా’’తి. తతియమ్పి ఖో సా ఇత్థీ ఆయస్మన్తం ఉపనన్దం సక్యపుత్తం ఏతదవోచ – ‘‘నిసీదథ, భన్తే, మా అగమిత్థా’’తి.
అథ ఖో సో పురిసో నిక్ఖమిత్వా భిక్ఖూ ఉజ్ఝాపేసి – ‘‘అయం, భన్తే, అయ్యో ఉపనన్దో మయ్హం పజాపతియా సద్ధిం సయనిఘరే నిసిన్నో. సో మయా ఉయ్యోజీయమానో న ఇచ్ఛతి గన్తుం. బహుకిచ్చా మయం బహుకరణీయా’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో సభోజనే కులే అనుపఖజ్జ నిసజ్జం కప్పేస్సతీ’’తి…పే… సచ్చం కిర త్వం, ఉపనన్ద, సభోజనే కులే అనుపఖజ్జ నిసజ్జం కప్పేసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, సభోజనే కులే అనుపఖజ్జ నిసజ్జం కప్పేస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౨౮౦. ‘‘యో పన భిక్ఖు సభోజనే కులే అనుపఖజ్జ నిసజ్జం కప్పేయ్య, పాచిత్తియ’’న్తి.
౨౮౧. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
సభోజనం నామ కులం ఇత్థీ చేవ హోతి పురిసో చ, ఇత్థీ చ పురిసో చ ఉభో అనిక్ఖన్తా హోన్తి, ఉభో అవీతరాగా.
అనుపఖజ్జాతి అనుపవిసిత్వా.
నిసజ్జం కప్పేయ్యాతి మహల్లకే ఘరే పిట్ఠసఙ్ఘాటస్స [పిట్ఠిసఙ్ఘాటస్స (స్యా.)] హత్థపాసం విజహిత్వా నిసీదతి, ఆపత్తి పాచిత్తియస్స. ఖుద్దకే ఘరే పిట్ఠివంసం అతిక్కమిత్వా నిసీదతి, ఆపత్తి పాచిత్తియస్స.
౨౮౨. సయనిఘరే సయనిఘరసఞ్ఞీ సభోజనే కులే అనుపఖజ్జ నిసజ్జం కప్పేతి, ఆపత్తి పాచిత్తియస్స. సయనిఘరే వేమతికో సభోజనే కులే అనుపఖజ్జ నిసజ్జం కప్పేతి, ఆపత్తి పాచిత్తియస్స. సయనిఘరే నసయనిఘరసఞ్ఞీ సభోజనే కులే అనుపఖజ్జ నిసజ్జం కప్పేతి, ఆపత్తి పాచిత్తియస్స.
నసయనిఘరే సయనిఘరసఞ్ఞీ, ఆపత్తి దుక్కటస్స. నసయనిఘరే వేమతికో, ఆపత్తి దుక్కటస్స. నసయనిఘరే నసయనిఘరసఞ్ఞీ, అనాపత్తి.
౨౮౩. అనాపత్తి మహల్లకే ఘరే పిట్ఠసఙ్ఘాటస్స హత్థపాసం అవిజహిత్వా నిసీదతి, ఖుద్దకే ఘరే పిట్ఠివంసం అనతిక్కమిత్వా నిసీదతి, భిక్ఖు దుతియో హోతి, ఉభో నిక్ఖన్తా హోన్తి, ఉభో వీతరాగా, నసయనిఘరే, ఉమ్మత్తకస్స, ఆదికమ్మికస్సాతి.
సభోజనసిక్ఖాపదం నిట్ఠితం తతియం.
౪. రహోపటిచ్ఛన్నసిక్ఖాపదం
౨౮౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉపనన్దో సక్యపుత్తో సహాయకస్స ఘరం గన్త్వా తస్స పజాపతియా సద్ధిం రహో పటిచ్ఛన్నే ఆసనే నిసజ్జం కప్పేసి. అథ ఖో సో పురిసో ఉజ్ఝాయతి ఖియ్యతి విపాచేతి – ‘‘కథఞ్హి నామ అయ్యో ఉపనన్దో మయ్హం పజాపతియా సద్ధిం రహో పటిచ్ఛన్నే ఆసనే నిసజ్జం కప్పేస్సతీ’’తి! అస్సోసుం ఖో భిక్ఖూ తస్స పురిసస్స ఉజ్ఝాయన్తస్స ఖియ్యన్తస్స విపాచేన్తస్స. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – కథఞ్హి నామ ఆయస్మా ఉపనన్దో సక్యపుత్తో మాతుగామేన సద్ధిం రహో పటిచ్ఛన్నే ఆసనే నిసజ్జం కప్పేస్సతీతి…పే… సచ్చం కిర త్వం, ఉపనన్ద, మాతుగామేన సద్ధిం రహో పటిచ్ఛన్నే ఆసనే నిసజ్జం కప్పేసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, మాతుగామేన సద్ధిం రహో పటిచ్ఛన్నే ఆసనే నిసజ్జం కప్పేస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౨౮౫. ‘‘యో పన భిక్ఖు మాతుగామేన సద్ధిం రహో పటిచ్ఛన్నే ఆసనే నిసజ్జం కప్పేయ్య, పాచిత్తియ’’న్తి.
౨౮౬. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
మాతుగామో నామ మనుస్సిత్థీ, న యక్ఖీ న పేతీ న తిరచ్ఛానగతా, అన్తమసో తదహుజాతాపి దారికా, పగేవ మహత్తరీ.
సద్ధిన్తి ఏకతో.
[పాచి. ౨౦౦,౨౯౧; పారా. ౪౪౫,౪౫౪] రహో నామ చక్ఖుస్స రహో సోతస్స రహో. చక్ఖుస్స రహో నామ న సక్కా హోతి అక్ఖిం వా నిఖణీయమానే భముకం వా ఉక్ఖిపీయమానే సీసం వా ఉక్ఖిపీయమానే పస్సితుం. సోతస్స రహో నామ న సక్కా హోతి పకతికథా సోతుం.
[పారా. ౪౪౫] పటిచ్ఛన్నం నామ ఆసనం కుట్టేన [కుడ్డేన (సీ. స్యా.)] వా కవాటేన వా కిలఞ్జేన వా సాణిపాకారేన వా రుక్ఖేన వా థమ్భేన వా కోత్థళియా [కోట్ఠళియా (సీ. స్యా.) కోత్థళికాయ (క.)] వా, యేన కేనచి పటిచ్ఛన్నం హోతి.
నిసజ్జం కప్పేయ్యాతి మాతుగామే నిసిన్నే భిక్ఖు ఉపనిసిన్నో వా హోతి ఉపనిపన్నో వా, ఆపత్తి పాచిత్తియస్స. భిక్ఖు నిసిన్నే మాతుగామో ఉపనిసిన్నో వా హోతి ఉపనిపన్నో వా, ఆపత్తి పాచిత్తియస్స. ఉభో వా నిసిన్నా హోన్తి ఉభో వా నిపన్నా, ఆపత్తి పాచిత్తియస్స.
౨౮౭. మాతుగామే మాతుగామసఞ్ఞీ రహో పటిచ్ఛన్నే ఆసనే నిసజ్జం కప్పేతి, ఆపత్తి పాచిత్తియస్స. మాతుగామే వేమతికో రహో పటిచ్ఛన్నే ఆసనే నిసజ్జం కప్పేతి, ఆపత్తి పాచిత్తియస్స. మాతుగామే అమాతుగామసఞ్ఞీ రహో పటిచ్ఛన్నే ఆసనే నిసజ్జం కప్పేతి, ఆపత్తి పాచిత్తియస్స.
యక్ఖియా వా పేతియా వా పణ్డకేన వా తిరచ్ఛానగతాయ వా మనుస్సవిగ్గహిత్థియా వా సద్ధిం రహో పటిచ్ఛన్నే ఆసనే నిసజ్జం కప్పేతి, ఆపత్తి దుక్కటస్స. అమాతుగామే మాతుగామసఞ్ఞీ, ఆపత్తి దుక్కటస్స. అమాతుగామే వేమతికో, ఆపత్తి దుక్కటస్స. అమాతుగామే అమాతుగామసఞ్ఞీ, అనాపత్తి.
౨౮౮. అనాపత్తి యో కోచి విఞ్ఞూ పురిసో దుతియో హోతి, తిట్ఠతి న నిసీదతి, అరహోపేక్ఖో, అఞ్ఞవిహితో నిసీదతి, ఉమ్మత్తకస్స, ఆదికమ్మికస్సాతి.
రహోపటిచ్ఛన్నసిక్ఖాపదం నిట్ఠితం చతుత్థం.
౫. రహోనిసజ్జసిక్ఖాపదం
౨౮౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉపనన్దో సక్యపుత్తో సహాయకస్స ఘరం గన్త్వా తస్స పజాపతియా సద్ధిం ఏకో ఏకాయ రహో నిసజ్జం కప్పేసి. అథ ఖో సో పురిసో ఉజ్ఝాయతి ఖియ్యతి విపాచేతి – ‘‘కథఞ్హి నామ అయ్యో ఉపనన్దో మయ్హం పజాపతియా సద్ధిం ఏకో ఏకాయ రహో నిసజ్జం కప్పేస్సతీ’’తి! అస్సోసుం ఖో భిక్ఖూ తస్స పురిసస్స ఉజ్ఝాయన్తస్స ఖియ్యన్తస్స విపాచేన్తస్స. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో మాతుగామేన సద్ధిం ఏకో ఏకాయ రహో నిసజ్జం కప్పేస్సతీ’’తి…పే… సచ్చం కిర త్వం, ఉపనన్ద, మాతుగామేన సద్ధిం ఏకో ఏకాయ రహో నిసజ్జం కప్పేసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, మాతుగామేన సద్ధిం ఏకో ఏకాయ రహో నిసజ్జం కప్పేస్ససి! నేతం, మోఘపురిస, అప్పసన్నానం వా పాసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౨౯౦. ‘‘యో పన భిక్ఖు మాతుగామేన సద్ధిం ఏకో ఏకాయ రహో నిసజ్జం కప్పేయ్య, పాచిత్తియ’’న్తి.
౨౯౧. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
మాతుగామో నామ మనుస్సిత్థీ, న యక్ఖీ న పేతీ న తిరచ్ఛానగతా, విఞ్ఞూ పటిబలా సుభాసితదుబ్భాసితం దుట్ఠుల్లాదుట్ఠుల్లం ఆజానితుం.
సద్ధిన్తి ఏకతో.
ఏకో ఏకాయాతి భిక్ఖు చేవ హోతి మాతుగామో చ.
[పాచి. ౨౦౦,౨౮౬; పారా. ౪౪౫,౪౫౪] రహో నామ చక్ఖుస్స రహో, సోతస్స రహో. చక్ఖుస్స రహో నామ న సక్కా హోతి అక్ఖిం వా నిఖణీయమానే భముకం వా ఉక్ఖిపీయమానే సీసం వా ఉక్ఖిపీయమానే పస్సితుం. సోతస్స రహో నామ న సక్కా హోతి పకతికథా సోతుం.
నిసజ్జం కప్పేయ్యాతి మాతుగామే నిసిన్నే భిక్ఖు ఉపనిసిన్నో వా హోతి ఉపనిపన్నో వా, ఆపత్తి పాచిత్తియస్స. భిక్ఖు నిసిన్నే మాతుగామో ఉపనిసిన్నో వా హోతి ఉపనిపన్నో వా, ఆపత్తి పాచిత్తియస్స. ఉభో వా నిసిన్నా హోన్తి ఉభో వా నిపన్నా, ఆపత్తి పాచిత్తియస్స.
౨౯౨. మాతుగామే మాతుగామసఞ్ఞీ ఏకో ఏకాయ రహో నిసజ్జం కప్పేతి, ఆపత్తి పాచిత్తియస్స. మాతుగామే వేమతికో ఏకో ఏకాయ రహో నిసజ్జం కప్పేతి, ఆపత్తి పాచిత్తియస్స. మాతుగామే అమాతుగామసఞ్ఞీ ఏకో ఏకాయ రహో నిసజ్జం కప్పేతి, ఆపత్తి పాచిత్తియస్స.
యక్ఖియా వా పేతియా వా పణ్డకేన వా తిరచ్ఛానగతమనుస్సవిగ్గహిత్థియా వా [తిరచ్ఛానగతాయ వా మనుస్సవిగ్గహిత్థియా వా (క.)] సద్ధిం ఏకో ఏకాయ రహో నిసజ్జం కప్పేతి, ఆపత్తి దుక్కటస్స. అమాతుగామే మాతుగామసఞ్ఞీ, ఆపత్తి దుక్కటస్స. అమాతుగామే వేమతికో, ఆపత్తి దుక్కటస్స. అమాతుగామే అమాతుగామసఞ్ఞీ, అనాపత్తి.
౨౯౩. అనాపత్తి యో కోచి విఞ్ఞూ పురిసో దుతియో హోతి, తిట్ఠతి న నిసీదతి, అరహోపేక్ఖో అఞ్ఞవిహితో నిసీదతి, ఉమ్మత్తకస్స, ఆదికమ్మికస్సాతి.
రహోనిసజ్జసిక్ఖాపదం నిట్ఠితం పఞ్చమం.
౬. చారిత్తసిక్ఖాపదం
౨౯౪. తేన సమయేన బుద్ధో భగవా రాజగహే విహరతి వేళువనే కలన్దకనివాపే. తేన ఖో పన సమయేన ఆయస్మతో ఉపనన్దస్స సక్యపుత్తస్స ఉపట్ఠాకకులం ఆయస్మన్తం ఉపనన్దం సక్యపుత్తం భత్తేన నిమన్తేసి. అఞ్ఞేపి భిక్ఖూ భత్తేన నిమన్తేసి. తేన ఖో పన సమయేన ఆయస్మా ఉపనన్దో సక్యపుత్తో పురేభత్తం, కులాని పయిరుపాసతి. అథ ఖో తే భిక్ఖూ తే మనుస్సే ఏతదవోచుం – ‘‘దేథావుసో భత్త’’న్తి. ‘‘ఆగమేథ, భన్తే, యావాయ్యో ఉపనన్దో ఆగచ్ఛతీ’’తి. దుతియమ్పి ఖో తే భిక్ఖూ…పే… తతియమ్పి ఖో తే భిక్ఖూ తే మనుస్సే ఏతదవోచుం – ‘‘దేథావుసో, భత్తం; పురే కాలో అతిక్కమతీ’’తి. ‘‘యమ్పి మయం, భన్తే, భత్తం కరిమ్హా అయ్యస్స ఉపనన్దస్స కారణా. ఆగమేథ, భన్తే, యావాయ్యో ఉపనన్దో ఆగచ్ఛతీ’’తి.
అథ ఖో ఆయస్మా ఉపనన్దో సక్యపుత్తో పురేభత్తం కులాని పయిరుపాసిత్వా దివా ఆగచ్ఛతి. భిక్ఖూ న చిత్తరూపం భుఞ్జింసు. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో నిమన్తితో సభత్తో సమానో పురేభత్తం కులేసు చారిత్తం ఆపజ్జిస్సతీ’’తి…పే… సచ్చం కిర త్వం, ఉపనన్ద, నిమన్తితో సభత్తో సమానో పురేభత్తం కులేసు చారిత్తం ఆపజ్జసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, నిమన్తితో సభత్తో సమానో పురేభత్తం కులేసు చారిత్తం ఆపజ్జిస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
‘‘యో పన భిక్ఖు నిమన్తితో సభత్తో సమానో పురేభత్తం కులేసు చారిత్తం ఆపజ్జేయ్య, పాచిత్తియ’’న్తి.
ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.
౨౯౫. [మహావ. ౨౭౭] తేన ఖో పన సమయేన ఆయస్మతో ఉపనన్దస్స సక్యపుత్తస్స ఉపట్ఠాకకులం సఙ్ఘస్సత్థాయ ఖాదనీయం పాహేసి – ‘‘అయ్యస్స ఉపనన్దస్స దస్సేత్వా సఙ్ఘస్స దాతబ్బ’’న్తి. తేన ఖో పన సమయేన ఆయస్మా ఉపనన్దో సక్యపుత్తో గామం పిణ్డాయ పవిట్ఠో హోతి. అథ ఖో తే మనుస్సా ఆరామం గన్త్వా భిక్ఖూ పుచ్ఛింసు – ‘‘కహం, భన్తే, అయ్యో ఉపనన్దో’’తి? ‘‘ఏసావుసో, ఆయస్మా ఉపనన్దో సక్యపుత్తో గామం పిణ్డాయ పవిట్ఠో’’తి. ‘‘ఇదం, భన్తే, ఖాదనీయం అయ్యస్స ఉపనన్దస్స దస్సేత్వా సఙ్ఘస్స దాతబ్బ’’న్తి. భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘తేన హి, భిక్ఖవే, పటిగ్గహేత్వా నిక్ఖిపథ యావ ఉపనన్దో ఆగచ్ఛతీ’’తి.
అథ ఖో ఆయస్మా ఉపనన్దో సక్యపుత్తో – ‘‘భగవతా పటిక్ఖిత్తం పురేభత్తం కులేసు చారిత్తం ఆపజ్జితు’’న్తి పచ్ఛాభత్తం కులాని పయిరుపాసిత్వా దివా పటిక్కమి, ఖాదనీయం ఉస్సారియిత్థ. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో పచ్ఛాభత్తం కులేసు చారిత్తం ఆపజ్జిస్సతీ’’తి…పే… సచ్చం కిర త్వం, ఉపనన్ద, పచ్ఛాభత్తం కులేసు చారిత్తం ఆపజ్జసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, పచ్ఛాభత్తం కులేసు చారిత్తం ఆపజ్జిస్ససి! నేతం, మోఘపురిస, అప్పసన్నానం వా పసాదాయ…పే… ఏవఞ్చ పన భిక్ఖవే ఇమం సిక్ఖాపదం ఉద్దిసేయ్యాథ –
‘‘యో పన భిక్ఖు నిమన్తితో సభత్తో సమానో పురేభత్తం వా పచ్ఛాభత్తం వా కులేసు చారిత్తం ఆపజ్జేయ్య, పాచిత్తియ’’న్తి.
ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.
౨౯౬. తేన ఖో పన సమయేన భిక్ఖూ చీవరదానసమయే కుక్కుచ్చాయన్తా కులాని న పయిరుపాసన్తి. చీవరం పరిత్తం ఉప్పజ్జతి. భగవతో ఏతమత్థం ఆరోచేసుం…పే… అనుజానామి, భిక్ఖవే, చీవరదానసమయే కులాని పయిరుపాసితుం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
‘‘యో పన భిక్ఖు నిమన్తితో సభత్తో సమానో పురేభత్తం వా పచ్ఛాభత్తం వా కులేసు చారిత్తం ఆపజ్జేయ్య, అఞ్ఞత్ర సమయా, పాచిత్తియం. తత్థాయం సమయో. చీవరదానసమయో – అయం తత్థ సమయో’’తి.
ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.
౨౯౭. తేన ఖో పన సమయేన భిక్ఖూ చీవరకమ్మం కరోన్తి, అత్థో చ హోతి సూచియాపి సుత్తేనపి సత్థకేనపి. భిక్ఖూ కుక్కుచ్చాయన్తా కులాని న పయిరుపాసన్తి. భగవతో ఏతమత్థం ఆరోచేసుం…పే… అనుజానామి, భిక్ఖవే, చీవరకారసమయే కులాని పయిరుపాసితుం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
‘‘యో పన భిక్ఖు నిమన్తితో సభత్తో సమానో పురేభత్తం వా పచ్ఛాభత్తం వా కులేసు చారిత్తం ఆపజ్జేయ్య, అఞ్ఞత్ర సమయా, పాచిత్తియం. తత్థాయం సమయో. చీవరదానసమయో, చీవరకారసమయో – అయం తత్థ సమయో’’తి.
ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.
౨౯౮. తేన ఖో పన సమయేన భిక్ఖూ గిలానా హోన్తి, అత్థో చ హోతి భేసజ్జేహి. భిక్ఖూ కుక్కుచ్చాయన్తా కులాని న పయిరుపాసన్తి. భగవతో ఏతమత్థం ఆరోచేసుం…పే… అనుజానామి, భిక్ఖవే, సన్తం భిక్ఖుం ఆపుచ్ఛా కులాని పయిరుపాసితుం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౨౯౯. ‘‘యో పన భిక్ఖు నిమన్తితో సభత్తో సమానో సన్తం భిక్ఖుం అనాపుచ్ఛా పురేభత్తం వా పచ్ఛాభత్తం వా కులేసు చారిత్తం ఆపజ్జేయ్య, అఞ్ఞత్ర సమయా, పాచిత్తియం. తత్థాయం సమయో. చీవరదానసమయో, చీవరకారసమయో – అయం తత్థ సమయో’’తి.
౩౦౦. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
నిమన్తితో నామ పఞ్చన్నం భోజనానం అఞ్ఞతరేన భోజనేన నిమన్తితో.
సభత్తో నామ యేన నిమన్తితో తేన సభత్తో.
సన్తం నామ భిక్ఖుం సక్కా హోతి ఆపుచ్ఛా పవిసితుం.
అసన్తం నామ భిక్ఖుం న సక్కా హోతి ఆపుచ్ఛా పవిసితుం.
పురేభత్తం నామ యేన నిమన్తితో తం అభుత్తావీ.
పచ్ఛాభత్తం నామ యేన నిమన్తితో తం అన్తమసో కుసగ్గేనపి [అరుణుగ్గమనేపి (సీ.)] భుత్తం హోతి.
కులం నామ చత్తారి కులాని – ఖత్తియకులం, బ్రాహ్మణకులం, వేస్సకులం, సుద్దకులం.
కులేసు చారిత్తం ఆపజ్జేయ్యాతి అఞ్ఞస్స ఘరూపచారం ఓక్కమన్తస్స ఆపత్తి దుక్కటస్స. పఠమం పాదం ఉమ్మారం అతిక్కామేతి, ఆపత్తి దుక్కటస్స. దుతియం పాదం అతిక్కామేతి, ఆపత్తి పాచిత్తియస్స.
అఞ్ఞత్ర సమయాతి ఠపేత్వా సమయం.
చీవరదానసమయో నామ అనత్థతే కథినే వస్సానస్స పచ్ఛిమో మాసో, అత్థతే కథినే పఞ్చ మాసా.
చీవరకారసమయో నామ చీవరే కయిరమానే.
౩౦౧. నిమన్తితే నిమన్తితసఞ్ఞీ సన్తం భిక్ఖుం అనాపుచ్ఛా పురేభత్తం వా పచ్ఛాభత్తం వా కులేసు చారిత్తం ఆపజ్జతి, అఞ్ఞత్ర సమయా, ఆపత్తి పాచిత్తియస్స. నిమన్తితే వేమతికో సన్తం భిక్ఖుం అనాపుచ్ఛా పురేభత్తం వా పచ్ఛాభత్తం వా కులేసు చారిత్తం ఆపజ్జతి, అఞ్ఞత్ర సమయా, ఆపత్తి పాచిత్తియస్స. నిమన్తితే అనిమన్తితసఞ్ఞీ సన్తం భిక్ఖుం అనాపుచ్ఛా పురేభత్తం వా పచ్ఛాభత్తం వా కులేసు చారిత్తం ఆపజ్జతి, అఞ్ఞత్ర సమయా, ఆపత్తి పాచిత్తియస్స.
అనిమన్తితే నిమన్తితసఞ్ఞీ, ఆపత్తి దుక్కటస్స. అనిమన్తితే వేమతికో, ఆపత్తి దుక్కటస్స. అనిమన్తితే అనిమన్తితసఞ్ఞీ, అనాపత్తి.
౩౦౨. అనాపత్తి సమయే, సన్తం భిక్ఖుం ఆపుచ్ఛా పవిసతి, అసన్తం భిక్ఖుం అనాపుచ్ఛా పవిసతి, అఞ్ఞస్స ఘరేన మగ్గో హోతి, ఘరూపచారేన మగ్గో హోతి, అన్తరారామం గచ్ఛతి, భిక్ఖునుపస్సయం గచ్ఛతి, తిత్థియసేయ్యం గచ్ఛతి, పటిక్కమనం గచ్ఛతి, భత్తియఘరం గచ్ఛతి, ఆపదాసు, ఉమ్మత్తకస్స, ఆదికమ్మికస్సాతి.
చారిత్తసిక్ఖాపదం నిట్ఠితం ఛట్ఠం.
౭. మహానామసిక్ఖాపదం
౩౦౩. తేన సమయేన బుద్ధో భగవా సక్కేసు విహరతి కపిలవత్థుస్మిం నిగ్రోధారామే. తేన ఖో పన సమయేన మహానామస్స సక్కస్స భేసజ్జం ఉస్సన్నం హోతి. అథ ఖో మహానామో సక్కో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో మహానామో సక్కో భగవన్తం ఏతదవోచ – ‘‘ఇచ్ఛామహం, భన్తే, సఙ్ఘం చతుమాసం [చతుమ్మాసం (సీ.) చాతుమాసం (స్యా.)] భేసజ్జేన పవారేతు’’న్తి. ‘‘సాధు సాధు, మహానామ! తేన హి త్వం, మహానామ, సఙ్ఘం చతుమాసం భేసజ్జేన పవారేహీ’’తి. భిక్ఖూ కుక్కుచ్చాయన్తా నాధివాసేన్తి. భగవతో ఏతమత్థం ఆరోచేసుం…పే… అనుజానామి, భిక్ఖవే, చతుమాసం భేసజ్జప్పచ్చయపవారణం సాదితున్తి.
౩౦౪. తేన ఖో పన సమయేన భిక్ఖూ మహానామం సక్కం పరిత్తం భేసజ్జం విఞ్ఞాపేన్తి. తథేవ మహానామస్స సక్కస్స భేసజ్జం ఉస్సన్నం హోతి. దుతియమ్పి ఖో మహానామో సక్కో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో మహానామో సక్కో భగవన్తం ఏతదవోచ – ‘‘ఇచ్ఛామహం, భన్తే, సఙ్ఘం అపరమ్పి చతుమాసం భేసజ్జేన పవారేతు’’న్తి. ‘‘సాధు సాధు, మహానామ! తేన హి త్వం, మహానామ, సఙ్ఘం అపరమ్పి చతుమాసం భేసజ్జేన పవారేహీ’’తి. భిక్ఖూ కుక్కుచ్చాయన్తా నాధివాసేన్తి. భగవతో ఏతమత్థం ఆరోచేసుం…పే… అనుజానామి, భిక్ఖవే, పున పవారణమ్పి సాదితున్తి.
౩౦౫. తేన ఖో పన సమయేన భిక్ఖూ మహానామం సక్కం పరిత్తంయేవ భేసజ్జం విఞ్ఞాపేన్తి. తథేవ మహానామస్స సక్కస్స భేసజ్జం ఉస్సన్నం హోతి. తతియమ్పి ఖో మహానామో సక్కో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో మహానామో సక్కో భగవన్తం ఏతదవోచ – ‘‘ఇచ్ఛామహం, భన్తే, సఙ్ఘం యావజీవం భేసజ్జేన పవారేతు’’న్తి. ‘‘సాధు సాధు, మహానామ! తేన హి త్వం, మహానామ, సఙ్ఘం యావజీవం భేసజ్జేన పవారేహీ’’తి. భిక్ఖూ కుక్కుచ్చాయన్తా నాధివాసేన్తి. భగవతో ఏతమత్థం ఆరోచేసుం…పే… అనుజానామి, భిక్ఖవే, నిచ్చపవారణమ్పి సాదితున్తి.
తేన ఖో పన సమయేన ఛబ్బగ్గియా భిక్ఖూ దున్నివత్థా హోన్తి దుప్పారుతా అనాకప్పసమ్పన్నా. మహానామో సక్కో వత్తా హోతి – ‘‘కిస్స తుమ్హే, భన్తే, దున్నివత్థా దుప్పారుతా అనాకప్పసమ్పన్నా? నను నామ పబ్బజితేన సునివత్థేన భవితబ్బం సుపారుతేన ఆకప్పసమ్పన్నేనా’’తి? ఛబ్బగ్గియా భిక్ఖూ మహానామే సక్కే ఉపనన్ధింసు. అథ ఖో ఛబ్బగ్గియానం భిక్ఖూనం ఏతదహోసి – ‘‘కేన ను ఖో మయం ఉపాయేన మహానామం సక్కం మఙ్కు కరేయ్యామా’’తి? అథ ఖో ఛబ్బగ్గియానం భిక్ఖూనం ఏతదహోసి – ‘‘మహానామేన ఖో, ఆవుసో, సక్కేన సఙ్ఘో భేసజ్జేన పవారితో. హన్ద మయం, ఆవుసో, మహానామం సక్కం సప్పిం విఞ్ఞాపేమా’’తి. అథ ఖో ఛబ్బగ్గియా భిక్ఖూ యేన మహానామో సక్కో తేనుపసఙ్కమింసు; ఉపసఙ్కమిత్వా మహానామం సక్కం ఏతదవోచుం – ‘‘దోణేన, ఆవుసో, సప్పినా అత్థో’’తి. ‘‘అజ్జణ్హో, భన్తే, ఆగమేథ. మనుస్సా వజం గతా సప్పిం ఆహరితుం. కాలం ఆహరిస్సథా’’తి [కాలే హరిస్సథాతి (స్యా.)].
దుతియమ్పి ఖో…పే… తతియమ్పి ఖో ఛబ్బగ్గియా భిక్ఖూ మహానామం సక్కం ఏతదవోచుం – ‘‘దోణేన, ఆవుసో, సప్పినా అత్థో’’తి. ‘‘అజ్జణ్హో, భన్తే, ఆగమేథ. మనుస్సా వజం గతా సప్పిం ఆహరితుం. కాలం ఆహరిస్సథా’’తి. ‘‘కిం పన తయా, ఆవుసో, అదాతుకామేన పవారితేన, యం త్వం పవారేత్వా న దేసీ’’తి! అథ ఖో మహానామో సక్కో ఉజ్ఝాయతి ఖియ్యతి విపాచేతి – ‘‘కథఞ్హి నామ భదన్తా – ‘అజ్జణ్హో, భన్తే, ఆగమేథా’తి వుచ్చమానా నాగమేస్సన్తీ’’తి! అస్సోసుం ఖో భిక్ఖూ మహానామస్స సక్కస్స ఉజ్ఝాయన్తస్స ఖియ్యన్తస్స విపాచేన్తస్స. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ మహానామేన సక్కేన – ‘అజ్జణ్హో, భన్తే, ఆగమేథా’తి వుచ్చమానా నాగమేస్సన్తీ’’తి…పే… సచ్చం కిర తుమ్హే, భిక్ఖవే, మహానామేన సక్కేన – ‘‘అజ్జణ్హో, భన్తే, ఆగమేథా’’తి వుచ్చమానా నాగమేథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, మహానామేన సక్కేన – ‘‘అజ్జణ్హో, భన్తే ఆగమేథా’’తి వుచ్చమానా నాగమేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే ఇమం సిక్ఖాపదం ఉద్దిసేయ్యాథ –
౩౦౬. ‘‘అగిలానేన భిక్ఖునా చతుమాసప్పచ్చయపవారణా సాదితబ్బా, అఞ్ఞత్ర పునపవారణాయ, అఞ్ఞత్ర నిచ్చపవారణాయ; తతో చే ఉత్తరి సాదియేయ్య, పాచిత్తియ’’న్తి.
౩౦౭. అగిలానేన భిక్ఖునా చతుమాసప్పచ్చయపవారణా సాదితబ్బాతి గిలానప్పచ్చయపవారణా సాదితబ్బా.
పునపవారణాపి సాదితబ్బాతి యదా గిలానో భవిస్సామి తదా విఞ్ఞాపేస్సామీతి.
నిచ్చపవారణాపి సాదితబ్బాతి యదా గిలానో భవిస్సామి తదా విఞ్ఞాపేస్సామీతి.
తతో చే ఉత్తరి సాదియేయ్యాతి అత్థి పవారణా భేసజ్జపరియన్తా న రత్తిపరియన్తా, అత్థి పవారణా రత్తిపరియన్తా న భేసజ్జపరియన్తా, అత్థి పవారణా భేసజ్జపరియన్తా చ రత్తిపరియన్తా చ, అత్థి పవారణా నేవ భేసజ్జపరియన్తా న రత్తిపరియన్తా.
భేసజ్జపరియన్తా నామ భేసజ్జాని పరిగ్గహితాని హోన్తి – ‘‘ఏత్తకేహి భేసజ్జేహి పవారేమీ’’తి. రత్తిపరియన్తా నామ రత్తియో పరిగ్గహితాయో హోన్తి – ‘‘ఏత్తకాసు రత్తీసు పవారేమీ’’తి. భేసజ్జపరియన్తా చ రత్తిపరియన్తా చ నామ భేసజ్జాని చ పరిగ్గహితాని హోన్తి రత్తియో చ పరిగ్గహితాయో హోన్తి – ‘‘ఏత్తకేహి భేసజ్జేహి ఏత్తకాసు రత్తీసు పవారేమీ’’తి. నేవ భేసజ్జపరియన్తా న రత్తిపరియన్తా నామ భేసజ్జాని చ అపరిగ్గహితాని హోన్తి రత్తియో చ అపరిగ్గహితాయో హోన్తి.
౩౦౮. భేసజ్జపరియన్తే – యేహి భేసజ్జేహి పవారితో హోతి తాని భేసజ్జాని ఠపేత్వా అఞ్ఞాని భేసజ్జాని విఞ్ఞాపేతి, ఆపత్తి పాచిత్తియస్స. రత్తిపరియన్తే – యాసు రత్తీసు పవారితో హోతి, తా రత్తియో ఠపేత్వా అఞ్ఞాసు రత్తీసు విఞ్ఞాపేతి, ఆపత్తి పాచిత్తియస్స. భేసజ్జపరియన్తే చ రత్తిపరియన్తే చ – యేహి భేసజ్జేహి పవారితో హోతి, తాని భేసజ్జాని ఠపేత్వా యాసు రత్తీసు పవారితో హోతి, తా రత్తియో ఠపేత్వా అఞ్ఞాని భేసజ్జాని అఞ్ఞాసు రత్తీసు విఞ్ఞాపేతి, ఆపత్తి పాచిత్తియస్స. నేవ భేసజ్జపరియన్తే న రత్తిపరియన్తే, అనాపత్తి.
౩౦౯. న భేసజ్జేన కరణీయేన [కరణీయే (సీ. స్యా.)] భేసజ్జం విఞ్ఞాపేతి, ఆపత్తి పాచిత్తియస్స. అఞ్ఞేన భేసజ్జేన కరణీయేన అఞ్ఞం భేసజ్జం విఞ్ఞాపేతి, ఆపత్తి పాచిత్తియస్స. తతుత్తరి తతుత్తరిసఞ్ఞీ భేసజ్జం విఞ్ఞాపేతి, ఆపత్తి పాచిత్తియస్స. తతుత్తరి వేమతికో భేసజ్జం విఞ్ఞాపేతి, ఆపత్తి పాచిత్తియస్స. తతుత్తరి నతతుత్తరిసఞ్ఞీ భేసజ్జం విఞ్ఞాపేతి, ఆపత్తి పాచిత్తియస్స.
నతతుత్తరి తతుత్తరిసఞ్ఞీ, ఆపత్తి దుక్కటస్స. నతతుత్తరి వేమతికో, ఆపత్తి దుక్కటస్స. నతతుత్తరి నతతుత్తరిసఞ్ఞీ, అనాపత్తి.
౩౧౦. అనాపత్తి యేహి భేసజ్జేహి పవారితో హోతి తాని భేసజ్జాని విఞ్ఞాపేతి, యాసు రత్తీసు పవారితో హోతి తాసు రత్తీసు విఞ్ఞాపేతి, ‘‘ఇమేహి తయా భేసజ్జేహి పవారితామ్హ, అమ్హాకఞ్చ ఇమినా చ ఇమినా చ భేసజ్జేన అత్థో’’తి ఆచిక్ఖిత్వా విఞ్ఞాపేతి, ‘‘యాసు తయా రత్తీసు పవారితామ్హ తాయో చ రత్తియో వీతివత్తా అమ్హాకఞ్చ భేసజ్జేన అత్థో’’తి ఆచిక్ఖిత్వా విఞ్ఞాపేతి, ఞాతకానం పవారితానం, అఞ్ఞస్సత్థాయ, అత్తనో ధనేన, ఉమ్మత్తకస్స, ఆదికమ్మికస్సాతి.
మహానామసిక్ఖాపదం నిట్ఠితం సత్తమం.
౮. ఉయ్యుత్తసేనాసిక్ఖాపదం
౩౧౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన రాజా పసేనది కోసలో సేనాయ అబ్భుయ్యాతో హోతి. ఛబ్బగ్గియా భిక్ఖూ ఉయ్యుత్తం సేనం దస్సనాయ అగమంసు. అద్దసా ఖో రాజా పసేనది కోసలో ఛబ్బగ్గియే భిక్ఖూ దూరతోవ ఆగచ్ఛన్తే. దిస్వాన పక్కోసాపేత్వా ఏతదవోచ – ‘‘కిస్స తుమ్హే, భన్తే, ఆగతత్థా’’తి? ‘‘మహారాజానం మయం దట్ఠుకామా’’ [మహారాజ మహారాజానం మయం దట్ఠుకామా (క.)] తి. ‘‘కిం, భన్తే, మం దిట్ఠేన యుద్ధాభినన్దినం [యుద్ధాభినన్దినా (క.)]; నను భగవా పస్సితబ్బో’’తి? మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా ఉయ్యుత్తం సేనం దస్సనాయ ఆగచ్ఛిస్సన్తి! అమ్హాకమ్పి అలాభా, అమ్హాకమ్పి దుల్లద్ధం, యే మయం ఆజీవస్స హేతు పుత్తదారస్స కారణా సేనాయ ఆగచ్ఛామా’’తి! అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ ఉయ్యుత్తం సేనం దస్సనాయ గచ్ఛిస్సన్తీ’’తి…పే… సచ్చం కిర తుమ్హే, భిక్ఖవే, ఉయ్యుత్తం సేనం దస్సనాయ గచ్ఛథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, ఉయ్యుత్తం సేనం దస్సనాయ గచ్ఛిస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
‘‘యో పన భిక్ఖు ఉయ్యుత్తం సేనం దస్సనాయ గచ్ఛేయ్య, పాచిత్తియ’’న్తి.
ఏవఞ్చిదం భగవతా భిక్ఖూనం సిక్ఖాపదం పఞ్ఞత్తం హోతి.
౩౧౨. తేన ఖో పన సమయేన అఞ్ఞతరస్స భిక్ఖునో మాతులో సేనాయ గిలానో హోతి. సో తస్స భిక్ఖునో సన్తికే దూతం పాహేసి – ‘‘అహఞ్హి సేనాయ గిలానో. ఆగచ్ఛతు భదన్తో. ఇచ్ఛామి భదన్తస్స ఆగత’’న్తి. అథ ఖో తస్స భిక్ఖునో ఏతదహోసి – ‘‘భగవతా సిక్ఖాపదం పఞ్ఞత్తం – ‘న ఉయ్యుత్తం సేనం దస్సనాయ గన్తబ్బ’న్తి. అయఞ్చ మే మాతులో సేనాయ గిలానో. కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, తథారూపప్పచ్చయా సేనాయ గన్తుం. ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౩౧౩. ‘‘యో పన భిక్ఖు ఉయ్యుత్తం సేనం దస్సనాయ గచ్ఛేయ్య, అఞ్ఞత్ర తథారూపప్పచ్చయా, పాచిత్తియ’’న్తి.
౩౧౪. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.
ఉయ్యుత్తా నామ సేనా గామతో నిక్ఖమిత్వా నివిట్ఠా వా హోతి పయాతా వా.
సేనా నామ హత్థీ అస్సా రథా పత్తీ. ద్వాదసపురిసో హత్థీ, తిపురిసో అస్సో, చతుపురిసో రథో, చత్తారో పురిసా సరహత్థా పత్తి. దస్సనాయ గచ్ఛతి, ఆపత్తి దుక్కటస్స. యత్థ ఠితో పస్సతి, ఆపత్తి పాచిత్తియస్స. దస్సనూపచారం విజహిత్వా పునప్పునం పస్సతి, ఆపత్తి పాచిత్తియస్స.
అఞ్ఞత్ర తథారూపప్పచ్చయాతి ఠపేత్వా తథారూపప్పచ్చయం.
౩౧౫. ఉయ్యుత్తే ఉయ్యుత్తసఞ్ఞీ దస్సనాయ గచ్ఛతి, అఞ్ఞత్ర తథారూపప్పచ్చయా, ఆపత్తి పాచిత్తియస్స. ఉయ్యుత్తే వేమతికో దస్సనాయ గచ్ఛతి, అఞ్ఞత్ర తథారూపప్పచ్చయా, ఆపత్తి పాచిత్తియస్స. ఉయ్యుత్తే అనుయ్యుత్తసఞ్ఞీ దస్సనాయ గచ్ఛతి, అఞ్ఞత్ర తథారూపప్పచ్చయా, ఆపత్తి పాచిత్తియస్స.
ఏకమేకం దస్సనాయ గచ్ఛతి, ఆపత్తి దుక్కటస్స. యత్థ ఠితో పస్సతి, ఆపత్తి దుక్కటస్స. దస్సనూపచారం విజహిత్వా పునప్పునం పస్సతి, ఆపత్తి దుక్కటస్స. అనుయ్యుత్తే ఉయ్యుత్తసఞ్ఞీ, ఆపత్తి దుక్కటస్స. అనుయ్యుత్తే వేమతికో, ఆపత్తి దుక్కటస్స. అనుయ్యుత్తే అనుయ్యుత్తసఞ్ఞీ, అనాపత్తి.
౩౧౬. అనాపత్తి ఆరామే ఠితో పస్సతి, భిక్ఖుస్స ఠితోకాసం వా నిసిన్నోకాసం వా నిపన్నోకాసం వా ఆగచ్ఛతి, పటిపథం గచ్ఛన్తో పస్సతి, తథారూపప్పచ్చయా, ఆపదాసు, ఉమ్మత్తకస్స, ఆదికమ్మికస్సాతి.
ఉయ్యుత్తసేనాసిక్ఖాపదం నిట్ఠితం అట్ఠమం.
౯. సేనావాససిక్ఖాపదం
౩౧౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ సతి కరణీయే సేనం గన్త్వా అతిరేకతిరత్తం సేనాయ వసన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా సేనాయ వసిస్సన్తి! అమ్హాకమ్పి అలాభా, అమ్హాకమ్పి దుల్లద్ధం, యే మయం ఆజీవస్స హేతు పుత్తదారస్స కారణా సేనాయ పటివసామా’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ అతిరేకతిరత్తం సేనాయ వసిస్సన్తీ’’తి…పే… సచ్చం కిర తుమ్హే, భిక్ఖవే, అతిరేకతిరత్తం సేనాయ వసథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, అతిరేకతిరత్తం సేనాయ వసిస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౩౧౮. ‘‘సియా చ తస్స భిక్ఖునో కోచిదేవ పచ్చయో సేనం గమనాయ, దిరత్తతిరత్తం తేన భిక్ఖునా సేనాయ వసితబ్బం. తతో చే ఉత్తరిం వసేయ్య, పాచిత్తియ’’న్తి.
౩౧౯. సియా చ తస్స భిక్ఖునో కోచిదేవ పచ్చయో సేనం గమనాయాతి సియా పచ్చయో సియా కరణీయం.
దిరత్తతిరత్తం తేన భిక్ఖునా సేనాయ వసితబ్బన్తి ద్వేతిస్సో రత్తియో వసితబ్బం.
తతో చే ఉత్తరి వసేయ్యాతి చతుత్థే దివసే అత్థఙ్గతే సూరియే సేనాయ వసతి, ఆపత్తి పాచిత్తియస్స.
౩౨౦. అతిరేకతిరత్తే అతిరేకసఞ్ఞీ సేనాయ వసతి, ఆపత్తి పాచిత్తియస్స. అతిరేకతిరత్తే వేమతికో సేనాయ వసతి, ఆపత్తి పాచిత్తియస్స. అతిరేకతిరత్తే ఊనకసఞ్ఞీ సేనాయ వసతి, ఆపత్తి పాచిత్తియస్స.
ఊనకతిరత్తే అతిరేకసఞ్ఞీ, ఆపత్తి దుక్కటస్స. ఊనకతిరత్తే వేమతికో, ఆపత్తి దుక్కటస్స. ఊనకతిరత్తే ఊనకసఞ్ఞీ, అనాపత్తి.
౩౨౧. అనాపత్తి ద్వేతిస్సో రత్తియో వసతి, ఊనకద్వేతిస్సో రత్తియో వసతి, ద్వే రత్తియో వసిత్వా తతియాయ రత్తియా పురారుణా నిక్ఖమిత్వా పున వసతి, గిలానో వసతి, గిలానస్స కరణీయేన వసతి, సేనా వా పటిసేనాయ రుద్ధా హోతి, కేనచి పలిబుద్ధో హోతి, ఆపదాసు, ఉమ్మత్తకస్స, ఆదికమ్మికస్సాతి.
సేనావాససిక్ఖాపదం నిట్ఠితం నవమం.
౧౦. ఉయ్యోధికసిక్ఖాపదం
౩౨౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖూ దిరత్తతిరత్తం సేనాయ వసమానా ఉయ్యోధికమ్పి బలగ్గమ్పి సేనాబ్యూహమ్పి అనీకదస్సనమ్పి గచ్ఛన్తి. అఞ్ఞతరోపి ఛబ్బగ్గియో భిక్ఖు ఉయ్యోధికం గన్త్వా కణ్డేన పటివిద్ధో హోతి. మనుస్సా తం భిక్ఖుం ఉప్పణ్డేసుం – ‘‘కచ్చి, భన్తే, సుయుద్ధం అహోసి, కతి తే లక్ఖాని లద్ధానీ’’తి? సో భిక్ఖు తేహి మనుస్సేహి ఉప్పణ్డీయమానో మఙ్కు అహోసి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా ఉయ్యోధికం దస్సనాయ ఆగచ్ఛిస్సన్తి! అమ్హాకమ్పి అలాభా, అమ్హాకమ్పి దుల్లద్ధం, యే మయం ఆజీవస్స హేతు పుత్తదారస్స కారణా ఉయ్యోధికం ఆగచ్ఛామా’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ ఉయ్యోధికం దస్సనాయ గచ్ఛిస్సన్తీ’’తి…పే… సచ్చం కిర తుమ్హే, భిక్ఖవే, ఉయ్యోధికం దస్సనాయ గచ్ఛథాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, ఉయ్యోధికం దస్సనాయ గచ్ఛిస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –
౩౨౩. ‘‘దిరత్తతిరత్తం చే భిక్ఖు సేనాయ వసమానో ఉయ్యోధికం వా బలగ్గం వా సేనాబ్యూహం వా అనీకదస్సనం వా గచ్ఛేయ్య, పాచిత్తియ’’న్తి.
౩౨౪. దిరత్తతిరత్తం చే భిక్ఖు సేనాయ వసమానోతి ద్వేతిస్సో రత్తియో వసమానో.
ఉయ్యోధికం నామ యత్థ సమ్పహారో దిస్సతి.
బలగ్గం నామ ఏత్తకా హత్థీ, ఏత్తకా అస్సా, ఏత్తకా రథా, ఏత్తకా పత్తీ.
సేనాబ్యూహం నామ ఇతో హత్థీ హోన్తు, ఇతో అస్సా హోన్తు, ఇతో రథా హోన్తు, ఇతో పత్తికా హోన్తు.
అనీకం నామ హత్థానీకం, అస్సానీకం, రథానీకం, పత్తానీకం. తయో హత్థీ పచ్ఛిమం హత్థానీకం, తయో అస్సా పచ్ఛిమం అస్సానీకం, తయో రథా పచ్ఛిమం రథానీకం, చత్తారో పురిసా సరహత్థా పత్తీ పచ్ఛిమం పత్తానీకం. దస్సనాయ గచ్ఛతి, ఆపత్తి దుక్కటస్స. యత్థ ఠితో పస్సతి, ఆపత్తి పాచిత్తియస్స. దస్సనూపచారం విజహిత్వా పునప్పునం పస్సతి, ఆపత్తి పాచిత్తియస్స.