౯. దుట్ఠుల్లారోచనసిక్ఖాపదం

౭౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఆయస్మా ఉపనన్దో సక్యపుత్తో ఛబ్బగ్గియేహి భిక్ఖూహి సద్ధిం భణ్డనకతో హోతి. సో సఞ్చేతనికం సుక్కవిస్సట్ఠిం ఆపత్తిం ఆపజ్జిత్వా సఙ్ఘం తస్సా ఆపత్తియా పరివాసం యాచి. తస్స సఙ్ఘో తస్సా ఆపత్తియా పరివాసం అదాసి. తేన ఖో పన సమయేన సావత్థియం అఞ్ఞతరస్స పూగస్స సఙ్ఘభత్తం హోతి. సో పరివసన్తో భత్తగ్గే ఆసనపరియన్తే నిసీది. ఛబ్బగ్గియా భిక్ఖూ తే ఉపాసకే ఏతదవోచుం – ‘‘ఏసో, ఆవుసో, ఆయస్మా ఉపనన్దో సక్యపుత్తో తుమ్హాకం సమ్భావితో కులూపకో; యేనేవ హత్థేన సద్ధాదేయ్యం భుఞ్జతి తేనేవ హత్థేన ఉపక్కమిత్వా అసుచిం మోచేసి. సో సఞ్చేతనికం సుక్కవిస్సట్ఠిం ఆపత్తిం ఆపజ్జిత్వా సఙ్ఘం తస్సా ఆపత్తియా పరివాసం యాచి. తస్స సఙ్ఘో తస్సా ఆపత్తియా పరివాసం అదాసి. సో పరివసన్తో ఆసనపరియన్తే నిసిన్నో’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ భిక్ఖుస్స దుట్ఠుల్లం ఆపత్తిం అనుపసమ్పన్నస్స ఆరోచేస్సన్తీ’’తి…పే… ‘‘సచ్చం కిర తుమ్హే, భిక్ఖవే, భిక్ఖుస్స దుట్ఠుల్లం ఆపత్తిం అనుపసమ్పన్నస్స ఆరోచేథా’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ తుమ్హే, మోఘపురిసా, భిక్ఖుస్స దుట్ఠుల్లం ఆపత్తిం అనుపసమ్పన్నస్స ఆరోచేస్సథ! నేతం, మోఘపురిసా, అప్పసన్నానం వా పసాదాయ…పే… ఏవఞ్చ పన, భిక్ఖవే, ఇమం సిక్ఖాపదం ఉద్దిసేయ్యాథ –

౭౯. ‘‘యో పన భిక్ఖు భిక్ఖుస్స దుట్ఠుల్లం ఆపత్తిం అనుపసమ్పన్నస్స ఆరోచేయ్య, అఞ్ఞత్ర భిక్ఖుసమ్ముతియా [భిక్ఖుసమ్మతియా (స్యా.)], పాచిత్తియ’’న్తి.

౮౦. యో పనాతి యో యాదిసో…పే… భిక్ఖూతి…పే… అయం ఇమస్మిం అత్థే అధిప్పేతో భిక్ఖూతి.

భిక్ఖుస్సాతి అఞ్ఞస్స భిక్ఖుస్స.

దుట్ఠుల్లా నామ ఆపత్తి – చత్తారి చ పారాజికాని, తేరస చ సఙ్ఘాదిసేసా.

అనుపసమ్పన్నో నామ భిక్ఖుఞ్చ భిక్ఖునిఞ్చ ఠపేత్వా అవసేసో అనుపసమ్పన్నో నామ.

ఆరోచేయ్యాతి ఆరోచేయ్య ఇత్థియా వా పురిసస్స వా గహట్ఠస్స వా పబ్బజితస్స వా.

అఞ్ఞత్ర భిక్ఖుసమ్ముతియాతి ఠపేత్వా భిక్ఖుసమ్ముతిం.

అత్థి భిక్ఖుసమ్ముతి ఆపత్తిపరియన్తా, న కులపరియన్తా. అత్థి భిక్ఖుసమ్ముతి కులపరియన్తా, న ఆపత్తిపరియన్తా, అత్థి భిక్ఖుసమ్ముతి ఆపత్తిపరియన్తా చ కులపరియన్తా చ, అత్థి భిక్ఖుసమ్ముతి నేవ ఆపత్తిపరియన్తా న కులపరియన్తా.

ఆపత్తిపరియన్తా నామ ఆపత్తియో పరిగ్గహితాయో హోన్తి – ‘‘ఏత్తకాహి ఆపత్తీహి ఆరోచేతబ్బో’’తి.

కులపరియన్తా నామ కులాని పరిగ్గహితాని హోన్తి – ‘‘ఏత్తకేసు కులేసు ఆరోచేతబ్బో’’తి. ఆపత్తిపరియన్తా చ కులపరియన్తా చ నామ ఆపత్తియో చ పరిగ్గహితాయో హోన్తి, కులాని చ పరిగ్గహితాని హోన్తి – ‘‘ఏత్తకాహి ఆపత్తీహి ఏత్తకేసు కులేసు ఆరోచేతబ్బో’’తి. నేవ ఆపత్తిపరియన్తా న కులపరియన్తా నామ ఆపత్తియో చ అపరిగ్గహితాయో హోన్తి, కులాని చ అపరిగ్గహితాని హోన్తి – ‘‘ఏత్తకాహి ఆపత్తీహి ఏత్తకేసు కులేసు ఆరోచేతబ్బో’’తి.

౮౧. ఆపత్తిపరియన్తే యా ఆపత్తియో పరిగ్గహితాయో హోన్తి, తా ఆపత్తియో ఠపేత్వా అఞ్ఞాహి ఆపత్తీహి ఆరోచేతి, ఆపత్తి పాచిత్తియస్స.

కులపరియన్తే యాని కులాని పరిగ్గహితాని హోన్తి, తాని కులాని ఠపేత్వా అఞ్ఞేసు కులేసు ఆరోచేతి, ఆపత్తి పాచిత్తియస్స.

ఆపత్తిపరియన్తే చ కులపరియన్తే చ యా ఆపత్తియో పరిగ్గహితాయో హోన్తి, తా ఆపత్తియో ఠపేత్వా యాని కులాని పరిగ్గహితాని హోన్తి, తాని కులాని ఠపేత్వా అఞ్ఞాహి ఆపత్తీహి అఞ్ఞేసు కులేసు ఆరోచేతి, ఆపత్తి పాచిత్తియస్స.

నేవ ఆపత్తిపరియన్తే న కులపరియన్తే, అనాపత్తి.

౮౨. దుట్ఠుల్లాయ ఆపత్తియా దుట్ఠుల్లాపత్తిసఞ్ఞీ అనుపసమ్పన్నస్స ఆరోచేతి, అఞ్ఞత్ర భిక్ఖుసమ్ముతియా, ఆపత్తి పాచిత్తియస్స.

దుట్ఠుల్లాయ ఆపత్తియా వేమతికో అనుపసమ్పన్నస్స ఆరోచేతి, అఞ్ఞత్ర భిక్ఖుసమ్ముతియా, ఆపత్తి పాచిత్తియస్స.

దుట్ఠుల్లాయ ఆపత్తియా అదుట్ఠుల్లాపత్తిసఞ్ఞీ అనుపసమ్పన్నస్స ఆరోచేతి, అఞ్ఞత్ర భిక్ఖుసమ్ముతియా, ఆపత్తి పాచిత్తియస్స.

అదుట్ఠుల్లం ఆపత్తిం ఆరోచేతి, ఆపత్తి దుక్కటస్స.

అనుపసమ్పన్నస్స దుట్ఠుల్లం వా అదుట్ఠుల్లం వా అజ్ఝాచారం ఆరోచేతి, ఆపత్తి దుక్కటస్స.

అదుట్ఠుల్లాయ ఆపత్తియా దుట్ఠుల్లాపత్తిసఞ్ఞీ, ఆపత్తి దుక్కటస్స.

అదుట్ఠుల్లాయ ఆపత్తియా వేమతికో, ఆపత్తి దుక్కటస్స.

అదుట్ఠుల్లాయ ఆపత్తియా అదుట్ఠుల్లాపత్తిసఞ్ఞీ, ఆపత్తి దుక్కటస్స.

౮౩. అనాపత్తి వత్థుం ఆరోచేతి నో ఆపత్తిం, ఆపత్తిం ఆరోచేతి నో వత్థుం, భిక్ఖుసమ్ముతియా, ఉమ్మత్తకస్స, ఆదికమ్మికస్సాతి.

దుట్ఠుల్లారోచనసిక్ఖాపదం నిట్ఠితం నవమం.