౨౩౧. దుగ్గహితసుగ్గహితాదికథా

౩౭౭. తేన ఖో పన సమయేన ఆయస్మా రేవతో అఞ్ఞతరస్స భిక్ఖునో హత్థే ఆయస్మతో సారిపుత్తస్స చీవరం పాహేసి – ‘‘ఇమం చీవరం థేరస్స దేహీ’’తి. అథ ఖో సో భిక్ఖు అన్తరామగ్గే ఆయస్మతో రేవతస్స విస్సాసా తం చీవరం అగ్గహేసి. అథ ఖో ఆయస్మా రేవతో ఆయస్మతా సారిపుత్తేన సమాగన్త్వా పుచ్ఛి – ‘‘అహం, భన్తే, థేరస్స చీవరం పాహేసిం. సమ్పత్తం తం చీవర’’న్తి? ‘‘నాహం తం, ఆవుసో, చీవరం పస్సామీ’’తి. అథ ఖో ఆయస్మా రేవతో తం భిక్ఖుం ఏతదవోచ – ‘‘అహం, ఆవుసో, ఆయస్మతో హత్థే థేరస్స చీవరం పాహేసిం. కహం తం చీవర’’న్తి? ‘‘అహం, భన్తే, ఆయస్మతో విస్సాసా తం చీవరం అగ్గహేసి’’న్తి. భగవతో ఏతమత్థం ఆరోచేసుం.

౩౭౮. ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దేహీ’’తి. సో అన్తరామగ్గే యో పహిణతి తస్స విస్సాసా గణ్హాతి. సుగ్గహితం. యస్స పహియ్యతి తస్స విస్సాసా గణ్హాతి. దుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దేహీ’’తి. సో అన్తరామగ్గే యస్స పహియ్యతి తస్స విస్సాసా గణ్హాతి. దుగ్గహితం. యో పహిణతి తస్స విస్సాసా గణ్హాతి. సుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దేహీ’’తి. సో అన్తరామగ్గే సుణాతి – యో పహిణతి సో కాలఙ్కతోతి. తస్స మతకచీవరం అధిట్ఠాతి. స్వాధిట్ఠితం. యస్స పహియ్యతి తస్స విస్సాసా గణ్హాతి. దుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దేహీ’’తి. సో అన్తరామగ్గే సుణాతి – యస్స పహియ్యతి సో కాలఙ్కతోతి. తస్స మతకచీవరం అధిట్ఠాతి. ద్వాధిట్ఠితం. యో పహిణతి తస్స విస్సాసా గణ్హాతి. సుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దేహీ’’తి. సో అన్తరామగ్గే సుణాతి – ఉభో కాలఙ్కతాతి. యో పహిణతి తస్స మతకచీవరం అధిట్ఠాతి. స్వాధిట్ఠితం. యస్స పహియ్యతి తస్స మతకచీవరం అధిట్ఠాతి. ద్వాధిట్ఠితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దమ్మీ’’తి. సో అన్తరామగ్గే యో పహిణతి తస్స విస్సాసా గణ్హాతి. దుగ్గహితం. యస్స పహియ్యతి తస్స విస్సాసా గణ్హాతి. సుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దమ్మీ’’తి. సో అన్తరామగ్గే యస్స పహియ్యతి తస్స విస్సాసా గణ్హాతి. సుగ్గహితం. యో పహిణతి తస్స విస్సాసా గణ్హాతి. దుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దమ్మీ’’తి. సో అన్తరామగ్గే సుణాతి – ‘‘యో పహిణతి సో కాలఙ్కతో’’తి. తస్స మతకచీవరం అధిట్ఠాతి. ద్వాధిట్ఠితం. యస్స పహియ్యతి తస్స విస్సాసా గణ్హాతి. సుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దమ్మీ’’తి. సో అన్తరామగ్గే సుణాతి – ‘‘యస్స పహియ్యతి సో కాలఙ్కతో’’తి. తస్స మతకచీవరం అధిట్ఠాతి. స్వాధిట్ఠితం. యో పహిణతి తస్స విస్సాసా గణ్హాతి. దుగ్గహితం.

ఇధ పన, భిక్ఖవే, భిక్ఖు భిక్ఖుస్స హత్థే చీవరం పహిణతి – ‘‘ఇమం చీవరం ఇత్థన్నామస్స దమ్మీ’’తి. సో అన్తరామగ్గే సుణాతి ‘‘ఉభో కాలఙ్కతా’’తి. యో పహిణతి తస్స మతకచీవరం అధిట్ఠాతి. ద్వాధిట్ఠితం. యస్స పహియ్యతి తస్స మతకచీవరం అధిట్ఠాతి. స్వాధిట్ఠితం.

దుగ్గహితసుగ్గహితాదికథా నిట్ఠితా.