౨౩౨. అట్ఠచీవరమాతికా

౩౭౯. అట్ఠిమా, భిక్ఖవే, మాతికా చీవరస్స ఉప్పాదాయ – సీమాయ దేతి, కతికాయ దేతి, భిక్ఖాపఞ్ఞత్తియా దేతి, సఙ్ఘస్స దేతి, ఉభతోసఙ్ఘస్స దేతి, వస్సంవుట్ఠసఙ్ఘస్స దేతి, ఆదిస్స దేతి, పుగ్గలస్స దేతి.

సీమాయ దేతి – యావతికా భిక్ఖూ అన్తోసీమగతా తేహి భాజేతబ్బం. కతికాయ దేతి – సమ్బహులా ఆవాసా సమానలాభా హోన్తి ఏకస్మిం ఆవాసే దిన్నే సబ్బత్థ దిన్నం హోతి. భిక్ఖాపఞ్ఞత్తియా దేతి, యత్థ సఙ్ఘస్స ధువకారా కరియ్యన్తి, తత్థ దేతి. సఙ్ఘస్స దేతి, సమ్ముఖీభూతేన సఙ్ఘేన భాజేతబ్బం. ఉభతోసఙ్ఘస్స దేతి, బహుకాపి భిక్ఖూ హోన్తి, ఏకా భిక్ఖునీ హోతి, ఉపడ్ఢం దాతబ్బం, బహుకాపి భిక్ఖునియో హోన్తి, ఏకో భిక్ఖు హోతి, ఉపడ్ఢం దాతబ్బం. వస్సంవుట్ఠసఙ్ఘస్స దేతి, యావతికా భిక్ఖూ తస్మిం ఆవాసే వస్సంవుట్ఠా, తేహి భాజేతబ్బం. ఆదిస్స దేతి, యాగుయా వా భత్తే వా ఖాదనీయే వా చీవరే వా సేనాసనే వా భేసజ్జే వా. పుగ్గలస్స దేతి, ‘‘ఇమం చీవరం ఇత్థన్నామస్స దమ్మీ’’తి.

అట్ఠచీవరమాతికా నిట్ఠితా.

చీవరక్ఖన్ధకో అట్ఠమో.