౨౩౦. సఙ్ఘే భిన్నే చీవరుప్పాదకథా

౩౭౬. ఇధ పన, భిక్ఖవే, వస్సంవుట్ఠానం భిక్ఖూనం అనుప్పన్నే చీవరే సఙ్ఘో భిజ్జతి. తత్థ మనుస్సా ఏకస్మిం పక్ఖే ఉదకం దేన్తి, ఏకస్మిం పక్ఖే చీవరం దేన్తి – సఙ్ఘస్స దేమాతి. సఙ్ఘస్సేవేతం.

ఇధ పన, భిక్ఖవే, వస్సంవుట్ఠానం భిక్ఖూనం అనుప్పన్నే చీవరే సఙ్ఘో భిజ్జతి. తత్థ మనుస్సా ఏకస్మిం పక్ఖే ఉదకం దేన్తి, తస్మింయేవ పక్ఖే చీవరం దేన్తి – సఙ్ఘస్స దేమాతి. సఙ్ఘస్సేవేతం.

ఇధ పన, భిక్ఖవే, వస్సంవుట్ఠానం భిక్ఖూనం అనుప్పన్నే చీవరే సఙ్ఘో భిజ్జతి. తత్థ మనుస్సా ఏకస్మిం పక్ఖే ఉదకం దేన్తి, ఏకస్మిం పక్ఖే చీవరం దేన్తి – పక్ఖస్స దేమాతి. పక్ఖస్సేవేతం.

ఇధ పన, భిక్ఖవే, వస్సంవుట్ఠానం భిక్ఖూనం అనుప్పన్నే చీవరే సఙ్ఘో భిజ్జతి. తత్థ మనుస్సా ఏకస్మిం పక్ఖే ఉదకం దేన్తి, తస్మింయేవ పక్ఖే చీవరం దేన్తి – పక్ఖస్స దేమాతి. పక్ఖస్సేవేతం.

ఇధ పన, భిక్ఖవే, వస్సంవుట్ఠానం భిక్ఖూనం ఉప్పన్నే చీవరే అభాజితే సఙ్ఘో భిజ్జతి. సబ్బేసం సమకం భాజేతబ్బన్తి.

సఙ్ఘే భిన్నే చీవరుప్పాదకథా నిట్ఠితా.