౨౨౭. కుసచీరాదిపటిక్ఖేపకథా

౩౭౧. తేన ఖో పన సమయేన అఞ్ఞతరో భిక్ఖు కుసచీరం నివాసేత్వా…పే… వాకచీరం నివాసేత్వా…పే… ఫలకచీరం నివాసేత్వా…పే… కేసకమ్బలం నివాసేత్వా…పే… వాళకమ్బలం నివాసేత్వా…పే… ఉలూకపక్ఖం నివాసేత్వా…పే… అజినక్ఖిపం నివాసేత్వా యేన భగవా తేనుపసఙ్కమి; ఉపసఙ్కమిత్వా భగవన్తం ఏతదవోచ – ‘‘భగవా, భన్తే, అనేకపరియాయేన అప్పిచ్ఛస్స సన్తుట్ఠస్స సల్లేఖస్స ధుతస్స పాసాదికస్స అపచయస్స వీరియారమ్భస్స వణ్ణవాదీ. ఇదం, భన్తే, అజినక్ఖిపం అనేకపరియాయేన అప్పిచ్ఛతాయ సన్తుట్ఠితాయ సల్లేఖాయ ధుతతాయ పాసాదికతాయ అపచయాయ వీరియారమ్భాయ సంవత్తతి. సాధు, భన్తే, భగవా భిక్ఖూనం అజినక్ఖిపం అనుజానాతూ’’తి. విగరహి బుద్ధో భగవా – ‘‘అననుచ్ఛవికం, మోఘపురిస, అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ త్వం, మోఘపురిస, అజినక్ఖిపం తిత్థియధజం ధారేస్ససి. నేతం, మోఘపురిస, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, అజినక్ఖిపం తిత్థియధజం ధారేతబ్బం. యో ధారేయ్య, ఆపత్తి థుల్లచ్చయస్సా’’తి.

తేన ఖో పన సమయేన అఞ్ఞతరో భిక్ఖు అక్కనాళం నివాసేత్వా…పే… పోత్థకం నివాసేత్వా యేన భగవా తేనుపసఙ్కమి, ఉపసఙ్కమిత్వా భగవన్తం ఏతదవోచ – ‘‘భగవా, భన్తే, అనేకపరియాయేన అప్పిచ్ఛస్స సన్తుట్ఠస్స సల్లేఖస్స ధుతస్స పాసాదికస్స అపచయస్స వీరియారమ్భస్స, వణ్ణవాదీ. అయం, భన్తే, పోత్థకో అనేకపరియాయేన అప్పిచ్ఛతాయ సన్తుట్ఠితాయ సల్లేఖాయ ధుతతాయ పాసాదికతాయ అపచయాయ వీరియారమ్భాయ సంవత్తతి. సాధు, భన్తే, భగవా భిక్ఖూనం పోత్థకం అనుజానాతూ’’తి. విగరహి బుద్ధో భగవా – ‘‘అననుచ్ఛవికం, మోఘపురిస, అననులోమికం అప్పతిరూపం అస్సామణకం అకప్పియం అకరణీయం. కథఞ్హి నామ త్వం, మోఘపురిస, పోత్థకం నివాసేస్ససి. నేతం, మోఘపురిస, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, పోత్థకో నివాసేతబ్బో. యో నివాసేయ్య, ఆపత్తి దుక్కటస్సా’’తి.

కుసచీరాదిపటిక్ఖేపకథా నిట్ఠితా.