౨౨౮. సబ్బనీలకాదిపటిక్ఖేపకథా

౩౭౨. తేన ఖో పన సమయేన ఛబ్బగ్గియా భిక్ఖూ సబ్బనీలకాని చీవరాని ధారేన్తి…పే… సబ్బపీతకాని చీవరాని ధారేన్తి…పే… సబ్బలోహితకాని చీవరాని ధారేన్తి…పే… సబ్బమఞ్జిట్ఠకాని [సబ్బమఞ్జేట్ఠకాని (సీ. స్యా.)] చీవరాని ధారేన్తి…పే… సబ్బకణ్హాని చీవరాని ధారేన్తి …పే… సబ్బమహారఙ్గరత్తాని చీవరాని ధారేన్తి…పే… సబ్బమహానామరత్తాని చీవరాని ధారేన్తి…పే… అచ్ఛిన్నదసాని చీవరాని ధారేన్తి…పే… దీఘదసాని చీవరాని ధారేన్తి…పే… పుప్ఫదసాని చీవరాని ధారేన్తి…పే… ఫణదసాని [ఫలదసాని (క.)] చీవరాని ధారేన్తి…పే… కఞ్చుకం ధారేన్తి…పే… తిరీటకం ధారేన్తి…పే… వేఠనం ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా వేఠనం ధారేస్సన్తి, సేయ్యథాపి గిహీ కామభోగినో’’తి. భగవతో ఏతమత్థం ఆరోచేసుం. న, భిక్ఖవే, సబ్బనీలకాని చీవరాని ధారేతబ్బాని, న సబ్బపీతకాని చీవరాని ధారేతబ్బాని, న సబ్బలోహితకాని చీవరాని ధారేతబ్బాని, న సబ్బమఞ్జిట్ఠకాని చీవరాని ధారేతబ్బాని, న సబ్బకణ్హాని చీవరాని ధారేతబ్బాని, న సబ్బమహారఙ్గరత్తాని చీవరాని ధారేతబ్బాని, న సబ్బమహానామరత్తాని చీవరాని ధారేతబ్బాని, న అచ్ఛిన్నదసాని చీవరాని ధారేతబ్బాని, న దీఘదసాని చీవరాని ధారేతబ్బాని, న పుప్ఫదసాని చీవరాని ధారేతబ్బాని, న ఫణదసాని చీవరాని ధారేతబ్బాని, న కఞ్చుకం ధారేతబ్బం, న తిరీటకం ధారేతబ్బం, న వేఠనం ధారేతబ్బం. యో ధారేయ్య, ఆపత్తి దుక్కటస్సాతి.

సబ్బనీలకాదిపటిక్ఖేపకథా నిట్ఠితా.