౨౨౩. ఉపనన్దసక్యపుత్తవత్థు

౩౬౪. తేన ఖో పన సమయేన ఆయస్మా ఉపనన్దో సక్యపుత్తో సావత్థియం వస్సంవుట్ఠో అఞ్ఞతరం గామకావాసం అగమాసి. తత్థ చ భిక్ఖూ చీవరం భాజేతుకామా సన్నిపతింసు. తే ఏవమాహంసు – ‘‘ఇమాని ఖో, ఆవుసో, సఙ్ఘికాని చీవరాని భాజియిస్సన్తి, సాదియిస్ససి భాగ’’న్తి? ‘‘ఆమావుసో, సాదియిస్సామీ’’తి. తతో చీవరభాగం గహేత్వా అఞ్ఞం ఆవాసం అగమాసి. తత్థపి భిక్ఖూ చీవరం భాజేతుకామా సన్నిపతింసు. తేపి ఏవమాహంసు – ‘‘ఇమాని ఖో, ఆవుసో, సఙ్ఘికాని చీవరాని భాజియిస్సన్తి, సాదియిస్ససి భాగ’’న్తి? ‘‘ఆమావుసో, సాదియిస్సామీ’’తి. తతోపి చీవరభాగం గహేత్వా అఞ్ఞం ఆవాసం అగమాసి. తత్థపి భిక్ఖూ చీవరం భాజేతుకామా సన్నిపతింసు. తేపి ఏవమాహంసు – ‘‘ఇమాని ఖో, ఆవుసో, సఙ్ఘికాని చీవరాని భాజియిస్సన్తి, సాదియిస్ససి భాగ’’న్తి? ‘‘ఆమావుసో, సాదియిస్సామీ’’తి. తతోపి చీవరభాగం గహేత్వా మహన్తం చీవరభణ్డికం ఆదాయ పునదేవ సావత్థిం పచ్చాగఞ్ఛి. భిక్ఖూ ఏవమాహంసు – ‘‘మహాపుఞ్ఞోసి త్వం, ఆవుసో ఉపనన్ద, బహుం తే చీవరం ఉప్పన్న’’న్తి. ‘‘కుతో మే, ఆవుసో, పుఞ్ఞం? ఇధాహం, ఆవుసో, సావత్థియం వస్సంవుట్ఠో అఞ్ఞతరం గామకావాసం అగమాసిం. తత్థ భిక్ఖూ చీవరం భాజేతుకామా సన్నిపతింసు. తే మం ఏవమాహంసు – ‘ఇమాని ఖో, ఆవుసో, సఙ్ఘికాని చీవరాని భాజియిస్సన్తి, సాదియిస్ససి భాగ’న్తి? ‘ఆమావుసో, సాదియిస్సామీ’తి. తతో చీవరభాగం గహేత్వా అఞ్ఞం ఆవాసం అగమాసిం. తత్థపి భిక్ఖూ చీవరం భాజేతుకామా సన్నిపతింసు. తేపి మం ఏవమాహంసు – ‘ఇమాని ఖో, ఆవుసో, సఙ్ఘికాని చీవరాని భాజియిస్సన్తి, సాదియిస్ససి భాగ’’’న్తి? ‘ఆమావుసో, సాదియిస్సామీ’తి. తతోపి చీవరభాగం గహేత్వా అఞ్ఞం ఆవాసం అగమాసిం. తత్థపి భిక్ఖూ చీవరం భాజేతుకామా సన్నిపతింసు. తేపి మం ఏవమాహంసు – ‘ఇమాని ఖో, ఆవుసో, సఙ్ఘికాని చీవరాని భాజియిస్సన్తి, సాదియిస్ససి భాగ’న్తి? ‘ఆమావుసో, సాదియిస్సామీ’తి. తతోపి చీవరభాగం అగ్గహేసిం. ఏవం మే బహుం చీవరం ఉప్పన్నన్తి. ‘‘కిం పన త్వం, ఆవుసో ఉపనన్ద, అఞ్ఞత్ర వస్సంవుట్ఠో అఞ్ఞత్ర చీవరభాగం సాదియీ’’తి? ‘‘ఏవమావుసో’’తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఉపనన్దో సక్యపుత్తో అఞ్ఞత్ర వస్సంవుట్ఠో అఞ్ఞత్ర చీవరభాగం సాదియిస్సతీ’’తి. భగవతో ఏతమత్థం ఆరోచేసుం…పే… ‘‘సచ్చం కిర త్వం, ఉపనన్ద, అఞ్ఞత్ర వస్సంవుట్ఠో అఞ్ఞత్ర చీవరభాగం సాదియీ’’తి? ‘‘సచ్చం భగవా’’తి. విగరహి బుద్ధో భగవా…పే… కథఞ్హి నామ త్వం, మోఘపురిస, అఞ్ఞత్ర వస్సంవుట్ఠో అఞ్ఞత్ర చీవరభాగం సాదియిస్ససి. నేతం, మోఘపురిస, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, అఞ్ఞత్ర వస్సంవుట్ఠేన అఞ్ఞత్ర చీవరభాగో సాదితబ్బో. యో సాదియేయ్య, ఆపత్తి దుక్కటస్సా’’తి.

తేన ఖో పన సమయేన ఆయస్మా ఉపనన్దో సక్యపుత్తో ఏకో ద్వీసు ఆవాసేసు వస్సం వసి – ‘‘ఏవం మే బహుం చీవరం ఉప్పజ్జిస్సతీ’’తి. అథ ఖో తేసం భిక్ఖూనం ఏతదహోసి – ‘‘కథం ను ఖో ఆయస్మతో ఉపనన్దస్స సక్యపుత్తస్స చీవరపటివీసో దాతబ్బో’’తి? భగవతో ఏతమత్థం ఆరోచేసుం. దేథ, భిక్ఖవే, మోఘపురిసస్స ఏకాధిప్పాయం. ఇధ పన, భిక్ఖవే, భిక్ఖు ఏకో ద్వీసు ఆవాసేసు వస్సం వసతి – ‘‘ఏవం మే బహుం చీవరం ఉప్పజ్జిస్సతీ’’తి. సచే అముత్ర ఉపడ్ఢం అముత్ర ఉపడ్ఢం వసతి, అముత్ర ఉపడ్ఢో అముత్ర ఉపడ్ఢో చీవరపటివీసో దాతబ్బో. యత్థ వా పన బహుతరం వసతి, తతో చీవరపటివీసో దాతబ్బోతి.

ఉపనన్దసక్యపుత్తవత్థు నిట్ఠితం.