౨౨౨. సఙ్ఘికచీవరుప్పాదకథా

౩౬౩. తేన ఖో పన సమయేన అఞ్ఞతరో భిక్ఖు ఏకో వస్సం వసి. తత్థ మనుస్సా సఙ్ఘస్స దేమాతి చీవరాని అదంసు. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘చతువగ్గో పచ్ఛిమో సఙ్ఘో’తి. అహఞ్చమ్హి ఏకకో. ఇమే చ మనుస్సా సఙ్ఘస్స దేమాతి చీవరాని అదంసు. యంనూనాహం ఇమాని సఙ్ఘికాని చీవరాని సావత్థిం హరేయ్య’’న్తి. అథ ఖో సో భిక్ఖు తాని చీవరాని ఆదాయ సావత్థిం గన్త్వా భగవతో ఏతమత్థం ఆరోచేసి. ‘‘తుయ్హేవ, భిక్ఖు, తాని చీవరాని యావ కథినస్స ఉబ్భారాయా’’తి. ఇధ పన, భిక్ఖవే, భిక్ఖు ఏకో వస్సం వసతి. తత్థ మనుస్సా సఙ్ఘస్స దేమాతి చీవరాని దేన్తి. అనుజానామి, భిక్ఖవే, తస్సేవ తాని చీవరాని యావ కథినస్స ఉబ్భారాయాతి.

తేన ఖో పన సమయేన అఞ్ఞతరో భిక్ఖు ఉతుకాలం ఏకో వసి. తత్థ మనుస్సా సఙ్ఘస్స దేమాతి చీవరాని అదంసు. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘చతువగ్గో పచ్ఛిమో సఙ్ఘో’తి. అహఞ్చమ్హి ఏకకో. ఇమే చ మనుస్సా సఙ్ఘస్స దేమాతి చీవరాని అదంసు. యంనూనాహం ఇమాని సఙ్ఘికాని చీవరాని సావత్థిం హరేయ్య’’న్తి. అథ ఖో సో భిక్ఖు తాని చీవరాని ఆదాయ సావత్థిం గన్త్వా భిక్ఖూనం ఏతమత్థం ఆరోచేసి. భిక్ఖూ భగవతో ఏతమత్థం ఆరోచేసుం. అనుజానామి, భిక్ఖవే, సమ్ముఖీభూతేన సఙ్ఘేన భాజేతుం. ఇధ పన, భిక్ఖవే, భిక్ఖు ఉతుకాలం ఏకో వసతి. తత్థ మనుస్సా సఙ్ఘస్స దేమాతి చీవరాని దేన్తి. అనుజానామి, భిక్ఖవే, తేన భిక్ఖునా తాని చీవరాని అధిట్ఠాతుం – ‘‘మయ్హిమాని చీవరానీ’’తి. తస్స చే, భిక్ఖవే, భిక్ఖునో తం చీవరం అనధిట్ఠితే అఞ్ఞో భిక్ఖు ఆగచ్ఛతి, సమకో దాతబ్బో భాగో. తేహి చే, భిక్ఖవే, భిక్ఖూహి తం చీవరం భాజియమానే, అపాతితే కుసే, అఞ్ఞో భిక్ఖు ఆగచ్ఛతి, సమకో దాతబ్బో భాగో. తేహి చే, భిక్ఖవే, భిక్ఖూహి తం చీవరం భాజియమానే, పాతితే కుసే, అఞ్ఞో భిక్ఖు ఆగచ్ఛతి, నాకామా దాతబ్బో భాగోతి.

తేన ఖో పన సమయేన ద్వే భాతికా థేరా, ఆయస్మా చ ఇసిదాసో ఆయస్మా చ ఇసిభటో, సావత్థియం వస్సంవుట్ఠా అఞ్ఞతరం గామకావాసం అగమంసు. మనుస్సా చిరస్సాపి థేరా ఆగతాతి సచీవరాని భత్తాని అదంసు. ఆవాసికా భిక్ఖూ థేరే పుచ్ఛింసు – ‘‘ఇమాని, భన్తే, సఙ్ఘికాని చీవరాని థేరే ఆగమ్మ ఉప్పన్నాని, సాదియిస్సన్తి థేరా భాగ’’న్తి. థేరా ఏవమాహంసు – ‘‘యథా ఖో మయం, ఆవుసో, భగవతా ధమ్మం దేసితం ఆజానామ, తుమ్హాకంయేవ తాని చీవరాని యావ కథినస్స ఉబ్భారాయా’’తి.

తేన ఖో పన సమయేన తయో భిక్ఖూ రాజగహే వస్సం వసన్తి. తత్థ మనుస్సా సఙ్ఘస్స

దేమాతి చీవరాని దేన్తి. అథ ఖో తేసం భిక్ఖూనం ఏతదహోసి – ‘‘భగవతా పఞ్ఞత్తం ‘చతువగ్గో పచ్ఛిమో సఙ్ఘో’తి. మయఞ్చమ్హా తయో జనా. ఇమే చ మనుస్సా సఙ్ఘస్స దేమాతి చీవరాని దేన్తి. కథం ను ఖో అమ్హేహి పటిపజ్జితబ్బ’’న్తి? తేన ఖో పన సమయేన సమ్బహులా థేరా, ఆయస్మా చ నిలవాసీ ఆయస్మా చ సాణవాసీ ఆయస్మా చ గోతకో ఆయస్మా చ భగు ఆయస్మా చ ఫళికసన్తానో, పాటలిపుత్తే విహరన్తి కుక్కుటారామే. అథ ఖో తే భిక్ఖూ పాటలిపుత్తం గన్త్వా థేరే పుచ్ఛింసు. థేరా ఏవమాహంసు – ‘‘యథా ఖో మయం ఆవుసో భగవతా ధమ్మం దేసితం ఆజానామ, తుమ్హాకంయేవ తాని చీవరాని యావ కథినస్స ఉబ్భారాయా’’తి.

సఙ్ఘికచీవరుప్పాదకథా నిట్ఠితా.