౨౨౧. పచ్ఛిమవికప్పనుపగచీవరాదికథా

౩౫౮. అథ ఖో భిక్ఖూనం ఏతదహోసి – ‘‘యాని తాని భగవతా అనుఞ్ఞాతాని తిచీవరన్తి వా వస్సికసాటికాతి వా నిసీదనన్తి వా పచ్చత్థరణన్తి వా కణ్డుప్పటిచ్ఛాదీతి వా ముఖపుఞ్ఛనచోళన్తి వా పరిక్ఖారచోళన్తి వా, సబ్బాని తాని అధిట్ఠాతబ్బాని ను ఖో, ఉదాహు, వికప్పేతబ్బానీ’’తి? భగవతో ఏతమత్థం ఆరోచేసుం. అనుజానామి, భిక్ఖవే, తిచీవరం అధిట్ఠాతుం న వికప్పేతుం; వస్సికసాటికం వస్సానం చాతుమాసం అధిట్ఠాతుం, తతో పరం వికప్పేతుం; నిసీదనం అధిట్ఠాతుం న వికప్పేతుం; పచ్చత్థరణం అధిట్ఠాతుం న వికప్పేతుం; కణ్డుప్పటిచ్ఛాదిం యావఆబాధా అధిట్ఠాతుం తతో పరం వికప్పేతుం; ముఖపుఞ్ఛనచోళం అధిట్ఠాతుం న వికప్పేతుం; పరిక్ఖారచోళం అధిట్ఠాతుం న వికప్పేతున్తి.

అథ ఖో భిక్ఖూనం ఏతదహోసి – ‘‘కిత్తకం పచ్ఛిమం ను ఖో చీవరం వికప్పేతబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, ఆయామేన అట్ఠఙ్గులం సుగతఙ్గులేన చతురఙ్గులవిత్థతం పచ్ఛిమం చీవరం వికప్పేతున్తి.

౩౫౯. తేన ఖో పన సమయేన ఆయస్మతో మహాకస్సపస్స పంసుకూలకతో గరుకో హోతి. భగవతో ఏతమత్థం ఆరోచేసుం. అనుజానామి, భిక్ఖవే, సుత్తలూఖం కాతున్తి. వికణ్ణో హోతి. భగవతో ఏతమత్థం ఆరోచేసుం. అనుజానామి, భిక్ఖవే, వికణ్ణం ఉద్ధరితున్తి. సుత్తా ఓకిరియన్తి. భగవతో ఏతమత్థం ఆరోచేసుం. అనుజానామి, భిక్ఖవే, అనువాతం పరిభణ్డం ఆరోపేతున్తి.

తేన ఖో పన సమయేన సఙ్ఘాటియా పత్తా లుజ్జన్తి. భగవతో ఏతమత్థం ఆరోచేసుం. అనుజానామి, భిక్ఖవే, అట్ఠపదకం కాతున్తి.

౩౬౦. తేన ఖో పన సమయేన అఞ్ఞతరస్స భిక్ఖునో తిచీవరే కయిరమానే సబ్బం ఛిన్నకం నప్పహోతి. భగవతో ఏతమత్థం ఆరోచేసుం. అనుజానామి, భిక్ఖవే, ద్వే ఛిన్నకాని ఏకం అచ్ఛిన్నకన్తి.

ద్వే ఛిన్నకాని ఏకం అచ్ఛిన్నకం నప్పహోతి. భగవతో ఏతమత్థం ఆరోచేసుం. అనుజానామి, భిక్ఖవే, ద్వే అచ్ఛిన్నకాని ఏకం ఛిన్నకన్తి.

ద్వే అచ్ఛిన్నకాని ఏకం ఛిన్నకం నప్పహోతి. భగవతో ఏతమత్థం ఆరోచేసుం. అనుజానామి, భిక్ఖవే, అన్వాధికమ్పి ఆరోపేతుం, న చ, భిక్ఖవే, సబ్బం అచ్ఛిన్నకం ధారేతబ్బం. యో ధారేయ్య, ఆపత్తి దుక్కటస్సాతి.

౩౬౧. తేన ఖో పన సమయేన అఞ్ఞతరస్స భిక్ఖునో బహుం చీవరం ఉప్పన్నం హోతి. సో చ తం చీవరం మాతాపితూనం దాతుకామో హోతి. భగవతో ఏతమత్థం ఆరోచేసుం. మాతాపితరోతి [మాతాపితూనం ఖో (సీ.)] ఖో, భిక్ఖవే, దదమానే [వదమానో (క.), వదమానే (?)] కిం వదేయ్యామ? అనుజానామి, భిక్ఖవే, మాతాపితూనం దాతుం. న చ, భిక్ఖవే, సద్ధాదేయ్యం వినిపాతేతబ్బం. యో వినిపాతేయ్య, ఆపత్తి దుక్కటస్సాతి.

౩౬౨. తేన ఖో పన సమయేన అఞ్ఞతరో భిక్ఖు అన్ధవనే చీవరం నిక్ఖిపిత్వా సన్తరుత్తరేన గామం పిణ్డాయ పావిసి. చోరా తం చీవరం అవహరింసు. సో భిక్ఖు దుచ్చోళో హోతి లూఖచీవరో. భిక్ఖూ ఏవమాహంసు – ‘‘కిస్స త్వం, ఆవుసో, దుచ్చోళో లూఖచీవరోసీ’’తి? ‘‘ఇధాహం [సో అహం (కత్థచి)], ఆవుసో, అన్ధవనే చీవరం నిక్ఖిపిత్వా సన్తరుత్తరేన గామం పిణ్డాయ పావిసిం. చోరా తం చీవరం అవహరింసు. తేనాహం దుచ్చోళో లూఖచీవరో’’తి. భగవతో ఏతమత్థం ఆరోచేసుం. న, భిక్ఖవే, సన్తరుత్తరేన గామో పవిసితబ్బో. యో పవిసేయ్య, ఆపత్తి దుక్కటస్సాతి.

తేన ఖో పన సమయేన ఆయస్మా ఆనన్దో అస్సతియా సన్తరుత్తరేన గామం పిణ్డాయ పావిసి. భిక్ఖూ ఆయస్మన్తం ఆనన్దం ఏతదవోచుం – ‘‘నను, ఆవుసో ఆనన్ద, భగవతా పఞ్ఞత్తం – ‘న సన్తరుత్తరేన గామో పవిసితబ్బో’తి? కిస్స త్వం, ఆవుసో ఆనన్ద, సన్తరుత్తరేన గామం పవిట్ఠో’’తి? ‘‘సచ్చం, ఆవుసో, భగవతా పఞ్ఞత్తం – ‘న సన్తరుత్తరేన గామో పవిసితబ్బో’తి. అపి చాహం అస్సతియా పవిట్ఠో’’తి. భగవతో ఏతమత్థం ఆరోచేసుం.

పఞ్చిమే, భిక్ఖవే, పచ్చయా సఙ్ఘాటియా నిక్ఖేపాయ – గిలానో వా హోతి, వస్సికసఙ్కేతం వా హోతి, నదీపారం గన్తుం వా హోతి, అగ్గళగుత్తివిహారో వా హోతి, అత్థతకథినం వా హోతి. ఇమే ఖో, భిక్ఖవే, పఞ్చ పచ్చయా సఙ్ఘాటియా నిక్ఖేపాయ.

పఞ్చిమే, భిక్ఖవే, పచ్చయా ఉత్తరాసఙ్గస్స నిక్ఖేపాయ…పే… అన్తరవాసకస్స నిక్ఖేపాయ – గిలానో వా హోతి, వస్సికసఙ్కేతం వా హోతి, నదీపారం గన్తుం వా హోతి, అగ్గళగుత్తివిహారో వా హోతి, అత్థతకథినం వా హోతి. ఇమే ఖో, భిక్ఖవే, పఞ్చ పచ్చయా ఉత్తరాసఙ్గస్స అన్తరవాసకస్స నిక్ఖేపాయ.

పఞ్చిమే, భిక్ఖవే, పచ్చయా వస్సికసాటికాయ నిక్ఖేపాయ – గిలానో వా హోతి, నిస్సీమం గన్తుం వా హోతి, నదీపారం గన్తుం వా హోతి, అగ్గళగుత్తివిహారో వా హోతి, వస్సికసాటికా అకతా వా హోతి విప్పకతా వా. ఇమే ఖో, భిక్ఖవే, పఞ్చ పచ్చయా వస్సికసాటికాయ నిక్ఖేపాయాతి.

పచ్ఛిమవికప్పనుపగచీవరాదికథా నిట్ఠితా.