౨౧౮. అతిరేకచీవరకథా

౩౪౭. [పారా. ౪౬౧] తేన ఖో పన సమయేన ఛబ్బగ్గియా భిక్ఖూ భగవతా తిచీవరం అనుఞ్ఞాతన్తి అఞ్ఞేనేవ తిచీవరేన గామం పవిసన్తి, అఞ్ఞేన తిచీవరేన ఆరామే అచ్ఛన్తి, అఞ్ఞేన తిచీవరేన నహానం ఓతరన్తి. యే తే భిక్ఖూ అప్పిచ్ఛా తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖూ అతిరేకచీవరం ధారేస్సన్తీ’’తి. అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, అతిరేకచీవరం ధారేతబ్బం. యో ధారేయ్య, యథాధమ్మో కారేతబ్బో’’తి.

[పారా. ౪౬౧] తేన ఖో పన సమయేన ఆయస్మతో ఆనన్దస్స అతిరేకచీవరం ఉప్పన్నం హోతి. ఆయస్మా చ ఆనన్దో తం చీవరం ఆయస్మతో సారిపుత్తస్స దాతుకామో హోతి. ఆయస్మా చ సారిపుత్తో సాకేతే విహరతి. అథ ఖో ఆయస్మతో ఆనన్దస్స ఏతదహోసి – ‘‘భగవతా సిక్ఖాపదం పఞ్ఞత్తం ‘న అతిరేకచీవరం ధారేతబ్బ’న్తి. ఇదఞ్చ మే అతిరేకచీవరం ఉప్పన్నం. అహఞ్చిమం చీవరం ఆయస్మతో సారిపుత్తస్స దాతుకామో. ఆయస్మా చ సారిపుత్తో సాకేతే విహరతి. కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసి. ‘‘కీవచిరం పనానన్ద, సారిపుత్తో ఆగచ్ఛిస్సతీ’’తి? ‘‘నవమం వా, భగవా, దివసం, దసమం వా’’తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, దసాహపరమం అతిరేకచీవరం ధారేతు’’న్తి.

తేన ఖో పన సమయేన భిక్ఖూనం అతిరేకచీవరం ఉప్పన్నం హోతి. అథ ఖో భిక్ఖూనం ఏతదహోసి – ‘‘కథం ను ఖో అమ్హేహి అతిరేకచీవరే పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, అతిరేకచీవరం వికప్పేతున్తి.

౩౪౮. అథ ఖో భగవా వేసాలియం యథాభిరన్తం విహరిత్వా యేన బారాణసీ తేన చారికం పక్కామి. అనుపుబ్బేన చారికం చరమానో యేన బారాణసీ తదవసరి. తత్ర సుదం భగవా బారాణసియం విహరతి ఇసిపతనే మిగదాయే. తేన ఖో పన సమయేన అఞ్ఞతరస్స భిక్ఖునో అన్తరవాసకో ఛిద్దో హోతి. అథ ఖో తస్స భిక్ఖునో ఏతదహోసి – ‘‘భగవతా తిచీవరం అనుఞ్ఞాతం – దిగుణా సఙ్ఘాటి, ఏకచ్చియో ఉత్తరాసఙ్గో, ఏకచ్చియో అన్తరవాసకో. అయఞ్చ మే అన్తరవాసకో ఛిద్దో. యంనూనాహం అగ్గళం అచ్ఛుపేయ్యం, సమన్తతో దుపట్టం భవిస్సతి, మజ్ఝే ఏకచ్చియ’’న్తి. అథ ఖో సో భిక్ఖు అగ్గళం అచ్ఛుపేసి. అద్దసా ఖో భగవా సేనాసనచారికం ఆహిణ్డన్తో తం భిక్ఖుం అగ్గళం అచ్ఛుపేన్తం [అచ్ఛుపన్తం (క.)], దిస్వాన యేన సో భిక్ఖు తేనుపసఙ్కమి, ఉపసఙ్కమిత్వా తం భిక్ఖుం ఏతదవోచ – ‘‘కిం త్వం, భిక్ఖు, కరోసీ’’తి? ‘‘అగ్గళం, భగవా, అచ్ఛుపేమీ’’తి. ‘‘సాధు సాధు, భిక్ఖు; సాధు ఖో త్వం, భిక్ఖు, అగ్గళం అచ్ఛుపేసీ’’తి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, అహతానం దుస్సానం అహతకప్పానం దిగుణం సఙ్ఘాటిం, ఏకచ్చియం ఉత్తరాసఙ్గం, ఏకచ్చియం అన్తరవాసకం; ఉతుద్ధటానం దుస్సానం చతుగ్గుణం సఙ్ఘాటిం, దిగుణం ఉత్తరాసఙ్గం, దిగుణం అన్తరవాసకం; పంసుకూలే యావదత్థం; పాపణికే ఉస్సాహో కరణీయో. అనుజానామి, భిక్ఖవే, అగ్గళం తున్నం ఓవట్టికం కణ్డుసకం దళ్హీకమ్మ’’న్తి.

అతిరేకచీవరకథా నిట్ఠితా.