౧౮౨. కేణియజటిలవత్థు

౩౦౦. [మ. ని. ౨.౩౯౬ ఆదయో; సు. ని. సేలసుత్తమ్పి పస్సితబ్బం] అథ ఖో భగవా అనుపుబ్బేన చారికం చరమానో యేన ఆపణం తదవసరి. అస్సోసి ఖో కేణియో జటిలో – ‘‘సమణో ఖలు భో గోతమో సక్యపుత్తో సక్యకులా పబ్బజితో ఆపణం అనుప్పత్తో, తం ఖో పన భవన్తం గోతమం ఏవం కల్యాణో కిత్తిసద్దో అబ్భుగ్గతో…పే… సాధు ఖో పన తథారూపానం అరహతం దస్సనం హోతీ’’తి. అథ ఖో కేణియస్స జటిలస్స ఏతదహోసి – ‘‘కిం ను ఖో అహం సమణస్స గోతమస్స హరాపేయ్య’’న్తి. అథ ఖో కేణియస్స జటిలస్స ఏతదహోసి – ‘‘యేపి ఖో తే బ్రాహ్మణానం [అయం పాఠో దీ. ని. ౧.౨౮౫, ౫౨౬, ౫౩౬; మ. ని. ౨.౪౨౭; అ. ని. ౫.౧౯౧-౧౯౨ ఆదయో] పుబ్బకా ఇసయో మన్తానం కత్తారో మన్తానం పవత్తారో, యేసమిదం ఏతరహి బ్రాహ్మణా పోరాణం మన్తపదం గీతం పవుత్తం సమిహితం, తదనుగాయన్తి తదనుభాసన్తి, భాసితమనుభాసన్తి, వాచితమనువాచేన్తి, సేయ్యథిదం – అట్ఠకో వామకో వామదేవో వేస్సామిత్తో యమతగ్గి [యమదగ్గి (క.)] అఙ్గీరసో భారద్వాజో వాసేట్ఠో కస్సపో భగు [అయం పాఠో దీ. ని. ౧.౨౮౫, ౫౨౬, ౫౩౬; మ. ని. ౨.౪౨౭; అ. ని. ౫.౧౯౧-౧౯౨ ఆదయో], రత్తూపరతా విరతా వికాలభోజనా, తే ఏవరూపాని పానాని సాదియింసు. సమణోపి గోతమో రత్తూపరతో విరతో వికాలభోజనా, అరహతి సమణోపి గోతమో ఏవరూపాని పానాని సాదియితు’’న్తి పహూతం పానం పటియాదాపేత్వా కాజేహి గాహాపేత్వా యేన భగవా తేనుపసఙ్కమి; ఉపసఙ్కమిత్వా భగవతా సద్ధిం సమ్మోది; సమ్మోదనీయం కథం సారణీయం వీతిసారేత్వా ఏకమన్తం అట్ఠాసి. ఏకమన్తం ఠితో ఖో కేణియో జటిలో భగవన్తం ఏతదవోచ – ‘‘పటిగ్గణ్హాతు మే భవం గోతమో పాన’’న్తి. తేన హి, కేణియ, భిక్ఖూనం దేహీతి. అథ ఖో కేణియో జటిలో భిక్ఖూనం దేతి. భిక్ఖూ కుక్కుచ్చాయన్తా న పటిగ్గణ్హన్తి. పటిగ్గణ్హథ, భిక్ఖవే, పరిభుఞ్జథాతి. అథ ఖో కేణియో జటిలో బుద్ధప్పముఖం భిక్ఖుసఙ్ఘం పహూతేహి పానేహి సహత్థా సన్తప్పేత్వా సమ్పవారేత్వా భగవన్తం ధోతహత్థం ఓనీతపత్తపాణిం ఏకమన్తం నిసీది. ఏకమన్తం నిసిన్నం ఖో కేణియం జటిలం భగవా ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో కేణియో జటిలో భగవతా ధమ్మియా కథాయ సన్దస్సితో సమాదపితో సముత్తేజితో సమ్పహంసితో భగవన్తం ఏతదవోచ – ‘‘అధివాసేతు మే భవం గోతమో స్వాతనాయ భత్తం సద్ధిం భిక్ఖుసఙ్ఘేనా’’తి. మహా ఖో, కేణియ, భిక్ఖుసఙ్ఘో అడ్ఢతేలసాని భిక్ఖుసతాని, త్వఞ్చ బ్రాహ్మణేసు అభిప్పసన్నోతి. దుతియమ్పి ఖో కేణియో జటిలో భగవన్తం ఏతదవోచ – ‘‘కిఞ్చాపి ఖో, భో గోతమ, మహా భిక్ఖుసఙ్ఘో అడ్ఢతేలసాని భిక్ఖుసతాని, అహఞ్చ బ్రాహ్మణేసు అభిప్పసన్నో, అధివాసేతు మే భవం గోతమో స్వాతనాయ భత్తం సద్ధిం భిక్ఖుసఙ్ఘేనా’’తి. మహా ఖో, కేణియ, భిక్ఖుసఙ్ఘో అడ్ఢతేలసాని భిక్ఖుసతాని, త్వఞ్చ బ్రాహ్మణేసు అభిప్పసన్నోతి. తతియమ్పి ఖో కేణియో జటిలో భగవన్తం ఏతదవోచ – ‘‘కిఞ్చాపి ఖో, భో గోతమ, మహా భిక్ఖుసఙ్ఘో అడ్ఢతేలసాని భిక్ఖుసతాని, అహఞ్చ బ్రాహ్మణేసు అభిప్పసన్నో, అధివాసేతు భవం గోతమో స్వాతనాయ భత్తం సద్ధిం భిక్ఖుసఙ్ఘేనా’’తి. అధివాసేసి భగవా తుణ్హీభావేన. అథ ఖో కేణియో జటిలో భగవతో అధివాసనం విదిత్వా ఉట్ఠాయాసనా పక్కామి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, అట్ఠ పానాని – అమ్బపానం జమ్బుపానం చోచపానం మోచపానం మధూకపానం [మధుపానం (సీ. స్యా.)] ముద్దికపానం సాలూకపానం ఫారుసకపానం. అనుజానామి, భిక్ఖవే, సబ్బం ఫలరసం ఠపేత్వా ధఞ్ఞఫలరసం. అనుజానామి, భిక్ఖవే, సబ్బం పత్తరసం ఠపేత్వా డాకరసం. అనుజానామి, భిక్ఖవే, సబ్బం పుప్ఫరసం ఠపేత్వా మధూకపుప్ఫరసం. అనుజానామి, భిక్ఖవే, ఉచ్ఛురస’’న్తి.

అథ ఖో కేణియో జటిలో తస్సా రత్తియా అచ్చయేన సకే అస్సమే పణీతం ఖాదనీయం భోజనీయం పటియాదాపేత్వా భగవతో కాలం ఆరోచాపేసి – ‘‘కాలో, భో గోతమ, నిట్ఠితం భత్త’’న్తి. అథ ఖో భగవా పుబ్బణ్హసమయం నివాసేత్వా పత్తచీవరమాదాయ యేన కేణియస్స జటిలస్స అస్సమో తేనుపసఙ్కమి; ఉపసఙ్కమిత్వా పఞ్ఞత్తే ఆసనే నిసీది సద్ధిం భిక్ఖుసఙ్ఘేన. అథ ఖో కేణియో జటిలో బుద్ధప్పముఖం భిక్ఖుసఙ్ఘం పణీతేన ఖాదనీయేన భోజనీయేన సహత్థా సన్తప్పేత్వా సమ్పవారేత్వా భగవన్తం భుత్తావిం ఓనీతపత్తపాణిం ఏకమన్తం నిసీది. ఏకమన్తం నిసిన్నం ఖో కేణియం జటిలం భగవా ఇమాహి గాథాహి అనుమోది –

‘‘అగ్గిహుత్తముఖా యఞ్ఞా, సావిత్తీ ఛన్దసో ముఖం;

రాజా ముఖం మనుస్సానం, నదీనం సాగరో ముఖం.

‘‘నక్ఖత్తానం ముఖం చన్దో, ఆదిచ్చో తపతం ముఖం;

పుఞ్ఞం ఆకఙ్ఖమానానం సఙ్ఘో, వే యజతం ముఖ’’న్తి.

అథ ఖో భగవా కేణియం జటిలం ఇమాహి గాథాహి అనుమోదిత్వా ఉట్ఠాయాసనా పక్కామి.

కేణియజటిలవత్థు నిట్ఠితం.