౯౩. ఆపత్తిఆవికరణవిధి

౧౭౦. తేన ఖో పన సమయేన అఞ్ఞతరో భిక్ఖు పాతిమోక్ఖే ఉద్దిస్సమానే ఆపత్తిం సరతి. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘న సాపత్తికేన ఉపోసథో కాతబ్బో’తి. అహఞ్చమ్హి ఆపత్తిం ఆపన్నో. కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం.

ఇధ పన, భిక్ఖవే, భిక్ఖు పాతిమోక్ఖే ఉద్దిస్సమానే ఆపత్తిం సరతి. తేన, భిక్ఖవే, భిక్ఖునా సామన్తో భిక్ఖు ఏవమస్స వచనీయో – ‘‘అహం, ఆవుసో, ఇత్థన్నామం ఆపత్తిం ఆపన్నో. ఇతో వుట్ఠహిత్వా తం ఆపత్తిం పటికరిస్సామీ’’తి వత్వా ఉపోసథో కాతబ్బో, పాతిమోక్ఖం సోతబ్బం, న త్వేవ తప్పచ్చయా ఉపోసథస్స అన్తరాయో కాతబ్బో.

ఇధ పన, భిక్ఖవే, భిక్ఖు పాతిమోక్ఖే ఉద్దిస్సమానే ఆపత్తియా వేమతికో హోతి. తేన, భిక్ఖవే, భిక్ఖునా సామన్తో భిక్ఖు ఏవమస్స వచనీయో – ‘‘అహం, ఆవుసో, ఇత్థన్నామాయ ఆపత్తియా వేమతికో. యదా నిబ్బేమతికో భవిస్సామి, తదా తం ఆపత్తిం పటికరిస్సామీ’’తి వత్వా ఉపోసథో కాతబ్బో, పాతిమోక్ఖం సోతబ్బం; న త్వేవ తప్పచ్చయా ఉపోసథస్స అన్తరాయో కాతబ్బోతి.