౯౨. ఆపత్తిపటికమ్మవిధి

౧౬౯. తేన ఖో పన సమయేన అఞ్ఞతరో భిక్ఖు తదహుపోసథే ఆపత్తిం ఆపన్నో హోతి. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘న సాపత్తికేన ఉపోసథో కాతబ్బో’తి. అహఞ్చమ్హి ఆపత్తిం ఆపన్నో. కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం. ఇధ పన, భిక్ఖవే, భిక్ఖు తదహుపోసథే ఆపత్తిం ఆపన్నో హోతి. తేన, భిక్ఖవే, భిక్ఖునా ఏకం భిక్ఖుం ఉపసఙ్కమిత్వా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘‘అహం, ఆవుసో, ఇత్థన్నామం ఆపత్తిం ఆపన్నో, తం పటిదేసేమీ’’తి. తేన వత్తబ్బో – ‘‘పస్ససీ’’తి. ‘‘ఆమ పస్సామీ’’తి. ‘‘ఆయతిం సంవరేయ్యాసీ’’తి.

ఇధ పన, భిక్ఖవే, భిక్ఖు తదహుపోసథే ఆపత్తియా వేమతికో హోతి. తేన, భిక్ఖవే, భిక్ఖునా ఏకం భిక్ఖుం ఉపసఙ్కమిత్వా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘‘అహం, ఆవుసో, ఇత్థన్నామాయ ఆపత్తియా వేమతికో; యదా నిబ్బేమతికో భవిస్సామి, తదా తం ఆపత్తిం పటికరిస్సామీ’’తి వత్వా ఉపోసథో కాతబ్బో, పాతిమోక్ఖం సోతబ్బం, న త్వేవ తప్పచ్చయా ఉపోసథస్స అన్తరాయో కాతబ్బోతి.

తేన ఖో పన సమయేన ఛబ్బగ్గియా భిక్ఖూ సభాగం ఆపత్తిం దేసేన్తి. భగవతో ఏతమత్థం ఆరోచేసుం. న, భిక్ఖవే, సభాగా ఆపత్తి దేసేతబ్బా. యో దేసేయ్య, ఆపత్తి దుక్కటస్సాతి.

తేన ఖో పన సమయేన ఛబ్బగ్గియా భిక్ఖూ సభాగం ఆపత్తిం పటిగ్గణ్హన్తి. భగవతో ఏతమత్థం ఆరోచేసుం. న, భిక్ఖవే, సభాగా ఆపత్తి పటిగ్గహేతబ్బా. యో పటిగ్గణ్హేయ్య, ఆపత్తి దుక్కటస్సాతి.