౧౦౧. లిఙ్గాదిదస్సనం

౧౭౯. ఇధ పన, భిక్ఖవే, ఆగన్తుకా భిక్ఖూ పస్సన్తి ఆవాసికానం భిక్ఖూనం ఆవాసికాకారం, ఆవాసికలిఙ్గం, ఆవాసికనిమిత్తం, ఆవాసికుద్దేసం, సుపఞ్ఞత్తం మఞ్చపీఠం, భిసిబిబ్బోహనం, పానీయం పరిభోజనీయం సూపట్ఠితం, పరివేణం సుసమ్మట్ఠం; పస్సిత్వా వేమతికా హోన్తి – ‘‘అత్థి ను ఖో ఆవాసికా భిక్ఖూ నత్థి ను ఖో’’తి. తే వేమతికా న విచినన్తి; అవిచినిత్వా ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా న పస్సన్తి; అపస్సిత్వా ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా ఏకతో ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా పాటేక్కం ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా పస్సన్తి; పస్సిత్వా – ‘‘నస్సన్తేతే, వినస్సన్తేతే, కో తేహి అత్థో’’తి – భేదపురేక్ఖారా ఉపోసథం కరోన్తి. ఆపత్తి థుల్లచ్చయస్స.

ఇధ పన, భిక్ఖవే, ఆగన్తుకా భిక్ఖూ సుణన్తి ఆవాసికానం భిక్ఖూనం ఆవాసికాకారం, ఆవాసికలిఙ్గం, ఆవాసికనిమిత్తం, ఆవాసికుద్దేసం, చఙ్కమన్తానం పదసద్దం, సజ్ఝాయసద్దం, ఉక్కాసితసద్దం, ఖిపితసద్దం; సుత్వా వేమతికా హోన్తి – ‘‘అత్థి ను ఖో ఆవాసికా భిక్ఖూ నత్థి ను ఖో’’తి. తే వేమతికా న విచినన్తి; అవిచినిత్వా ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా న పస్సన్తి; అపస్సిత్వా ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా ఏకతో ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా పాటేక్కం ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా పస్సన్తి; పస్సిత్వా – ‘‘నస్సన్తేతే, వినస్సన్తేతే, కో తేహి అత్థో’’తి – భేదపురేక్ఖారా ఉపోసథం కరోన్తి. ఆపత్తి థుల్లచ్చయస్స.

ఇధ పన, భిక్ఖవే, ఆవాసికా భిక్ఖూ పస్సన్తి ఆగన్తుకానం భిక్ఖూనం ఆగన్తుకాకారం, ఆగన్తుకలిఙ్గం, ఆగన్తుకనిమిత్తం, ఆగన్తుకుద్దేసం, అఞ్ఞాతకం పత్తం, అఞ్ఞాతకం చీవరం, అఞ్ఞాతకం నిసీదనం, పాదానం ధోతం, ఉదకనిస్సేకం; పస్సిత్వా వేమతికా హోన్తి – ‘‘అత్థి ను ఖో ఆగన్తుకా భిక్ఖూ నత్థి ను ఖో’’తి. తే వేమతికా న విచినన్తి; అవిచినిత్వా ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా న పస్సన్తి; అపస్సిత్వా ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా ఏకతో ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా పాటేక్కం ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా పస్సన్తి; పస్సిత్వా – ‘‘నస్సన్తేతే, వినస్సన్తేతే, కో తేహి అత్థో’’తి – భేదపురేక్ఖారా ఉపోసథం కరోన్తి. ఆపత్తి థుల్లచ్చయస్స.

ఇధ పన, భిక్ఖవే, ఆవాసికా భిక్ఖూ సుణన్తి ఆగన్తుకానం భిక్ఖూనం ఆగన్తుకాకారం, ఆగన్తుకలిఙ్గం, ఆగన్తుకనిమిత్తం, ఆగన్తుకుద్దేసం, ఆగచ్ఛన్తానం పదసద్దం, ఉపాహనపప్ఫోటనసద్దం, ఉక్కాసితసద్దం, ఖిపితసద్దం; సుత్వా వేమతికా హోన్తి – ‘‘అత్థి ను ఖో ఆగన్తుకా భిక్ఖూ నత్థి ను ఖో’’తి. తే వేమతికా న విచినన్తి; అవిచినిత్వా ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా న పస్సన్తి; అపస్సిత్వా ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా ఏకతో ఉపోసథం కరోన్తి. అనాపత్తి. తే వేమతికా విచినన్తి; విచినిత్వా పస్సన్తి; పస్సిత్వా పాటేక్కం ఉపోసథం కరోన్తి. ఆపత్తి దుక్కటస్స. తే వేమతికా విచినన్తి; విచినిత్వా పస్సన్తి; పస్సిత్వా – ‘‘నస్సన్తేతే, వినస్సన్తేతే, కో తేహి అత్థో’’తి – భేదపురేక్ఖారా ఉపోసథం కరోన్తి. ఆపత్తి థుల్లచ్చయస్స.

లిఙ్గాదిదస్సనం నిట్ఠితం.