౧౦౨. నానాసంవాసకాదీహి ఉపోసథకరణం

౧౮౦. ఇధ పన, భిక్ఖవే, ఆగన్తుకా భిక్ఖూ పస్సన్తి ఆవాసికే భిక్ఖూ నానాసంవాసకే. తే సమానసంవాసకదిట్ఠిం పటిలభన్తి; సమానసంవాసకదిట్ఠిం పటిలభిత్వా న పుచ్ఛన్తి; అపుచ్ఛిత్వా ఏకతో ఉపోసథం కరోన్తి. అనాపత్తి. తే పుచ్ఛన్తి; పుచ్ఛిత్వా నాభివితరన్తి; అనభివితరిత్వా ఏకతో ఉపోసథం కరోన్తి. ఆపత్తి దుక్కటస్స. తే పుచ్ఛన్తి; పుచ్ఛిత్వా నాభివితరన్తి; అనభివితరిత్వా పాటేక్కం ఉపోసథం కరోన్తి. అనాపత్తి.

ఇధ పన, భిక్ఖవే, ఆగన్తుకా భిక్ఖూ పస్సన్తి ఆవాసికే భిక్ఖూ సమానసంవాసకే. తే నానాసంవాసకదిట్ఠిం పటిలభన్తి; నానాసంవాసకదిట్ఠిం పటిలభిత్వా న పుచ్ఛన్తి; అపుచ్ఛిత్వా ఏకతో ఉపోసథం కరోన్తి. ఆపత్తి దుక్కటస్స. తే పుచ్ఛన్తి; పుచ్ఛిత్వా అభివితరన్తి; అభివితరిత్వా పాటేక్కం ఉపోసథం కరోన్తి. ఆపత్తి దుక్కటస్స. తే పుచ్ఛన్తి; పుచ్ఛిత్వా అభివితరన్తి; అభివితరిత్వా ఏకతో ఉపోసథం కరోన్తి. అనాపత్తి.

ఇధ పన, భిక్ఖవే, ఆవాసికా భిక్ఖూ పస్సన్తి ఆగన్తుకే భిక్ఖూ నానాసంవాసకే. తే సమానసంవాసకదిట్ఠిం పటిలభన్తి; సమానసంవాసకదిట్ఠిం పటిలభిత్వా న పుచ్ఛన్తి; అపుచ్ఛిత్వా ఏకతో ఉపోసథం కరోన్తి. అనాపత్తి. తే పుచ్ఛన్తి; పుచ్ఛిత్వా నాభివితరన్తి; అనభివితరిత్వా ఏకతో ఉపోసథం కరోన్తి. ఆపత్తి దుక్కటస్స. తే పుచ్ఛన్తి; పుచ్ఛిత్వా నాభివితరన్తి; అనభివితరిత్వా పాటేక్కం ఉపోసథం కరోన్తి. అనాపత్తి.

ఇధ పన, భిక్ఖవే, ఆవాసికా భిక్ఖూ పస్సన్తి ఆగన్తుకే భిక్ఖూ సమానసంవాసకే. తే నానాసంవాసకదిట్ఠిం పటిలభన్తి; నానాసంవాసకదిట్ఠిం పటిలభిత్వా న పుచ్ఛన్తి; అపుచ్ఛిత్వా ఏకతో ఉపోసథం కరోన్తి. ఆపత్తి దుక్కటస్స. తే పుచ్ఛన్తి; పుచ్ఛిత్వా అభివితరన్తి; అభివితరిత్వా పాటేక్కం ఉపోసథం కరోన్తి. ఆపత్తి దుక్కటస్స. తే పుచ్ఛన్తి; పుచ్ఛిత్వా అభివితరన్తి; అభివితరిత్వా ఏకతో ఉపోసథం కరోన్తి. అనాపత్తి.

నానాసంవాసకాదీహి ఉపోసథకరణం నిట్ఠితం.