౧౪. అన్తేవాసికవత్తకథా

౩౮౧. తేన ఖో పన సమయేన ఆచరియా అన్తేవాసికేసు న సమ్మా వత్తన్తి. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆచరియా అన్తేవాసికేసు న సమ్మా వత్తిస్సన్తీ’’తి! అథ ఖో తే భిక్ఖూ భగవతో ఏతమత్థం ఆరోచేసుం. అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా భిక్ఖూ పటిపుచ్ఛి – ‘‘సచ్చం కిర, భిక్ఖవే, ఆచరియా అన్తేవాసికేసు న సమ్మా వత్తన్తీ’’తి? ‘‘సచ్చం భగవా’’తి…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి –

౩౮౨. ‘‘తేన హి, భిక్ఖవే, ఆచరియానం అన్తేవాసికేసు వత్తం పఞ్ఞపేస్సామి యథా ఆచరియేహి అన్తేవాసికేసు సమ్మా వత్తితబ్బం. [మహావ. ౭౯] ఆచరియేన, భిక్ఖవే, అన్తేవాసికమ్హి సమ్మా వత్తితబ్బం. తత్రాయం సమ్మావత్తనా –

‘‘ఆచరియేన, భిక్ఖవే, అన్తేవాసికో సఙ్గహేతబ్బో అనుగ్గహేతబ్బో ఉద్దేసేన పరిపుచ్ఛాయ ఓవాదేన అనుసాసనియా. సచే ఆచరియస్స పత్తో హోతి, అన్తేవాసికస్స పత్తో న హోతి, ఆచరియేన అన్తేవాసికస్స పత్తో దాతబ్బో, ఉస్సుక్కం వా కాతబ్బం – కిన్తి ను ఖో అన్తేవాసికస్స పత్తో ఉప్పజ్జియేథాతి. సచే ఆచరియస్స చీవరం హోతి, అన్తేవాసికస్స చీవరం న హోతి, ఆచరియేన అన్తేవాసికస్స చీవరం దాతబ్బం, ఉస్సుక్కం వా కాతబ్బం – కిన్తి ను ఖో అన్తేవాసికస్స చీవరం ఉప్పజ్జియేథాతి. సచే ఆచరియస్స పరిక్ఖారో హోతి, అన్తేవాసికస్స పరిక్ఖారో న హోతి, ఆచరియేన అన్తేవాసికస్స పరిక్ఖారో దాతబ్బో, ఉస్సుక్కం వా కాతబ్బం – కిన్తి ను ఖో అన్తేవాసికస్స పరిక్ఖారో ఉప్పజ్జియేథాతి.

‘‘సచే అన్తేవాసికో గిలానో హోతి, కాలస్సేవ ఉట్ఠాయ దన్తకట్ఠం దాతబ్బం, ముఖోదకం దాతబ్బం, ఆసనం పఞ్ఞపేతబ్బం. సచే యాగు హోతి, భాజనం ధోవిత్వా యాగు ఉపనామేతబ్బా. యాగుం పీతస్స ఉదకం దత్వా భాజనం పటిగ్గహేత్వా నీచం కత్వా సాధుకం అప్పటిఘంసన్తేన ధోవిత్వా పటిసామేతబ్బం. అన్తేవాసికమ్హి వుట్ఠితే ఆసనం ఉద్ధరితబ్బం. సచే సో దేసో ఉక్లాపో హోతి, సో దేసో సమ్మజ్జితబ్బో.

‘‘సచే అన్తేవాసికో గామం పవిసితుకామో హోతి, నివాసనం దాతబ్బం, పటినివాసనం పటిగ్గహేతబ్బం, కాయబన్ధనం దాతబ్బం, సగుణం కత్వా సఙ్ఘాటియో దాతబ్బా, ధోవిత్వా పత్తో సోదకో దాతబ్బో.

‘‘ఏత్తావతా నివత్తిస్సతీతి ఆసనం పఞ్ఞపేతబ్బం, పాదోదకం పాదపీఠం పాదకథలికం ఉపనిక్ఖిపితబ్బం, పచ్చుగ్గన్త్వా పత్తచీవరం పటిగ్గహేతబ్బం, పటినివాసనం దాతబ్బం, నివాసనం పటిగ్గహేతబ్బం. సచే చీవరం సిన్నం హోతి, ముహుత్తం ఉణ్హే ఓతాపేతబ్బం, న చ ఉణ్హే చీవరం నిదహితబ్బం. చీవరం సఙ్ఘరితబ్బం. చీవరం సఙ్ఘరన్తేన చతురఙ్గులం కణ్ణం ఉస్సారేత్వా చీవరం సఙ్ఘరితబ్బం – మా మజ్ఝే భఙ్గో అహోసీతి. ఓభోగే కాయబన్ధనం కాతబ్బం.

‘‘సచే పిణ్డపాతో హోతి, అన్తేవాసికో చ భుఞ్జితుకామో హోతి, ఉదకం దత్వా పిణ్డపాతో ఉపనామేతబ్బో. అన్తేవాసికో పానీయేన పుచ్ఛితబ్బో. భుత్తావిస్స ఉదకం దత్వా పత్తం పటిగ్గహేత్వా నీచం కత్వా సాధుకం అప్పటిఘంసన్తేన ధోవిత్వా వోదకం కత్వా ముహుత్తం ఉణ్హే ఓతాపేతబ్బో, న చ ఉణ్హే పత్తో నిదహితబ్బో. పత్తచీవరం నిక్ఖిపితబ్బం. పత్తం నిక్ఖిపన్తేన…పే… చీవరం నిక్ఖిపన్తేన…పే… పారతో అన్తం ఓరతో భోగం కత్వా చీవరం నిక్ఖిపితబ్బం. అన్తేవాసికమ్హి ఉట్ఠితే ఆసనం ఉద్ధరితబ్బం, పాదోదకం పాదపీఠం పాదకథలికం పటిసామేతబ్బం. సచే సో దేసో ఉక్లాపో హోతి, సో దేసో సమ్మజ్జితబ్బో.

‘‘సచే అన్తేవాసికో నహాయితుకామో హోతి, నహానం పటియాదేతబ్బం. సచే సీతేన అత్థో హోతి, సీతం పటియాదేతబ్బం. సచే ఉణ్హేన అత్థో హోతి, ఉణ్హం పటియాదేతబ్బం.

‘‘సచే అన్తేవాసికో జన్తాఘరం పవిసితుకామో హోతి, చుణ్ణం సన్నేతబ్బం, మత్తికా తేమేతబ్బా, జన్తాఘరపీఠం ఆదాయ [ఆదాయ అన్తేవాసికస్స పిట్ఠితో పిట్ఠితో (క.)] గన్త్వా జన్తాఘరపీఠం దత్వా చీవరం పటిగ్గహేత్వా ఏకమన్తం నిక్ఖిపితబ్బం, చుణ్ణం దాతబ్బం, మత్తికా దాతబ్బా. సచే ఉస్సహతి జన్తాఘరం పవిసితబ్బం. జన్తాఘరం పవిసన్తేన మత్తికాయ ముఖం మక్ఖేత్వా పురతో చ పచ్ఛతో చ పటిచ్ఛాదేత్వా జన్తాఘరం పవిసితబ్బం. న థేరే భిక్ఖూ అనుపఖజ్జ నిసీదితబ్బం. న నవా భిక్ఖూ ఆసనేన పటిబాహితబ్బా. జన్తాఘరే అన్తేవాసికస్స పరికమ్మం కాతబ్బం. జన్తాఘరా నిక్ఖమన్తేన జన్తాఘరపీఠం ఆదాయ పురతో చ పచ్ఛతో చ పటిచ్ఛాదేత్వా జన్తాఘరా నిక్ఖమితబ్బం.

‘‘ఉదకేపి అన్తేవాసికస్స పరికమ్మం కాతబ్బం. నహాతేన పఠమతరం ఉత్తరిత్వా అత్తనో గత్తం వోదకం కత్వా నివాసేత్వా అన్తేవాసికస్స గత్తతో ఉదకం పమజ్జితబ్బం, నివాసనం దాతబ్బం, సఙ్ఘాటి దాతబ్బా, జన్తాఘరపీఠం ఆదాయ పఠమతరం ఆగన్త్వా ఆసనం పఞ్ఞపేతబ్బం, పాదోదకం పాదపీఠం పాదకథలికం ఉపనిక్ఖిపితబ్బం, అన్తేవాసికో పానీయేన పుచ్ఛితబ్బో.

‘‘యస్మిం విహారే అన్తేవాసికో విహరతి, సచే సో విహారో ఉక్లాపో హోతి, సచే ఉస్సహతి, సోధేతబ్బో. విహారం సోధేన్తేన పఠమం పత్తచీవరం నీహరిత్వా ఏకమన్తం నిక్ఖిపితబ్బం…పే… ఆచమనకుమ్భియా ఉదకం న హోతి, ఆచమనకుమ్భియా ఉదకం ఆసిఞ్చితబ్బం.

‘‘సచే అన్తేవాసికస్స అనభిరతి ఉప్పన్నా హోతి, ఆచరియేన వూపకాసేతబ్బో, వూపకాసాపేతబ్బో, ధమ్మకథా వాస్స కాతబ్బా. సచే అన్తేవాసికస్స కుక్కుచ్చం ఉప్పన్నం హోతి, ఆచరియేన వినోదేతబ్బం, వినోదాపేతబ్బం, ధమ్మకథా వాస్స కాతబ్బా. సచే అన్తేవాసికస్స దిట్ఠిగతం ఉప్పన్నం హోతి, ఆచరియేన వివేచేతబ్బం, వివేచాపేతబ్బం, ధమ్మకథా వాస్స కాతబ్బా. సచే అన్తేవాసికో గరుధమ్మం అజ్ఝాపన్నో హోతి, పరివాసారహో, ఆచరియేన ఉస్సుక్కం కాతబ్బం – కిన్తి ను ఖో సఙ్ఘో అన్తేవాసికస్స పరివాసం దదేయ్యాతి. సచే అన్తేవాసికో మూలాయపటికస్సనారహో హోతి, ఆచరియేన ఉస్సుక్కం కాతబ్బం – కిన్తి ను ఖో సఙ్ఘో అన్తేవాసికం మూలాయ పటికస్సేయ్యాతి. సచే అన్తేవాసికో మానత్తారహో హోతి, ఆచరియేన ఉస్సుక్కం కాతబ్బం – కిన్తి ను ఖో సఙ్ఘో అన్తేవాసికస్స మానత్తం దదేయ్యాతి. సచే అన్తేవాసికో అబ్భానారహో హోతి, ఆచరియేన ఉస్సుక్కం కాతబ్బం – కిన్తి ను ఖో సఙ్ఘో అన్తేవాసికం అబ్భేయ్యాతి. సచే సఙ్ఘో అన్తేవాసికస్స కమ్మం కత్తుకామో హోతి, తజ్జనీయం వా నియస్సం వా పబ్బాజనీయం వా పటిసారణీయం వా ఉక్ఖేపనీయం వా, ఆచరియేన ఉస్సుక్కం కాతబ్బం – కిన్తి ను ఖో సఙ్ఘో అన్తేవాసికస్స కమ్మం న కరేయ్య, లహుకాయ వా పరిణామేయ్యాతి. కతం వా పనస్స హోతి, సఙ్ఘేన కమ్మం, తజ్జనీయం వా నియస్సం వా పబ్బాజనీయం వా పటిసారణీయం వా ఉక్ఖేపనీయం వా, ఆచరియేన ఉస్సుక్కం కాతబ్బం – కిన్తి ను ఖో అన్తేవాసికో సమ్మా వత్తేయ్య, లోమం పాతేయ్య, నేత్థారం వత్తేయ్య, సఙ్ఘో తం కమ్మం పటిప్పస్సమ్భేయ్యాతి.

‘‘సచే అన్తేవాసికస్స చీవరం ధోవితబ్బం హోతి, ఆచరియేన ఆచిక్ఖితబ్బం – ఏవం ధోవేయ్యాసీతి, ఉస్సుక్కం వా కాతబ్బం – కిన్తి ను ఖో అన్తేవాసికస్స చీవరం ధోవియేథాతి. సచే అన్తేవాసికస్స చీవరం కాతబ్బం హోతి, ఆచరియేన ఆచిక్ఖితబ్బం – ఏవం కరేయ్యాసీతి, ఉస్సుక్కం వా కాతబ్బం – కిన్తి ను ఖో అన్తేవాసికస్స చీవరం కరియేథాతి. సచే అన్తేవాసికస్స రజనం పచితబ్బం హోతి, ఆచరియేన ఆచిక్ఖితబ్బం – ఏవం పచేయ్యాసీతి, ఉస్సుక్కం వా కాతబ్బం – కిన్తి ను ఖో అన్తేవాసికస్స రజనం పచియేథాతి. సచే అన్తేవాసికస్స చీవరం రజితబ్బం హోతి, ఆచరియేన ఆచిక్ఖితబ్బం – ఏవం రజేయ్యాసీతి, ఉస్సుక్కం వా కాతబ్బం – కిన్తి ను ఖో అన్తేవాసికస్స చీవరం రజియేథాతి. చీవరం రజన్తేన సాధుకం సమ్పరివత్తకం సమ్పరివత్తకం రజితబ్బం. న చ అచ్ఛిన్నే థేవే పక్కమితబ్బం. సచే అన్తేవాసికో గిలానో హోతి, యావజీవం ఉపట్ఠాతబ్బో, వుట్ఠానమస్స ఆగమేతబ్బం. ఇదం ఖో, భిక్ఖవే, ఆచరియానం అన్తేవాసికేసు వత్తం యథా ఆచరియేహి అన్తేవాసికేసు సమ్మా వత్తితబ్బ’’న్తి.

వత్తక్ఖన్ధకో అట్ఠమో.

ఇమమ్హి ఖన్ధకే వత్థూ ఏకూనవీసతి, వత్తా చుద్దస.

తస్సుద్దానం –

సఉపాహనా ఛత్తా చ, ఓగుణ్ఠి సీసం పానీయం;

నాభివాదే న పుచ్ఛన్తి, అహి ఉజ్ఝన్తి పేసలా.

ఓముఞ్చి ఛత్తం ఖన్ధే చ, అతరఞ్చ పటిక్కమం;

పత్తచీవరం నిక్ఖిపా, పతిరూపఞ్చ పుచ్ఛితా.

ఆసిఞ్చేయ్య ధోవితేన, సుక్ఖేనల్లేనుపాహనా;

వుడ్ఢో నవకో పుచ్ఛేయ్య, అజ్ఝావుట్ఠఞ్చ గోచరా.

సేక్ఖా వచ్చా పానీ పరి, కత్తరం కతికం తతో;

కాలం ముహుత్తం ఉక్లాపో, భూమత్థరణం నీహరే.

పటిపాదో భిసిబిబ్బో, మఞ్చపీఠఞ్చ మల్లకం;

అపస్సేనుల్లోకకణ్ణా, గేరుకా కాళ అకతా.

సఙ్కారఞ్చ భూమత్థరణం, పటిపాదకం మఞ్చపీఠం;

భిసి నిసీదనమ్పి, మల్లకం అపస్సేన చ.

పత్తచీవరం భూమి చ, పారన్తం ఓరతో భోగం;

పురత్థిమా పచ్ఛిమా చ, ఉత్తరా అథ దక్ఖిణా.

సీతుణ్హే చ దివారత్తిం, పరివేణఞ్చ కోట్ఠకో;

ఉపట్ఠానగ్గి సాలా చ, వత్తం వచ్చకుటీసు చ.

పానీ పరిభోజనియా, కుమ్భి ఆచమనేసు చ;

అనోపమేన పఞ్ఞత్తం, వత్తం ఆగన్తుకేహిమే [వే (క. ఏవముపరిపి)].

నేవాసనం న ఉదకం, న పచ్చు న చ పానియం;

నాభివాదే నపఞ్ఞపే, ఉజ్ఝాయన్తి చ పేసలా.

వుడ్ఢాసనఞ్చ ఉదకం, పచ్చుగ్గన్త్వా చ పానియం;

ఉపాహనే ఏకమన్తం, అభివాదే చ పఞ్ఞపే.

వుత్థం గోచరసేక్ఖో చ, ఠానం పానియభోజనం;

కత్తరం కతికం కాలం, నవకస్స నిసిన్నకే.

అభివాదయే ఆచిక్ఖే, యథా హేట్ఠా తథా నయే;

నిద్దిట్ఠం సత్థవాహేన వత్తం ఆవాసికేహిమే.

గమికా దారుమత్తి చ, వివరిత్వా న పుచ్ఛియ;

నస్సన్తి చ అగుత్తఞ్చ, ఉజ్ఝాయన్తి చ పేసలా.

పటిసామేత్వా థకేత్వా, ఆపుచ్ఛిత్వావ పక్కమే;

భిక్ఖు వా సామణేరో వా, ఆరామికో ఉపాసకో.

పాసాణకేసు చ పుఞ్జం, పటిసామే థకేయ్య చ;

సచే ఉస్సహతి ఉస్సుక్కం, అనోవస్సే తథేవ చ.

సబ్బో ఓవస్సతి గామం, అజ్ఝోకాసే తథేవ చ;

అప్పేవఙ్గాని సేసేయ్యుం, వత్తం గమికభిక్ఖునా.

నానుమోదన్తి థేరేన, ఓహాయ చతుపఞ్చహి;

వచ్చితో ముచ్ఛితో ఆసి, వత్తానుమోదనేసుమే.

ఛబ్బగ్గియా దున్నివత్థా, అథోపి చ దుప్పారుతా;

అనాకప్పా చ వోక్కమ్మ, థేరే అనుపఖజ్జనే.

నవే భిక్ఖూ చ సఙ్ఘాటి, ఉజ్ఝాయన్తి చ పేసలా;

తిమణ్డలం నివాసేత్వా, కాయసగుణగణ్ఠికా.

న వోక్కమ్మ పటిచ్ఛన్నం, సుసంవుతోక్ఖిత్తచక్ఖు;

ఉక్ఖిత్తోజ్జగ్ఘికాసద్దో, తయో చేవ పచాలనా.

ఖమ్భోగుణ్ఠిఉక్కుటికా, పటిచ్ఛన్నం సుసంవుతో;

ఓక్ఖిత్తుక్ఖిత్తఉజ్జగ్ఘి, అప్పసద్దో తయో చలా.

ఖమ్భోగుణ్ఠిపల్లత్థి చ, అనుపఖజ్జ నాసనే;

ఓత్థరిత్వాన ఉదకే, నీచం కత్వాన సిఞ్చియా.

పటి సామన్తా సఙ్ఘాటి, ఓదనే చ పటిగ్గహే;

సూపం ఉత్తరిభఙ్గేన, సబ్బేసం సమతిత్థి చ.

సక్కచ్చం పత్తసఞ్ఞీ చ, సపదానఞ్చ సూపకం;

న థూపతో పటిచ్ఛాదే, విఞ్ఞత్తుజ్ఝానసఞ్ఞినా.

మహన్తమణ్డలద్వారం, సబ్బహత్థో న బ్యాహరే;

ఉక్ఖేపో ఛేదనాగణ్డ, ధునం సిత్థావకారకం.

జివ్హానిచ్ఛారకఞ్చేవ, చపుచపు సురుసురు;

హత్థపత్తోట్ఠనిల్లేహం, సామిసేన పటిగ్గహే.

యావ న సబ్బే ఉదకే, నీచం కత్వాన సిఞ్చియం;

పటి సామన్తా సఙ్ఘాటి, నీచం కత్వా ఛమాయ చ.

ససిత్థకం నివత్తన్తే, సుప్పటిచ్ఛన్నముక్కుటి;

ధమ్మరాజేన పఞ్ఞత్తం, ఇదం భత్తగ్గవత్తనం.

దున్నివత్థా అనాకప్పా, అసల్లేక్ఖేత్వా చ సహసా;

దూరే అచ్చ చిరం లహుం, తథేవ పిణ్డచారికో.

పటిచ్ఛన్నోవ గచ్ఛేయ్య, సుంసవుతోక్ఖిత్తచక్ఖు;

ఉక్ఖిత్తోజ్జగ్ఘికాసద్దో, తయో చేవ పచాలనా.

ఖమ్భోగుణ్ఠిఉక్కుటికా, సల్లక్ఖేత్వా చ సహసా;

దూరే అచ్చ చిరం లహుం, ఆసనకం కటచ్ఛుకా.

భాజనం వా ఠపేతి చ, ఉచ్చారేత్వా పణామేత్వా;

పటిగ్గహే న ఉల్లోకే, సూపేసుపి తథేవ తం.

భిక్ఖు సఙ్ఘాటియా ఛాదే, పటిచ్ఛన్నేవ గచ్ఛియం;

సంవుతోక్ఖిత్తచక్ఖు చ, ఉక్ఖిత్తోజ్జగ్ఘికాయ చ;

అప్పసద్దో తయో చాలా, ఖమ్భోగుణ్ఠికఉక్కుటి.

పఠమాసనవక్కార, పానియం పరిభోజనీ;

పచ్ఛాకఙ్ఖతి భుఞ్జేయ్య, ఓపిలాపేయ్య ఉద్ధరే.

పటిసామేయ్య సమ్మజ్జే, రిత్తం తుచ్ఛం ఉపట్ఠపే;

హత్థవికారే భిన్దేయ్య, వత్తిదం పిణ్డచారికే.

పానీ పరి అగ్గిరణి, నక్ఖత్తదిసచోరా చ;

సబ్బం నత్థీతి కోట్టేత్వా, పత్తంసే చీవరం తతో.

ఇదాని అంసే లగ్గేత్వా, తిమణ్డలం పరిమణ్డలం;

యథా పిణ్డచారివత్తం, నయే ఆరఞ్ఞకేసుపి.

పత్తంసే చీవరం సీసే, ఆరోహిత్వా చ పానియం;

పరిభోజనియం అగ్గి, అరణీ చాపి కత్తరం.

నక్ఖత్తం సప్పదేసం వా, దిసాపి కుసలో భవే;

సత్తుత్తమేన పఞ్ఞత్తం, వత్తం ఆరఞ్ఞకేసుమే.

అజ్ఝోకాసే ఓకిరింసు, ఉజ్ఝాయన్తి చ పేసలా;

సచే విహారో ఉక్లాపో, పఠమం పత్తచీవరం.

భిసిబిబ్బోహనం మఞ్చం, పీఠఞ్చ ఖేళమల్లకం;

అపస్సేనుల్లోకకణ్ణా, గేరుకా కాళ అకతా.

సఙ్కారం భిక్ఖుసామన్తా, సేనావిహారపానియం;

పరిభోజనసామన్తా, పటివాతే చ అఙ్గణే.

అధోవాతే అత్థరణం, పటిపాదకమఞ్చో చ;

పీఠం భిసి నిసీదనం, మల్లకం అపస్సేన చ.

పత్తచీవరం భూమి చ, పారన్తం ఓరతో భోగం;

పురత్థిమా చ పచ్ఛిమా, ఉత్తరా అథ దక్ఖిణా.

సీతుణ్హే చ దివా రత్తిం, పరివేణఞ్చ కోట్ఠకో;

ఉపట్ఠానగ్గిసాలా చ, వచ్చకుటీ చ పానియం.

ఆచమనకుమ్భి వుడ్ఢే చ, ఉద్దేసపుచ్ఛనా సజ్ఝా;

ధమ్మో పదీపం విజ్ఝాపే, న వివరే నపి థకే.

యేన వుడ్ఢో పరివత్తి, కణ్ణేనపి న ఘట్టయే;

పఞ్ఞపేసి మహావీరో, వత్తం సేనాసనేసు తం.

నివారియమానా ద్వారం, ముచ్ఛితుజ్ఝన్తి పేసలా;

ఛారికం ఛడ్డయే జన్తా, పరిభణ్డం తథేవ చ.

పరివేణం కోట్ఠకో సాలా, చుణ్ణమత్తికదోణికా;

ముఖం పురతో న థేరే, న నవే ఉస్సహతి సచే.

పురతో ఉపరిమగ్గో, చిక్ఖల్లం మత్తి పీఠకం;

విజ్ఝాపేత్వా థకేత్వా చ, వత్తం జన్తాఘరేసుమే.

నాచమేతి యథావుడ్ఢం, పటిపాటి చ సహసా;

ఉబ్భజి నిత్థునో కట్ఠం, వచ్చం పస్సావ ఖేళకం.

ఫరుసా కూప సహసా, ఉబ్భజి చపు సేసేన;

బహి అన్తో చ ఉక్కాసే, రజ్జు అతరమానఞ్చ.

సహసా ఉబ్భజి ఠితే, నిత్థునే కట్ఠ వచ్చఞ్చ;

పస్సావ ఖేళ ఫరుసా, కూపఞ్చ వచ్చపాదుకే.

నాతిసహసా ఉబ్భజి, పాదుకాయ చపుచపు;

న సేసయే పటిచ్ఛాదే, ఉహతపిధరేన చ.

వచ్చకుటీ పరిభణ్డం, పరివేణఞ్చ కోట్ఠకో;

ఆచమనే చ ఉదకం, వత్తం వచ్చకుటీసుమే.

ఉపాహనా దన్తకట్ఠం, ముఖోదకఞ్చ ఆసనం;

యాగు ఉదకం ధోవిత్వా, ఉద్ధారుక్లాప గామ చ.

నివాసనా కాయబన్ధా, సగుణం పత్తసోదకం;

పచ్ఛా తిమణ్డలో చేవ, పరిమణ్డల బన్ధనం.

సగుణం ధోవిత్వా పచ్ఛా, నాతిదూరే పటిగ్గహే;

భణమానస్స ఆపత్తి, పఠమాగన్త్వాన ఆసనం.

ఉదకం పీఠకథలి, పచ్చుగ్గన్త్వా నివాసనం;

ఓతాపే నిదహి భఙ్గో, ఓభోగే భుఞ్జితు నమే.

పానీయం ఉదకం నీచం, ముహుత్తం న చ నిదహే;

పత్తచీవరం భూమి చ, పారన్తం ఓరతో భోగం.

ఉద్ధరే పటిసామే చ, ఉక్లాపో చ నహాయితుం;

సీతం ఉణ్హం జన్తాఘరం, చుణ్ణం మత్తిక పిట్ఠితో.

పీఠఞ్చ చీవరం చుణ్ణం, మత్తికుస్సహతి ముఖం;

పురతో థేరే నవే చ, పరికమ్మఞ్చ నిక్ఖమే.

పురతో ఉదకే న్హాతే, నివాసేత్వా ఉపజ్ఝాయం;

నివాసనఞ్చ సఙ్ఘాటి, పీఠకం ఆసనేన చ.

పాదో పీఠం కథలిఞ్చ, పానీయుద్దేసపుచ్ఛనా;

ఉక్లాపం సుసోధేయ్య, పఠమం పత్తచీవరం.

నిసీదనపచ్చత్థరణం, భిసి బిబ్బోహనాని చ;

మఞ్చో పీఠం పటిపాదం, మల్లకం అపస్సేన చ.