౧౧. పఞ్ఞత్తిహారసమ్పాతవిభావనా

౭౩. యేన యేన వేవచనహారసమ్పాతేన వేవచనాని నిద్ధారితాని, సో వేవచనహారసమ్పాతో పరిపుణ్ణో, ‘‘కతమో పఞ్ఞత్తిహారసమ్పాతో’’తి పుచ్ఛితబ్బత్తా ‘‘తత్థ కతమో పఞ్ఞత్తిహారసమ్పాతో’’తిఆది వుత్తం.

‘‘కతమా సుత్తప్పదేసభూతా పఞ్ఞత్తి కతమేసం ధమ్మానం పఞ్ఞత్తీ’’తి పుచ్ఛితబ్బత్తా ‘‘తస్మా’’తిఆది వుత్తం. ‘‘తస్మా రక్ఖితచిత్తస్సా’’తి పఞ్ఞత్తి సతియా పదట్ఠానస్స రక్ఖితబ్బస్స చిత్తస్స పఞ్ఞాపనతో సతియా పదట్ఠానపఞ్ఞత్తి నామ. సతియా హి రక్ఖితబ్బం చిత్తం సతియా పదట్ఠానం అధిట్ఠానం నామ. తేనాహ అట్ఠకథాయం – ‘‘అధిట్ఠహిత్వా రక్ఖన్తియా సతియా రక్ఖియమానం చిత్తం తస్సా అధిట్ఠానం వియ హోతీ’’తి. ‘‘సమ్మాసఙ్కప్పగోచరో’’తి పఞ్ఞత్తి సమథస్స భావనాయ పఞ్ఞాపనతో సమథస్స భావనాపఞ్ఞత్తి నామ. ‘‘సమ్మాదిట్ఠిపురేక్ఖారో, ఞత్వాన ఉదయబ్బయ’’న్తి పఞ్ఞత్తి దస్సనభూమియా నిక్ఖేపస్స పఞ్ఞాపనతో నిక్ఖేపపఞ్ఞత్తి నామ. ‘‘థినమిద్ధాభిభూ భిక్ఖూ’’తి సముదయస్స అనవసేసప్పహానస్స పఞ్ఞాపనతో అనవసేసప్పహానపఞ్ఞత్తి నామ. ‘‘సబ్బా దుగ్గతియో జహే’’తి పఞ్ఞత్తి మగ్గస్స అరియమగ్గస్స భావనాయ పఞ్ఞాపనతో భావనాపఞ్ఞత్తి నామ.

‘‘ఏత్తకోవ పఞ్ఞత్తిహారసమ్పాతో పరిపుణ్ణో’’తి వత్తబ్బత్తా ‘‘నియుత్తో పఞ్ఞత్తిహారసమ్పాతో’’తి వుత్తం. యేన యేన సంవణ్ణనావిసేసభూతేన పఞ్ఞత్తిహారసమ్పాతేన పఞ్ఞత్తిప్పభేదా నిద్ధారితా, సో సో సంవణ్ణనావిసేసభూతో పఞ్ఞత్తిహారసమ్పాతో నియుత్తో యథారహం నిద్ధారేత్వా యుజ్జితబ్బోతి అత్థో గహేతబ్బోతి.

ఇతి పఞ్ఞత్తిహారసమ్పాతే సత్తిబలానురూపా రచితా

విభావనా నిట్ఠితా.

పణ్డితేహి పన…పే… గహేతబ్బోతి.