౧౨. ఓతరణహారసమ్పాతవిభావనా

౭౪. యేన యేన పఞ్ఞత్తిహారసమ్పాతేన పఞ్ఞత్తిప్పభేదా నిద్ధారితా, సో పఞ్ఞత్తిహారసమ్పాతో పరిపుణ్ణో, ‘‘కతమో ఓతరణో హారసమ్పాతో’’తి పుచ్ఛితబ్బత్తా ‘‘తత్థ కతమో ఓతరణో హారసమ్పాతో’’తిఆదిమాహ.

‘‘తత్థ తిస్సం గాథాయం కతమాని ఇన్ద్రియాని నిద్ధారేత్వా కతమేహి నిద్ధారితేహి ధమ్మేహి ఓతరతీ’’తి పుచ్ఛితబ్బత్తా ‘‘తస్మా’’తిఆది వుత్తం. యా ‘‘తస్మా రక్ఖితచిత్తస్సా’’తిఆదిగాథా వుత్తా, తిస్సం గాథాయం ‘‘తస్మా…పే… పురేక్ఖారో’’తి సుత్తప్పదేసేన సమ్మాదిట్ఠి గహితా, సమ్మాదిట్ఠియా గహితాయ పఞ్చిన్ద్రియాని సద్ధాదిపఞ్చిన్ద్రియాని గహితాని భవన్తి.

తానియేవ సద్ధాదిపఞ్చిన్ద్రియాని విజ్జాయ ఉపకారత్తా వా పదట్ఠానత్తా వా విజ్జా భవన్తి, విజ్జుప్పాదా తాదిసాయ విజ్జాయ ఉప్పాదా ఉప్పాదహేతుతో అవిజ్జానిరోధో సమ్భవతి, అవిజ్జానిరోధా సఙ్ఖారనిరోధో సమ్భవతి…పే… జాతినిరోధా జరామరణనిరోధో సమ్భవతీతి. అయం ఓతరణా పటిచ్చసముప్పాదేన పఞ్చిన్ద్రియానం ఓతరణా నామ.

తానియేవ పఞ్చిన్ద్రియాని సీలక్ఖన్ధేన సమాధిక్ఖన్ధేన పఞ్ఞాక్ఖన్ధేన తీహి ఖన్ధేహి సఙ్గహితాని భవన్తి సద్ధావీరియేహి సీలసమ్భవతో, సతియా చ పఞ్ఞానువత్తకత్తా. అయం ఓతరణా ఖన్ధేహి పఞ్చిన్ద్రియానం ఓతరణా నామ.

తానియేవ పఞ్చిన్ద్రియాని సఙ్ఖారపరియాపన్నాని భవన్తి. యే సఙ్ఖారా అనాసవా భవన్తి, భవఙ్గా భవహేతూ నో భవన్తి, తే అనాసవా సఙ్ఖారా ధమ్మధాతుసఙ్గహితా భవన్తి ధమ్మధాతుయా అన్తోగధత్తా. అయం ఓతరణా ధాతూహి పఞ్చిన్ద్రియానం ఓతరణా నామ.

సా అనాసవా ధమ్మధాతు ధమ్మాయతనపరియాపన్నా భవతి, యం ఆయతనం అనాసవం భవతి, భవఙ్గం భవహేతు నో భవతి. అయం ఓతరణా ఆయతనేహి ధమ్మధాతుయా ఓతరణా నామ.

‘‘ఏత్తకోవ ఓతరణో హారసమ్పాతో పరిపుణ్ణో’’తి వత్తబ్బత్తా ‘‘నియుత్తో ఓతరణో హారసమ్పాతో’’తి వుత్తం. యేన యేన సంవణ్ణనావిసేసభూతేన ఓతరణహారసమ్పాతేన సుత్తప్పదేసత్థా ఓతరితబ్బా, సో సో సంవణ్ణనావిసేసభూతో ఓతరణో హారసమ్పాతో నియుత్తో యథారహం నిద్ధారేత్వా యుజ్జితబ్బోతి అత్థో గహేతబ్బోతి.

ఇతి ఓతరణహారసమ్పాతే సత్తిబలానురూపా రచితా

విభావనా నిట్ఠితా.

పణ్డితేహి పన…పే… గహేతబ్బోతి.

ఇతో పట్ఠాయ ‘‘తత్థ కతమో’’తిఆదిఅనుసన్ధ్యత్థో చ పరియోసానే ‘‘నియుత్తో’’తిఆదిఅనుసన్ధ్యత్థో చ వుత్తనయానుసారేనేవ విఞ్ఞాతబ్బో. కత్థచి కత్థచి పాఠే అపాకటంయేవ యథాబలం కథయిస్సామ.