౧౨. ఉపాదాపఞ్ఞత్తానుయోగవణ్ణనా

౯౭. నీలగుణయోగతో నీలో, నీలో ఏవ నీలకో, తస్స, అయం పనస్స నీలపఞ్ఞత్తి నీలరూపుపాదానాతి ఆహ ‘‘నీలం…పే… పఞ్ఞత్తీ’’తి. ఏవం పన పాఠే ఠితే నీలం ఉపాదాయ నీలోతి కథమయం పదుద్ధారోతి ఆహ ‘‘నీలం రూపం…పే… ఏత్థ యో పుట్ఠో నీలం ఉపాదాయ నీలో’’తి. ఏత్థాతి ఏతస్మిం వచనే. తదాదీసూతి ‘‘పీతం రూపం ఉపాదాయా’’తిఆదికం అట్ఠకథాయం ఆది-సద్దేన గహితమేవ తదత్థదస్సనవసేన గణ్హాతి.

౯౮. వుత్తన్తి ‘‘మగ్గకుసలో’’తిఆదీసు ఛేకట్ఠం సన్ధాయ వుత్తం. కుసలపఞ్ఞత్తిం కుసలవోహారం.

౧౧౨. పుబ్బపక్ఖం దస్సేత్వా ఉత్తరమాహాతి పరవాదీ పుబ్బపక్ఖం దస్సేత్వా సకవాదిస్స ఉత్తరమాహ.

౧౧౫. ‘‘రూపం రూపవా’’తిఆదినయప్పవత్తం పరవాదివాదం భిన్దితుం ‘‘యథా న నిగళో నేగళికో’’తిఆదినా సకవాదివాదో ఆరద్ధోతి ఆహ ‘‘యస్స రూపం సో రూపవాతి ఉత్తరపక్ఖే వుత్తం వచనం ఉద్ధరిత్వా’’తి.

౧౧౮. విఞ్ఞాణనిస్సయభావూపగమనన్తి చక్ఖువిఞ్ఞాణస్స నిస్సయభావూపగమనం. తయిదం విసేసనం చక్ఖుస్సాతి ఇమినావ సిద్ధన్తి న కతం దట్ఠబ్బం.

ఉపాదాపఞ్ఞత్తానుయోగవణ్ణనా నిట్ఠితా.