౩. తికనిద్దేసవణ్ణనా

౯౧. సేససంవరభేదేనాతి కాయికవాచసికవీతిక్కమతో సేసేన సంవరవినాసేన. సో పన ద్వారవసేన వుచ్చమానో మనోద్వారికో హోతీతి ఆహ ‘‘మనోసంవరభేదేనా’’తి. ఇదాని తం పకారభేదేన దస్సేన్తో ‘‘సతిసంవరాదిభేదేన వా’’తి ఆహ, ముట్ఠసచ్చాదిప్పవత్తియాతి అత్థో. యం కిఞ్చి సభావభూతం చరితమ్పి ‘‘సీల’’న్తి వుచ్చతీతి అకుసలస్సపి సీలపరియాయో వుత్తో.

౯౪. సమానవిసయానన్తి పఠమఫలాదికో సమానో ఏవరూపో విసయో ఏతేసన్తి సమానవిసయా, తేసం.

౧౦౭. తదత్థో తప్పయోజనో లోకుత్తరసాధకోతి అత్థో. తస్స పరమత్థసాసనస్స. మూలేకదేసత్తాతి మూలభావేన ఏకదేసత్తా.

౧౧౮. ఉన్నళో ఉగ్గతతుచ్ఛమానో.

౧౨౩. సీలస్స అనుగ్గణ్హనం అపరిసుద్ధియం సోధనం అపారిపూరియం పూరణఞ్చాతి ఆహ ‘‘సోధేతబ్బే చ వడ్ఢేతబ్బే చా’’తి. అధిసీలం నిస్సాయాతి అధిసీలం నిస్సయం కత్వా ఉప్పన్నపఞ్ఞాయ.

౧౨౪. గూథసదిసత్తమేవ దస్సేతి, న గూథకూపసదిసత్తన్తి అధిప్పాయో. గూథవసేనేవ హి కూపస్సపి జిగుచ్ఛనీయతాతి. అయఞ్చ అత్థో గూథరాసియేవ గూథకూపోతి ఇమస్మిం పక్ఖే నవత్తబ్బో సియా.

౧౩౦. సరభఙ్గసత్థారాదయో రూపభవాదికామాదిపరిఞ్ఞం కత్వా పఞ్ఞపేన్తో లోకియం పరిఞ్ఞం సమ్మదేవ పఞ్ఞపేన్తీతి ఆహ ‘‘యేభుయ్యేన న సక్కోన్తీ’’తి. అసమత్థభావం వా సన్ధాయ నో చ పఞ్ఞాపేతుం సక్కోన్తీతి వుత్తన్తి యోజనా.

తికనిద్దేసవణ్ణనా నిట్ఠితా.