౮. అట్ఠమనయో విప్పయుత్తేనసమ్పయుత్తపదవణ్ణనా

౩౧౭. రూపక్ఖన్ధేన విప్పయుత్తా నామ చత్తారో అరూపినో ఖన్ధా, తేసం అఞ్ఞేహి సమ్పయోగో నామ నత్థి తాదిసస్స అఞ్ఞస్స సమ్పయోగినో అభావతో. సముదాయస్స చ ఏకదేసేన సమ్పయోగో నత్థీతి వుత్తోవాయమత్థో. వేదనాక్ఖన్ధాదీహి విప్పయుత్తం రూపం నిబ్బానఞ్చ, తస్స కేనచి సమ్పయోగో నత్థేవాతి ఆహ ‘‘రూపక్ఖన్ధాదీహి…పే… నత్థీ’’తి. తేనాతి ‘‘రూపక్ఖన్ధేన యే ధమ్మా విప్పయుత్తా’’తిఆదివచనేన.

అట్ఠమనయవిప్పయుత్తేనసమ్పయుత్తపదవణ్ణనా నిట్ఠితా.