౧. కోసియసిక్ఖాపదవణ్ణనా

౫౪౨. పాళియం ‘‘కోసియకారకే’’తి ఏత్థ కోసం కరోన్తీతి కోసకారకాతి లద్ధవోహారానం పాణకానం కోసతో నిబ్బత్తం కోసియం, తం కరోన్తీతి కోసియకారకా, తన్తవాయా. సంహననం సఙ్ఘాతో, వినాసోతి అత్థో. కోసియమిస్సకన్తి కోసియతన్తునా మిస్సం. ‘‘అవాయిమ’’న్తి వుత్తత్తా వాయిత్వా చే కరోన్తి, అనాపత్తి. అనాపత్తి వితానం వాతిఆదినా వితానాదీనం అత్థాయ కరణేపి తేనాకారేన పరిభోగేపి అనాపత్తి వుత్తా.

ఏవమ్పి మిస్సేత్వా కతమేవ హోతీతి ఇమినా వాతేన ఆహరిత్వా పాతితేపి అచిత్తకత్తా ఆపత్తియేవాతి దస్సేతి. కోసియమిస్సకతా, అత్తనో అత్థాయ సన్థతస్స కరణం కారాపనం, పటిలాభో చాతి ఇమానేత్థ తీణి అఙ్గాని.

కోసియసిక్ఖాపదవణ్ణనా నిట్ఠితా.

౫౪౭. సుద్ధకాళకసిక్ఖాపదం ఉత్తానత్థమేవ.