ఉపోసథాదిపుచ్ఛావిస్సజ్జనావణ్ణనా

౩౩౨. ‘‘సఙ్ఘం, భన్తే, పవారేమీతిఆది పవారణాకథా నామా’’తి గణ్ఠిపదేసు వుత్తం.

అత్థవసపకరణవణ్ణనా

౩౩౪. పఠమపారాజికవణ్ణనాయమేవ వుత్తన్తి ‘‘సఙ్ఘసుట్ఠుతాయా’’తిఆదీనం అత్థవణ్ణనం సన్ధాయ వుత్తం. దసక్ఖత్తుం యోజనాయ పదసతం వుత్తన్తి ఏకమూలకనయే దసక్ఖత్తుం యోజనాయ కతాయ సఙ్ఖలికనయే వుత్తపదేహి సద్ధిం పదసతం వుత్తన్తి ఏవమత్థో గహేతబ్బో. అఞ్ఞథా ఏకమూలకే ఏవ నయే న సక్కా పదసతం లద్ధుం. ఏకమూలకనయేహి పురిమపచ్ఛిమపదాని ఏకతో కత్వా ఏకేకస్మిం వారే నవ నవ పదాని వుత్తానీతి దసక్ఖత్తుం యోజనాయ నవుతి పదానియేవ లబ్భన్తి. తస్మా తాని నవుతి పదాని సఙ్ఖలికనయే బద్ధచక్కవసేన యోజితే దస పదాని లబ్భన్తీతి తేహి సద్ధిం పదసతన్తి సక్కా వత్తుం. ఇతో అఞ్ఞథా పన ఉభోసుపి నయేసు విసుం విసుం అత్థసతం ధమ్మసతఞ్చ యథా లబ్భతి, తథా పఠమపారాజికసంవణ్ణనాయమేవ అమ్హేహి దస్సితం, తం తత్థ వుత్తనయేనేవ గహేతబ్బం. పురిమపచ్ఛిమపదాని ఏకత్తేన గహేత్వా ‘‘పదసత’’న్తి వుత్తత్తా ‘‘తత్థ పచ్ఛిమస్స పచ్ఛిమస్స పదస్స వసేన అత్థసతం, పురిమస్స పురిమస్స వసేన ధమ్మసత’’న్తి వుత్తం. తస్మిం పదసతే ‘‘సఙ్ఘసుట్ఠూ’’తిఆదినా వుత్తపురిమపదానం వసేన ధమ్మసతం, ‘‘సఙ్ఘఫాసూ’’తిఆదినా వుత్తపచ్ఛిమపదానం వసేన అత్థసతన్తి అధిప్పాయో.

మహావగ్గవణ్ణనా నిట్ఠితా.