సేదమోచనగాథా

అవిప్పవాసాదిపఞ్హవణ్ణనా

౪౭౯. సేదమోచనగాథాసు తహిన్తి తస్మిం పుగ్గలే. ‘‘అకప్పియసమ్భోగో నామ మేథునధమ్మాదీ’’తి గణ్ఠిపదేసు వుత్తం. ఏసా పఞ్హా కుసలేహి చిన్తితాతి లిఙ్గవిపల్లాసవసేనేతం వుత్తం, ఏసో పఞ్హో కుసలేహి చిన్తితోతి అత్థో.

దసాతి అవన్దియే దస. ఏకాదసాతి పణ్డకాదయో ఏకాదస. ఉబ్భక్ఖకే న వదామీతి ఇమినా ముఖే మేథునధమ్మాభావం దీపేతి. అధోనాభిం వివజ్జియాతి ఇమినా వచ్చమగ్గపస్సావమగ్గేసు.

గామన్తరపరియాపన్నం నదీపారం ఓక్కన్తభిక్ఖునిం సన్ధాయాతి ఏత్థ నదీ భిక్ఖునియా గామపరియాపన్నా, పరతీరం గామన్తరపరియాపన్నం. తత్థ పరతీరే పఠమలేడ్డుపాతప్పమాణో గామూపచారో నదీపరియన్తేన పరిచ్ఛిన్నో, తస్మా పరతీరే రతనమత్తమ్పి అరఞ్ఞం నత్థి, పరతీరఞ్చ తిణాదీహి పటిచ్ఛన్నత్తా దస్సనూపచారవిరహితం కరోతి. తత్థ అత్తనో గామే ఆపత్తి నత్థి, పరతీరే పన పఠమలేడ్డుపాతసఙ్ఖాతే గామూపచారేయేవ పాదం ఠపేతి. అన్తరే అభిధమ్మే వుత్తనయేన అరఞ్ఞభూతం సకగామం అతిక్కమతి నామ, తస్మా గణమ్హా ఓహీయనా నామ హోతీతి వేదితబ్బం.

భిక్ఖూనం సన్తికే ఏకతోఉపసమ్పన్నా నామ మహాపజాపతిపముఖా పఞ్చసతసాకినియో భిక్ఖునియో. మహాపజాపతిపి హి ఆనన్దత్థేరేన దిన్నఓవాదస్స పటిగ్గహితత్తా భిక్ఖూనం సన్తికే ఉపసమ్పన్నా నామ.

పారాజికాదిపఞ్హవణ్ణనా

౪౮౦. సహ దుస్సేన మేథునవీతిక్కమస్స సక్కుణేయ్యతాయ ‘‘దుస్సకుటిఆదీని సన్ధాయా’’తి వుత్తం. లిఙ్గపరివత్తం సన్ధాయ వుత్తాతి ‘‘లిఙ్గపరివత్తే సతి పటిగ్గహణస్స విజహనతో సామం గహేత్వా భుఞ్జితుం న వట్టతీ’’తి లిఙ్గపరివత్తనం సన్ధాయ వుత్తా.

౪౮౧. సుప్పతిట్ఠితనిగ్రోధసదిసన్తి యోజనద్వియోజనాదిపరమం మహానిగ్రోధం సన్ధాయ వుత్తం.

సేదమోచనగాథావణ్ణనా నిట్ఠితా.