౬. సురుసురువగ్గవణ్ణనా

౬౨౭. ఛట్ఠవగ్గే సీతీకతోతి సీతట్టో, సీతపీళితోతి వుత్తం హోతి. సిలకబుద్ధోతి పరిహాసవచనమేతం. సిలకఞ్హి కఞ్చి దిస్వా ‘‘బుద్ధో అయ’’న్తి వోహరన్తి.

౬౩౪. విలీవచ్ఛత్తన్తి వేణువిలీవేహి కతం ఛత్తం. తత్థజాతకదణ్డకేన కతన్తి తాలపణ్ణం సహ దణ్డకేన ఛిన్దిత్వా తమేవ ఛత్తదణ్డం కరోన్తి గోపాలకాదయో వియ, తం సన్ధాయేతం వుత్తం. ఛత్తపాదుకాయ వా ఠితం హోతీతి ఏత్థ ఛత్తపాదుకా వుచ్చతి ఛత్తాధారో. యస్మిం ఛత్తం అపతమానం కత్వా ఠపేన్తి, తాదిసికాయ ఛత్తపాదుకాయ ఠితం ఛత్తం ‘‘ఛత్త’’న్తి అజ్ఝాహరితబ్బం. ‘‘ఛత్తం ఛత్తపాదుకాయ ఠిత’’న్తిపి పఠన్తి, తత్థాపి అయమేవత్థో.

౬౩౭. చాపోతి మజ్ఝే వఙ్కా కాచదణ్డసదిసా ధనువికతి. కోదణ్డోతి వట్టలదణ్డా ధనువికతి. పటిముక్కన్తి పవేసితం లగ్గితం.

సురుసురువగ్గవణ్ణనా నిట్ఠితా.