౮. దుబ్బణ్ణకరణసిక్ఖాపదవణ్ణనా

౩౬౮. అట్ఠమే ‘‘చమ్మకారనీలం నామ పకతినీల’’న్తి తీసుపి గణ్ఠిపదేసు వుత్తం. గణ్ఠిపదే పన ‘‘చమ్మకారా ఉదకే తిపుమలం అయగూథఞ్చ పక్ఖిపిత్వా చమ్మం కాళం కరోన్తి, తం చమ్మకారనీల’’న్తి వుత్తం. సేసమేత్థ ఉత్తానమేవ. వుత్తప్పకారస్స చీవరస్స అకతకప్పతా, అనట్ఠచీవరాదితా, నివాసనం వా పారుపనం వాతి ఇమాని పనేత్థ తీణి అఙ్గాని.

దుబ్బణ్ణకరణసిక్ఖాపదవణ్ణనా నిట్ఠితా.