౬. దుతియపవారణాసిక్ఖాపదవణ్ణనా

౨౪౩. ఛట్ఠే సాధారణమేవాతి ‘‘హన్ద భిక్ఖు ఖాద వా’’తిఆదినా వుత్తపవారణాయ సాధారణం. ‘‘భుత్తస్మిం పాచిత్తియ’’న్తి మాతికాయం వుత్తత్తా భోజనపరియోసానే ఆపత్తి, న అజ్ఝోహారే అజ్ఝోహారే. అభిహట్ఠుం పవారేతి, ఆపత్తి పాచిత్తియస్సాతి ఇదఞ్చ భోజనపరియోసానంయేవ సన్ధాయ వుత్తన్తి వేదితబ్బం. సేసమేత్థ ఉత్తానమేవ. పవారితతా, పవారితసఞ్ఞితా, ఆసాదనాపేక్ఖతా, అనతిరిత్తేన అభిహట్ఠుం పవారణా, భోజనపరియోసానన్తి ఇమాని పనేత్థ పఞ్చ అఙ్గాని.

దుతియపవారణాసిక్ఖాపదవణ్ణనా నిట్ఠితా.