౧౦. రహోనిసజ్జసిక్ఖాపదవణ్ణనా

౧౯౮. దసమే ఉపనన్దస్స చతుత్థసిక్ఖాపదేనాతి అప్పటిచ్ఛన్నే మాతుగామేన సద్ధిం రహోనిసజ్జసిక్ఖాపదం సన్ధాయ వుత్తం. కిఞ్చాపి తం అచేలకవగ్గే పఞ్చమసిక్ఖాపదం హోతి, ఉపనన్దత్థేరం ఆరబ్భ పఞ్ఞత్తేసు పన చతుత్థభావతో ‘‘ఉపనన్దస్స చతుత్థసిక్ఖాపదేనా’’తి వుత్తం. చతుత్థసిక్ఖాపదస్స వత్థుతో ఇమస్స సిక్ఖాపదస్స వత్థునో పఠమం ఉప్పన్నత్తా ఇదం సిక్ఖాపదం పఠమం పఞ్ఞత్తం. ఇమినా చ సిక్ఖాపదేన కేవలం భిక్ఖునియా ఏవ రహోనిసజ్జాయ ఆపత్తి పఞ్ఞత్తా, ఉపరి మాతుగామేన సద్ధిం రహోనిసజ్జాయ ఆపత్తి విసుం పఞ్ఞత్తాతి దట్ఠబ్బం.

రహోనిసజ్జసిక్ఖాపదవణ్ణనా నిట్ఠితా.

నిట్ఠితో భిక్ఖునివగ్గో తతియో.