చీవరక్ఖన్ధకకథావణ్ణనా

౨౭౨౬-౭. చీవరం ఉప్పజ్జతి ఏతాసూతి ‘‘ఉప్పాదా’’తి జనికావ వుచ్చన్తి, చీవరవత్థపరిలాభక్ఖేత్తన్తి అత్థో. యథాహ – ‘‘యథావుత్తానం చీవరానం పటిలాభాయ ఖేత్తం దస్సేతుం అట్ఠిమా భిక్ఖవే మాతికాతిఆదిమాహా’’తి (మహావ. అట్ఠ. ౩౭౯). చీవరమాతికాతి చీవరుప్పాదహేతుభూతమాతరో. తేనాహ కథినక్ఖన్ధకవణ్ణనాయం ‘‘మాతికాతి మాతరో, జనేత్తియోతి అత్థో’’తి (మహావ. అట్ఠ. ౩౧౦). మాతికాతి చేత్థ చీవరదానమధిప్పేతం. యథాహ ‘‘సీమాయ దానం ఏకా మాతికా, కతికాయ దానం దుతియా’’తిఆది. సీమాయ దేతి, కతికాయ దేతి, భిక్ఖాపఞ్ఞత్తియా దేతి, సఙ్ఘస్స దేతి, ఉభతోసఙ్ఘే దేతి, వస్సంవుత్థసఙ్ఘస్స దేతి, ఆదిస్స దేతి, పుగ్గలస్స దేతి. ‘‘ఇమా పన అట్ఠ మాతికా’’తి వుత్తమేవ నిగమనవసేన వుత్తం.

౨౭౨౮. తత్థాతి తాసు అట్ఠమాతికాసు. సీమాయ దేతీతి ‘‘సీమాయ దమ్మీ’’తి ఏవం సీమం పరామసిత్వా దేన్తో సీమాయ దేతి, ఏవం దిన్నం అన్తోసీమగతేహి భిక్ఖూహి భాజేతబ్బన్తి వణ్ణితన్తి యోజనా. తత్థ అన్తోసీమగతేహీతి దాయకో యం సీమం అపేక్ఖిత్వా ఏవమాహ, తస్సా సీమాయ అన్తోగతేహి సబ్బేహి. భాజేతబ్బన్తి తం చీవరం భాజేతబ్బం. వరవణ్ణినాతి ‘‘ఇతిపి సో భగవా అరహ’’న్తిఆదినా సకలలోకబ్యాపిగుణాతిసయయుత్తేన బ్యామప్పభాయ, ఛబ్బణ్ణానం రంసీనఞ్చ వసేన ఉత్తమప్పభాతిసయయుత్తేన వరవణ్ణినా వణ్ణితం కథితం. అయమేత్థ పదవణ్ణనా, అయం పన వినిచ్ఛయో – సీమాయ దేతీతి ఏత్థ తావ ఖణ్డసీమా ఉపచారసీమా సమానసంవాససీమా అవిప్పవాససీమా లాభసీమా గామసీమా నిగమసీమా నగరసీమా అబ్భన్తరసీమా ఉదకుక్ఖేపసీమా జనపదసీమా రట్ఠసీమా రజ్జసీమా దీపసీమా చక్కవాళసీమా ఇతి పన్నరస సీమా వేదితబ్బా.

తత్థ ఖణ్డసీమా సీమాకథాయం వుత్తా. ఉపచారసీమా పరిక్ఖిత్తస్స విహారస్స పరిక్ఖేపేన, అపరిక్ఖిత్తస్స విహారస్స పరిక్ఖేపారహట్ఠానేన పరిచ్ఛిన్నా హోతి. అపిచ భిక్ఖూనం ధువసన్నిపాతట్ఠానతో వా పరియన్తే ఠితభోజనసాలతో వా నిబద్ధవసనకఆవాసతో వా థామమజ్ఝిమస్స పురిసస్స ద్విన్నం లేడ్డుపాతానం అన్తో ఉపచారసీమా వేదితబ్బా. సా పన ఆవాసేసు వడ్ఢన్తేసు వడ్ఢతి, పరిహాయన్తేసు పరిహాయతి. మహాపచ్చరియం పన ‘‘భిక్ఖూసుపి వడ్ఢన్తేసు వడ్ఢతీ’’తి (మహావ. అట్ఠ. ౩౭౯) వుత్తం. తస్మా సచే విహారే సన్నిపతితభిక్ఖూహి సద్ధిం ఏకాబద్ధా హుత్వా యోజనసతమ్పి పూరేత్వా నిసీదన్తి, యోజనసతమ్పి ఉపచారసీమావ హోతి, సబ్బేసం లాభో పాపుణాతి. సమానసంవాసఅవిప్పవాససీమాద్వయమ్పి వుత్తమేవ.

లాభసీమా నామ నేవ సమ్మాసమ్బుద్ధేన అనుఞ్ఞాతా, న ధమ్మసఙ్గాహకత్థేరేహి ఠపితా, అపిచ ఖో రాజరాజమహామత్తా విహారం కారేత్వా గావుతం వా అడ్ఢయోజనం వా యోజనం వా సమన్తతో పరిచ్ఛిన్దిత్వా ‘‘అయం అమ్హాకం విహారస్స లాభసీమా’’తి నామలిఖితకే థమ్భే నిఖణిత్వా ‘‘యం ఏత్థన్తరే ఉప్పజ్జతి, సబ్బం తం అమ్హాకం విహారస్స దేమా’’తి సీమం ఠపేన్తి, అయం లాభసీమా నామ. గామనిగమనగరఅబ్భన్తరఉదకుక్ఖేపసీమాపి వుత్తా ఏవ.

జనపదసీమా నామ కాసికోసలరట్ఠాదీనం అన్తో బహూ జనపదా హోన్తి, ఏత్థ ఏకేకో జనపదపరిచ్ఛేదో జనపదసీమా. రట్ఠసీమా నామ కాసికోసలాదిరట్ఠపరిచ్ఛేదో. రజ్జసీమా నామ మహాచోళభోగో కేరళభోగోతి ఏవం ఏకేకస్స రఞ్ఞో ఆణాపవత్తిట్ఠానం. దీపసీమా నామ సముద్దన్తేన సముచ్ఛిన్నమహాదీపా చ అన్తరదీపా చ. చక్కవాళసీమా నామ చక్కవాళపబ్బతేనేవ పరిచ్ఛిన్నా.

ఏవమేతాసు సీమాసు ఖణ్డసీమాయ కేనచి కమ్మేన సన్నిపతితం సఙ్ఘం దిస్వా ‘‘ఏత్థేవ సీమాయ సఙ్ఘస్స దేమీ’’తి వుత్తే యావతికా భిక్ఖూ అన్తోఖణ్డసీమగతా, తేహి భాజేతబ్బం. తేసంయేవ హి తం పాపుణాతి, అఞ్ఞేసం సీమన్తరికాయ వా ఉపచారసీమాయ వా ఠితానమ్పి న పాపుణాతి. ఖణ్డసీమాయ ఠితే పన రుక్ఖే వా పబ్బతే వా ఠితస్స హేట్ఠా వా పథవియా వేమజ్ఝం గతస్స పాపుణాతియేవ.

‘‘ఇమిస్సా ఉపచారసీమాయ సఙ్ఘస్స దమ్మీ’’తి దిన్నం పన ఖణ్డసీమాసీమన్తరికాసు ఠితానమ్పి పాపుణాతి. ‘‘సమానసంవాససీమాయ దమ్మీ’’తి దిన్నం పన ఖణ్డసీమాసీమన్తరికాసు ఠితానం న పాపుణాతి. అవిప్పవాససీమాలాభసీమాసు దిన్నం తాసు సీమాసు అన్తోగతానంయేవ పాపుణాతి. గామసీమాదీసు దిన్నం తాసం సీమానం అబ్భన్తరే బద్ధసీమాయ ఠితానమ్పి పాపుణాతి. అబ్భన్తరసీమాఉదకుక్ఖేపసీమాసు దిన్నం తత్థ అన్తోగతానంయేవ పాపుణాతి. జనపదరట్ఠరజ్జదీపచక్కవాళసీమాసుపి గామసీమాదీసు వుత్తసదిసోయేవ వినిచ్ఛయో.

సచే పన జమ్బుదీపే ఠితో ‘‘తమ్బపణ్ణిదీపే సఙ్ఘస్స దమ్మీ’’తి వదతి, తమ్బపణ్ణిదీపతో ఏకోపి గన్త్వా సబ్బేసం గణ్హితుం లభతి. సచేపి తత్రేవ ఏకో సభాగభిక్ఖు సభాగానం భాగం గణ్హాతి, న వారేతబ్బో. ఏవం తావ యో సీమం పరామసిత్వా దేతి, తస్స దానే వినిచ్ఛయో వేదితబ్బో.

యో పన ‘‘అసుకసీమాయా’’తి వత్తుం న జానాతి, కేవలం ‘‘సీమా’’తి వచనమత్తమేవ జానన్తో విహారం ఆగన్త్వా ‘‘సీమాయ దమ్మీ’’తి వా ‘‘సీమట్ఠకసఙ్ఘస్స దమ్మీ’’తి వా భణతి, సో పుచ్ఛితబ్బో ‘‘సీమా నామ బహువిధా, కతరం సీమం సన్ధాయ భణసీ’’తి, సచే వదతి ‘‘అహం ‘అసుకసీమా’తి న జానామి, సీమట్ఠకసఙ్ఘో భాజేత్వా గణ్హతూ’’తి, కతరసీమాయ భాజేతబ్బం? మహాసీవత్థేరో కిరాహ ‘‘అవిప్పవాససీమాయా’’తి. తతో నం ఆహంసు ‘‘అవిప్పవాససీమా నామ తియోజనాపి హోతి, ఏవం సన్తే తియోజనే ఠితా లాభం గణ్హిస్సన్తి, తియోజనే ఠత్వా ఆగన్తుకవత్తం పూరేత్వా ఆరామం పవిసితబ్బం భవిస్సతి, గమికో తియోజనం గన్త్వా సేనాసనం ఆపుచ్ఛిస్సతి, నిస్సయపటిపన్నస్స తియోజనాతిక్కమే నిస్సయో పటిప్పస్సమ్భిస్సతి, పారివాసికేన తియోజనం అతిక్కమిత్వా అరుణం ఉట్ఠాపేతబ్బం భవిస్సతి, భిక్ఖునియా తియోజనే ఠత్వా ఆరామప్పవేసనం ఆపుచ్ఛితబ్బం భవిస్సతి, సబ్బమ్పేతం ఉపచారసీమాపరిచ్ఛేదవసేనేవ కత్తుం వట్టతి. తస్మా ఉపచారసీమాయమేవ భాజేతబ్బ’’న్తి.

౨౭౨౯. యే విహారా సఙ్ఘేన కతికాయ ఏకలాభకా సమానలాభకా ఏత్థ ఏతేసు విహారేసు దిన్నం ‘‘కతికాయ దమ్మీ’’తి దిన్నం సబ్బేహి భిక్ఖూహి సహ భాజేతబ్బం చీవరం కతికాయ వుచ్చతీతి యోజనా.

అయమేత్థ వినిచ్ఛయో – కతికా నామ సమానలాభకతికా, తత్రేవం కతికా కాతబ్బా – ఏకస్మిం విహారే సన్నిపతితేహి భిక్ఖూహి యం విహారం సఙ్గణ్హితుకామా సమానలాభం కాతుం ఇచ్ఛన్తి, అస్స నామం గహేత్వా ‘‘అసుకో నామ విహారో పోరాణకో’’తి వా ‘‘బుద్ధాధివుత్థో’’తి వా ‘‘అప్పలాభో’’తి వా యం కిఞ్చి కారణం వత్వా ‘‘తం విహారం ఇమినా విహారేన సద్ధిం ఏకలాభం కాతుం సఙ్ఘస్స రుచ్చతీ’’తి తిక్ఖత్తుం సావేతబ్బం. ఏత్తావతా తస్మిం విహారే నిసిన్నోపి ఇధ నిసిన్నోవ హోతి. తస్మిం విహారేపి సఙ్ఘేన ఏవమేవ కాతబ్బం. ఏత్తావతా ఇధ నిసిన్నోపి తస్మిం విహారే నిసిన్నోవ హోతి. ఏకస్మిం లాభే భాజియమానే ఇతరస్మిం ఠితస్స భాగం గహేతుం వట్టతి. ఏవం ఏకేన విహారేన సద్ధిం బహూపి ఆవాసా ఏకలాభా కాతబ్బాతి.

౨౭౩౦. చీవరదాయకేన ధువకారా పాకవత్తాదినిచ్చసక్కారా యత్థ సఙ్ఘస్స క్రీయన్తి కరీయన్తి తత్థ తస్మిం విహారే తేనేవ దాయకేన సఙ్ఘస్స దిన్నం విహారం ‘‘భిక్ఖాపఞ్ఞత్తియా దిన్న’’న్తి మహేసినా వుత్తన్తి యోజనా.

తత్రాయం వినిచ్ఛయో – యస్మిం విహారే ఇమస్స చీవరదాయకస్స సన్తకం సఙ్ఘస్స పాకవత్తం వా వత్తతి, యస్మిం వా విహారే భిక్ఖూ అత్తనో భారం కత్వా సదా గేహే భోజేతి, యత్థ వా తేన ఆవాసో కారితో, సలాకభత్తాదీని వా నిబద్ధాని, యేన పన సకలోపి విహారో పతిట్ఠాపితో, తత్థ వత్తబ్బమేవ నత్థి, ఇమే ధువకారా నామ. తస్మా సచే సో ‘‘యత్థ మయ్హం ధువకారా కరీయన్తి, ఏత్థ దమ్మీ’’తి వా ‘‘తత్థ దేథా’’తి వా భణతి, బహూసు చేపి ఠానేసు ధువకారా హోన్తి, సబ్బత్థ దిన్నమేవ హోతి.

సచే పన ఏకస్మిం విహారే భిక్ఖూ బహుతరా హోన్తి, తేహి వత్తబ్బం ‘‘తుమ్హాకం ధువకారే ఏకత్థ భిక్ఖూ బహూ, ఏకత్థ అప్పకా’’తి, సచే ‘‘భిక్ఖుగణనాయ గణ్హథా’’తి భణతి, తథా భాజేత్వా గణ్హితుం వట్టతి. ఏత్థ చ వత్థభేసజ్జాది అప్పకమ్పి సుఖేన భాజీయతి, యది పన మఞ్చో వా పీఠకం వా ఏకమేవ హోతి, తం పుచ్ఛిత్వా యస్స వా విహారస్స ఏకవిహారేపి వా యస్స సేనాసనస్స సో విచారేతి, తత్థ దాతబ్బం. సచే ‘‘అసుకభిక్ఖు గణ్హతూ’’తి వదతి, వట్టతి.

అథ ‘‘మయ్హం ధువకారే దేథా’’తి వత్వా అవిచారేత్వావ గచ్ఛతి, సఙ్ఘస్సపి విచారేతుం వట్టతి. ఏవం పన విచారేతబ్బం – ‘‘సఙ్ఘత్థేరస్స వసనట్ఠానే దేథా’’తి వత్తబ్బం. సచే తత్థ సేనాసనం పరిపుణ్ణం హోతి. యత్థ నప్పహోతి, తత్థ దాతబ్బం. సచే ఏకో భిక్ఖు ‘‘మయ్హం వసనట్ఠానే సేనాసనపరిభోగభణ్డం నత్థీ’’తి వదతి, తత్థ దాతబ్బన్తి.

౨౭౩౧. సఙ్ఘస్స పన యం దిన్నన్తి విహారం పవిసిత్వా ‘‘ఇమాని చీవరాని సఙ్ఘస్స దమ్మీ’’తి యం చీవరం దిన్నం. ‘‘సమ్ముఖీభూతేనా’’తి వత్తబ్బే గాథాబన్ధేన రస్సత్తం. సమ్ముఖిభూతేనాతి చ ఉపచారసీమాయ ఠితేన. భాజేతబ్బన్తి ఘణ్టిం పహరిత్వా కాలం ఘోసేత్వా భాజేతబ్బం. ఇదమేత్థ ముఖమత్తదస్సనం. వినిచ్ఛయో అట్ఠకథాయ (మహావ. అట్ఠ. ౩౭౯) వేదితబ్బో. సేయ్యథిదం – చీవరదాయకేన విహారం పవిసిత్వా ‘‘ఇమాని చీవరాని సఙ్ఘస్స దమ్మీ’’తి దిన్నేసు భాజియమానేసు సీమట్ఠస్స అసమ్పత్తస్సపి భాగం గణ్హన్తో న వారేతబ్బో. విహారో మహా హోతి, థేరాసనతో పట్ఠాయ వత్థేసు దియ్యమానేసు అలసజాతికా మహాథేరా పచ్ఛా ఆగచ్ఛన్తి, ‘‘భన్తే, వీసతివస్సానం దియ్యతి, తుమ్హాకం ఠితికా అతిక్కన్తా’’తి న వత్తబ్బా, ఠితికం ఠపేత్వా తేసం దత్వా పచ్ఛా ఠితికాయ దాతబ్బం.

‘‘అసుకవిహారే కిర బహుం చీవరం ఉప్పన్న’’న్తి సుత్వా యోజనన్తరికవిహారతోపి భిక్ఖూ ఆగచ్ఛన్తి, సమ్పత్తసమ్పత్తానం ఠితట్ఠానతో పట్ఠాయ దాతబ్బం. అసమ్పత్తానమ్పి ఉపచారసీమం పవిట్ఠానం అన్తేవాసికాదీసు గణ్హన్తేసు దాతబ్బమేవ. ‘‘బహి ఉపచారసీమాయ ఠితానం దేథా’’తి వదన్తి, న దాతబ్బం. సచే పన ఉపచారసీమం ఓక్కన్తేహి ఏకాబద్ధా హుత్వా అత్తనో విహారద్వారే వా అన్తోవిహారేయేవ వా హోన్తి, పరిసవసేన వడ్ఢితా నామ సీమా హోతి, తస్మా దాతబ్బం. సఙ్ఘనవకస్స దిన్నేపి పచ్ఛా ఆగతానం దాతబ్బమేవ. దుతియభాగే పన థేరాసనం ఆరుళ్హే ఆగతానం పఠమభాగో న పాపుణాతి, దుతియభాగతో వస్సగ్గేన దాతబ్బం.

ఏకస్మిం విహారే దస భిక్ఖూ హోన్తి, దస వత్థాని ‘‘సఙ్ఘస్స దేమా’’తి దేన్తి, పాటేక్కం భాజేతబ్బాని. సచే ‘‘సబ్బానేవ అమ్హాకం పాపుణన్తీ’’తి గహేత్వా గచ్ఛన్తి, దుప్పాపితాని చేవ దుగ్గహితాని చ, గతగతట్ఠానే సఙ్ఘికానేవ హోన్తి. ఏకం పన ఉద్ధరిత్వా ‘‘ఇదం తుమ్హాకం పాపుణాతీ’’తి సఙ్ఘత్థేరస్స దత్వా సేసాని ‘‘ఇమాని అమ్హాకం పాపుణన్తీ’’తి గహేతుం వట్టతి.

ఏకమేవ వత్థం ‘‘సఙ్ఘస్స దేమా’’తి ఆహరన్తి, అభాజేత్వావ ‘‘అమ్హాకం పాపుణాతీ’’తి గణ్హన్తి, దుప్పాపితఞ్చేవ దుగ్గహితఞ్చ, సత్థకేన, పన హలిద్దిఆదినా వా లేఖం కత్వా ఏకం కోట్ఠాసం ‘‘ఇమం ఠానం తుమ్హాకం పాపుణాతీ’’తి సఙ్ఘత్థేరస్స పాపేత్వా సేసం ‘‘అమ్హాకం పాపుణాతీ’’తి గహేతుం వట్టతి. యం పన వత్థస్సేవ పుప్ఫం వా వలి వా, తేన పరిచ్ఛేదం కాతుం న వట్టతి. సచే ఏకం తన్తం ఉద్ధరిత్వా ‘‘ఇదం ఠానం తుమ్హాకం పాపుణాతీ’’తి సఙ్ఘత్థేరస్స దత్వా సేసం ‘‘అమ్హాకం పాపుణాతీ’’తి గణ్హన్తి, వట్టతి. ఖణ్డం ఖణ్డం ఛిన్దిత్వా భాజియమానం వట్టతియేవ.

ఏకభిక్ఖుకే విహారే సఙ్ఘస్స చీవరేసు ఉప్పన్నేసు సచే పుబ్బే వుత్తనయేనేవ సో భిక్ఖు ‘‘సబ్బాని మయ్హం పాపుణన్తీ’’తి గణ్హాతి, సుగ్గహితాని, ఠితికా పన న తిట్ఠతి. సచే ఏకేకం ఉద్ధరిత్వా ‘‘ఇదం మయ్హం పాపుణాతీ’’తి గణ్హాతి, ఠితికా తిట్ఠతి. తత్థ ఠితికాయ అట్ఠితాయ పున అఞ్ఞస్మిం చీవరే ఉప్పన్నే సచే ఏకో భిక్ఖు ఆగచ్ఛతి, మజ్ఝే ఛిన్దిత్వా ద్వీహిపి గహేతబ్బం. ఠితాయ ఠితికాయ పున అఞ్ఞస్మిం చీవరే ఉప్పన్నే సచే నవకతరో ఆగచ్ఛతి, ఠితికా హేట్ఠా ఓరోహతి. సచే వుడ్ఢతరో ఆగచ్ఛతి, ఠితికా ఉద్ధం ఆరోహతి. అథ అఞ్ఞో నత్థి, పున అత్తనో పాపేత్వా గహేతబ్బం.

‘‘సఙ్ఘస్స దేమా’’తి వా ‘‘భిక్ఖుసఙ్ఘస్స దేమా’’తి వా యేన కేనచి ఆకారేన సఙ్ఘం ఆమసిత్వా దిన్నం పన పంసుకూలికానం న వట్టతి ‘‘గహపతిచీవరం పటిక్ఖిపామి, పంసుకూలికఙ్గం సమాదియామీ’’తి వుత్తత్తా, న పన అకప్పియత్తా. భిక్ఖుసఙ్ఘేన అపలోకేత్వా దిన్నమ్పి న గహేతబ్బం. యం పన భిక్ఖు అత్తనో సన్తకం దేతి, తం భిక్ఖుదత్తియం నామ వట్టతి. పంసుకూలం పన న హోతి. ఏవం సన్తేపి ధుతఙ్గం న భిజ్జతి. ‘‘భిక్ఖూనం దేమ, థేరానం దేమా’’తి వుత్తే పన పంసుకూలికానమ్పి వట్టతి. ‘‘ఇదం వత్థం సఙ్ఘస్స దేమ, ఇమినా ఉపాహనత్థవికపత్తత్థవికఆయోగఅంసబద్ధకాదీని కరోథా’’తి దిన్నమ్పి వట్టతి.

పత్తత్థవికాదీనం అత్థాయ దిన్నాని బహూనిపి హోన్తి, చీవరత్థాయపి పహోన్తి, తతో చీవరం కత్వా పారుపితుం వట్టతి. సచే పన సఙ్ఘో భాజితాతిరిత్తాని వత్థాని ఛిన్దిత్వా ఉపాహనత్థవికాదీనం అత్థాయ భాజేతి, తతో గహేతుం న వట్టతి. సామికేహి విచారితమేవ హి వట్టతి, న ఇతరం.

‘‘పంసుకూలికసఙ్ఘస్స ధమ్మకరణఅంసబద్ధాదీనం అత్థాయ దేమా’’తి వుత్తేపి గహేతుం వట్టతి. పరిక్ఖారో నామ పంసుకూలికానమ్పి ఇచ్ఛితబ్బో. యం తత్థ అతిరేకం హోతి, తం చీవరేపి ఉపనేతుం వట్టతి. సుత్తం సఙ్ఘస్స దేన్తి, పంసుకూలికేహిపి గహేతబ్బం. అయం తావ విహారం పవిసిత్వా ‘‘ఇమాని చీవరాని సఙ్ఘస్స దమ్మీ’’తి దిన్నేసు వినిచ్ఛయో.

సచే పన బహి ఉపచారసీమాయ అద్ధానపటిపన్నే భిక్ఖూ దిస్వా ‘‘సఙ్ఘస్స దమ్మీ’’తి సఙ్ఘత్థేరస్స వా సఙ్ఘనవకస్స వా ఆరోచేతి, సచేపి యోజనం ఫరిత్వా పరిసా ఠితా హోతి, ఏకాబద్ధా చే, సబ్బేసం పాపుణాతి. యే పన ద్వాదసహి హత్థేహి పరిసం అసమ్పత్తా, తేసం న పాపుణాతీతి.

౨౭౩౨. ఇదాని ‘‘ఉభతోసఙ్ఘే దేతీ’’తి మాతికం వివరన్తో ఆహ ‘‘ఉభతోసఙ్ఘముద్దిస్సా’’తిఆది. ఉభతోసఙ్ఘముద్దిస్సాతి భిక్ఖుసఙ్ఘం, భిక్ఖునిసఙ్ఘఞ్చ ఉద్దిసిత్వా. దేతీతి ‘‘ఉభతోసఙ్ఘస్స దేమీ’’తి దేతి. ‘‘బహు వా’’తి ఏత్థ ‘‘బహూ వా’’తి వత్తబ్బే గాథాబన్ధవసేన రస్సత్తం. భిక్ఖునీనం భిక్ఖూ థోకా వా హోన్తు బహూ వా, పుగ్గలగ్గేన అకత్వా ఉభతోసఙ్ఘవసేన సమభాగోవ కాతుం వట్టతీతి యోజనా.

తత్రాయం వినిచ్ఛయో – ‘‘ఉభతోసఙ్ఘస్స దమ్మీ’’తి వుత్తేపి ‘‘ద్వేధాసఙ్ఘస్స దమ్మి, ద్విన్నం సఙ్ఘానం దమ్మి, భిక్ఖుసఙ్ఘస్స చ భిక్ఖునిసఙ్ఘస్స చ దమ్మీ’’తి వుత్తేపి ఉభతోసఙ్ఘస్స దిన్నమేవ హోతి, ద్వే భాగే సమే కత్వా ఏకో దాతబ్బో.

‘‘ఉభతోసఙ్ఘస్స చ తుయ్హఞ్చ దమ్మీ’’తి వుత్తే సచే దస దస భిక్ఖూ, భిక్ఖునియో చ హోన్తి, ఏకవీసతి పటివీసే కత్వా ఏకో పుగ్గలస్స దాతబ్బో, దస భిక్ఖుసఙ్ఘస్స, దస భిక్ఖునిసఙ్ఘస్స. యేన పుగ్గలికో లద్ధో, సో సఙ్ఘతోపి అత్తనో వస్సగ్గేన గహేతుం లభతి. కస్మా? ఉభతోసఙ్ఘగ్గహణేన గహితత్తా.

‘‘ఉభతోసఙ్ఘస్స చ చేతియస్స చ దమ్మీ’’తి వుత్తేపి ఏసేవ నయో. ఇధ పన చేతియస్స సఙ్ఘతో పాపుణనకోట్ఠాసో నామ నత్థి, ఏకపుగ్గలస్స పత్తకోట్ఠాససమోవ కోట్ఠాసో హోతి.

‘‘ఉభతోసఙ్ఘస్స చ తుయ్హఞ్చ చేతియస్స చా’’తి వుత్తే పన ద్వావీసతి కోట్ఠాసే కత్వా దస భిక్ఖూనం, దస భిక్ఖునీనం, ఏకో పుగ్గలస్స, ఏకో చేతియస్స దాతబ్బో. తత్థ పుగ్గలో సఙ్ఘతోపి అత్తనో వస్సగ్గేన పున గహేతుం లభతి. చేతియస్స ఏకోయేవ.

‘‘భిక్ఖుసఙ్ఘస్స చ భిక్ఖునీనఞ్చ దమ్మీ’’తి వుత్తే పన మజ్ఝే భిన్దిత్వా న దాతబ్బం, భిక్ఖూ చ భిక్ఖునియో చ గణేత్వా దాతబ్బం.

‘‘భిక్ఖుసఙ్ఘస్స చ భిక్ఖునీనఞ్చ తుయ్హఞ్చా’’తి వుత్తే పన పుగ్గలో విసుం న లభతి, పాపుణనట్ఠానతో ఏకమేవ లభతి. కస్మా? భిక్ఖుసఙ్ఘగ్గహణేన గహితత్తా.

‘‘భిక్ఖుసఙ్ఘస్స చ భిక్ఖునీనఞ్చ తుయ్హఞ్చ చేతియస్స చా’’తి వుత్తేపి చేతియస్స ఏకపుగ్గలపటివీసో లబ్భతి, పుగ్గలస్స విసుం న లబ్భతి. తస్మా ఏకం చేతియస్స దత్వా అవసేసం భిక్ఖూ చ భిక్ఖునియో చ గణేత్వా భాజేతబ్బం.

‘‘భిక్ఖూనఞ్చ భిక్ఖునీనఞ్చ దమ్మీ’’తి వుత్తేపి న మజ్ఝే భిన్దిత్వా దాతబ్బం, పుగ్గలగణనాయ ఏవ విభజితబ్బం.

‘‘భిక్ఖూనఞ్చ భిక్ఖునీనఞ్చ తుయ్హఞ్చ చేతియస్స చా’’తి ఏవం వుత్తేపి చేతియస్స ఏకపుగ్గలపటివీసో లబ్భతి, పుగ్గలస్స విసుం నత్థి, భిక్ఖూ చ భిక్ఖునియో చ గణేత్వా ఏవ భాజేతబ్బం. యథా చ భిక్ఖుసఙ్ఘం ఆదిం కత్వా నయో నీతో, ఏవం భిక్ఖునిసఙ్ఘం ఆదిం కత్వాపి నేతబ్బో.

‘‘భిక్ఖుసఙ్ఘస్స చ తుయ్హఞ్చా’’తి వుత్తే పుగ్గలస్స విసుం న లబ్భతి, వస్సగ్గేనేవ గహేతబ్బం.

‘‘భిక్ఖుసఙ్ఘస్స చ చేతియస్స చా’’తి వుత్తే పన చేతియస్స విసుం పటివీసో లబ్భతి.

‘‘భిక్ఖుసఙ్ఘస్స చ తుయ్హఞ్చ చేతియస్స చా’’తి వుత్తేపి చేతియస్సేవ లబ్భతి, న పుగ్గలస్స.

‘‘భిక్ఖూనఞ్చ తుయ్హఞ్చా’’తి వుత్తేపి విసుం న లబ్భతి.

‘‘భిక్ఖూనఞ్చ చేతియస్స చా’’తి వుత్తే పన చేతియస్స లబ్భతి.

‘‘భిక్ఖూనఞ్చ తుయ్హఞ్చ చేతియస్స చా’’తి వుత్తేపి చేతియస్సేవ విసుం లబ్భతి, న పుగ్గలస్స. భిక్ఖునిసఙ్ఘం ఆదిం కత్వాపి ఏవమేవ యోజేతబ్బం.

పుబ్బే బుద్ధప్పముఖస్స ఉభతోసఙ్ఘస్స దానం దేన్తి, భగవా మజ్ఝే నిసీదతి, దక్ఖిణతో భిక్ఖూ, వామతో భిక్ఖునియో నిసీదన్తి, భగవా ఉభిన్నం సఙ్ఘత్థేరో, తదా భగవా అత్తనో లద్ధపచ్చయే అత్తనాపి పరిభుఞ్జతి, భిక్ఖూనమ్పి దాపేతి. ఏతరహి పన పణ్డితమనుస్సా సధాతుకం పటిమం వా చేతియం వా ఠపేత్వా బుద్ధప్పముఖస్స ఉభతోసఙ్ఘస్స దానం దేన్తి, పటిమాయ వా చేతియస్స వా పురతో ఆధారకే పత్తం ఠపేత్వా దక్ఖిణోదకం దత్వా ‘‘బుద్ధానం దేమా’’తి తత్థ యం పఠమం ఖాదనీయం భోజనీయం దేన్తి, విహారం వా ఆహరిత్వా ‘‘ఇదం చేతియస్స దేమా’’తి పిణ్డపాతఞ్చ మాలాగన్ధాదీని చ దేన్తి, తత్థ కథం పటిపజ్జితబ్బన్తి? మాలాగన్ధాదీని తావ చేతియే ఆరోపేతబ్బాని, వత్థేహి పటాకా, తేలేన పదీపా కాతబ్బా. పిణ్డపాతమధుఫాణితాదీని పన యో నిబద్ధం చేతియస్స జగ్గకో హోతి పబ్బజితో వా గహట్ఠో వా, తస్స దాతబ్బాని. నిబద్ధజగ్గకే అసతి ఆహటపత్తం ఠపేత్వా వత్తం కత్వా పరిభుఞ్జితుం వట్టతి. ఉపకట్ఠే కాలే భుఞ్జిత్వా పచ్ఛాపి వత్తం కాతుం వట్టతియేవ.

మాలాగన్ధాదీసు చ యం కిఞ్చి ‘‘ఇదం హరిత్వా చేతియస్స పూజం కరోథా’’తి వుత్తే దూరమ్పి హరిత్వా పూజేతబ్బం. ‘‘భిక్ఖం సఙ్ఘస్స హరా’’తి వుత్తేపి హరితబ్బం. సచే పన ‘‘అహం పిణ్డాయ చరామి, ఆసనసాలాయ భిక్ఖూ అత్థి, తే హరిస్సన్తీ’’తి వుత్తే ‘‘భన్తే, తుయ్హంయేవ దమ్మీ’’తి వదతి, భుఞ్జితుం వట్టతి. అథ పన ‘‘భిక్ఖుసఙ్ఘస్స దస్సామీ’’తి హరన్తస్స గచ్ఛతో అన్తరావ కాలో ఉపకట్ఠో హోతి, అత్తనో పాపేత్వా భుఞ్జితుం వట్టతి.

౨౭౩౩. యం పన చీవరం ‘‘యస్మిం ఆవాసే వస్సంవుత్థస్స సఙ్ఘస్స దమ్మీ’’తి దేతి, తస్మింయేవ ఆవాసే వుత్థవస్సేన సఙ్ఘేన వా గణేన వా పుగ్గలేన వా తం చీవరం భాజేతబ్బన్తి వణ్ణితం దేసితన్తి యోజనా.

తత్రాయం వినిచ్ఛయో – విహారం పవిసిత్వా ‘‘ఇమాని చీవరాని వస్సంవుత్థసఙ్ఘస్స దమ్మీ’’తి దేతి, యావతికా భిక్ఖూ తస్మిం ఆవాసే వస్సంవుత్థా, యత్తకా వస్సచ్ఛేదం అకత్వా పురిమవస్సంవుత్థా, తేహి భాజేతబ్బం, అఞ్ఞేసం న పాపుణాతి. దిసాపక్కన్తస్సాపి సతి గాహకే యావ కథినస్స ఉబ్భారా దాతబ్బం. అనత్థతే పన కథినే అన్తోహేమన్తే ఏవఞ్చ వత్వా దిన్నం పచ్ఛిమవస్సంవుత్థానమ్పి పాపుణాతీతి లక్ఖణఞ్ఞూ వదన్తి. అట్ఠకథాసు పనేతం అవిచారితం.

సచే పన బహి ఉపచారసీమాయం ఠితో ‘‘వస్సంవుత్థసఙ్ఘస్స దమ్మీ’’తి వదతి, సమ్పత్తానం సబ్బేసం పాపుణాతి. అథ ‘‘అసుకవిహారే వస్సంవుత్థసఙ్ఘస్సా’’తి వదతి, తత్ర వస్సంవుత్థానమేవ యావ కథినస్సుబ్భారా పాపుణాతి. సచే పన గిమ్హానం పఠమదివసతో పట్ఠాయ ఏవం వదతి, తత్ర సమ్ముఖీభూతానంయేవ సబ్బేసం పాపుణాతి. కస్మా? పిట్ఠిసమయే ఉప్పన్నత్తా. అన్తోవస్సేయేవ ‘‘వస్సం వసన్తానం దమ్మీ’’తి వుత్తే ఛిన్నవస్సా న లభన్తి, వస్సం వసన్తావ లభన్తి. చీవరమాసే పన ‘‘వస్సం వసన్తానం దమ్మీ’’తి వుత్తే పచ్ఛిమికాయ వస్సూపగతానంయేవ పాపుణాతి, పురిమికాయ వస్సూపగతానఞ్చ ఛిన్నవస్సానఞ్చ న పాపుణాతి.

చీవరమాసతో పట్ఠాయ యావ హేమన్తస్స పచ్ఛిమో దివసో, తావ ‘‘వస్సావాసికం దేమా’’తి వుత్తే కథినం అత్థతం వా హోతు అనత్థతం వా, అతీతవస్సంవుత్థానమేవ పాపుణాతి. గిమ్హానం పఠమదివసతో పట్ఠాయ వుత్తే పన మాతికా ఆరోపేతబ్బా ‘‘అతీతవస్సావాసస్స పఞ్చ మాసా అభిక్కన్తా, అనాగతే చాతుమాసచ్చయేన భవిస్సతి, కతరవస్సావాసస్స దేసీ’’తి. సచే ‘‘అతీతవస్సంవుత్థానం దమ్మీ’’తి వదతి, తం అన్తోవస్సం వుత్థానమేవ పాపుణాతి. దిసాపక్కన్తానమ్పి సభాగా గణ్హితుం లభన్తి.

సచే ‘‘అనాగతే వస్సావాసికం దమ్మీ’’తి వదతి, తం ఠపేత్వా వస్సూపనాయికదివసే గహేతబ్బం. అథ ‘‘అగుత్తో విహారో, చోరభయం అత్థి, న సక్కా ఠపేతుం, గణ్హిత్వా వా ఆహిణ్డితు’’న్తి వుత్తే ‘‘సమ్పత్తానం దమ్మీ’’తి వదతి, భాజేత్వా గహేతబ్బం. సచే వదతి ‘‘ఇతో మే, భన్తే, తతియే వస్సే వస్సావాసికం న దిన్నం, తం దమ్మీ’’తి, తస్మిం అన్తోవస్సే వుత్థభిక్ఖూనం పాపుణాతి. సచే తే దిసాపక్కన్తా, అఞ్ఞో విస్సాసికో గణ్హాతి, దాతబ్బం. అథ ఏకోయేవ అవసిట్ఠో, సేసా కాలకతా, సబ్బం ఏకస్సేవ పాపుణాతి. సచే ఏకోపి నత్థి, సఙ్ఘికం హోతి, సమ్ముఖీభూతేహి భాజేతబ్బన్తి.

౨౭౩౪. యాగుయా పన పీతాయ వా భత్తే వా భుత్తే సచే పన ఆదిస్స ‘‘యేన మే యాగు పీతా, తస్స దమ్మి, యేన మే భత్తం భుత్తం, తస్స దమ్మీ’’తి పరిచ్ఛిన్దిత్వా చీవరం దేతి, వినయధరేన తత్థ తత్థేవ దానం దాతబ్బన్తి యోజనా. ఏస నయో ఖాదనీయచీవరసేనాసనభేసజ్జాదీసు.

తత్రాయం వినిచ్ఛయో – భిక్ఖూ అజ్జతనాయ వా స్వాతనాయ వా యాగుయా నిమన్తేత్వా తేసం ఘరం పవిట్ఠానం యాగుం దేతి, యాగుం దత్వా పీతాయ యాగుయా ‘‘ఇమాని చీవరాని యేహి మయ్హం యాగు పీతా, తేసం దమ్మీ’’తి దేతి, యేహి నిమన్తితేహి యాగు పీతా, తేసంయేవ పాపుణన్తి, యేహి పన భిక్ఖాచారవత్తేన ఘరద్వారేన గచ్ఛన్తేహి వా ఘరం పవిట్ఠేహి వా యాగు లద్ధా, యేసం వా ఆసనసాలతో పత్తం ఆహరిత్వా మనుస్సేహి నీతా, యే వా థేరేహి పేసితా, తేసం న పాపుణన్తి.

సచే పన నిమన్తితభిక్ఖూహి సద్ధిం అఞ్ఞేపి బహూ ఆగన్త్వా అన్తోగేహఞ్చ బహిగేహఞ్చ పూరేత్వా నిసిన్నా, దాయకో చ ఏవం వదతి ‘‘నిమన్తితా వా హోన్తు అనిమన్తితా వా, యేసం మయా యాగు దిన్నా, సబ్బేసం ఇమాని వత్థాని హోన్తూ’’తి, సబ్బేసం పాపుణన్తి. యేహి పన థేరానం హత్థతో యాగు లద్ధా, తేసం న పాపుణన్తి. అథ సో ‘‘యేహి మయ్హం యాగు పీతా, సబ్బేసం హోన్తూ’’తి వదతి, సబ్బేసం పాపుణన్తి. భత్తఖాదనీయేసుపి ఏసేవ నయో.

చీవరే వాతి పుబ్బేపి యేన వస్సం వాసేత్వా భిక్ఖూనం చీవరం దిన్నపుబ్బం హోతి, సో చే భిక్ఖూ భోజేత్వా వదతి ‘‘యేసం మయా పుబ్బే చీవరం దిన్నం, తేసంయేవ ఇమం చీవరం వా సుత్తం వా సప్పిమధుఫాణితాదీని వా హోన్తూ’’తి, సబ్బం తేసంయేవ పాపుణాతి.

సేనాసనే వాతి ‘‘యో మయా కారితే విహారే వా పరివేణే వా వసతి, తస్సిదం హోతూ’’తి వుత్తే తస్సేవ హోతి.

భేసజ్జే వాతి ‘‘మయం కాలేన కాలం థేరానం సప్పిఆదీని భేసజ్జాని దేమ, యేహి తాని లద్ధాని, తేసంయేవిదం హోతూ’’తి వుత్తే తేసంయేవ హోతీతి.

౨౭౩౫. దీయతేతి దానన్తి కమ్మసాధనేన చీవరం వుచ్చతి. యం-సద్దేన చీవరస్స పరామట్ఠత్తా తం-సద్దేనాపి తదేవ పరామసితబ్బన్తి.

తత్రాయం వినిచ్ఛయో – ‘‘ఇమం చీవరం ఇత్థన్నామస్స దమ్మీ’’తి ఏవం పరమ్ముఖా వా ‘‘ఇదం మే, భన్తే, తుమ్హాకం దమ్మీ’’తి ఏవం సమ్ముఖా వా పాదమూలే ఠపేత్వా వా దేతి, తం తస్సేవ హోతి. సచే పన ‘‘ఇదం తుమ్హాకఞ్చ తుమ్హాకం అన్తేవాసికానఞ్చ దమ్మీ’’తి ఏవం వదతి, థేరస్స చ అన్తేవాసికానఞ్చ పాపుణాతి. ఉద్దేసం గహేతుం ఆగతో గహేత్వా గచ్ఛన్తో చ అత్థి, తస్సాపి పాపుణాతి. ‘‘తుమ్హేహి సద్ధిం నిబద్ధచారికభిక్ఖూనం దమ్మీ’’తి వుత్తే ఉద్దేసన్తేవాసికానం వత్తం కత్వా ఉద్దేసపరిపుచ్ఛాదీని గహేత్వా విచరన్తానం సబ్బేసం పాపుణాతీతి.

౨౭౩౭. వదతిచ్చేవమేవ చేతి ఇచ్చేవం యథావుత్తనయేన వదతి చే. తన్తి తం పరిక్ఖారం. తేసన్తి మాతుఆదీనం. సఙ్ఘస్సేవ సన్తకం హోతీతి యోజనా.

౨౭౩౮. ‘‘పఞ్చన్నం…పే… హోతీ’’తి ఇమినా పురిమగాథాద్వయేన విత్థారితమేవత్థం సంఖిపిత్వా దస్సేతి. పఞ్చన్నం సహధమ్మికానం. అచ్చయేతి కాలకిరియాయ. దానన్తి ‘‘మయి కాలకతే ఇమం పరిక్ఖారం తుయ్హం హోతు, తవ సన్తకం కరోహీ’’తిఆదినా పరిచ్చజనం. కిఞ్చిపీతి అన్తమసో దన్తకట్ఠమ్పి. గిహీనం పన దానం తథా దాయకానం గిహీనమేవ అచ్చయే రూహతీతి యోజనా.

౨౭౩౯. భిక్ఖు వా సామణేరో వా భిక్ఖునిఉపస్సయే కాలం కరోతి, అస్స భిక్ఖుస్స వా సామణేరస్స వా పరిక్ఖారా భిక్ఖూనంయేవ సన్తకా భిక్ఖుసఙ్ఘస్సేవ సన్తకాతి యోజనా. భిక్ఖుసఙ్ఘస్సేవ సన్తకా కాలకతస్స భిక్ఖుసఙ్ఘపరియాపన్నత్తా.

౨౭౪౦. సామణేరీ వాతి ఏత్థ వా-సద్దేన ‘‘సిక్ఖమానా వా’’తి ఇదం సఙ్గణ్హాతి. విహారస్మిం భిక్ఖూనం నివాసనట్ఠానే. తస్సాతి భిక్ఖునియా వా సామణేరియా వా సిక్ఖమానాయ వా పరిక్ఖారా భిక్ఖునీనం సన్తకా హోన్తీతి యోజనా. సన్తకాతి ఏత్థాపి భిక్ఖూసు వుత్తనయేనేవత్థో గహేతబ్బో.

౨౭౪౧. దేహి నేత్వాతి ఏత్థ ‘‘ఇమం చీవర’’న్తి పకరణతో లబ్భతి. ‘‘ఇమం చీవరం నేత్వా అసుకస్స దేహీ’’తి యం చీవరం దిన్నం, తం తస్స పురిమస్సేవ సన్తకం హోతి. ‘‘ఇదం చీవరం అసుకస్స దమ్మీ’’తి యం చీవరం దిన్నం, తం యస్స పహియ్యతి, తస్స పచ్ఛిమస్సేవ సన్తకం హోతీతి యోజనా.

౨౭౪౨. యథావుత్తవచనప్పకారానురూపేన సామికే ఞత్వా సామికేసు విస్సాసేన వా తేసు మతేసు మతకచీవరమ్పి గణ్హితుం వట్టతీతి దస్సేతుం ఆహ ‘‘ఏవ’’న్తిఆది. ‘‘మతస్స వా అమతస్స వా’’తి పదచ్ఛేదో. విస్సాసం వాపి గణ్హేయ్యాతి జీవన్తస్స సన్తకం విస్సాసగ్గాహం గణ్హేయ్య. గణ్హే మతకచీవరన్తి మతస్స చీవరం మతకపరిక్ఖారనీహారేన పాపేత్వా గణ్హేయ్య.

౨౭౪౩. రజతే అనేనాతి రజనన్తి మూలాదిసబ్బమాహ. వన్తదోసేనాతి సవాసనసముచ్ఛిన్నరాగాదిదోసేన. తాదినాతి రూపాదీసు ఛళారమ్మణేసు రాగాదీనం అనుప్పత్తియా అట్ఠసు లోకధమ్మేసు నిబ్బికారతాయ ఏకసదిసేన.

౨౭౪౪-౫. ‘‘మూలే’’తిఆదీసు నిద్ధారణే భుమ్మం. మూలరజనే హలిద్దిం ఠపేత్వా సబ్బం మూలరజనం వట్టతి. ఖన్ధేసు రజనేసు మఞ్జేట్ఠఞ్చ తుఙ్గహారకఞ్చ ఠపేత్వా సబ్బం ఖన్ధరజనం వట్టతి. పత్తేసు రజనేసు అల్లియా పత్తం తథా నీలియా పత్తఞ్చ ఠపేత్వా సబ్బం పత్తరజనం వట్టతి. పుప్ఫరజనేసు కుసుమ్భఞ్చ కింసుకఞ్చ ఠపేత్వా సబ్బం పుప్ఫరజనం వట్టతి. తచరజనే లోద్దఞ్చ కణ్డులఞ్చ ఠపేత్వా సబ్బం తచరజనం వట్టతి. ఫలరజనం సబ్బమ్పి వట్టతీతి యోజనా.

మఞ్జేట్ఠన్తి ఏకో సకణ్టకరుక్ఖో, వల్లివిసేసో చ, యస్స రజనం మఞ్జేట్ఠబీజవణ్ణం హోతి. మఞ్జేట్ఠరుక్ఖస్స ఖన్ధో సేతవణ్ణోతి సో ఇధ న గహేతబ్బో రజనాధికారత్తా. తుఙ్గహారకో నామ ఏకో సకణ్టకరుక్ఖో, యస్స రజనం హరితాలవణ్ణం హోతి. అల్లీతి చుల్లతాపిఞ్ఛరుక్ఖో, యస్స పణ్ణరజనం హలిద్దివణ్ణం హోతి. నీలీతి గచ్ఛవిసేసో, యస్స పన రజనం నీలవణ్ణం హోతి. కింసుకం నామ వల్లికింసుకపుప్ఫం, యస్స రజనం లోహితవణ్ణం హోతి.

౨౭౪౬. కిలిట్ఠసాటకన్తి మలీనసాటకం. ధోవితున్తి ఏకవారం ధోవితుం. అల్లియా ధోతం కిర సమ్మదేవ రజనం పటిగ్గణ్హాతి.

౨౭౪౭. చీవరానం కథా సేసాతి భేదకారణప్పకారకథాదికా ఇధ అవుత్తకథా. పఠమే కథినే వుత్తాతి సేసో. విభావినాతి ఖన్ధకభాణకేన.

చీవరక్ఖన్ధకకథావణ్ణనా.

ఇతి వినయత్థసారసన్దీపనియా వినయవినిచ్ఛయవణ్ణనాయ

మహావగ్గవినిచ్ఛయవణ్ణనా నిట్ఠితా.