౧౦. దసమనిస్సగ్గియపాచిత్తియసిక్ఖాపదవణ్ణనా

౭౭౯. దసమే పన ‘‘యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన అఞ్ఞం చేతాపేయ్య, నిస్సగ్గియం పాచిత్తియ’’న్తి ఏవంవిధేన భవితబ్బం, ‘‘పుగ్గలికేన సంయాచికేనా’’తి ఇమినా ఏకాదసమేన భవితబ్బం సియా యథాక్కమేన సమ్భవతో. కామమేవ చేతం అట్ఠుప్పత్తియా అభావతో న వుత్తం, అత్థతో పన గహేతబ్బమేవ. ఏత్థ పన సఙ్ఘగణపుగ్గలానం పవారితట్ఠానే, పుగ్గలస్సేవ ఞాతకట్ఠానే చ అనాపత్తిఛాయా దిస్సతి, ఇదం సబ్బం అమ్హాకం తక్కానుసారవసేనేవ వుత్తన్తి కత్వా న సారతో దట్ఠబ్బం. విచారేత్వా యథా నిచ్చలకారణం దిస్వా యం వా వినయక్కమకోవిదా అనుజానన్తి, తం తదేవ గహేతబ్బం. పోరాణగణ్ఠిపదే పన ‘‘ఆపదాసుపి అఞ్ఞం గరుభణ్డమేవ చేతాపేతబ్బం, ఇతరం న వట్టతి, భిక్ఖుస్స పన వట్టతీ’’తి వుత్తం.

దసమనిస్సగ్గియపాచిత్తియసిక్ఖాపదవణ్ణనా నిట్ఠితా.