౫. పఞ్చమసఙ్ఘాదిసేససిక్ఖాపదవణ్ణనా

౭౦౧. ఏతం న వుత్తన్తి భిక్ఖునియా అవస్సుతభావో దట్ఠబ్బోతి ఏతం నియమనం న వుత్తం. తం అవచనం పాళియా సమేతి. కతరపాళియాతి? ‘‘అనవస్సుతోతి జానన్తీ పటిగ్గణ్హాతీ’’తి ఇమాయ. యది హి పుగ్గలస్స అవస్సుతభావో న పమాణం, కిం ఇమాయ పాళియా పయోజనం, ‘‘అనాపత్తి ఉభో అనవస్సుతా హోన్తి, అనవస్సుతా పటిగ్గణ్హాతీ’’తి ఏత్తకమేవ వత్తబ్బం సియా. అత్తనో హి అనవస్సుతభావోయేవ పమాణన్తి. ఇమస్స పన అనాపత్తివారస్స అయమత్థో – ఉభో చే అనవస్సుతా, సబ్బథాపి అనాపత్తి. అథ భిక్ఖునీ అనవస్సుతా సమానా అవస్సుతమ్పి ‘‘అనవస్సుతో’’తి సఞ్ఞాయ తస్స హత్థతో పటిగ్గణ్హాతి, ఏవమ్పి అనాపత్తీతి. అథ సా అనవస్సుతాపి అఞ్ఞం అనవస్సుతం వా అవస్సుతం వా ‘‘అవస్సుతో’’తి జానాతి, దుక్కటమేవ. వుత్తఞ్హేతం అనన్తరసిక్ఖాపదే ‘‘కిస్స త్వం అయ్యే న పటిగ్గణ్హాసీతి. అవస్సుతో అయ్యేతి…పే… నాహం అవస్సుతా’’తి.

పఞ్చమసఙ్ఘాదిసేససిక్ఖాపదవణ్ణనా నిట్ఠితా.