౧. అపారసుత్తవణ్ణనా

౮౧౩. ఛన్దం నిస్సాయ పవత్తో సమాధీతి కత్తుకమ్యతాఛన్దం అధిపతిం కత్వా పటిలద్ధసమాధి ఛన్ధసమాధి. పధానసఙ్ఖారాతి చతుకిచ్చసాధకస్స సమ్మప్పధానవీరియస్సేతం అధివచనం. తేహీతి ఛన్దసమాధిపధానసఙ్ఖారేహి. ఇద్ధియా పాదన్తి నిప్ఫత్తిపరియాయేన ఇజ్ఝనట్ఠేన, ఇజ్ఝన్తి ఏతాయ సద్ధా ఇద్ధా వుద్ధా ఉక్కంసగతా హోన్తీతి ఇమినా వా పరియాయేన ‘‘ఇద్ధీ’’తి సఙ్ఖాతానం ఉపచారజ్ఝానాదికుసలచిత్తసమ్పయుత్తానం ఛన్దసమాధిపధానసఙ్ఖారానం అధిట్ఠానట్ఠేన పాదభూతం, సేసచిత్తచేతసికరాసిన్తి అత్థో. సా ఏవ చ యథావుత్తఇద్ధి యస్మా హేట్ఠిమా హేట్ఠిమా ఉపరిమాయ ఉపరిమాయ పాదభూతా, తస్మా వుత్తం ‘‘ఇద్ధిభూతం వా పాదన్తి ఇద్ధిపాద’’న్తి. సేసేసూతి వీరియసమాధిఆదీసు. తత్థ హి వీరియం చిత్తం వీమంసం అధిపతిం కత్వా పటిలద్ధసమాధి వీమంసాసమాధీతి అత్థో వేదితబ్బో. ఇధాతి ఇమస్మిం ఇద్ధిపాదసంయుత్తే. ఏకపరిచ్ఛేదోవ అత్థనిద్దేసో.